రాజధాని ఢిల్లీ(Delhi)లో సోమవారం అర్ధరాత్రి పోలీసులకు, గ్యాంగ్‌స్టర్ల(Gangsters) మధ్య ఎన్‌కౌంటర్(Encounter) కలకలం రేపింది. ఈ ఎన్‌కౌంటర్‌లో హషీమ్ బాబా ముఠాకు చెందిన ముగ్గురు గ్యాంగ్‌స్టర్లను పోలీసులు అదుపులోకి తీసుకున్నారు.
ఈశాన్య ఢిల్లీలోని అంబేడ్కర్ కాలేజీ, గోకులురి మెట్రోస్టేషన్‌కు సమీపంలో ఈ ఎన్‌కౌంటర్ జరిగింది. పరస్పర కాల్పుల్లో తీవ్రంగా గాయపడిన వారిని చికిత్స నిమిత్తం ఆస్పత్రిలో చేర్చారు. ఈ ఘటనలో ఇద్దరు పోలీసులకు స్వల్ప గాయాలయ్యాయి. వివరాల్లోకి వెళ్తే.. మూడు రోజుల కిందట శీలంపూర్‌లో జరిగిన ఘటనలో అర్బాజ్ మృతిచెందగా మరొకరు గాయాలపాలయ్యారు.
ఈ ఘటనపై కేసు నమోదు చేసిన ఢిల్లీ పోలీసులు గాలింపు చర్యలు చేపట్టారు. నిందితుల జాడపై పోలీసులకు సమాచారం అందింది. ఈ మేరకు పోలీసులు వారిని పట్టుకోవడానికి అక్కడికి వెళ్లారు. దీంతో పోలీసులను చూసిన గ్యాంగ్‌స్టర్స్ వెంటనే కాల్పులు జరపడంతో పోలీసులు ఎదురుకాల్పులు ప్రారంభించారు.
ఈ క్రమంలో హాశిమ్ ముఠాకు చెందిన ముగ్గురు సభ్యుల కాళ్లకు బులెట్ గాయాలయ్యాయి. పోలీసులు వారిని పట్టుకొని ఆస్పత్రికి తరలించారు. గాయాలపాలైన దుండగులను అలీ అలియాస్ ఫహాద్, అల్సెజాన్ అలియాస్ థోథా, ఆసిఫ్ అలియాస్ ఖలీద్‌గా ఢిల్లీ పోలీసులు గుర్తించారు. గ్యాంగ్‌స్టర్లు కోలుకున్నాక విచారణ చేపట్టే అవకాశం ఉంది.
