మహబూబ్నగర్ (Mahabubnagar) స్థానిక సంస్థల ఎమ్మెల్సీ కసిరెడ్డి నారాయణరెడ్డి రాజీనామా చేయడంతో, ఉప ఎన్నిక అనివార్యమైంది. కాగా నేడు ఈ స్థానం భర్తీకి నిర్వహించిన ఎమ్మెల్సీ ఉప ఎన్నిక (MLC by election) ప్రశాంతంగా ముగిసింది. ఎన్నికల్లో 100 శాతం పోలింగ్ నమోదు అయినట్లు ఏఆర్వో తెలిపారు.. కాగా ఉమ్మడి మహబూబ్నగర్ జిల్లావ్యాప్తంగా ప్రజాప్రతినిధులు తమ ఓటు హక్కును వినియోగించుకొన్నారని తెలుస్తోంది.
అదేవిధంగా ఈ ఉప ఎన్నికకు ముగ్గురు అభ్యర్థులు బరిలోకి దిగారు.. వారిలో కాంగ్రెస్ (Congress) తరపున మన్నె జీవన్‌రెడ్డి.. నవీన్‌ కుమార్‌ రెడ్డి, బీఆర్ఎస్ నుంచి.. స్వతంత్ర అభ్యర్థిగా సుదర్శన్‌ గౌడ్ ఉన్నారు.. కాగా ఈ ఎన్నికల్లో ఇద్దరు ఎంపీలు, 14 మంది శాసనసభ్యులు, ముగ్గురు ఎమ్మెల్సీలు, 888 మంది ఎంపీటీసీలు, 83 మంది జడ్పీటీసీలు, 449 మంది కౌన్సిలర్లు కలిపి మొత్తం 1,439 మంది ఓటర్లు, తమ ఓటు హక్కు వినియోగించుకున్నారు.
మరోవైపు సీఎం రేవంత్ రెడ్డి (CM Revanth Reddy) సైతం కొడంగల్ (Kodangal) ఎంపీడీవో (MPDO) కార్యాలయంలో తన ఓటు హక్కును వినియోగించుకొన్నారు. ఇక ఏప్రిల్ 2న ఓట్ల లెక్కింపు జరగనుంది. అదేవిధంగా మొదటి ప్రాధాన్య ఓటు, రెండో ప్రాధాన్య ఓటు, మూడో ప్రాధాన్య ఓటు ఈ ఎన్నికల్లో ఉంటుంది. అయితే మొత్తం పోలైన ఓట్లలో, మొదటి ప్రాధాన్యత ఓట్లను తొలుత లెక్కిస్తారు.
పోలైన ఓట్లలో మొదటి ప్రాధాన్యత ఓట్లు సగం కంటే ఒక్క ఓటు అదనంగా వచ్చినా, ఆ అభ్యర్థి మొదటి రౌండ్‌లో విజయం సాధించినట్లని తెలుస్తోంది. మరోవైపు పోలింగ్ ముగిసిన అనంతరం అన్ని పోలింగ్ కేంద్రాల నుంచి బ్యాలెట్ బాక్స్ లను మహబూబ్నగర్ ప్రభుత్వ బాలుర జూనియర్ కళాశాల స్ట్రాంగ్ రూంలో భద్రపరిచారు. కాగా ఈ ఉప ఎన్నికను అధికార కాంగ్రెస్ (Congress), బీఆర్ఎస్ (BRS) పార్టీలు ప్రతిష్ఠాత్మకంగా తీసుకున్నాయి. అయితే హస్తం గెలిచే అవకాశాలున్నట్లు చర్చించుకొంటున్నారు..
