Andhra Pradesh

పార్లమెంట్ ఎన్నికల(Parliament elections)కు సమయం దగ్గర పడుతోంది.ఇప్పటికే దేశవ్యాప్తంగా మొదటిదశ పోలింగ్ (శుక్రవారం, ఏప్రిల్19)న పూర్తయిన విషయం తెలిసిందే. అన్ని చోట్లా పోలింగ్ ప్రశాంతంగా ముగిసినట్లు ఈసీ(Election Commission) ప్రకటించింది. ఇకపోతే భారత పార్లమెంటుకు జరుగుతున్న ఎన్నికలకు ఇంకా ఆరు దశల్లో పోలింగ్ ప్రక్రియ జరగాల్సి ఉంది.

పొలిటికల్ పార్టీలు ఇప్పటికే ప్రచారంలో నిమగ్నమయ్యాయి. సభలు, సమావేశాలు, ప్రచారాలతో ప్రజలను ఆకట్టుకునేందుకు నేతలు నానా తంటాలు పడుతున్నారు. ఈ పార్లమెంట్ ఎన్నికల్లో చాలా వరకు పార్టీలు పొత్తులతో ముందుకు వెళ్తున్నాయి. సింగిల్‌గా పోటీ చేస్తే జనాగ్రహాన్ని చూరగొనక తప్పదని వారికి అర్థం అయినట్లు తెలుస్తోంది.

ఇకపోతే దేశవ్యాప్తంగా పోలింగ్ సందర్భంగా ప్రభుత్వ ఉద్యోగులు చాలా మంది విధుల్లో ఉంటున్నారు. ఫలితంగా వీరికి తమ ఓటు హక్కును వినియోగించుకునేందుకు అవకాశం లేకపోతోంది.వీరి ఓటు హక్కు ఒక ప్రాంతంలో ఉంటే మరొక ప్రాంతంలో వీరు ఎన్నికల విధులు నిర్వహిస్తున్నారు.

అది గ్రహించిన ఏపీ ఉద్యోగ సంఘాల(AP Employees leaders) నేతలు మే తొలి వారంలో పోస్టల్ బ్యాలెట్(Postal ballot) ద్వారా ఓటు హక్కును వినియోగించుకునేందుకు సెలవు ఇవ్వాలని కోరుతూ సీఈసీ ముకేశ్ కుమార్ మీనాను కోరారు. సిబ్బందిని పోలింగ్ కేంద్రాల వద్దకు ముందురోజు మధ్యాహ్నం చేర్చేలా చర్యలు తీసుకోవాలని విజ్ఞప్తి చేశాయి. పోస్టల్ బ్యాలెట్ నమోదు, జారీ ప్రక్రియపై కొంతమంది అధికారుల్లో ఉన్న అనుమానాలను తొలగించాలని కోరాయి. కాగా, ఏపీలో నాలుగోదశ కింద మే 13న అసెంబ్లీతో పాటు పార్లమెంట్ ఎన్నికలకు పోలింగ్ జరగనుంది.

వివేకా హత్య కేసు(Viveka Murder Case) విషయమై ఆయన కుమార్తె సునీత(Sunitha) న్యాయపోరాటం చేస్తున్నారు. రాష్ట్రంలో లోక్‌సభ, అసెంబ్లీ ఎన్నికల వేళ ఈ అంశం హాట్ టాపిక్ అవుతోంది. ఈ తరుణంలో ఆమె వివేకా హత్య కేసు విషయంలో ఎలాంటి వ్యాఖ్యలు చేయొద్దంటూ కడప జిల్లా కోర్టు ఉత్తర్వులు జారీచేసిన సంగతి తెలిసిందే. దీనిపై తాజాగా సునీత స్పందించారు.

జిల్లా కోర్టు ఇచ్చిన తీర్పును సవాల్ చేస్తూ హైకోర్టు(High Court)ను ఆశ్రయించనున్నట్లు ఆమె తెలిపారు. వివేకా హత్యకేసు అంశంపై వైఎస్ షర్మిల, వివేకా కుమార్తె సునీత, చంద్రబాబునాయుడు, లోకేశ్, పురందేశ్వరి, పవన్ కల్యాణ్, పులివెందుల టీడీపీ అభ్యర్థి బీటెక్ రవి తరచూ మాట్లాడుతున్నారని, వారు ఈ వ్యాఖ్యలు చేయకుండా చూడాలని వైసీపీ వైఎస్సార్ జిల్లా అధ్యక్షుడు సురేష్‌బాబు కడప కోర్టులో పిటిషన్ వేశారు.

ప్రతివాదులు, వారి అనుచరులు, ఆయా పార్టీల అభ్యర్థులు ఈ కేసులో అవినాష్‌రెడ్డిని హంతకుడిగానూ, సీఎం జగన్ ఆయన్ను కాపాడుతున్నట్లుగానూ వ్యాఖ్యానిస్తున్నారన్నారు. ఇలా వారి ప్రతిష్టకు భంగం కలిగించేవి, వ్యాఖ్యలు చేయరాదని కోర్టు గురువారం ఆదేశించింది. తదుపరి విచారణను ఈ నెల 30కు వాయిదా వేస్తూ కడప జిల్లా ప్రధాన న్యాయమూర్తి జి.శ్రీదేవి మధ్యంతర ఉత్తర్వులు జారీ చేశారు.

ఈ నేపథ్యంలో సునీత మాట్లాడుతూ న్యాయం కోసం ప్రజాతీర్పు కోరుతుంటే వైసీపీ అడ్డుపడుతోందని ఆవేదన వ్యక్తం చేశారు. పులివెందులలో తాను ప్రచారం చేయకుండా కేసులు వేస్తున్నారని తెలిపారు. వివేకా హత్య అంశంపై వైసీపీ నేతలు చాలాసార్లు మాట్లాడారని అన్నారు. ప్రజల ఇళ్ల వద్దకు తాను రాలేకపోతే మన్నించాలని, ఎన్నికల్లో షర్మిలను గెలిపించే బాధ్యతను తీసుకోవాలని కోరారు.

వైఎస్ఆర్(YSR) హయాంలో ఉన్న ప్రజాదర్బార్ వారసుడి పాలనలో ఎక్కడ పోయిందని ఏపీసీసీ చీఫ్ వైఎస్ షర్మిల(YS Sharmila) ప్రశ్నించారు. ఎన్నికల ప్రచారంలో భాగంగా మడకశిర(Madakashira) నియోజక వర్గంలో నిర్వహించిన బహిరంగ సభలో ఆమె పాల్గొని మాట్లాడుతూ సీఎం జగన్‌పై కీలక వ్యాఖ్యలు చేశారు.

పెద్దపెద్ద కోటలు కట్టుకుని ఉన్న జగన్ ఎన్నికలు ఉన్నాయని సిద్ధం అంటూ బయటకు వస్తున్నారని విమర్శించారు. ప్రత్యేక హోదా విషయంలో బీజేపీ ఏపీ ప్రజలను మోసం చేసిందని, అయినా బాబు, జగన్ పోటీ పడి పొత్తులు పెట్టుకుంటున్నారని ఎద్దేవా చేశారు. చంద్రబాబు పొత్తు అయితే జగన్ తొత్తు అని సెటైర్ వేశారు.  బీజేపీకి గులాంగిరి చేస్తూ బానిసలుగా మారారని, రాష్ట్రాన్ని తాకట్టు పెట్టారంటూ షర్మిల తీవ్రస్థాయిలో విరుచుకుపడ్డారు.

ఒక్క సీటు లేని బీజేపీ రాష్ట్రంలో రాజ్యమేలుతోందన్నారు. బాబు, జగన్‌ ఇద్దరిలో ఎవరికి ఓటు వేసినా బీజేపీకి వేసినట్లేనన్నారు. ఇలాంటి వారికి ఓటు వేయడం అవసరమా? హోదా ఇవ్వని అలాంటి పార్టీలు మనకు అవసరమా? అని ప్రజలు ఆలోచించాలని సూచించారు. ప్రత్యేక హోదా అనేది రాష్ట్రానికి సంజీవని లాంటిదని షర్మిల వ్యాఖ్యానించారు. అలాంటి హోదా వచ్చి ఉంటే ఇవాళ వేల సంఖ్యలో పరిశ్రమలు వచ్చేవన్నారు.

హంద్రీనీవా ప్రాజెక్టు వైఎస్సార్ హయాంలో 90శాతం పూర్తయితే 2019ఎన్నికల్లో గెలిచిన చంద్రబాబు ఆ ప్రాజెక్టును పట్టించుకోలేదన్నారు. అదేవిధంగా ఇండస్ట్రియల్ కారిడార్ ఏర్పాటు చేస్తామని చెప్పి ఒక్క పరిశ్రమను నెలకొల్పలేదని దుయ్యబట్టారు. భూసేకరణ చేసినా పరిశ్రమలు తేలేదన్నారు. లెదర్ పార్క్, మడకశిర నియోజకవర్గం చుట్టూ రింగ్ రోడ్ హామీలను మర్చిపోయారని ఎద్దేవా చేశారు.

పదేళ్లుగా నియోజకవర్గాన్ని టీడీపీ, వైసీపీ మోసం చేస్తున్నాయని షర్మిల ఆరోపించారు. హోదా ఇచ్చేది కాంగ్రెస్ మాత్రమేనని ష్పష్టం చేశారు. రాష్ట్రంలో అధికారంలో వస్తే మొదటి సంతకం భారీగా ఉద్యోగాల కల్పనపైనే అన్నారు. 2.25 లక్షల ఉద్యోగాలను భర్తీ చేస్తామని తెలిపారు. మడకశిర ఎమ్మెల్యేగా సుధాకర్‌ను గెలిపించాలని, ఎంపీ గా సమద్ షాహిన్‌ను గెలిపించాలని షర్మిల ప్రజలను కోరారు.

అసెంబ్లీ, లోక్ సభ ఎన్నికల నేపథ్యంలో ఏపీ రాజకీయాలు(AP Politics) ఆసక్తికరంగా మారాయి. పార్టీలో సీటు రాని అభ్యర్థులు పక్కచూపులు చూస్తున్నారు. ఇప్పటికే ప్రధాన పార్టీల్లో అనేక మంది నేతలు రాజీనామాలు చేసి ఇతర పార్టీల్లో చేరారు. అంబేడ్కర్ కోనసీమ జిల్లా(Konaseema District) రాజోలు(Rajolu) నియోజకవర్గంలో రోజురోజుకి సమీకరణాలు మారుతున్నాయి.

రాజోలు స్థానంపై ప్రత్యేక దృష్టి సారించారు జనసేనాని పవన్ కల్యాణ్. ఈ ఎన్నికల్లో మరోసారి ఆ స్థానాన్ని దక్కించుకునేలా వ్యూహాలు సిద్ధం చేస్తున్నారు. రాజోలు బీఫామ్‌ను రిటైర్డ్ ఐఏఎస్ దేవ వరప్రసాద్‌కు ఇచ్చిన విషయం తెలిసిందే. ఈ క్రమంలో జనసేన పార్టీకి బిగ్ షాక్ తగిలింది. రాజోలు నుంచి టికెట్ ఆశించిన బొంతు రాజేశ్వర రావు జనసేన పార్టీకి రాజీనామా చేశారు.

రేపు జగన్ సమక్షంలో కాకినాడలో సొంత గూటికి బొంతు రాజేశ్వరరావు చేరునున్నారు. అయితే, రాజోలు నియోజకవర్గానికి జనసేన పార్టీలో ఒక ప్రత్యేక అనుంబంధం ఉందని చెప్పవచ్చు. రాష్ట్రవ్యాప్తంగా గత ఎన్నికల్లో జనసేనకు ఎదురుగాలి వీచినా.. రాజోలులో మాత్రం జనసేన జెండా ఎగిరింది.

రాజోలు నియోజకవర్గ ప్రజలు ఆ స్థానం నుంచి జనసేన తరఫున పోటీ చేసిన రాపాక వరప్రసాద్‌కు విజయాన్ని కట్టబెట్టారు. అయితే ఆయన అనూహ్యంగా వైసీపీలో చేరారు. దీంతో జనసేన చేతి నుంచి ఆ ఒక్క సీటు కూడా చేజారింది. ఈసారి టికెట్ కోసం జనసేనకు వచ్చిన ఆయనకు సీటు ఇవ్వకపోవడంతో వరప్రసాద్ మళ్లీ వైసీపీలో చేరనున్నట్లు తెలుస్తోంది.

ఎన్నికల్లో పోటీ చేసే జనసేన అభ్యర్థులకు ఆ పార్టీ అధినేత పవన్ కల్యాణ్(Pawan Kalyan) బీఫామ్‌లు అందజేశారు. మంగళగిరి(Mangalagiri)లోని పార్టీ కేంద్ర కార్యాలయంలో ఏర్పాటు చేసిన కార్యక్రమంలో అసెంబ్లీ, లోక్‌సభ స్థానాల్లో పోటీ చేస్తున్న అభ్యర్థులతో ప్రతిజ్ఞ చేయించారు. పొత్తులో భాగంగా జనసేన నుంచి 21 అసెంబ్లీ, ఇద్దరు లోక్ సభకు పోటీ చేస్తున్న విషయం తెలిసిందే.

ఈ మేరకు తొలుత నాదెండ్ల మనోహర్‌కు జనసేన అధినేత పవన్ కల్యాణ్ బీఫామ్ అందజేశారు. ఈ సందర్భంగా పవన్ కల్యాణ్ మాట్లాడుతూ… ఐదేళ్ల వైకాపా పాలనలో రాష్ట్రం అధోగతి పాలైందని విమర్శించారు. వివాదాలకు తావు లేకుండా అందరి సమన్వయంతో ఏపీని పునర్నిర్మించుకోవాలని పిలుపునిచ్చారు. ప్రజలే తన దేవుళ్లని, వారికి నిత్యం అందుబాటులో ఉంటామని జనసేనాని స్పష్టం చేశారు.

పోలవరం పూర్తి, నదుల అనుసంధానం, విద్య, ఉపాధి అవకాశాలు, అభివృద్ధికి కంకణ బద్దులై పని చేస్తామన్నారు. వలసలు లేని, పస్తులు లేని వికసిత ఏపీ ఏర్పాటు అందరి బాధ్యత అని పవన్ కల్యాణ్ వ్యాఖ్యానించారు. టీడీపీ, బీజేపీతో కలిసి ఎన్డీఏ కూటమి గెలుపునకు చిత్తశుద్ధితో కృషి చేస్తామన్నారు. రాజ్యాంగం సాక్షిగా వీటికి కట్టుబడి పని చేస్తామని ప్రతిజ్ఞ చేస్తున్నామన్నారు.

ఈ ఎన్నిక చాలా కీలకమైనదని, ఓట్లు చీలకుండా ఉండేందుకే పొత్తులకు వెళ్లామని పునరుద్ఘాటించారు. ఈ అవినీతి, రాక్షస పాలనను తరిమి కొట్టాలన్నారు. నిబద్ధతతో పనిచేయాలనే అందరితో ప్రతిజ్ఞను చేయించామని, శ్రీరామ నవమి రోజు అందరం బి ఫారాలు తీసుకున్నామని, త్వరలో రామరాజ్యం స్థాపిద్దామని అన్నారు.

బీసీ నేతలను ఇరికించేందుకు జగన్ కుట్ర చేస్తున్నాడని టీడీపీ రాష్ట్ర చీఫ్ అచ్చెనాయుడు(TDP state chief Atchannaidu) ఆరోపించారు. కత్తి డ్రామాలో ఎస్సీ బిడ్డను ఐదేళ్లు జైలు పాలు చేశారని, ఇప్పుడు మళ్లీ జగన్‌పైగా గులకరాయి డ్రామాలో బీసీ నేత సతీశ్‌ను ఇరికించాలని చూస్తున్నారని మండిపడ్డారు. అసలు జగన్‌(CM Jagan)పై దాడికి టీడీపీకి సంబంధమేంటని ప్రశ్నించారు.

అధికారంలో ఉన్న వారే దీనికి బాధ్యత వహించాలని డిమాండ్ చేశారు. మూడు రోజుల కిందట టీడీపీ కార్యకర్త వేముల దుర్గారావును అదుపులోకి తీసుకుని ఇప్పటి వరకు మీడియా ముందుకు ఎందుకు ప్రవేశపెట్టలేదని అచ్చెన్నాయుడు నిలదీశారు. బోండా ఉమా పేరు చెప్పాలంటూ దుర్గారావును మూడు రోజుల నుంచి చిత్రహింసలు పెడుతున్నారని ఆగ్రహం వ్యక్తం చేశారు.

బోండా ఉమతో పాటు టీడీపీ నేతలను అక్రమంగా ఇరికించే కుట్రపై ఇప్పటికే ఎన్నికల కమిషన్‌కు ఫిర్యాదు చేశామని తెలిపారు. తప్పులు మీరు చేసి మాపై కేసులు పెడతామంటే చూస్తూ ఊరుకోమంటూ అచ్చెన్నాయుడు ఆక్షేపించారు. తెలంగాణలో చట్ట విరుద్దంగా ఫోన్ ట్యాపింగ్ చేసి అధికారులు ఏవిధంగా జైలుపాలయ్యారో వైసీపీ నేతలు మాటలు వినే పోలీసుల అధికారులకు గతి అంతే అన్నారు.

తప్పుడు కేసులు పెడుతున్న ఏ ఒక్క పోలీసు అధికారిని వదలమని హెచ్చరించారు. మరో నెల రోజుల్లో ఎన్డీయే కూటమి అధికారంలోకి వస్తుందని ధీమా వ్యక్తం చేశారు. గులకరాయి కేసులో చట్ట విరుద్దంగా వ్యవహరించిన వారిపై, ఈ డ్రామాను నడిపిన వారిపై కఠిన చర్యలు తప్పవని అచ్చెన్నాయుడు పునరుద్ఘాటించారు.