దీపావళి(Diwali) పండుగ క్యాలెండర్ ప్రకారం ఇవాళే అనే విషయం తెలిసిందే. అయితే, అమావాస్య ఘడియలు రెండు రోజులు ఉండటంతో దీపావళి పండుగ ఎప్పుడు జరుపుకోవాలనే దానిపై గందరగోళం నెలకొంది. ఇవాళ మధ్యాహ్నం రెండు గంటల 44 నిమిషాల నుంచి రేపు మధ్యాహ్నం రెండు గంటల 56 నిమిషాల వరకు అమావాస్య గడియలు ఉన్నాయి.
ఈ ఏడాది దసరా పండుగలాగే దీపావళి పండుగ మహూర్తాలు రెండురోజులు ఉన్నాయి. దీపావళి పండుగ ఆది, సోమవారాల్లో వస్తోంది. దీంతో తెలంగాణలో దీపావళి సెలవు మారుస్తూ ప్రభుత్వం నిర్ణయం తీసుకుంది. తొలుత ఈనెల 12 ఆదివారం రోజు దీపావళి సెలవు ఉండగా, ఉద్యోగ సంఘాల విన్నపం మేరకు ఈనెల 13వ తేదీకి సెలవును మార్చిన సంగతి తెలిసిందే. దీంతో ఆది, సోమ రెండు రోజులు సెలవులు వస్తున్నాయి.
అమావాస్య సాయంత్రానికి ఉన్న రోజునే పరిగణలోకి తీసుకోవాలని పండితులు చెబుతున్నారు. ఈ లెక్కన ఇవాళ దీపావళి పండుగ జరుపుకోవాలని కోరుతున్నారు పండితులు. ఇక రేపు కూడా అమావాస్య గడియలు ఉండటంతో ఆ రోజు… వైదిక క్షతువులు నిర్వహించుకోవచ్చు అని తెలిపారు.
కాగా, దీపావళి పండుగను పురస్కరించుకొని సీఎం కేసీఆర్ తెలంగాణ రాష్ట్ర ప్రజలకు శుభాకాంక్షలు తెలిపారు. చెడుపై మంచి సాధించిన విజయానికి ప్రతీకగా, చీకటిని పారద్రోలే వెలుగుల పండుగగా దీపావళికి హిందూ సంస్కృతిలో విశేషమైన ప్రాశస్త్యమున్నదని సీఎం కేసీఆర్ అన్నారు. జీవానికి సంకేతమైన అగ్ని కొలువైన దీపాల వెలుగులు మనలో అజ్ఞానాంధకారాన్ని తొలగించాలని కోరారు.
