Andhra Pradesh

ఏపీలో రాజకీయాలు గరంగరంగా మారుతున్నాయి.. ఎన్నికల్లో పోటీ చేయాలని ఆశించిన నేతలకు.. బీజేపీ (BJP), తెలుగుదేశం (TDP), జనసేన (Janasena) పొత్తు పంటికింద రాయిలా మారిందని అనుకొంటున్నారు.. అదేవిధంగా సీట్ల పంపకంలో కొందరికి అన్యాయం జరిగిందని వాపోతున్నారు. ప్రస్తుతం ఇలాంటి పరిస్థితిలో ఒక కీలక నేత ఉన్నారు.. ఆయనే ఎంపీ (MP) జీవీఎల్ నరసింహరావు (GVL Narasimha Rao)..

రాబోయే ఎన్నికల్లో విశాఖ ఎంపీగా పోటీ చేసేందుకు గత కొంతకాలంగా ప్రయత్నాలు సాగిస్తున్న ఆయనకు బీజేపీ అధిష్టానం హ్యాండ్ ఇచ్చినట్లు తెలుస్తోంది. అయితే మూడు ప్రధాన పార్టీల పొత్తుల్లో భాగంగా విశాఖ సీటును టీడీపీకి.. రాజమండ్రి సీటును బీజేపీకి కేటాయించినట్లు సమాచారం. కాగా రాజమండ్రి నుంచి బీజేపీ ఏపీ చీఫ్ పురంధేశ్వరి పోటీ చేస్తున్నారు. దీంతో జీవీఎల్ ఆశలు నీటి మీద కాగితపు పడవలుగా మారాయని భావిస్తున్నట్లు తెలుస్తోంది.

ఈ నేపథ్యంలో ఎంపీ జీవీఎల్ నేడు ఓ వీడియో సందేశాన్ని విడుదల చేశారు. సీటు దక్కకపోవడంపై బాధపడిన విషయాన్ని తెలియచేస్తూ.. భవిష్యత్తులో కూడా విశాఖ అభివృద్ధికి కృషి చేస్తానని తెలిపారు.. విశాఖ (Visakhapatnam) లోక్‌సభ టికెట్ తనకు రానందుకు చాలా మంది పార్టీ నేతలు, కార్యకర్తలు, మిత్రులు, శ్రేయోభిలాషులు కలత చెంది ఫోన్ చేస్తున్నారని ఎంపీ జీవీఎల్ నరసింహరావు అన్నారు..

విశాఖలో మూడేళ్ళుగా ఉంటూ.. మీ అందరిలో ఒకరిగా కలిసిపోయానని తెలిపారు.. పదవి దక్కకపోయినంత మాత్రాన ప్రజలకు దూరం అవనని.. అన్ని సమస్యలపై పోరాడుతానని వెల్లడించారు.. తన పరిధిలో ఉన్న కొన్ని సమస్యలను ఇప్పటికే పరిష్కరించానని ఎంపీ తెలిపారు.. తాను చేసిన సేవ నిస్వార్థమైనదని.. వృథా అయిందని ఎవరైనా భావిస్తే అది తప్పు అని పేర్కొన్నారు.. విశాఖతో పాటు.. రాష్ట్రంలో బీజేపీ జెండా ఎగిరేలా కార్యాచరణ రూపొందించుకుందామన్నారు..

వైసీపీ ప్రభుత్వం చీకటి వ్యాపారాలు చేసి రాష్ట్రాన్ని భ్రష్టు పట్టిచిందని టీడీపీ అధినేత చంద్రబాబు నాయుడు(Chandrababu Nayudu)ఆరోపించారు. ఇవాళ (సోమవారం) కుప్పం(Kuppam)లో పర్యటించారు. రెండు రోజుల పాటు సోమ, మంగళ వారాలు చంద్రబాబు కుప్పంలోనే పర్యటించనున్నారు. ఈ సందర్భంగా ఆయన కొత్తపేట(Kothapeta)లోని కన్యకా పరమేశ్వరి ఆలయం(Kanyaka Parameshwari Temple)లో  పూజలు చేశారు.

అంతకుముందు అర్చకులు ఆయనకు పూర్ణకుంభంతో స్వాగతం పలికారు. దర్శనానంతరం వేదాశీర్వచనం చేసి తీర్థప్రసాదాలు అందజేశారు. అనంతరం మహిళలతో ఏర్పాటు చేసిన ముఖాముఖి కార్యక్రమంలో చంద్రబాబు మాట్లాడుతూ జగన్ ప్రభుత్వంపై కీలక ఆరోపణలు చేశారు. ఏపీ మహిళలు ప్రపంచానికే ఆదర్శంగా నిలవాలని కలలుగన్నామన్నారు. ఇప్పుడు చూస్తుంటే డబ్బులకు కక్కుర్తిపడి విదేశాల నుంచి మత్తు పదార్థాలు తీసుకొచ్చి అమ్ముతున్న పరిస్థితిని చూస్తున్నామని ఆందోళన వ్యక్తం చేశారు.

మహిళలు ఆర్థికంగా పైకి రావాలంటే ఇంటికి 2 ఆవులు ఇవ్వాలనుకున్నామని అన్నారు. అలా అంటే తనను హేళన చేశారని గుర్తుచేశారు. కుప్పంలో వెయ్యి లీటర్లతో మొదలైన పాల సేకరణ ఇప్పుడు 4లక్షల లీటర్లకు చేరిందన్నారు. ఆడబిడ్డల ఆత్మగౌరవం కోసం ఇంటింటికి మరుగుదొడ్లు కట్టించామని టీడీపీ అధినేత చెప్పుకొచ్చారు. అదేవిధంగా మహిళలకు ఆర్థిక స్వాతంత్ర్యం ఇవ్వాలని ఆలోచన చేసిందే టీడీపీ అని తెలిపారు.

డ్వాక్రా సంఘాలు పెట్టి మహిళల్లో చైతన్యం తీసుకొచ్చామన్నారు. ఇప్పుడు డ్వాక్రా సంఘాల్లో లక్షల మంది ఉన్నారంటే అది టీడీపీ చొరవేనని తెలిపారు. స్థానిక సంస్థల్లో మహిళలకు రిజర్వేషన్లు కల్పించిన నాయకుడు ఎన్టీఆర్ అని కొనియాడారు. రాష్ట్రం బాగుండాలంటే కార్యకర్తలు 40రోజులు కష్టపడాలని చంద్రబాబు పిలుపునిచ్చారు. ఇదిలా ఉండగా చంద్రబాబు బస చేసేందుకు పార్టీ నేతలు తగు ఏర్పాట్లు చేశారు.

ఈ నేపథ్యంలో టీడీపీ అధినేత పర్యటనలో భద్రతా వైఫల్యం కొట్టచ్చినట్లు కనిపించింది. కుప్పం టీడీపీ కార్యాలయం వద్ద చంద్రబాబు బస చేసే వాహనాన్ని పార్టీ శ్రేణులు చుట్టుముట్టారు. పరిసరాల్లో అంతగా పోలీసులు కనిపించకపోవడంతో చంద్రబాబు వాహనం నుంచి దిగి మహిళలతో ముఖాముఖి కార్యక్రమం వద్దకు వెళ్లేందుకు ఇబ్బందిపడాల్సి వచ్చింది. కీలక నేతకు అతి సాధారణ భద్రత ఏర్పాటుపై టీడీపీ నేతలు అసహనం వ్యక్తం చేశారు.

ఎన్నికల వేళ ఆంధ్రప్రదేశ్‌(AP)లో రాజకీయం రసవత్తరంగా మారింది. సీటు కోసం ఎవరికి వారు ధీమా వ్యక్తం చేస్తున్నారు. ఎన్నికల్లో టీడీపీ-జనసేన-బీజేపీ కలిసి బరిలోకి దిగుతుండటంతో మూడు పార్టీల నుంచి అభ్యర్థులు సీటు కోసం పోటీ పడుతున్నారు. తాజాగా ఎన్టీఆర్ జిల్లా(NTR District) విజయవాడ పశ్చిమ నియోజకవర్గం(Vijayawada West Constituency) సీటు తనకే కేటాయించాలంటూ జనసేన పార్టీ కార్యకర్తలతో కలిసి ఆ పార్టీ అధికార ప్రతినిధి పోతిన మహేష్ నిరాహార దీక్షకు దిగారు.

ఈ సందర్భంగా ఆయన మీడియాతో మాట్లాడారు. జనసేన అధినేత పవన్ కల్యాణ్‌పై కీలక వ్యాఖ్యలు చేశారు. తనకు జనసేన అధినేత పవన్ కల్యాణ్ మీద నమ్మకం ఉందనీ.. రెండో లిస్టులో తన పేరు ఉంటుందని పోతిన మహేష్ ఆశాభావం వ్యక్తం చేశారు. ఆయన చెప్పడం వల్లే తాను దూకుడు పెంచానని వివరించారు. పశ్చిమ నియోజకవర్గం ప్రజలందరూ అదే కోరుకుంటున్నారని చెప్పారు. తనకు సీటు ఇవ్వడమే న్యాయమని అన్నారు.

పశ్చిమ నియోజకవర్గంలో ఆణువణువూ తనకు తెలుసని,  జనసేన పార్టీ తనకు తప్ప ఎవరికీ సీటు ఇచ్చినా.. వైఎస్ఆర్ కాంగ్రెస్ పార్టీతో పోటీ పడలేరని ధీమా వ్యక్తం చేశారు. ఇక్కడ ఉన్న వెల్లంపల్లి శ్రీనివాస్‌ను వేరే నియోజకవర్గానికి పంపించిదని, తమ పోరాట ఫలితం కాదా? అని ప్రశ్నించారు.

పశ్చిమ నియోజకవర్గంలో తాను లోకల్ అనీ కూటమిలో భాగంగా తనకు సీటు కేటాయించడమే న్యాయమని పోతిన మహేష్ అన్నారు. ఐదేళ్ల నుంచి కష్టపడి పనిచేశానని చెప్పుకొచ్చారు. తనతో పాటు పశ్చిమ నియోజకవర్గం ప్రజలు సైతం ఎంతో కష్టపడ్డారని తెలిపారు. తమ నియోజకవర్గంలో కొండ ప్రాంతాల అభివృద్ధికి జనసేన పాటుపడిందని వెల్లడించారు.

‘ఎన్నికల్లో చంద్రబాబు(Chandrababu), పవన్‌ కల్యాణ్(Pawan Kalyan)ను ఓడించే బాధ్యత నాది.. అందుకు ఎంత దూరమైనా వెళ్తా..’ అని ముద్రగడ పద్మనాభం(Mudragada Padmanabham) అన్నారు. ఆయన ఆదివారం మీడియా సమావేశంలో మాట్లాడారు. జగన్‌కు, పవన్ కల్యాణ్‌కు చాలా తేడా ఉందన్నారు. జగన్ పిలిస్తేనే వైసీపీలో చేరానని స్పష్టం చేశారు.

ఆయన ఇంకా 30ఏళ్లు సీఎంగానే ఉంటారని తెలిపారు. 20సీట్ల కోసం తాను పవన్‌కు ఎందుకు సపోర్ట్ చేయాలన్నారు. ఒక ఎంపీ, ఎమ్మెల్యే కాకుండా ఎవరు పడితే వారు పార్టీ పెడితే నేను వెళ్లాలా? అని ప్రశ్నించారు. గత ప్రభుత్వంలో ఐదేళ్లు పవన్ ఏ మడుగులో ఉన్నాడని ఎద్దేవా చేశారు. తాను వైసీపీలో చేరకుండా ఉండుంటే పవన్ కల్యాణ్‌పై పిఠాపురంలో ఇండిపెండెంట్‌ అభ్యర్థిగా పోటీ చేసేవాడినని తెలిపారు.

వారసత్వ రాజకీయాలు ఒకరి సొత్తు కాదని, తన కొడుకు రాజకీయాల్లోకి ఎందుకు రావొద్దని ప్రశ్నించారు. పత్తిపాడు నుంచి కాపుల కోసం పని చేయడంతోనే తన రాజకీయ పతనం ప్రారంభమైందని వెల్లడించారు. ఉద్యమం వల్ల తాను నష్టపోయానంటూ ముద్రగడ చెప్పుకొచ్చారు.

చంద్రబాబు తనను చాలా ఇబ్బందులకు గురిచేశాడని, పవన్ కళ్యాణ్ కాపుల కోసం ఇప్పుడు ఉద్యమం చేయొచ్చు కదా అంటూ ముద్రగడ సలహా ఇచ్చారు. సినిమా వాళ్లు రాజకీయాలకు పనికిరారు అని, వాళ్లది ‘మీ ఇంటికి వస్తే ఏమిస్తారు.. మా ఇంటికి వస్తే ఏం తెస్తారు’ అనే పద్ధతి ఉంటుందని ముద్రగడ విమర్శించారు. పిఠాపురంలో పవన్ కచ్చితంగా ఓడిపోతాడు అని ముద్రగడ పద్మనాభం సంచలన వ్యాఖ్యలు చేశారు.

ఏపీ ప్రతిపక్ష నేత, తెలుగుదేశం(TDP) పార్టీ అధినేత చంద్రబాబు(Chandra babu) సంచలన వ్యాఖ్యలు చేశారు. ఏపీలో అధికారంలో ఉన్న వైఎస్సార్(YSR CONGRESS) కాంగ్రెస్ పార్టీ చేస్తున్న అవినీతిపై ఆయన విమర్శలు గుప్పించారు. రాష్ట్రంలో ఎన్నికలు దగ్గర పడుతున్న వేళ ఆ పార్టీ నేతల ఆగడాలు మరింత ఎక్కువ అయ్యాయని మండిపడ్డారు.

ఈసారి ఎన్నికల్లో వైసీపీ డబ్బులు పంచి గెలవాలని చూస్తోందన్నారు. డబ్బులు విచ్చలవిడిగా పంచేందుకు ఆ పార్టీ సిద్ధంగా ఉందని, పోలీసులు కూడా ఈ విషయంలో మౌనంగా ఉన్నారని ఆరోపించారు. గడచిన నాలుగున్నర ఏళ్ల పాలనలో సీఎం జగన్ భారీగా అవినీతికి పాల్పడ్డారని సంచలన ఆరోపణలు చేశారు.

అలాంటి పార్టీని ఎన్నికల్లో కట్టడి చేయాలంటే రూ.200, 500 వంటి పెద్ద నోట్లను రద్దు(200,500 Notes Ban) చేయాలని హాట్ కామెంట్స్ చేశారు. దేశంలో డిజిటల్ కరెన్సీ రావాల్సిన అవసరం ఉందని చంద్రబాబు అభిప్రాయం వ్యక్తంచేశారు. రాష్ట్ర సంపదనంతా వైసీపీ నేతలు హవాలా రూపంలో విదేశాలకు తరలిస్తున్నారని ఆరోపించారు.

ఆంధ్రప్రదేశ్ అభివృద్ధికి, దేశం బాగుకోసం జనసేన, బీజేపీతో పొత్తు పెట్టుకున్నట్లు మాజీ సీఎం ప్రకటించారు. ఇదిలాఉండగా దేశంలో పెద్ద నోట్ల రద్దు జరిగిన సమయంలో ప్రధాని మోడీని విమర్శించిన పార్టీల్లో తెలుగుదేశం కూడా ఒకటి. ఆ పార్టీ అధినేత మరోసారి పెద్ద నోట్ల రద్దు గురించి మాట్లాడటం ప్రస్తుతం చర్చనీయాంశంగా మారింది. అయితే, చంద్రబాబు అధికారంలో ఉన్నప్పుడు ఎందుకు ప్రధాని మోడీతో ఈ విషయంపై చర్చించలేదని, ప్రతిపక్షంలో ఉన్నపుడే గుర్తుకు వచ్చిందా? అని వైసీపీ శ్రేణులు విమర్శిస్తున్నారు.

ఏపీ రాజకీయాలు (AP Politics) ఒక్కసారిగా హీటెక్కాయి. మే 13న ఏపీ అసెంబ్లీకి ఎన్నికల జరగనున్న నేపథ్యంలో అధికార ప్రతిపక్ష పార్టీలు ప్రచారంలో జోరును పెంచాయి. ఈ క్రమంలోనే టీడీపీ(TDP), జనసేన(Janasena), బీజేపీ(BJP) కూటమి వచ్చే ఎన్నికల్లో ఎలాగైనా గెలవాలని పావులు కదుపుతున్నారు. అధికార పార్టీ చేసిన తప్పిదాలు, హామీల ఉల్లంఘన, అభివృద్ధిపై, అవినీతి పై ప్రజలకు వివరించే ప్రయత్నం చేస్తున్నాయి.

ప్రతిపక్షాల మాటలకు అధికార పార్టీ ఇస్తున్న కౌంటర్లు ప్రజల్లోకి వెళ్లడం లేదని గ్రహించిన స్థానిక వైసీపీ నేతలు దాడులకు(Attacks) తెగబడుతున్నారు. ఈ క్రమంలోనే ప్రచారం ముగించుకుని కారులో గురువారం రాత్రి ఇంటికి వెళ్తున్న జన సైనికులకు అడ్డగించి రాళ్లదాడి చేసినట్లు సమాచారం.

పల్నాడు జిల్లాలోని మించలపాడులో ఈ ఘటన జరగగా శుక్రవారం ఉదయం తాజాగా వెలుగులోకి వచ్చింది. అదేవిధంగా పల్నాడు జిల్లాలోని మాచర్ల 8వ వార్డుకు చెందిన బండారు రామయ్య బొలెరో వాహనాన్ని గుర్తుతెలియని వ్యక్తులు తగులబెట్టారు. ఒకే రోజు రెండు దారుణ సంఘటనలు చోటుచేసుకున్నాయి.

కచ్చితంగా ఈ పని వైసీపీ నేతలు చేశారని టీడీపీ, జనసైనికులు ఆరోపిస్తున్నారు. ఆయా నియోజకవర్గాల్లో వైసీపీ ఓటమి గురించి ముందుగానే తెలిసి నిస్సహాయ స్థితిలో వైసీపీ గుండాలు దాడులకు పాల్పడుతున్నారని ఆరోపించారు.

ఇదిలాఉండగా, తమపై దాడులు జరిపారని పోలీసులకు ఫిర్యాదు చేయగా వారు కూడా పెద్దగా పట్టించుకోవడం లేదని, చూసి చూడనట్టు వ్యవహరిస్తున్నారని తెలుగు తమ్ముళ్లు, జనసైనికులు ఆవేదన వ్యక్తంచేస్తున్నారు. ప్రజాస్వామ్యంలో రాజకీయాలు అనేవి స్వేచ్ఛా వాతావరణంలో జరగాలని, ఇలాంటి దాడులకు పాల్పడటం ప్రజాస్వామ్యానికి చేటుచేస్తుందని పలువురు విమర్శిస్తున్నారు.

టీడీపీ మూడో జాబితా(TDP 3rd List) విడుదలైంది. 11 అసెంబ్లీ, 13 పార్లమెంట్ నియోజకవర్గాలకు అభ్యర్థులను పార్టీ అధిష్టానం శుక్రవారం ప్రకటించింది. బీజేపీ, టీడీపీ, జనసేన పార్టీల పొత్తులో భాగంగా టీడీపీ(TDP) 144 అసెంబ్లీ, 17 పార్లమెంట్ నియోజకవర్గాల్లో పోటీ చేస్తున్న విషయం తెలిసిందే.

దీంతో టీడీపీ అధినేత, మాజీ సీఎం చంద్రబాబు నాయుడు రెండు విడతల్లో 128 అసెంబ్లీ నియోజకవర్గాల్లో అభ్యర్థులను ప్రకటించారు. తాజాగా మరో 11 నియోజకవర్గాలకు అభ్యర్థులను ప్రకటించారు. దీంతో ఇప్పటి వరకు 139 నియోజకవర్గాలకు అభ్యర్థులను ప్రకటించారు.

మరో ఐదు అసెంబ్లీ నియోజకవర్గాలకు అభ్యర్థులను ప్రకటించాల్సి ఉంది. మరోవైపు టీడీపీ పోటీ చేయనున్న 17 పార్లమెంట్ నియోజకవర్గాల్లో తాజాగా 13 నియోజకవర్గాలకు టీడీపీ అధిష్టానం అభ్యర్థులను ప్రకటించింది. మరో నాలుగు నియోజకవర్గాల్లో అభ్యర్థుల పేర్లను ప్రకటించాల్సి ఉంది.

అసెంబ్లీ స్థానాల అభ్యర్థులు

• పాతపట్నం- మామిడి గోవిందరావు
• శ్రీకాకుళం-గొండు శంకర్
• నరసరావుపేట – చదలవాడ అరవిందబాబు
• చీరాల- మద్దులూరి మాలకొండయ్య యాదవ్
• పలాస-గౌతు శిరీష
• సర్వేపల్లి- సోమిరెడ్డి చంద్రమోహన్‌రెడ్డి
• అమలాపురం (ఎస్సీ) – అయితాబత్తుల ఆనందరావు
• పెనమలూరు-బోడె ప్రసాద్
• మైలవరం- వసంత వెంకట కృష్ణప్రసాద్
• శృంగవరపుకోట- కోళ్ల లలితకుమారి
• కాకినాడ సిటీ- వనమాడి వెంకటేశ్వరరావు (కొండబాబు)

లోక్‌సభ స్థానాల అభ్యర్థులు

• విశాఖపట్నం- మతుకుమిల్లి భరత్
• విజయవాడ- కేశినేని శివనాథ్ (చిన్ని)
• హిందూపురం- బీకే పార్థసారథి
• శ్రీకాకుళం- కింజరాపు రామ్మోహన్నాయుడు
• అమలాపురం- గంటి హరీష్
• ఏలూరు- పుట్టా మహేశ్ యాదవ్
• గుంటూరు- పెమ్మసాని చంద్రశేఖర్
• నరసరావుపేట – లావు శ్రీకృష్ణ దేవరాయలు
• బాపట్ల – టి. కృష్ణ ప్రసాద్
• చిత్తూరు- దగ్గుమళ్ల ప్రసాదరావు
• కర్నూలు- బస్తిపాటి నాగరాజు (పంచలింగాల నాగరాజు)
• నంద్యాల – బైరెడ్డి శబరి
• నెల్లూరు- వేమిరెడ్డి ప్రభాకర్ రెడ్డి