రాష్ట్రంలో పెట్టే ప్రతి పైసా పెట్టుబడికి తగిన రక్షణ కల్పిస్తామని సీఎం రేవంత్ రెడ్డి (Revanth Reddy) అన్నారు. పారిశ్రామికాభివృద్ధి అనేది కేంద్రీకృతం కాకుండా అన్ని ప్రాంతాలకు విస్తరించాలని తెలిపారు. రాష్ట్రంలోని హైదరాబాద్ (Hyderabad) లాగా అన్ని ప్రాంతాలు అభివృద్ధి చెందాలని చెప్పారు. పరిశ్రమలు గ్రామీణ ప్రాంతాలకు కూడా విస్తరించాలనేది తమ లక్ష్యమని రేవంత్ రెడ్డి పేర్కొన్నారు.
సచివాలయంలో పరిశ్రమ శాఖపై సీఎం రేవంత్ రెడ్డి సమీక్ష నిర్వహించారు. ఈ సమావేశంలో రేవంత్ రెడ్డి మాట్లాడుతూ… పెట్టుబడులు ఆహ్వానించేలా తమది ఫ్రెండ్లీ పారిశ్రామిక విధానమన్నారు. కొత్త ఫార్మా విలేజీలు నిర్మిస్తామని చెప్పారు. హైదరాబాద్ తరహా రాష్ట్రమంతటా అభివృద్ధి చేస్తామన్నారు. అన్ని రంగాల పరిశ్రమలకు తమ ప్రభుత్వం ప్రోత్సాహం కల్పిస్తుందన్నారు.
2050 నాటికి రాష్టమంతటా పారిశ్రామిక వృద్ధి జరగాలని ఆకాంక్షించారు. సుదీర్ఘ భవిష్యత్ లక్ష్యంతో మెగా మాస్టర్ పాలసీ రూపకల్పన చేయాలని అధికారులకు సూచించారు. తెలంగాణను మూడు క్లస్టర్లుగా విభజించనున్నామని వెల్లడించారు. మొదటిగా ఔటర్ రింగ్రోడ్డు లోపల అర్బన్ క్లస్టర్, రెండవది ఓఆర్ఆర్, ఆర్ఆర్ఆర్ మధ్య ప్రాంతం సెమీ అర్బన్ క్లస్టర్గా, మూడవది రీజనల్ రింగ్ రోడ్డు తర్వాత ప్రాంతం రూరల్ క్లస్టర్గా విభజించామన్నారు.
జహీరాబాద్లో ఐటీ, ఫార్మా, హెల్త్, ఫుడ్ ప్రాసెసింగ్ పరిశ్రమలు ఏర్పాటు చేస్తున్నట్లు ప్రకటించారు. ఫార్మాసిటీపై ప్రభుత్వానికి స్పష్టమైన ఆలోచనలు ఉన్నాయని వివరించారు. ఒకేచోట ఫార్మాసిటీ కాకుండా ఫార్మా విలేజీలు అభివృద్ధి చేస్తామని స్పష్టం చేశారు. స్పోర్ట్స్, ఆటో మొబైల్, ఆర్గానిక్ పరిశ్రమలు ఏర్పాటు చేస్తున్నట్లు వివరించారు. రక్షణ, నావికా రంగం పరికరాల తయారీకి అపార అవకాశాలు ఉన్నాయన్నారు. కొత్తగా సోలార్ పవర్ పాలసీని రూపొందిస్తామని హామీ ఇచ్చారు.
ఓఆర్ఆర్, హైవేలకు దగ్గరలో ఉండేలా ఫార్మా విలేజ్లు ఏర్పాటు చేస్తామని, ఓఆర్ఆర్కు 14 రేడియల్ రోడ్లు, 12 హైవేల కనెక్టివిటీ ఉంటుందన్నారు. ప్రజల జీవనానికి ఇబ్బంది లేకుండా ఫార్మా పరిశ్రమలు ఉండేలా చూడాలన్నారు. కాలుష్యం లేకుండా పరిశ్రమలు, స్కూల్స్, ఆస్పత్రులు ఏర్పాటు చేస్తామని చెప్పారు.
రాష్ట్రంలో సుమారు 35 లక్షల మంది నిరుద్యోగులు ఉన్నారని వెల్లడించారు.
గత ప్రభుత్వం లాగా తాము యువతను భారంగా భావించటం పేర్కొన్నారు. పరిశ్రమల అభివృద్ధిలో యువత భాగస్వాములయ్యేలా చూస్తామన్నారు. యువతలో నైపుణ్యాల పెంపునకు స్కిల్స్ యూనివర్సిటీలు పెడతామన్నారు. తెలంగాణలో మరిన్ని పెట్టుబడులకు వెల్‌ స్పాన్ గ్రూప్‌ సంసిద్ధత వ్యక్తం చేసిందన్నారు. పరిశ్రమలకు తమ ప్రభుత్వ సహాయ సహకారాలు ఎల్లప్పుడూ ఉంటాయన్నారు.
