పవిత్ర అయోధ్యా (Ayodhya) నగరంలోని రామ మందిర ప్రతిష్ఠాపన కార్యక్రమం దగ్గర పడుతోంది. ఈనెల 22వ తేదీన ప్రాణ ప్రతిష్ఠ జరగనుంది. ప్రధాని మోడీ చేతులమీదుగా జరిగే ఈ కార్యక్రమానికి అన్ని ఏర్పాట్లు జరుగుతున్నాయి. ఎన్నో ఏళ్ల తర్వాత హిందూవల కల నెరవేరుతుండడంతో అయోధ్య విశేషాలను వివరిస్తోంది ‘రాష్ట్ర’ (Raashtra). ఇప్పటికే పలు అంశాల గురించి పరిశోధనాత్మక కథనాలు ఇచ్చింది. ఇప్పుడు అయోధ్య ఆలయానికి సంబంధించిన మరిన్ని విశేషాలు, మందిరం చుట్టూ ఉన్న ఖాళీ స్థలంలోని నిర్మాణాల గురించి తెలుసుకుందాం.
అయోధ్య ఆలయ నిర్మాణం మూడు అంతస్తులుగా ఉంటుంది. మందిర ప్రవేశం తూర్పు వైపు నుండి ఉండగా.. దక్షిణం వైపు నుండి నిష్క్రమణ ఉంటుంది. ప్రధాన ఆలయానికి చేరుకోవడానికి సందర్శకులు తూర్పు వైపు నుండి 32 మెట్లు ఎక్కాల్సి ఉంటుంది. ఆలయ సముదాయం 250 అడుగుల వెడల్పు, 161 అడుగుల ఎత్తులో ఉంటుంది. ప్రతి అంతస్తు 20 అడుగుల ఎత్తులో ఉంటుంది. మొత్తం 392 స్తంభాలు, 44 ద్వారాలు ఉన్నాయి.
సాధారణంగా ఉత్తరాన ఉన్న దేవాలయాలకు పెర్కోటా (గర్భగుడి చుట్టూ బయటి భాగం) ఉండదు. కానీ, రామాలయం 14 అడుగుల వెడల్పు, 732 మీటర్ల విస్తీర్ణంలో పెర్కోటా కలిగి ఉంటుంది. నాలుగు మూలలా సూర్య దేవుడు, మా భగవతి, గణేశుడు, శివునికి అంకితం చేయబడ్డాయి. ఉత్తరం వైపు అన్నపూర్ణ మాత, దక్షిణం వైపున హనుమంతుని మందిరాలు ఉంటాయి.
మహర్షి వాల్మీకి, మహర్షి వశిష్ఠ, మహర్షి విశ్వామిత్ర, మహర్షి అగస్త్య, నిషాద్ రాజ్, మాతా శబరి, దేవి అహల్య.. ఇలా అందరి మందిరాలు ఉంటాయి. అయోధ్యలోని కుబేర్ తిల వద్ద జటాయువు విగ్రహాన్ని ప్రతిష్టించారు. కాంప్లెక్స్‌ లో, ఆరోగ్య సంరక్షణ కేంద్రం, టాయిలెట్ బ్లాక్‌ తో కూడిన యాత్రికుల సౌకర్యాల సముదాయం ఉంటుంది. దర్శనానికి వెళ్లే ముందు 25వేల మంది వరకు తమ బూట్లు, వాచీలు, మొబైల్ ఫోన్లను డిపాజిట్ చేసుకునే అవకాశం కల్పించారు.
వేసవిలో, సందర్శకులు ఫెసిలిటీ సెంటర్ నుండి ఆలయానికి చెప్పులు లేకుండా నడవాల్సిన అవసరం లేకుండా ప్రత్యేక ఏర్పాట్లు చేయనున్నారు. ఆలయ సముదాయంలోని 70 ఎకరాల్లో దాదాపు 70 శాతం పచ్చని ప్రాంతం ఉంటుంది. వందేళ్లకు పైగా పురాతనమైన చెట్లు కూడా ఉన్నాయి. సూర్యకిరణాలు భూమిపైకి రాని దట్టమైన వనం ఉంటుంది. కాంప్లెక్స్‌ లో రెండు మురుగునీటి శుద్ధి ప్లాంట్లు, ఒక నీటి శుద్ధి ప్లాంట్, ఒక ప్రత్యేక విద్యుత్ లైన్ ఉంటాయి. ఇది భూగర్భ జలాశయం నుండి నీటిని పొందే అగ్నిమాపక దళ పోస్ట్‌ ను కలిగి ఉంటుంది. అంటే, భూగర్భ జలాలు ఎప్పటికీ తగ్గవు. అవసరమైతే సరయూ నది నుంచి నీళ్లు తీసుకుంటారు.
2వేల ఏళ్లకు పైగా చెక్కు చెదరకుండా నిర్మాణం జరుపుకుంటున్న అయోధ్య ఆలయం లోపలి విశేషాలను తర్వాతి కథనంలో చూద్దాం. విగ్రహాలు, స్తంభాలు, గోడల నిర్మాణాల గురించి తెలుసుకుందాం.
