Breaking News

ఎన్నికలు (Elections) దగ్గర పడుతున్న నేపథ్యంలో కాంగ్రెస్ (Congress) దూకుడు పెంచింది. పోలింగ్ తేదీ వరకు వీలైనంత మంది పార్టీ జాతీయ నేతలను రాష్ట్రానికి పిలిపించి ప్రచారం చేయాలని భావిస్తోంది. ఈ క్రమంలో కాంగ్రెస్ అగ్రనేత రాహుల్ గాంధీ (Rahul Gandhi) మరోసారి తెలంగాణలో పర్యటించనున్నారు. ఈ నెల 17న రాహుల్ గాంధీ తెలంగాణకు రానున్నారు.

17న పాలకుర్తి, వరంగల్‌, భువనగిరిలో నిర్వహించే సభల్లో రాహుల్ గాంధీ పాల్గొని ప్రసంగిస్తారు. మొత్తం ఆరు రోజుల పాటు ఆయన ేప్రచారంలో పాల్గొంటారు. ఇప్పటికే ఈ మేరకు రెండు హెలికాప్టర్లను కాంగ్రెస్ సిద్ధం చేసుకుంది. అదే రోజు రాష్ట్రంలో ప్రియాంక గాంధీ, మల్లికార్జున ఖర్గే సమావేశాలు ఉండే అవకాశం ఉందని పార్టీ వర్గాలు చెబుతున్నాయి.

వారి పర్యటనకు సంబంధించి తేదీలను రేపు ఖరారు చేసే అవకాశం ఉంది. పలు తేదీల్లో వారు ఆరు రోజుల పాటు ఎన్నికల ప్రచారంలో పాల్గొంటారని పార్టీ శ్రేణులు వెల్లడించాయి. రాష్ట్రంలోని అన్ని నియోజక వర్గాలను కవర్ చేసేలా వీఐపీ పర్యటనలకు కాంగ్రెస్ ప్రణాళికలు రెడీ చేస్తోంది.
స్వ
ఇది ఇలా వుంటే ఈ నెల 7 నుంచి పీసీసీ అధ్యక్షుడు రేవంత్‌రెడ్డి రాష్ట్ర వ్యాప్తంగా సుడిగాలి పర్యటన చేస్తున్నారు. రోజుకు మూడు నియోజక వర్గాల చొప్పున ఆయన ప్రచారం చేస్తున్నారు. మరోవైపు హైదరాబాద్‌ వచ్చిన ఏఐసీసీ ప్రధాన కార్యదర్శి కేసీ వేణుగోపాల్ పార్టీ పరిస్థితులపై సమీక్షించినట్టు తెలుస్తోంది. రాష్ట్ర రాజకీయాలు, పార్టీ పరిస్థితి, రాష్ట్రంలో జరుగుతున్న ప్రచారం, నేతల మధ్య విభేదాల గురించి ఆయన ఏఐసీసీ పరిశీలకులతో సమీక్షించినట్టు సమాచారం.

ఎంఐఎం(AIMIM) ఎమ్మెల్యే అక్బరుద్దీన్ ఓవైసీ (Akbaruddin Owaisi) సంచలన వ్యాఖ్యలు చేశారు. తెలంగాణలో రెడ్డి, రావు ఎవరైనా సరే తమ ముందు తల వంచాల్సిందేనన్నారు. నెహ్రూ దేశ విభజన చేయడం వల్లే దేశం రెండుగా విడిపోయిందన్నారు. దేశంలో ప్రతిసారీ హిందూ ముస్లిం ఘర్షణలు తీసుకు వచ్చింది కాంగ్రెస్ పార్టీనేనని ఆరోపణలు గుప్పించారు.

గాజి ఏ మిల్లత కాలనీలో అక్బరుద్దీన్ ఓవైసీ పర్యటించారు. ఈ సందర్భంగా టీపీసీసీ చీఫ్ రేవంత్ రెడ్డి చేసిన కామెంట్స్ పై ఆయన తీవ్ర స్థాయిలో విరుచుకు పడ్డారు. తమ జోలికి రావద్దంటూ రేవంత్ రెడ్డికి సూచించారు. తమ జోలికి వస్తే రేవంత్ రెడ్డి జీవిత చరిత్రను బట్టబయలు చేస్తామని వార్నింగ్ ఇచ్చారు.

కావాలంటే తనను, తన అన్న అసదుద్దీన్ ఓవైసీని తిట్టాలన్నారు. తన తమ్ముడికి రాజకీయాల గురించి తెలియదన్నారు. అందువల్ల తమ కుటుంబం జోలికి రావద్దన్నారు. రేవంత్ రెడ్డి ముందు ఆర్ఎస్ఎస్, టీడీపీ, ఇప్పుడు కాంగ్రెస్ లో కొనసాగుతున్నారని తెలిపారు. అందుకే ఆయన్ని ఆర్ఎస్ఎస్ టిల్లు అని పిలవాలన్నారు.

వాహద్ ఓవైసీనీ కాంగ్రెస్ 11 నెలలు జైలులో ఉంచిందన్నారు. సలర్‌ను కూడా జైలుకు పంపించారని మండిపడ్డారు. అసదుద్దీన్ ఓవైసీపై కేసులు పెట్టారని ఫైర్ అయ్యారు. తనను నిజామాబాద్ జైలులో ఉంచారని అన్నారు. తనకు ట్రీట్ మెంట్ చేయలేదంటే దానికి కారణం కూడా కాంగ్రెస్ అన్నారు. కాబట్టి తమను రెచ్చగొట్టవద్దని రేవంత్ రెడ్డికి సూచించారు.

ఇప్పటి వరకు దేశంలో ప్రతి సారి హిందూ- ముస్లింల గొడవలు తెచ్చింది కాంగ్రెస్ అంటూ తీవ్ర వ్యాఖ్యలు చేశారు. ఇప్పటి వరకు జరిగిన 55 మతపరమైన గొడవలకు కారణం కాంగ్రెస్సే అని నిప్పులు చెరిగారు. నెహ్రూ దేశ విభజన వల్లనే భారత్-పాకిస్థాన్ రెండు భాగాలు అయ్యిందన్నారు. లేదంటే ఒకే దేశం ఉండేదన్నారు.

ఎస్సీ వర్గీకరణపై కేంద్ర మంత్రి కిషన్ రెడ్డి (Kishan Reddy) కీలక వ్యాఖ్యలు చేశారు. ఎస్సీ వర్గీకరణ (SC Classification) సమస్యను ప్రధాని మోడీ అర్థం చేసుకున్నారని తెలిపారు. దశాబ్దాల నాటి సమస్యను మోడీ పరిష్కరిస్తున్నారని చెప్పారు. వర్గీకరణకు అనుకూలమని గతంలో కాంగ్రెస్ చెప్పిందన్నారు. కానీ ఆ విషయంలో ఏమీ చేయలేకపోయిందన్నారు.

ఎస్సీ వర్గీకరణపై ప్రధాని మోడీ హామీ ఇవ్వగానే ప్రతిపక్షాలకు భయం పట్టుకుందన్నారు. ప్రధాని మోడీ తలుచుకుంటే ఎస్పీ వర్గీకరణ చేసి చూపిస్తారని అన్నారు. అన్ని వర్గాలకు న్యాయం చేయాలన్నదే ప్రధాని మోడీ ప్రయత్నమని పేర్కొన్నారు. ఎస్సీ వర్గరీకరణపై గతంలో ఎన్నో కమిటీలు వేశారని అన్నారు.

వర్గీకరణ అంశాన్ని గతంలో ఏ ప్రధాని కూడా సీరియస్ తీసుకోలేదన్నారు. వర్గీకరణ సమస్యను కాంగ్రెస్ ఏండ్ల తరబడి కోల్డ్ స్టోరేజీలో పెట్టిందని మండిపడ్డారు. గతంలో ఏ ప్రభుత్వం కూడా వర్గీకరణపై ఇంత చిత్తశుద్దితో పనిచేయలేదని వెల్లడించారు. ఈ విషయంలో కాంగ్రెస్ ప్రథమ ముద్దాయి అని ఫైర్ అయ్యారు.

కొంతమంది రాజకీయ నాయకులు కోడిగుడ్డు మీద ఈకలు పీకినట్లు వ్యాఖ్యలు చేస్తున్నారంటూ ఆగ్రహం వ్యక్తం చేశారు. ఎస్సీ వర్గీకరణపై కేంద్రం ఓ కమిటీని ఏర్పాటు చేస్తుందన్నారు. వర్గీకరణ సమస్య పరిష్కారానికి బీజేపీ సంపూర్ణ మద్దతిస్తుందని స్పష్టం చేశారు. న్యాయపరంగా..చట్టపరంగా ఎలాంటి ఇబ్బందులు రాకుండా చూస్తామని హామీ ఇచ్చారు.

మనకు స్వతంత్య్రం వచ్చి 75 ఏండ్లు గడుస్తోందని, ఇంకా మన దేశంలో రావాల్సినంత పరిణితి రాలేదని సీఎం కేసీఆర్ అన్నారు. ఎన్నికలు వస్తుంటాయ్.. పోతుంటాయ్ అన్నారు. కానీ ప్రజలు మాత్రం ఆగం కావద్దన్నారు. నిదానంగా మంచీ చెడులు ఆలోచించి ఓటు వేయాలని ప్రజలకు ఆయన సూచించారు.

అశ్వారావుపేట నియోజకవర్గం దమ్మపేటలో ప్రజా ఆశీర్వాద సభను నిర్వహించారు. ఆ సభలో సీఎం కేసీఆర్ పాల్గొని మాట్లాడుతూ…. ఎన్నికలు చాలా వస్తుంటాయన్నారు. మీరు చాలానే ఎన్నికల్లో పాల్గొన్నారన్నారు. ఎన్నికలు వస్తే పార్టీకి ఒకరు నిలబడుతారన్నారు. బీఆర్ఎస్ నుంచి నాగేశ్వర్‌రావు నిలబడ్డారని చెప్పారు.

బీజేపీ, కాంగ్రెస్‌ నుంచి ఇతర వ్యక్తులు నిలబడతారని వెల్లడించారు. వ్యక్తుల వెనుక పార్టీలు వున్నాయన్నారు. ఏ పార్టీ చరిత్ర ఏంటో తెలసుకుని ఓటు వేయాలన్నారు. ఆయా పార్టీలకు అధికారం ఇస్తే ఏం ఆలోచిస్తారు.. బీదల గురించి ఆయా పార్టీల దృక్పథం ఎలా వుంది? అనే అంశాలపై గ్రామాల్లో, పట్టణాల్లో చర్చ జరగాలన్నారు.

ఆ చర్చల్లో అన్ని విషయాలను తేల్చినంక మాత్రమే ఓట్లు వేయాలన్నారు. ఎన్నికల్లో నేతలు గెలవడం కాదు… ప్రజలు విజయం సాధించడమనేది ప్రారంభమవుతుందన్నారు. ప్రజలు గెలిస్తే మంచి ఫలితాలు వస్తాయన్నారు. మొదట తెలంగాణ రాష్ట్రం మనకే ఉండేనన్నారు. కానీ దాన్ని బలవంతంగా ఆంధ్రాలో కలిపారన్నారు.

హైదరాబాద్‌ రాష్ట్రం ఉండి వుంటే ఈ సమయానికి మన ప్రాజెక్టులు పూర్తయి చాలా ధనిక రాష్ట్రంగా ఉండేవాళ్లమన్నారు. అదే జరిగితే మన దరిద్రమంతా తీరిపోయేదన్నారు. సమైక్య రాష్ట్రంలో కలవడంతో వాళ్ల దృక్పథం ఎంత సేపు వాళ్ల వైపే కానీ మన వైపు లేకుండేదని అన్నారు. అందువల్లనే బాధలు అనుభవించామన్నారు.

అందుకే పార్టీల చరిత్ర చూడాలని తాను చెబుతున్నానన్నారు. అభివృద్ధి చెందిన, చెందుతున్న దేశాల్లో ఎన్నికలు వస్తే మన దేశంలో ఉన్నంత హడావుడి ఉండదు. ఇక్కడ జరిగినట్టు పెద్ద పెద్ద సభలు జరగవన్నారు. టీవీ సందేశాలు, పాలసీ మెసేజ్ ల ద్వారా జరుగుతూ ఉంటాయని పేర్కొన్నారు.

మన దేశంలో అలాంటి వ్యవస్థ రాలేదన్నారు. మన దేశంలో ఎన్నికలు వచ్చాయంటే చాలు అబద్ధాలు, అబండాలు, నెరవేర్చేందుకు వీలుగానీ వాగ్దానాలు ఉంటాయన్నారు. ప్రజల్లో తీవ్ర అసంతృప్తి చూస్తున్నామన్నారు. ఇదంతా పోవాలంటే తాను కోరుకున్న ప్రజాస్వామ్య పరిణితి రావాలన్నారు.

తెలంగాణను ఊడగొట్టి.. ఆంధ్రాలో కలిపిన పార్టీ ఏది? అని ప్రశ్నించారు. ఆ పని చేసింది కాంగ్రెస్సే కదా అని మండిపడ్డారు.. ఎన్ని సార్లు ఉద్యమాలు వచ్చినా అణచివేసింది ఎవరు ? అని నిలదీశారు. 1969లో ఉద్యమం వస్తే 400 మందిని కాల్చి చంపారని ఆగ్ర హం వ్యక్తం చేశారు. మనం ఉద్యమం ప్రారంభించిన తర్వాత 2004లో మనతో పొత్తు పెట్టుకున్నారన్నారు.

పొత్తుల ప్రకారం చూస్తే న్యాయబద్ధంగా 2004, 2006లోనే తెలంగాణ ఇవ్వాల్సిందన్నారు. కానీ, మోసం చేసి తెలంగాణ ఎగబెట్టే ప్రయత్నం చేసిందన్నారు. మనం ఉధృతంగా పోరాటాలు చేసి, ఎదురొడ్డి పోరాటం చేసిన తర్వాత 14 ఏండ్ల తర్వాత కేసీఆర్‌ సచ్చుడో.. తెలంగాణ వచ్చుడో అని తాను ఆమరణ దీక్షకు దిగితే అప్పుడు తెలంగాణను ప్రకటించారన్నారు. వెంటనే ఆ ప్రకటన నుంచి వెనక్కి వెళ్లారన్నారు. మళ్లీ ఏడాదిన్న ఉధృతంగా పోరాటాలు చేస్తే అప్పుడు దిగివచ్చి తెలంగాణ ఇచ్చారన్నారు.

ఈ సభలో కాంగ్రెస్‌ నేత, మాజీ ఎమ్మెల్యే తాటి వెంకటేశ్వర్లు బీఆర్ఎస్ తీర్థం పుచ్చుకున్నారు. సీఎం కేసీఆర్ సమక్షంలో ఆయన బీఆర్ఎస్ లో చేరారు. సీఎం కేసీఆర్‌తోనే తెలంగాణ అభివృద్ధి సాధ్యమని వెంకటేశ్వర్లు తెలిపారు. సీఎం కేసీఆర్‌ ఆశయాలకు అనుగుణంగా పని చేస్తూ బీఆర్‌ఎస్‌ విజయానికి కృషి చేస్తానన్నారు.

యాదాద్రి (Yadadri) ఆలయంలో విషాదం చోటు చేసుకుంది. దైవ దర్శనం కోసం క్యూలో నిలబడిన ఓ భక్తురాలికి గుండె పోటు (Heart Attack) వచ్చింది. దీంతో ఆమె ఒక్కసారిగా కుప్పకూలింది. క్యూ లైన్ లోనే ప్రాణాలు విడవడంతో భక్తులు ఒక్కసారిగా ఆందోళనకు గురయ్యారు.

మహబూబ్ నగర్ జిల్లా నారాయణ పేటకు చెందిన ముత్తమ్మ (65) యాదాద్రి లక్ష్మీ నరసింహస్వామి దర్శనం కోసం వచ్చింది. స్వామి వారిని దర్శించుకునేందుకు కుటుంబ సభ్యులతో కలిసి క్యూలైన్ లో ఆమె నిల్చుంది. అప్పటి వరకు బాగానే ఉన్న ముత్తమ్మ ఒక్కసారిగా కుప్పకూలిపోయింది.

ముత్తమ్మకు ఏమైందని చూసేలోపే ఆమె తుది శ్వాసవిడిచింది. వెంటనే ఆలయ సిబ్బంది సహాయంతో ఆమె మృత దేహాన్ని భువనగిరి ఏరియా ఆస్పత్రికి తరలించారు. దైవ సన్నిధిలోనే భక్తురాలు మృతి చెందడంతో వెంటనే అర్చకులు ఆలయాన్ని మూసి వేశారు.

అనంతరం శుద్ది సంప్రోక్షణ చేశారు. ఆ తర్వాత ఆలయాన్ని తెరచి భక్తులను దర్శనానికి అనుమతించారు. కార్తిక మాసం కావడం, సోమవారం సెలవు దినం కావడంతో ఆలయానికి భక్తులు భారీగా వచ్చారు. దీంతో క్యూలైన్ లో నిల్చోవాల్సిన పరిస్థితి వచ్చిందని ఆలయ వర్గాలు చెబుతున్నాయి.