Andhra Pradesh

ఏపీలో ఎన్నికల హీట్ పెరిగింది. పార్టీ పొత్తును మరిచి తమ ప్రమేయం లేకుండా సీట్ల కేటాయింపు చేయడంపై జనసేన అధినేత గుర్రుగా ఉన్నారు. ఈ నేపథ్యంలో టీడీపీ అధ్యక్షుడు చంద్రబాబు నాయుడు(Chandrababu Nayudu), జనసేనాని పవన్‌ కల్యాణ్(Pawan Kalyan) భేటీ ప్రధాన్యత సంతరించుకుంది.

ఉండవల్లిలోని నివాసంలో ఆదివారం వీరిద్దరూ భేటి అయి సీట్ల సర్దుబాట్లపై చర్చించారు. జనసేన పోటీ చేసే స్థానాలపై ఒక అవగాహనకు వచ్చినట్లు సమాచారం. రాజానగరం, రాజోలు స్థానాల్లో జనసేన అభ్యర్థులు పోటీ చేస్తారని ప్రకటించిన పవన్‌కల్యాణ్‌కు అనుకూలంగానే నిర్ణయం తీసుకున్నట్లు తెలిసింది.

కాగా అధికార పార్టీ వైసీపీ ఇప్పటికే సగానికి పైగా స్థానాల్లో అభ్యర్థులను ఖరారు చేయడంతో పాటు వారిని ఎన్నికలకు సంసిద్ధం చేశారు. తమ ప్రత్యర్థులింకా అభ్యర్థులను ఖరారు చేయడంలో మల్లగుల్లాలు పడుతున్నారని టీడీపీ, జనసేన, బీజేపీ, వామపక్ష పార్టీలపై విమర్శలు చేస్తున్నారు.

వరుసగా జరుగుతున్న సమావేశాల్లో దాదాపు సీట్ల సర్దుబాట్లు ఓ కొలిక్కి వచ్చినట్లు పార్టీ వర్గాలు పేర్కొన్నాయి. ముఖ్యంగా ఉమ్మడి ఉభయ గోదావరి జిల్లా నేతలు కొందరు త్యాగాలకు సిద్ధం కావాలని చంద్రబాబు స్పష్టత ఇచ్చినట్లు సమాచారం. సీట్లసర్దుబాటును మరికొద్ది రోజుల్లో ప్రకటించే అవకాశముండడంతో ఆశావాహులంతా అధినేతల ప్రకటనపై ఎదురుచూస్తున్నారు.

వైసీపీ పాలనలో ఐదేళ్లు అభివృద్ధి పనులు అనుకున్నంతగా జరగలేదని.. అందుకే జనసేనలో చేరుతున్నానని మచిలీపట్నం ఎంపీ వల్లభనేని బాలశౌరి(Machilipatnam MP Vallabhaneni Balashauri) అన్నారు. పవన్ కల్యాణ్(Pawan Kalyan) సమక్షంలో ఆదివారం జనసేన(Janasena)లో చేరనున్నట్లు ఆయన ప్రకటించిన విషయం తెలిసిందే.

ఈ నేపథ్యంలో ఆదివారం ఆయన మీడియాతో మాట్లాడుతూ.. వైసీపీలో అభివృద్ధి గురించి పట్టించుకునే పరిస్థితి లేదని ఆరోపించారు. పోలవరం ప్రాజెక్టు నిర్మాణంలో రాష్ట్ర ప్రభుత్వం నిర్లక్ష్యంగా వ్యవహరిస్తోందని ఎన్నిసార్లు చెప్పినా స్పందించలేదన్నారు. రాష్ట్రాన్ని అభివృద్ధి చేస్తారన్న ఆలోచనతోనే జనసేనతో కలిసి నడుస్తున్నానని స్పష్టం చేశారు.

అదేవిధంగా వైఎస్సార్‌తో తనకున్న అనుబంధాన్ని గుర్తుచేసుకున్నారు బాలశౌరి. తాను వైఎస్సార్ అడుగు జాడల్లో నడిచిన వ్యక్తినని తెలిపారు. వైఎస్ ఎంతో గొప్ప వ్యక్తి అని, ఆయనతో ఏ నాయకుడినీ పోల్చలేమన్నారు. 2004లో వైఎస్ శిష్యుడిగా రాజకీయాల్లోకి వచ్చానని, గత ఎన్నికల్లో వైసీపీ అభ్యర్థిగా బందర్ నుంచి పోటీ చేసి గెలిచానన్నారు.

తాను రాజకీయాల్లో క్రమ శిక్షణతో ఉంటాను కాబట్టే ఎవరైనా నచ్చుతానని తెలిపారు. వైఎస్ హయాంలో డెల్టాకు జీవనాధారమైన పులిచింతల ప్రాజెక్టును పూర్తి చేయగలిగామని తెలిపారు. పోలవరం ప్రాజెక్టు పూర్తవుతుందని భావించామని, అయితే డయాఫం వాల్ రిపేరు పేరుతో రెండు సంవత్సరాలుగా కాలయాపన చేస్తున్నారని విమర్శించారు.

పోలవరం ప్రాజెక్టుకు సంబంధించిన నిధులు తెచ్చుకోవడంలో రాష్ట్ర ప్రభుత్వం నిర్లక్ష్యంగా ఉందంటూ అసహనం వ్యక్తం చేశారు. కొన్ని కేంద్ర పథకాలకు మాచింగ్ గ్రాంట్ కూడా రాష్ట్ర ప్రభుత్వం ఇవ్వడం లేదని, రాష్ట్రంలో రోడ్ల పరిస్థితి చూస్తే బాధేస్తోందన్నారు.

ఎంపీ, వైసీపీ నెల్లూరు జిల్లా అధ్యక్షుడు వేమిరెడ్డి ప్రభాకర్‌రెడ్డి(Vemireddy Prabhakar Reddy) అసంతృప్తిపై మంత్రి పెద్దిరెడ్డి రామచంద్రారెడ్డి( Minister Peddireddy Ramachandra Reddy) స్పందించారు. ఎన్నికల సమయంలో అసంతృప్తి సహజంగా ఉంటుందన్నారు. ఎమ్మెల్యేగా ఉన్నప్పుడు సరైన పనితీరు కనపరచని వారికి పార్టీ టికెట్ నిరాకరించిందన్నారు.

నెల్లూరు వైసీపీ ఎంపీ అభ్యర్థిగా వేమిరెడ్డి ప్రభాకర్ రెడ్డిని అధిష్టానం ప్రకటించింది. తన పరిధిలో వచ్చే మూడు నియోజకవర్గాలకు అభ్యర్థులను మార్చాలని ఆయన ముందునుంచి పట్టుబడుతున్నారు. దీనిపై అధిష్ఠానం స్పందించకపోవడంతో అసంతృప్తితో ఉంటున్నారు. తనకు పార్టీలో జిల్లా అధ్యక్ష పదవి ఇచ్చారే కానీ ఆ గౌరవం దక్కడం లేదని వేమిరెడ్డి తన అనుచరుల ఎదుట వాపోయినట్లు సమాచారం.

వేమిరెడ్డి శనివారం మధ్యాహ్నం ఉన్నట్టుండి నెల్లూరు నుంచి ఆయన పయనమయ్యారు. కొద్దిరోజుల పాటు పార్టీ కార్యకలాపాలకు దూరంగా ఉండాలని అనుచరులకు, సిబ్బందికి సూచనలిచ్చారని తెలుస్తోంది. మరోవైపు పెద్దిరెడ్డి రామచంద్రారెడ్డి కాంగ్రెస్ పార్టీపై విమర్శలు చేశారు. కాంగ్రెస్ పార్టీ ఇప్పటికే చనిపోయిందని, ఆ పార్టీ దహన సంస్కారాలకు వైఎస్ షర్మిలను తీసుకొచ్చారంటూ సెటైర్లు విసిరారు.

అదేవిధంగా ‘‘షర్మిల, కేవీపీ, ఘువీరా రెడ్డి, గిడుగు రుద్రరాజు కాంగ్రెస్ పాడే మోస్తున్నారు. పార్టీలో అసంతృప్తితో ఉండటం సాధారణమే. పార్టీ గెలిచే వారికే టికెట్ ఇవ్వాలనే ఆలోచనలో ఉంటుంది’’ అంటూ పెద్దిరెడ్డి విమర్శలు గుప్పించారు. చంద్రబాబు నాయుడు, కాంగ్రెస్ ఎన్ని కుట్రలు చేసినా జగన్ గెలుపు ఖాయమని ధీమా వ్యక్తం చేశారు.

ఏపీ(AP)లో ఇటీవల జరిగిన డీఎస్పీల బదిలీలపై ప్రతిపక్ష నేతలు పలు అనుమానాలు వ్యక్తం చేస్తున్నారు. ఈ నేపథ్యంలో కేంద్ర ఎన్నికల సంఘానికి టీడీపీ ఏపీ చీఫ్(TTD AP Chief) అచ్చెన్నాయుడు(Achchennaidu) లేఖ రాశారు. వచ్చే అసెంబ్లీ ఎన్నికల్లో లబ్ధిచేకూరేలా డీఎస్పీల బదిలీలు ఉన్నాయని ఆరోపించారు.

అధికార వైసీపీకి అనుకూలంగా ఉన్నారంటూ 10 మంది డీఎస్పీల పేర్లను సీఈసీ దృష్టికి తీసుకెళ్లారు. డీఎస్పీలపై ఉన్న అభియోగాలనూ కేంద్ర ఎన్నికల సంఘం(EC) దృష్టికి తీసుకెళ్లారు అచ్చెన్నాయుడు. వైసీపీకి అనుకూలంగా ఉండే డీఎస్పీలను రాష్ట్రంలోని వివిధ ప్రాంతాల్లో బదిలీ చేశారని పేర్కొన్నారు.

తాజాగా చేపట్టిన 42 మంది డీఎస్పీల బదిలీలపై విచారణ చేపట్టాలని కోరారు. వచ్చే అసెంబ్లీ ఎన్నికల్లో అధికార పార్టీకి సహకరించాలని బదిలీ అయిన డీఎస్పీలకు డీజీపీ స్పష్టంగా చెప్పారని ఈసీకి అందజేసిన లేఖలో పేర్కొన్నారు.

ఫిర్యాదులో డీఎస్పీలు సుధాకర్ రెడ్డి, రాంబాబు, ఉమా మహేశ్వర రెడ్డి, వీర రాఘవరెడ్డి, సి.మహేశ్వర్ రెడ్డి, మురళీకృష్ణా రెడ్డి, నారాయణ స్వామి రెడ్డి, శ్రీనాధ్, రాజ్ గోపాల్ రెడ్డి, హనుమంత రావు పేర్లను ప్రస్తావించారు. ఈ మేరకు వారిపై తగు చర్యలు తీసుకోవాలని అచ్చెన్నాయుడు డిమాండ్ చేశారు.

అన్యమతస్థులను శ్రీవారి సేవకు అనుమతించే విషయమై పరిశీలిస్తున్నట్లు టీటీడీ(TTD) ఈవో ధర్మారెడ్డి(Dharmareddy) చేసిన ప్రకటన వివాదాస్పదమైంది. తాజాగా ఆయన వ్యాఖ్యలపై బీజేపీ రాష్ట్ర అధికార ప్రతినిధి భానుప్రకాష్ రెడ్డి (Bhanuprakash Reddy) ఆగ్రహం వ్యక్తం చేశారు.

ఆయన శనివారం మీడియాతో మాట్లాడుతూ.. ‘‘టీటీడీ ఈవోపై అన్యమతస్థులను శ్రీవారి సేవకు అనుమతించడానికి ఈవో నిర్ణయం తీసుకోవడాన్ని బీజేపీ తీవ్రంగా ఖండిస్తోంది. అన్యమతస్థుల సేవలను వినియోగించుకుంటామని ధర్మారెడ్డి ఏ హోదాలో ప్రకటిస్తారు?’’ అంటూ ప్రశ్నించారు.

టీటీడీ ఈవో అయితే ఇష్టానుసారం నిర్ణయాలు తీసుకుంటారా? అని భానుప్రకాష్ రెడ్డి నిలదీశారు. ఇప్పటికే టీటీడీలో అనేక మంది అన్యమతస్థులు విధులు నిర్వర్తిస్తున్నారని తెలిపారు. స్వామి వారికి మొక్కని వారు టీటీడీలో విధులు నిర్వర్తిస్తూ జీతాలు తీసుకుంటున్నారని విమర్శించారు.

అన్యమతస్థుల సేవలు టీటీడీకి అవసరం లేదన్నారు. ధర్మారెడ్డి తన మాటలను వెంటనే వెనక్కి తీసుకోవాలని డిమాండ్ చేశారు. టీటీడీలో పని చేస్తున్న అన్యమతస్థ ఉద్యోగులను వెంటనే ప్రభుత్వానికి సరెండర్ చేయాలని భానుప్రకాష్ రెడ్డి డిమాండ్ చేశారు.