ఇంకా ఎన్నికల షెడ్యూల్ ఈసీ ప్రకటించనే లేదు. కానీ తెలంగాణాలో (Telangana) నేతలు మాత్రం ఎన్నికల సిత్రాలను తమ ప్రచారాల్లో ఓటర్లకు చూపించడం స్టార్ట్ చేశారని తెలంగాణ ప్రజలు అనుకుంటున్నారట.
ఇప్పటికే మాటల యుద్ధానికి తెరతీసిన మూడు పార్టీల నాయకులు నరం లేని నాలుకను నలుదిక్కులా నాట్యం ఆడిస్తున్నారని గుసగుసలు వినిపిస్తున్నాయి. ప్రచార సమరంలో దూకుడు ప్రదర్శించడంలో మంత్రి కేటీఆర్ (KTR) ను మించిన వారు లేరని గులాబీ నేతలు మురిసిపోతున్నారట. ఇక ఫుల్ జోష్ లో ఉన్న కేటీఆర్ సారు కామారెడ్డిలో (KamaReddy) నిర్వహించిన సభలో మాటల తూటాలు పేల్చారు. కేసీఆర్ (KCR) పై పోటీ అంటే పోచమ్మ గుడిముందు పొట్టేలను కట్టేసినట్టేనని అన్నారు.
కామారెడ్డిలో కేసీఆర్ పోటీ చేస్తున్నారనే వార్త ప్రతిపక్షాల గుండెల్లో రైళ్లు పరిగెత్తిస్తున్నాయని తెలిపారు. వారి భయాన్ని చూస్తుంటే కేసీఆర్ గెలుపు ఖాయమైందనే నమ్మకం అందరికీ కలిగిందని అన్నారు. బలమైన ఆశయం.. ధృడమైన సంకల్పం కలిగిన నేత కేసీఆర్ అని ప్రశంసిస్తూ, ఈ ఎన్నికతో దక్షిణ భారతదేశంలో సరికొత్త రికార్డు సీఎం కేసీఆర్ సృష్టిస్తారని కేటీఆర్ పేర్కొన్నారు.
తెలంగాణ ప్రజలకు కేసీఆర్ పథకాలు నచ్చడం వల్లే మరోసారి సీఎంగా అవకాశం ఇస్తున్నారని, ఈ పథకాల కోసం మహారాష్ట్ర ప్రజలు కూడా ఎదురు చూస్తున్నారని కేటీఆర్ వ్యాఖ్యానించారు. కామారెడ్డి నియోజకవర్గానికి చాలా చరిత్ర ఉందని, ఈ నియోజకవర్గం ఉద్యమ స్ఫూర్తిని తెచ్చిందని ఈ సందర్భంగా గుర్తుచేశారు.
