umakanth rao

Manipur : ప్రధాని మోడీ (Modi)ప్రభుత్వంపై ప్రతిపక్షాలు పెట్టిన అవిశ్వాస తీర్మానంపై పార్లమెంటులో చర్చ సందర్భంగా తనను మాట్లాడవద్దన్నారని మణిపూర్ ఎంపీ ఒకరు తెలిపారు. లోక్ సభలో మణిపూర్ నుంచి ఆయన ఒక్కరే బీజేపీ మిత్రపక్షమైన నాగా పీపుల్స్ ఫ్రంట్ (Naga Peoples Front) పార్టీకి చెందినవారు. చర్చ జరుగుతుండగా తాను కూడా మాట్లాడదామనుకున్నానని, కానీ కూటమిలోని సభ్యులు, ముఖ్యంగా బీజేపీకి చెందిన నేతలు తనను వారించారని లోర్హో ఎస్. ఫోజ్ (Lorho S.Pfoze) వెల్లడించారు.

మణిపూర్ లో సాధారణ పరిస్థితులు నెలకొనేలా చూసేందుకు, శాంతిని పునరుద్ధరించేందుకు ప్రభుత్వం కృషి చేస్తున్నదని చెప్పాలనుకున్నా.. కానీ నోరెత్తవద్దని వారు సలహా ఇచ్చారు ..నన్ను అనుమతించలేదు అని లోర్హో పేర్కొన్నారు. నిజానికి ఈయన నియోజకవర్గంలోని ప్రాంతాల్లోనే ఎక్కువగా హింసాత్మక ఘటనలు జరిగాయి.

‘నా చేతులు కట్టేశారు .. నేను బీజేపీ మిత్ర పక్షానికి చెందినవాడిని.. అందుకే వారి ఆదేశాలను పాటించక తప్పలేదు అని ఆయన చెప్పారు.  ప్రధాని మోడీ తమ రాష్ట్రాన్ని సందర్శించాల్సి ఉండిందని, హింసాకాండ బాధితులను పరామర్శించి ఉండాల్సిందని ఆయన అభిప్రాయపడ్డారు.

కాంగ్రెస్ నేత రాహుల్ గాంధీ (Rahul Gandhi) ఈ పని చేశారని ఈ సందర్భంగా ఆయన ప్రస్తావించారు. మణిపూర్ నే కాదని, దేశ వ్యాప్తంగా అనేక చోట్ల జరుగుతున్న హింసాత్మక ఘటనలను కూడా అణచివేయవలసి ఉందన్నారు.

Rahul Gandhi : మణిపూర్ అంశంపై పార్లమెంటులో రచ్చ రేపిన కాంగ్రెస్ (Congress) అగ్ర నేత రాహుల్ గాంధీ (Rahul Gandhi) మళ్ళీ జనంతో మమేకమైపోయారు. శనివారం ఊటీ సమీపంలోని ముత్తునాడు గ్రామంలో ఆయన ‘టోడా’ (Toda) గిరిజనులతో కలిసి డ్యాన్స్ చేశారు. వారి సమస్యలు తెలుసుకున్నారు. కేరళ, తమిళనాడు పర్యటనలో ఉన్న ఆయన.. ఈ గ్రామంలో ఈ గిరిజనుల సంప్రదాయబద్దమైన శాలువా వంటిది కప్పుకుని డ్యాన్స్ చేస్తున్న వీడియోను ఏఎన్ఐ షేర్ చేసింది. ఇక్కడి నుంచి ఆయన కేరళలో తన పార్లమెంటరీ నియోజకవర్గమైన వయనాడ్ (Wayanad) ను సందర్శించనున్నారు.

ఆయనకు ఘన స్వాగతం పలికేందుకు తాము అన్ని ఏర్పాట్లు చేశామని కేరళ పీసీసీ వర్కింగ్ ప్రెసిడెంట్ వి.టి. సిద్ధిక్ తెలిపారు. ఆదివారం జరిగే జిల్లా కాంగ్రెస్ కమిటీ సమావేశంలో కూడా రాహుల్ పాల్గొంటారని ఆయన చెప్పారు. కేరళ, తమిళనాడులోపర్యటించిన అనంతరం రాహుల్.. యూరప్ దేశాల పర్యటనకు వెళ్లే అవకాశాలున్నాయి.

సెప్టెంబరులో బెల్జియం, ఫ్రాన్స్, నార్వే దేశాలను ఆయన విజిట్ చేయనున్నారని, ఆయా దేశాల్లోని యూనివర్సిటీల విద్యార్థులు, ప్రవాస భారతీయులతో ఇంటరాక్ట్ కానున్నారని తెలుస్తోంది. యూరోపియన్ యూనియన్ ఎంపీలతోనూ ఆయన భేటీ కావచ్చునని పార్టీ వర్గాలు తెలిపాయి.

ఇక రాహుల్ తన రెండో విడత భారత్ జోడో యాత్రను కూడా చేబట్టవచ్చునని మహారాష్ట్ర కాంగ్రెస్ చీఫ్ నానా పటోల్ తెలిపారు. గుజరాత్ నుంచి మేఘాలయ వరకు రాహుల్ పాదయాత్ర చేస్తారని ఆయన వెల్లడించారు. త్వరలో పార్టీ వర్గాలు దీన్ని ధృవీకరిస్తాయని ఆయన చెప్పారు.

President : ఢిల్లీ సర్వీసుల బిల్లుకు రాష్ట్రపతి ద్రౌపది ముర్ము గ్రీన్ సిగ్నల్ ఇచ్చారు. దీంతో ఇది చట్టంగా మారింది. ఈ మేరకు శనివారం కేంద్ర ప్రభుత్వం గెజిట్ నోటిఫికేషన్ విడుదల చేస్తూ.. దీన్ని గవర్నమెంట్ ఆఫ్ నేషనల్ కేపిటల్ టెరిటరీ ఆఫ్ ఢిల్లీ (అమెండ్మెంట్) యాక్ట్-2023 గా పేర్కొంది. ఈ నెల 3 న ఈ బిల్లును లోక్ సభ మూజువాణీ ఓటుతో ఆమోదించింది. రాజ్యసభలో ఈ బిల్లుకు అనుకూలంగా 131 మంది, ప్రతికూలంగా 102 మంది ఎంపీలు ఓటు చేశారు. ఢిల్లీ బ్యూరోక్రాట్ల బదిలీలు, పోస్టింగులకు సంబంధించి కేంద్రానికే కంట్రోల్ ఉండేందుకు నిర్దేశించిన ఈ బిల్లును రాజ్యసభలో కొన్ని విపక్షాలు కూడా సమర్థించాయి.

కొద్దిపాటి వ్యతిరేకత ఎదురైనా ఎన్డీయే ప్రభుత్వం మొత్తానికి ఈ బిల్లును ఆమోదింపజేసుకోగలిగింది. ఇక డిజిటల్ పర్సనల్ డేటా ప్రొటెక్షన్ బిల్లు, జనన మరణాల నమోదు సవరణ బిల్లు, జన విశ్వాస్ నిబంధనల సవరణ బిల్లులకు కూడా రాష్ట్రపతి నుంచి ఆమోదం లభించింది. ఢిల్లీ సర్వీసుల బిల్లును ఢిల్లీ సీఎం, ఆప్ కన్వీనర్ అరవింద్ కేజ్రీవాల్ (Arvind Kejiriwal) మొదటి నుంచీ వ్యతిరేకిస్తూ వచ్చారు. రాజ్యసభలో ఇది వీగిపోయేలా చూసేందుకు విపక్షాల మద్దతును కూడగట్టారు. మొదట కాంగ్రెస్ కొంత విముఖత చూపినా చివరకు ఆయనకు మద్దతునివ్వడానికే నిర్ణయించుకుంది.

ఢిల్లీ ఐఏఎస్,ఇతర బ్యూరోక్రాట్ల బదిలీలు,నియామకాల విషయంలో తన ప్రభుత్వ ప్రమేయమేమీ ఉండదని, ఇది తన ప్రభుత్వ అధికారాలను హరించే విధంగా ఉందని కేజ్రీవాల్ ఆరోపించారు. అయితే ఢిల్లీకి సంబంధించినంతవరకు ఏ చట్టాన్నయినా ఆమోదించే అధికారం పార్లమెంటుకు ఉందని సుప్రీంకోర్టు స్పష్టం చేసిందని హోమ్ మంత్రి అమిత్ షా.. ఈ బిల్లును సభలో ప్రవేశపెట్టిన సందర్భంగా ప్రకటించారు.

ఇక ఈ చట్టం మేరకు జాతీయ రాజధాని సివిల్ సర్వీసు అథారిటీని కేంద్రం ఏర్పాటు చేసింది. సంబంధిత కమిటీకి సీఎం చైర్మన్ గా, చీఫ్ సెక్రటరీ, హోమ్ శాఖ కార్యదర్శి సభ్యులుగా ఉంటారు. వీరిలో సీఎం మినహా మిగిలిన ఇద్దరు కేంద్ర నియంత్రణలోనే ఉంటారు. మెజారిటీ సభ్యుల నిర్ణయం మేరకే ఉద్యోగుల బదిలీలు, నియామకాలు జరుగుతాయని, వీరి మధ్య ఏకాభిప్రాయం కుదరని పక్షంలో లెఫ్టినెంట్ గవర్నర్ దే తుది నిర్ణయమని ఈ ఆర్డినెన్స్ నిర్దేశించింది. ఇది చట్టమైంది కనుక ‘సుప్రీం’ అథారిటీ ఆయనే కానున్నారు.

Modi: తన ప్రభుత్వంపై విపక్షాలు పెట్టిన అవిశ్వాస తీర్మానానికి దీటైన సమాధానమిచ్చామని ప్రధాని మోడీ (Modi) అన్నారు. అందువల్లే పార్లమెంటులో ఓటింగ్ కి భయపడి వారు వాకౌట్ చేశారన్నారు. శనివారం బెంగాల్ లో బీజేపీకి చెందిన క్షేత్రీయ పంచాయతీరాజ్ పరిషద్ నిర్వహించిన సమావేశాన్ని ఉద్దేశించి వర్చ్యువల్ గా ఆయన ప్రసంగించారు. మణిపూర్ (Manipur) పరిస్థితిపై వాళ్ళు దేశానికంతటికీ తప్పుడు, ప్రతికూల ప్రచారం చేశారని ఆరోపించిన ఆయన.. వారు పెట్టిన అవిశ్వాస తీర్మానాన్ని సభలో దీటుగా ఓడించామని, మధ్యలోనే సభ నుంచి నిష్క్రమించారని చెప్పారు.

ఇలాంటి తీర్మానాలు తమకెప్పుడూ అదృష్టమేనని, తాజాగా పెట్టిన తీర్మానం కూడా రానున్న ఎన్నికల్లో రికార్డు స్థాయిలో ప్రజలనుంచి మద్దతు పొందడానికి తమకు ఉపకరిస్తుందని ఆయన అన్నారు. ప్రజల సంక్షేమానికి ఉద్దేశించిన ముఖ్యమైన బిల్లులపై చర్చ జరగవలసిన అవసరం ఉందని, కానీ ప్రతిదానినీ రాజకీయం చేయడంలోనే ప్రతిపక్షాలు ఆసక్తి చూపుతూ వచ్చాయని ఆయన విమర్శించారు.

కాంగ్రెస్ (Congress) గురించి మోడీ పరోక్షంగా ప్రస్తావిస్తూ .. సభలో మాట్లాడిన విపక్ష నేతల్లో ఎవరూ ‘పెద్ద’ లీడర్ లేరన్నారు. ఆ పార్టీకి చెందిన అధిర్ రంజన్ చౌదరికి మాట్లాడేందుకు సమయమివ్వాలని కోరిన అమిత్ షా (Amit Shah) దే ఔన్నత్యమని ఆయన చెప్పారు. పశ్చిమ బెంగాల్ లో పంచాయతీరాజ్ ఎన్నికల సందర్భంగా జరిగిన హింసకు అధికార తృణమూల్ కాంగ్రెస్ దే బాధ్యత అని మోడీ ఆరోపించారు.

రాష్ట్ర సీఎం మమతా బెనర్జీ నేతృత్వం లోని ఈ పార్టీ.. బీజేపీ అభ్యర్థులను బెదిరించిందని, బూత్ క్యాప్చరింగ్ కి పాల్పడిందని అన్నారు. బీజేపీ అభ్యర్థులెవరూ నామినేషన్లు దాఖలు చేయకుండా చూసేందుకు గూండాలకు కాంట్రాక్టులిచ్చారని మోడీ దుయ్యబట్టారు .ఎన్ని బెదిరింపులు వచ్చినా భయపడకుండా ఆ ఎన్నికల్లో పోటీ చేసి గెలిచిన బీజేపీ అభ్యర్థులను అభినందిస్తున్నానన్నారు.

Parliament : పార్లమెంట్ ఉభయ సభలూ శుక్రవారం నిరవధికంగా వాయిదా పడ్డాయి. ప్రధాని మోడీ (Modi) ప్రభుత్వంపై విపక్షాలు పెట్టిన అవిశ్వాస తీర్మానం గురువారం మూజువాణీ ఓటుతో వీగిపోయింది. . . దీనికి సంబంధించిన చర్చకు మోడీ లోక్ సభలో సుదీర్ఘంగా సమాధానమిచ్చారు. అయితే ఆయన ప్రసంగిస్తుండగానే కాంగ్రెస్ సహా ప్రతిపక్షాలు సభ నుంచి వాకౌట్ చేశాయి. మొత్తానికి సభ 39 గంటలు నడిచిందని, ముఖ్యమైన బిల్లులను ఆమోదించడం జరిగిందని స్పీకర్ ఓంబిర్లా (Om Birla) తన చివరి ప్రసంగంలో తెలిపారు.

వీటిలో డిజిటల్ పర్సనల్ డేటా ప్రొటెక్షన్ బిల్లు-2023, ది గవర్నమెంట్ ఆఫ్ నేషనల్ కేపిటల్ టెరిటరీ బిల్లు-2023 వంటివి ఉన్నాయని చెప్పారు. జులై 20 న పార్లమెంట్ వర్షాకాల సమావేశాలు ప్రారంభమైన నాటి నుంచే మణిపూర్ అంశంపై ప్రతిపక్షాలు సభలను స్తంభింపజేస్తూ వచ్చాయి. అనేక సార్లు సభలు వాయిదా పడ్డాయి.

చివరి రోజైన శుక్రవారం లోక్ సభలో హోమ్ మంత్రి అమిత్ షా మూడు కీలక బిల్లులను ప్రవేశ పెట్టారు. బ్రిటీష్ కాలం నాటి కాలం చెల్లిన క్రిమినల్ చట్టాల స్థానే వీటిని ప్రతిపాదించారు. దేశంలో జరుగుతున్న నేరాలను అదుపు చేయడానికి కఠిన నిబంధనలను ఈ బిల్లుల్లో చేర్చినట్టు ఆయన పేర్కొన్నారు.

ఇక సెంట్రల్ ఇంటిగ్రేటెడ్ జీ ఎస్టీ చట్టాలకు సంబంధించిన రెండు బిల్లులను చర్చ లేకుండానే సభ మూజువాణీ ఓటుతో ఆమోదించింది. ఆన్ లైన్ గేమింగ్, కేసినోలు , హార్స్ రేస్ క్లబ్స్ పై సాగుతున్న బెట్స్ మీద 28 శాతం పన్ను విధించడానికి ఈ బిల్లులు వీలు కల్పిస్తున్నాయి. తాము పెట్టిన అవిశ్వాస తీర్మానం వీగిపోతుందని తెలిసి కూడా .. ముఖ్యంగా మణిపూర్ అంశంపై మోడీ సభలో మాట్లాడేలా చేయాలన్నతమ ధ్యేయం నెరవేరిందని విపక్షాలు భావిస్తున్నాయి. ఇక కాంగ్రెస్ (Congress) నేత (Rahul Gandhi) లోక్ సభ సభ్యత్వాన్ని పునరుద్ధరించడంతో ఆయన పార్లమెంటుకు హాజరయ్యారు.

Nitish Kumar : 2024 ఎన్నికల తరువాత బీహార్ ( Bihar) నుంచి బీజేపీ పూర్తిగా తుడిచిపెట్టుకుపోతుందని రాష్ట్ర సీఎం నితీష్ కుమార్ (Nitish Kumar) జోస్యం చెప్పారు. విపక్షాలన్నీ కలిసి ‘ఇండియా’ కూటమిని ఏర్పాటు చేసిన తరువాత బీజేపీలో భయం మొదలైందని, ప్రతిపక్షాల సమైక్యత చూసి ఆందోళన చెందుతోందని ఆయన చెప్పారు. 2024 లోక్ సభ ఎన్నికల్లో ఆ పార్టీ ఓటమి ఖాయమని చెప్పారు. ఈ దేశ ప్రయోజనాలకోసం మేమంతా చేతులు కలిపాం.. ఇంకా అనేక పార్టీలు కూడా మాతో కలిసేందుకు సిద్ధంగా ఉన్నాయి. ఎన్నికల ప్రకటన వెలువడగానే ఆ పార్టీలన్నీ మాతో కలుస్తాయి’ అన్నారు.

ప్రధాని మోడీ (Modi) ప్రభుత్వంపై విపక్షాలు పెట్టిన అవిశ్వాస తీర్మానాన్ని నితీష్ నేతృత్వంలోని జేడీ యు సమర్థించింది. మణిపూర్ ఇష్యూను హైలైట్ చేయడం ద్వారా విపక్షాలు తమ పనిని తాము చేశాయని ఆయన చెప్పారు. ఈ తీర్మానానికి సంబంధించి పార్లమెంట్ లో మొదటి రెండు రోజుల్లో మోడీ ఎందుకు లేరని ఆయన ప్రశ్నించారు.

సభ జరుగుతుండగా ఎంపీలు అటూఇటూ తిరుగుతూ బిజీగా కనిపించారని, నాడు అటల్ బిహారీ వాజ్ పేయి అధికారంలో ఉండగా ఆయన మంత్రివర్గంలో తానూ ఉన్నానని చెప్పిన నితీష్.. సభలోనే ఎంపీలు ఉండాలని తాము ప్రధానంగా ప్రస్తావించేవారిమని పేర్కొన్నారు.

ప్రజలను మీరు వాకబు చేస్తే కమలం పార్టీ కేవలం ప్రచారాలు, పబ్లిసిటీపైనే దృష్టి పెడతాయని వారు ఆరోపిస్తారని ఆయన అన్నారు. బీహార్ లోని సంకీర్ణ కూటమి ప్రభుత్వంపై రాష్ట్ర బీజేపీ అధ్యక్షుడు సామ్రాట్ చౌదరి విరుచుకుపడిన నేపథ్యంలో నితీష్ ..ఇలా కమలనాథులను దుయ్యబట్టారు. రాష్ట్రంలో శాంతి భద్రతలను ప్రభుత్వం అదుపు చేయలేకపోయిందని సామ్రాట్ చౌదరి చేసిన ఆరోపణను ఆయన కొట్టిపారేశారు.