umakanth rao

URI : హింసతో అట్టుడికిన మణిపూర్ లో మళ్లీ ప్రశాంత పరిస్థితులు నెలకొంటున్నాయా ? శాంతి భద్రతలను పూర్తిగా పునరుద్ధరించారా ? జనం తిరిగి సాధారణ జీవన స్రవంతిలో అడుగుపెట్టారా ? ఈ ప్రశ్నలన్నింటికీ సమాధానం ఒకటే. అదే.. ఓ ఓపెన్ థియేటర్ లో ప్రదర్శించిన హిందీ చిత్రం.. ‘యూరి.. ది సర్జికల్ స్ట్రైక్ ‘ మూవీని చూసేందుకు జనం పోటెత్తడమే. స్వాతంత్య్ర దినోత్సవం సందర్భంగా నిన్న చురా చాంద్ పూర్ జిల్లాలోని ఓ థియేటర్ లో ఈ చిత్రాన్ని ప్రదర్శించారు. విక్కీ కౌశల్ నటించిన ఈ సినిమాను 23 ఏళ్ళ తరువాత మొట్టమొదటిసారిగా తాత్కాలిక ఓపెన్ థియేటర్ లో ప్రదర్శిస్తే.. ఈ ప్రాంగణమంతా జనంతో కిక్కిరిసిపోయింది.

2000 సంవత్సరం సెప్టెంబరులో పీపుల్స్ లిబరేషన్ ఆర్మీకి చెందిన రాజకీయ సంస్థ.. ది రెవల్యూషనరీ పీపుల్స్ ఫ్రంట్ .. రాష్ట్రంలో హిందీ సినిమాలను నిషేధించింది. అయితే ఈ బ్యాన్ ను వ్యతిరేకిస్తూ హమర్ స్టూడెంట్స్ అసోసియేషన్ ఈ సినిమా ప్రదర్శనను నిర్వహించింది. రెండు దశాబ్దాల తరువాత మా టౌన్ లో ఓ హిందీ సినిమాను ప్రదర్శించడం ఇదే మొదటిసారి అని, చాలాకాలం క్రితమే మెయితీలు రాష్ట్రంలో బాలీవుడ్ మూవీల ప్రదర్శనను బ్యాన్ చేశారని ఇండైజినస్ ట్రైబల్ లీడర్స్ ఫోరం అధికార ప్రతినిధి గింజా వోల్జాంగ్ ఓ స్టేట్మెంట్ లో పేర్కొన్నారు.

మెయితీ వర్గాల దేశ వ్యతిరేక విధానాలను ఉల్లంఘించి, ఇండియా పట్ల మాకు గల ప్రేమాభిమానాలను చూపడానికే ఈ చర్య తీసుకున్నామని ఆయన అన్నారు. ఇందుకు హమర్ స్టూడెంట్స్ అసోసియేషన్ కూడా సహకరించిందన్నారు. తమను కుల్కీ తెగలవాణిగా ఈ సంస్థ చెప్పుకుంది. ఈ చిత్ర ప్రదర్శనకు ముందు జాతీయ గీతాన్ని కూడా ఆలపించారు. ఇంఫాల్ కు సుమారు 63 కి.మీ. దూరంలో ఉందీ ప్రాంతం.

మణిపూర్ లో చివరిసారి 1998 లో ‘కుచ్ కుచ్ హోతా హై’ చిత్రాన్ని ప్రదర్శించారు. 2000 సంవత్సరంలో హిందీ సినిమాలపై బ్యాన్ విధించిన తరువాత మెయితీ మిలిటెంట్లు బాలీవుడ్ చిత్రాలకు సంబంధించి ఆరు వేలనుంచి ఎనిమిది వేల వీడియో, ఆడియో కేసెట్లను, కాంపాక్ట్ డిస్కులను కాల్చివేశారు.

మన సమైక్యతే మనకు బలమని, సమైక్యంగా లేకపోతే కొన్ని శక్తులు ఈ దేశాన్ని బలహీనపరచేందుకు యత్నిస్తాయని ఆర్ఎస్ఎస్ చీఫ్ మోహన్ భగవత్ అన్నారు. మొత్తం ప్రపంచానికే ఇండియా కాంతినివ్వాలని ఆయన పిలుపునిచ్చారు. స్వాతంత్య్ర దినోత్సవం సందర్భంగా మంగళవారం బెంగళూరు లో జాతీయ జెండాను ఆవిష్కరించిన అనంతరం ప్రసంగించిన ఆయన.. ప్రపంచానికి కాంతిని ఇచ్చేందుకే ఇండియా ఇండిపెండెన్స్ సాధించిందని చెప్పారు.

మన జాతీయ జెండాను స్ఫూర్తిగా తీసుకోవాలని ఆయన సూచించారు. ఈ జెండాలోని కాషాయ రంగు త్యాగాన్ని సూచిస్తే.. తెలుపు రంగు నిస్వార్థాన్ని, ఆకుపచ్చ రంగు సంపదను సూచిస్తుందని ఆయన వివరించారు. భారత్ తన శక్తి సామర్థ్యాలను పెంచుకోవాలని కూడా చెప్పిన ఆయన.. తన సాంస్కృతిక సామర్థ్యం ద్వారా ఈ దేశం ఇతర దేశాలకు మార్గదర్శకం కావాలన్నారు.

మన జాతీయపతాకం ఇస్తున్న స్ఫూర్తితో ఈ సందేశం ఆధారంగా ప్రపంచాన్ని మనం లీడ్ చేయవలసిన అవసరం ఉందని మోహన్ భగవత్ పేర్కొన్నారు. నాలెడ్జ్,యాక్షన్, డివోషన్, ప్యూరిటీ, ప్రాస్పెరిటీ అన్నవి ముఖ్యమని, వీటి ప్రాతిపదిక పైనే వాల్డ్ కి మనం మంచిసందేశాన్ని ఇవ్వవచ్చునని ఆయన చెప్పారు.

భారత్ అంటే భా అన్నది కాంతికి సూచిక అని, సూర్యారాధన మేలు చేస్తుందని అన్నారు. ఈ సందర్భంగా తమసోమా జ్యోతిర్గమయా అన్న సందేశాన్ని ఆయన ప్రస్తావించారు.

Malikharjun Kharge : దేశ 77 వ స్వాతంత్య్ర దినోత్సవం సందర్భంగా ప్రధాని మోడీ (Modi) ఎర్ర కోటపై దేశ ప్రజలనుద్దేశించి చేసిన ప్రసంగ కార్యక్రమానికి కాంగ్రెస్ (Congress) చీఫ్ మల్లిఖార్జున్ ఖర్గే (Mallikharjun Kharge) హాజరు కాలేదు. ఆయనకు ఉద్దేశించిన ఎర్ర రంగు కుర్చీ ఖాళీగా కనిపించింది. భద్రతా కారణాల దృష్ట్యా ఖర్గే ఈ కార్యక్రమానికి హాజరు కాలేదని పార్టీ వర్గాలు తెలిపాయి. రెడ్ ఫోర్ట్ వేడుకకు ఖర్గే హాజరయి ఉంటే తన నివాసంలోను, పార్టీ ప్రధాన కార్యాలయం లోను జరిగిన పతాకావిష్కరణ కార్యక్రమాన్ని ఆయన మిస్ అయి ఉండేవారని ఈ వర్గాలు పేర్కొన్నాయి.

పైగా సెక్యూరిటీ పరమైన కారణాలు కూడా ఉన్నాయని, తన ఇంటి నుంచి రెడ్ ఫోర్ట్ వరకు వెళ్లాలంటే ఖర్గేకి రెండు గంటలు పడుతుందని, ముందుగానే ఆయన తన ఇంటినుంచి బయల్దేరలేకపోయారని వివరించాయి. తమ పార్టీ అధ్యక్షుడు ఇతర కార్యక్రమాల్లో బిజీగా ఉన్నారని కాంగ్రెస్ నేత రాజీవ్ శుక్లా తెలిపారు. మంత్రులతో సహా అనేకమంది ఎర్రకోటను సకాలంలో చేరలేకపోయారని ఆయన చెప్పారు. తమ నేత మోడీ ప్రసంగ కార్యక్రమానికి గైర్ హాజరయినందుకు బీజేపీ బహుశా అసంతృప్తికి గురై ఉంటుందని కాంగ్రెస్ కే చెందిన మరో నాయకుడు పవన్ ఖేరా సెటైర్ వేశారు.

స్వాతంత్య్ర దినోత్సవం నాడు మా పార్టీ కార్యాలయంలో జాతీయ జెండా ఎగురవేసే ‘స్వాతంత్య్రం’ మాకు లేదా అన్నారు. కాగా గత కొన్నేళ్ల లోనే ఈ దేశం అభివృద్ధి చెందినట్టుగా కొందరు మాట్లాడుతున్నారని ఖర్గే.. మోడీని ఉద్దేశించి పరోక్షంగా విమర్శిస్తూ ఓ వీడియో మెసేజ్ ని విడుదల చేశారు.

జవహర్లాల్ నెహ్రూ, ఇందిరా గాంధీ, లాల్ బహదూర్ శాస్త్రి, పీవీ. నరసింహారావు, రాజీవ్ గాంధీ, మన్మోహన్ సింగ్ వంటి మాజీ ప్రధానులు ఈ దేశానికి చేసిన సేవలను ఆయన ప్రస్తావించారు. బీజేపీ నేత, దివంగత మాజీ ప్రధాని అటల్ బిహారీ వాజ్ పేయి పేరును కూడా ఆయన గుర్తు చేశారు. ప్రతి ప్రధాన మంత్రీ ఈ దేశ అభివృద్ధికి తమవంతు సేవలు అందించారన్నారు. ప్రస్తుతం ప్రజాస్వామ్యం, రాజ్యాంగం రెండూ ప్రమాదకర పరిస్థితుల్లో ఉన్నాయని, సిబిఐ, ఈడీ వంటి దర్యాప్తు సంస్ధల ద్వారా విపక్షనేతలను వేధిస్తూ వారి నోళ్లను మూయిస్తున్నారని ఖర్గే ఆరోపించారు.

Rajasthani Turban : దేశ 77 వ స్వాతంత్య్ర దినోత్సవం సందర్భంగా ప్రధాని మోడీ (Modi) ధరించిన రాజస్థానీ (Rajasthani) స్టయిల్ తలపాగా (Turban) విశేషంగా ఆకర్షించింది. ఎప్పుడు ఇండిపెండెన్స్ డే సెలబ్రేషన్స్ లో వచ్చినా ఆయన స్పెషల్ డ్రెస్సులు, రంగుల తలపాగాలు ధరించి ప్రత్యేకంగా కనిపిస్తారు. ఈ సారి కూడా ఆఫ్ వైట్ కుర్తా, వైట్ ప్యాంట్స్, ధరించారు . 2014 నుంచి 2022 వరకు కూడా ఇండిపెండెన్స్ డే సందర్భాల్లో జాతీయ జెండా రంగులను పోలిన తలపాగాలు ధరించి మోడీ ఆకర్షించారు. 2021 లో ఎర్ర చారలతో కూడిన కాషాయ రంగు టర్బన్ ధరిస్తే 2022 లో కాషాయ రంగుతో బాటు క్రీమ్ కలర్ తలపాగా ధరించారు.

ఎప్పటిమాదిరే మంగళవారం ఎర్రకోటపై నుంచి ప్రసంగించిన ఆయన ఈ తొమ్మిదేళ్లలో తమ ప్రభుత్వం సాధించిన విజయాలను ప్రస్తావించారు. ముఖ్యంగా మణిపూర్ అంశాన్ని ప్రత్యేకంగా పేర్కొన్నారు. మణిపూర్ ప్రజల్లో భరోసా కల్పించేందుకు మోడీ ఈ సందర్భాన్ని ఎంచుకున్నారు. 2024 లో లోక్ సభ ఎన్నికలకు వెళ్లేముందు ఆయన చేసిన ఇండిపెండెన్స్ డే ప్రసంగం ఇదే చివరిది. ఇక తన ప్రసంగంలో ఆయన దేశ ప్రజలపై వరాల జల్లు కురిపించారు.

పట్టణ ప్రాంతాల్లో దిగువ, మధ్యతరగతి ప్రజల సొంత ఇంటి కలలను నెరేవేర్చేందుకు కొత్త పథకాన్ని ప్రకటిస్తామని, బ్యాంకు రుణాలపై రాయితీ ఇచ్చేలా ఈ స్కీం ఉంటుందన్నారు. చౌక ధరల్లో లభించే జనరిక్ మందులు అందరికీ అందుబాటులో ఉండేట్టు జన ఔషధీ కేంద్రాల సంఖ్యను 10 వేల నుంచి 25 వేలకు పెంచుతామని, మార్కెట్ లో వంద రూపాయలకు లభించే మందులు ఈ కేంద్రాల్లో10 నుంచి 15 రూపాయలకే లభిస్తాయన్నారు.

తన ప్రసంగంలో ఆయన విపక్షాలను పరోక్షంగా విమర్శించారు. అవినీతి, వారసత్వ రాజకీయాలు కుటుంబ ప్రజాస్వామ్యానికి విఘాతంగా మారాయని, కుటుంబం చేత, కుటుంబం కోసం, కుటుంబానికే మేలు అన్నట్టుగా ఇవి తయారయ్యాయని, లోగడ ఇవి దేశానికి తీరని నష్టాన్ని మిగిల్చాయని అన్నారు. అవినీతికి వ్యతిరేకంగా యుద్ధం చేయాల్సి ఉందన్నారు. గత అయిదేళ్ల కాలంలో 13.5 కోట్ల మంది ప్రజలను పేదరికం నుంచి బయటకు తీసుకువచ్చినందుకు ఆనందంగా ఉందని మోడీ చెప్పారు.

Modi : దేశంలో వరుస బాంబు పేలుళ్ల శకం ముగిసిందని ప్రధాని మోడీ (Modi) అన్నారు. ఇప్పుడు దేశం సుస్థిర ప్రభుత్వంతో ముందుకు సాగుతోందని, ప్రభుత్వం చేబట్టిన సంస్కరణలు మంచి ఫలితాలనిస్తున్నాయని చెప్పారు. ప్రజలు సుస్థిర ప్రభుత్వాన్ని కోరుకుంటున్నారు. వారు ఆశించిన ఫలాలను అందిస్తున్నాం.. అన్నారు. దేశ 77 వ స్వాతంత్య్ర దినోత్సవం సందర్భంగా మంగళవారం ఢిల్లీ ఎర్రకోటపై జాతీయ జెండాను ఆవిష్కరించిన అనంతరం ఆయన దేశ ప్రజలనుద్దేశించి ప్రసంగించారు. ప్రపంచ దేశాలన్నీ భారత్ వైపు చూస్తున్నాయని, ఐదేళ్లలో ఇండియా బలమైన ఆర్ధిక వ్యవస్థలున్న దేశాల్లో మూడో స్థానాన్ని ఆక్రమిస్తుందని ఆయన అన్నారు.

2014 లో తాము అధికారంలోకి వచ్చినప్పుడు దేశం పదో స్థానంలో ఉందని కానీ ఇప్పుడు ఐదో స్థానంలో నిలిచామని చెప్పారు. 140 కోట్లమంది భారత ప్రజలు తమ ప్రభుత్వంపై ప్రగాఢ విశ్వాసం ఉంచిన ఫలితమే ఇదన్నారు. అవినీతి కబంధ హస్తాల నుంచి ఈ దేశానికి విముక్తి కల్పించామని, లీకేజీలకు అడ్డుకట్ట వేసి పటిష్టమైన ఎకానమీకి బాటలు పరిచామని మోడీ పేర్కొన్నారు. ‘రీఫామ్, పర్ఫామ్, ట్రాన్స్ ఫామ్’ అన్న మూడు సూత్రాలు దేశ స్థితిగతులను మార్చివేశాయని చెప్పారు. భారత దేశ సత్తాను ప్రపంచ దేశాలు గుర్తించాయని, నేడు జీ 20 కూటమికి ఇండియా అధ్యక్షత వహించే అవకాశం లభించిందని చెప్పిన ఆయన.. దేశంలోని ప్రతి మారుమూల రాష్ట్రంలోనూ జీ 20 ఈవెంట్ల నిర్వహణను ప్రపంచం చూస్తోందన్నారు.

ఇండియాలో యువశక్తికి అపార అవకాశాలున్నాయని పేర్కొన్న మోడీ.. ట్రినిటీ ఆఫ్ డెమోగ్రాఫీ, డెమాక్రసీ, డైవర్సిటీ అన్న పదాలను ప్రస్తావిస్తూ దేశ ప్రజల కలలను సాకారం చేసేందుకు తమ ప్రభుత్వం అన్ని చర్యలు తీసుకుంటుందన్నారు.

మణిపూర్ కు అండగా ఉంటాం

ఈ దేశ ప్రజలు మణిపూర్ కు అండగా ఉంటారని, ఆ రాష్ట్రంలో శాంతి నెలకొనేలా చూసేందుకు అన్ని ప్రయత్నాలు చేస్తున్నామని మోడీ చెప్పారు. మణిపూర్ సమస్యకు పరిష్కారం కనుగొనేందుకు కేంద్రం, ఆ రాష్ట్రం కూడా కృషి చేస్తున్నట్టు ఆయన తెలిపారు. ద్రవ్యోల్బణాన్ని అదుపు చేసేందుకు తమ సర్కార్ తీసుకుంటున్న చర్యలు సత్ఫలితాలనిస్తున్నాయన్నారు. సాంప్రదాయక నైపుణ్యం గలవారి కోసం మా ప్రభుత్వం వచ్చే నెలలో ‘విశ్వకర్మ’ పథకాన్ని చేబడుతుందని ప్రకటించిన ఆయన., ఇందుకు 13 వేల కోట్ల నుంచి 15 వేల కోట్లను కేటాయిస్తామని వెల్లడించారు.

కరోనా భూతం ప్రపంచాన్ని వదలలేదు

కరోనా మహమ్మారినుంచి ప్రపంచం ఇంకా కోలుకోలేదని మోడీ పేర్కొన్నారు. కానీ ఇండియా ఈ బెడదను అధిగమించిందన్నారు. కోవిడ్ పాండమిక్ సమయంలో తాము 200 కోట్ల వ్యాక్సినేషన్లను ఇప్పించామన్నారు. సైన్స్, టెక్నాలజీలో మనం దూసుకుపోతున్నామని, మా ప్రభుత్వం తీసుకున్న వివిధ చర్యలు, చేబట్టిన పథకాలు వచ్చే వెయ్యేళ్ళ వరకు మంచి ప్రభావాన్ని చూపుతాయని అన్నారు.

పునరుత్పాదక శక్తికి సంబంధించి మన లక్ష్యాలను చేరుకోగలిగామని మోడీ చెప్పారు. 2047 నాటికి భారత్ అభివృద్ధి చెందిన దేశంగా మారుతుందని తాను గట్టిగా విశ్వసిస్తున్నానని పేర్కొన్నారు. మొదట రాజ్ ఘాట్ లో మహాత్మా గాంధీకి నివాళులర్పించిన మోడీ త్రివిధ దళాల గౌరవ వందనం స్వీకరించారు. రాజస్థానీ స్టయిల్ తలపాగా ధరించిన మోడీ అశోక్ చక్ర చిహ్నంతో కూడిన బ్లాక్ నెహ్రూ జాకెట్
ను ధరించారు.

EC : ఎన్నికల కమిషన్ ని పునర్వ్యవస్థీకరించేందుకు చీఫ్ ఎలెక్షన్ ఆఫీసర్, ఎలెక్షన్ కమిషనర్ల నియామకాల విషయంలో కేంద్రం తెచ్చిన బిల్లులో మరో ముఖ్యమైన అంశాన్ని చేర్చారు. సెర్చ్ కమిటీ సూచించిన పేర్లు కాకుండా ప్రధాని మోడీ (Modi) సారథ్యం లోని నియామక ప్యానెల్ .. బయటి వ్యక్తులను కూడా పరిగణనలోకి తీసుకోవచ్చునని ఈ తాజా బిల్లులో కేంద్రం స్పష్టం చేసింది, ప్రతిపాదిత లా లోని సెక్షన్ 8 (2) కింద సెలక్షన్ కమిటీ … సెర్చ్ కమిటీ చేర్చిన పేర్లను కాక బయటి వ్యక్తుల పేర్లను కూడా పరిశీలించవచ్చు.

అంటే కేబినెట్ కార్యదర్శి నేతృత్వం లోని సెర్చ్ కమిటీ వడపోత పోయని వారి పేర్లను కూడా ప్రధాని సారథ్యంలోని ప్యానెల్ పరిశీలించవచ్చునని ఈ కొత్త బిల్లు నిర్దేశిస్తోంది. ఎన్నికల ప్రధాన అధికారి, ఎలెక్షన్ కమిషనర్ల నియామకాల విషయంలో ఈ ప్యానెల్ కి అధికారాలు ఉంటయి. సీఈసీ, ఇతర ఎలెక్షన్ కమిషనర్ల నియామకాలు సర్వీసు కండిషన్లు, టర్మ్ ఆఫీస్ బిల్లు పేరిట దీన్ని ప్రతిపాదించారు.

కేబినెట్ కార్యదర్శి నేతృత్వంలోని సెర్చ్ కమిటీ .. వీరి నియామకాలకు సంబంధించి సెలెక్షన్ కమిటీ పరిశీలన నిమిత్తం అయిదుగురు వ్యక్తులతో ప్యానెల్ ని ఏర్పాటు చేయవలసి ఉంటుంది. బిల్లు లోని సెక్షన్ 7 (1) ప్రకారం ఈసీలో నియామకాలకు మోడీ నేతృత్వంలోని ప్యానెల్ చేసే సిఫారసు మేరకు రాష్ట్రపతి ద్రౌపది ముర్ము ఆమోద ముద్ర వేస్తారు.

ఈ బిల్లును గతవారం కేంద్ర న్యాయశాఖ మంత్రి అర్జున్ రామ్ మేఘ్వాల్ రాజ్యసభలో ప్రవేశ పెట్టారు. ఈసీల నియామక ప్యానెల్ నుంచి చీఫ్ జస్టిస్ ని తొలగించాలని కూడా కేంద్రం నిర్ణయించడం విశేషం. కేంద్ర ఎన్నికల ప్రధాన అధికారి, ఎన్నికల కమిషనర్ల నియామక ప్యానెల్ లో చీఫ్ జస్టిస్, ప్రధాని, లోక్ సభలో ప్రతిపక్ష నేత ఉండాలని గత మార్చిలో సుప్రీంకోర్టు తీర్పునిచ్చింది. కానీ కేంద్రం తెచ్చిన ఈ బిల్లు ఆ తీర్పునకు వ్యతిరేకంగా ఉంది. అందువల్లే విపక్షాలు దీనిపై మండిపడుతున్నాయి. ఎన్నికల సంవత్సరంలో మోడీ తనకు అనుకూలురైన వారిని ఈసీలో నియమించుకునేందుకు ఈ బిల్లు వీలు కల్పిస్తోందని కాంగ్రెస్ నేత జైరాంరమేష్ ఆరోపించారు. ఎన్నికల కమిషన్ ని తన కంట్రోల్ లో ఉంచుకునేందుకు ప్రభుత్వం యత్నిస్తోందని ఆయన దుయ్యబట్టారు.

Aditya : చంద్రయాన్-3 సక్సెస్ కి కేవలం కొద్దిదూరంలోనే ఉన్న ఇస్రో (Isro) మరో సాహసోపేత మిషన్ కి నడుం బిగించింది. మొదటిసారిగా సౌర వ్యవస్థ రహస్యాలు తెలుసుకునేందుకు సూర్యుడికి సంబంధించిన విశేషాలపై ఫోకస్ పెట్టింది. ఆదిత్య ఎల్-1 శాటిలైట్ ను ప్రయోగించడానికి సిద్ధం చేసింది. పీఎస్ ఎల్వీ -సి 57 రాకెట్ ద్వారా ఆదిత్య ఎల్-1 ని శ్రీహరికోట లోని సతీష్ ధావన్ స్పేస్ సెంటర్ నుంచి ప్రయోగించబోతున్నారు. బెంగళూరు లోని యుఆర్ రావు శాటిలైట్ సెంటర్ నుంచి దీన్ని లాంచ్ చేసేందుకు ఏర్పాట్లు పూర్తయ్యాయని ఇస్రో వర్గాలు తెలిపాయి.

వివిధ పరీక్షలు నిర్వహించి ప్రత్యేక వాహనంలో ఈ ఉపగ్రహాన్ని ఇక్కడకు చేర్చారు. భారత తొలి సోలార్ మిషన్ అయిన ఆదిత్య-ఎల్ 1 ని ఈ నెలాఖరులో గానీ, సెప్టెంబర్ మొదటివారంలో గానీ లాంచ్ చేయనున్నట్టు ఈ వర్గాలు వెల్లడించాయి. ఈ రాకెట్ కి అదనపు పే లోడ్స్ టెస్ట్స్ కూడా నిర్వహించాలని రివ్యూ కమిటీ సిఫారసు చేసిందని ఇస్రో ఛైర్మన్ ఎస్. సోమనాథ్ (S.Somanath) తెలిపారు. భూమి నుంచి పదిన్నర లక్షల కి.,మీ. దూరంలో హాలో కక్ష్య (Orbit) లో దీన్ని ప్రవేశపెట్టాలన్న ప్లాన్ ఉందని, సౌర సంబంధ విశేషాలను, అంతరిక్షంపై ఇవి చూపగల ప్రభావాన్ని పరిశోధించవలసి ఉందని ఆయన అన్నారు

సూర్యుని బాహ్య వలయాలను అధ్యయనం చేసేందుకు ఈ స్పేస్ క్రాఫ్ట్ 7 పే లోడ్లను మోసుకువెళ్తుందని, పైగా ఎలెక్ట్రో మ్యాగ్నెటిక్, పార్టికల్ మ్యాగ్నెటిక్ ఫీల్డ్ డిటెక్టర్లను వినియోగించుకుంటుందని ఆయన వివరించారు. నాలుగు పే లోడ్లు నేరుగా సూర్యుని అభిముఖంగా, మిగిలిన మూడు పార్టికల్స్ కు సంబంధించిన అంశాలను అధ్యయనం చేస్తాయని సోమనాథ్ చెప్పారు. సౌర తుఫాన్లపైనా, ఆ సమయంలో జరిగే మార్పులపై కూడా ఈ శాటిలైట్ పరిశోధనలు చేస్తుందన్నారు. కక్ష్యలోకి పంపించడం ద్వారా గ్రహణాలతో సంబంధం లేకుండా సౌర వ్యవస్థను నిరంతరం అధ్యయనం చేసేందుకు వీలు కలుగుతుందని ఆయన చెప్పారు.

సుమారు 1500 కిలోల బరువున్న ఈ ఉపగ్రహం ఫొటోస్ఫియర్, క్రోమోస్ఫియర్ ను ప్రత్యేకంగా స్టడీ చేయనుంది. చంద్రయాన్-3 ప్రయోగంలో విక్రమ్ ల్యాండర్ చంద్రునిపై దిగిన కొన్ని రోజుల వ్యవధిలోనే ఆదిత్య-ఎల్ 1 ప్రయోగాన్ని ఇస్రో చేబడుతుందని సంబంధిత వర్గాలు వెల్లడించాయి. సూర్య గోళం నుంచి ప్రసరించే శక్తిమంతమైన కాంతి పుంజాన్ని స్టడీ చేసేందుకు అనువుగా పే లోడ్స్ ని రూపొందించడం విశేషం,