తిరుపతి (Tirupati) జూపార్క్‌ (Zoo Park)లో తీవ్ర విషాదం చోటుచేసుకుంది. నగరంలోని ఎస్వీ (SV) జూపార్క్‌లో ఓ యువకుడిపై సింహం (Lion) క్రూరంగా దాడి చేయగా అతను అక్కడికక్కడే మరణించాడు. సింహం దాడిలో తీవ్రంగా గాయపడిన అతను స్పాట్ లోనే మృతి చెందడం జూ సందర్శనకు వెళ్ళిన వారిని భయాందోళనకు గురిచేసింది. అయితే ఆ యువకుడు సెల్ఫీ కోసం ఇంతటి సాహసానికి పూనుకొన్నట్లు తెలుస్తోంది.
అత్యుత్సాహంతో జూ నిబంధనలు ఉల్లంఘించి ఎన్‌క్లోజర్‌ (Enclosure)లోకి వెళ్లడంతో సింహం అతనిపై దాడి చేసినట్లు సమాచారం. ఇక ఘటన సమాచారం అందుకొన్న సిబ్బంది.. వెంటనే అప్రమత్తమై అందరినీ బయటకు పంపించివేశారు. కొత్తగా వచ్చేవారికి సైతం అనుమతిని నిరాకరించారు. కాగా విషయం తెలుసుకొన్న పోలీసులు ఘటనా స్థలానికి చేరుకొని కేసు నమోదు చేశారు.
మరోవైపు సెల్ఫీ దిగడానికి ముందు సదరు యువకుడు సింహంతో పరాచికాలు ఆడినట్లు తెలుస్తోంది. సింహం ముందు అతడు చేసిన వెకిలి చేష్టలు చివరకు ప్రాణాల మీదకు వచ్చాయని స్థానికులు అంటున్నారు. అయితే దాడికి ముందు సింహం నుంచి తప్పించుకునేందకు ఆ యువకుడు చెట్టు ఎక్కాడని స్పాట్ లో ఉన్న మరికొందరు వెల్లడించినట్లు సమాచారం. అయితే ఆ యువకుని మానసిక స్థితి సరిగా లేదా.. లేక కావాలనే ఇలా ప్రవర్తించాడా అనే వివరాలు తెలియవలసి ఉంది.
