Breaking News

మధ్యప్రదేశ్ ముఖ్యమంత్రి శివరాజ్ సింగ్ చౌహాన్ (Shivaraj Singh Chouhan) పై ఆ రాష్ట్ర కాంగ్రెస్ చీఫ్ కమల్ నాథ్ (Kamalnath) తీవ్ర స్థాయిలో విరుచుకు పడ్డారు. రాబోయే ఎన్నికల్లో శివరాజ్ సింగ్ చౌహాన్ ప్రభుత్వానికి ప్రజలు వీడ్కోలు పలుకుతారని అన్నారు. కానీ శివరాజ్ సింగ్ చౌహాన్ మంచి నటుడని అందుకే ఆయన రాజకీయ నిరుద్యోగిగా ఉండరన్నారు.

సాగర్ జిల్లాలోని రెల్హి అసెంబ్లీ నియోజక వర్గంలో నిర్వహించిన ఎన్నికల ర్యాలీలో ఆయన పాల్గొన్నారు. ఈ ర్యాలీలో ఆయన మాట్లాడుతూ…. పోలీసులు, డబ్బు, పరిపాలనతో నడిచే బీజేపీ ప్రభుత్వానికి ఇంకా కేవలం నాలుగు రోజులు మాత్రమే మిగిలి ఉన్నాయని కమల్ నాథ్ చెప్పారు.

ఎన్నికల అనంతరం శివరాజ్ సింగ్ చౌహాన్ సీఎం పదవి కోల్పోతారన్నారు. అయినప్పటికీ ఆయన నిరుద్యోగిగా మారడన్నారు. శివరాజ్ సింగ్ మంచి నటుడని అన్నారు. నటనా వృత్తిని కొనసాగించేందుకు, మధ్యప్రదేశ్ కు కీర్తిని తీసుకు వచ్చేందుకు శివరాజ్ సింగ్ ముంబైకి వెళ్తారంటూ ఎద్దేవా చేశారు.

రాష్ట్రంలో యువతకు లక్ష ఉద్యోగాలు కల్పిస్తామని శివరాజ్ సింగ్ గతంలో హామీ ఇచ్చాడన్నారు. కానీ ఉద్యోగాల భర్తీ చేయలేదన్నారు. ఆ విషయాన్ని పక్కన పెడితే కనీసం బ్యాక్ లాగ్ పోస్టులనైనా ఆ ప్రభుత్వం భర్తీ చేయాల్సిందన్నారు. చౌహాన్ ప్రభుత్వ ఉద్దేశమేంటో ప్రజలు అర్థం చేసుకోవాలన్నారు.

ఛత్తీస్‌గఢ్‌ (Chhattisgarh)లో మహిళ ఓటర్లను ఆకర్షించేందుకు కాంగ్రెస్ (Congress) మరో కీలక హామీ ఇచ్చింది. రాబోయే ఎన్నికల్లో కాంగ్రెస్ ప్రభుత్వం అధికారంలోకి వస్తే రాష్ట్రంలో గృహలక్ష్మీ యోజన పథకాన్ని అమలు చేస్తామని సీఎం భూపేశ్ బాఘేల్ వెల్లడించారు. ఈ పథకం కింద మహిళలకు ఏడాదికి రూ. 15000ల చొప్పున మహిళల బ్యాంకు ఖాతాల్లో జమచేస్తామన్నారు.

ఈ నూతన పథకం గురించి సీఎం భూపేశ్ బఘేల్ మీడియా సమావేశంలో తెలిపారు. మొదట రాష్ట్ర ప్రజలకు ఆయన దీపావళి శుభాకాంక్షలు తెలిపారు. నేడు దీపావళి శుభ సందర్భంగా మాత లక్ష్మి జీ, ఛత్తీస్‌గఢ్ మహతారి ఆశీర్వాదంతో, మహిళా సాధికారత కోసం ఒక ముఖ్యమైన నిర్ణయం తీసుకున్నామని సీఎం వెల్లడించారు.

చత్తీస్‌గఢ్‌లో మొత్తం 90 అసెంబ్లీ స్థానాలు ఉన్నాయి. చత్తీస్ గఢ్‌లో రెండు విడతల్లో ఎన్నికలు నిర్వహిస్తున్నారు. రాష్ట్రంలోని 20 అసెంబ్లీ స్థానాలకు నవంబర్ 7 పోలింగ్ నిర్వహించారు. మిగిలిన 70 స్థానాలకు ఈ నెల 17న రెండవ విడత ఎన్నికలను నిర్వహించనున్నారు.

అంతకు ముందు ఈ నెల 5న కాంగ్రెస్ తన మెనిఫెస్టోను ప్రకటించింది. రాష్ట్రంలో కాంగ్రెస్ అధికారంలోకి వస్తే కుల గణన చేపట్టనున్నట్టు వెల్లడించింది. రైతుల రుణాలను మాఫీ చేస్తామని, ఎల్పీజీ గ్యాస్ సిలిండర్లను సబ్సిడీ ధరకు అందిస్తామని మెనిఫెస్టోలో కాంగ్రెస్ హామీ ఇచ్చింది.

ప్రధాని మోడీ (PM Modi) సైనికులతో కలిసి దీపావళి (Deepawali) వేడుకలు జరుపుకుంటున్నారు. జవాన్లతో కలిసి దీపావళి జరుపుకునేందుకు గాను ప్రధాని మోడీ ఈ రోజ ఉదయం హిమాచల్ ప్రదేశ్ లోని లెప్చాకు చేరుకున్నారు. ఆ విషయాన్ని ప్రధాని మోడీ ట్విట్టర్ ద్వారా వెల్లడించారు. అక్కడ జవాన్లతో కలిసి దిగిన ఫోటోలను ప్రధాని మోడీ షేర్ చేశారు.

సైనిక దుస్తుల్లో ఉన్న ప్రధాని మోడీ జవాన్లతో ముచ్చటిస్తూ ఉండటం ఫోటోల్లో కనిపిస్తోంది. ఇది ఇలా వుంటే దీపావళి నేపథ్యంలో దేశ ప్రజలకు ప్రధాని మోడీ శుభాకాంక్షలు తెలిపారు. ఈ దీపావళి పండుగ మీ అందరి జీవితాల్లో అంతులేని ఆనందాన్ని నింపాలని, మంచి ఆరోగ్యాన్ని అందించాలని తాను కోరుకుంటున్నట్టు చెప్పారు.

మన ధైర్యమైన భద్రతా దళాలతో కలిసి తాను లెప్చాలో దీపావళి జరుపుకుంటున్నట్టు తెలిపారు. 2014లో ప్రధానిగా పదవీ బాధ్యతలు చేప్పటినప్పటి నుంచి ప్రతి ఏటా సైన్యంతో నరేంద్ర మోడీ దీపావళి వేడుకలు జరుపుకుంటున్నారు. జవాన్లతో ప్రధాని దీపావళి జరుపుకోవడం వరుసగా ఇది తొమ్మిదవ సారి కావడం విశేషం.

2014లో ప్రధాని మోడీ మొదటి సారి సియాచిన్ ప్రాంతంలో సైనికులతో కలిసి దీపావళి వేడుకల్లో పాల్గొన్నారు. ఆ తర్వాత సంవత్సరం 1965 యుద్ధంలో భారత సైన్యం సాధించిన విజయాలను పురస్కరించుకుని పంజాబ్‌లోని మూడు స్మారక చిహ్నాలను మోడీ సందర్శించారు. 2016లో హిమాచల్ ప్రదేశ్ లో చైనా సరిహద్దుల్లోని సైనికులతో ఆయన ఇంటరాక్ట్ అయ్యారు.

2017లో ఉత్తర కశ్మీర్ లోని గురేజ్ సెక్టార్ కు ప్రధాని మోడీ వెళ్లారు. 2018లో ఉత్తరాఖండ్ లోని హర్సిల్ ప్రాంతంలో సైనికులతో కలిసి దీపావళి వేడుకలు చేసుకున్నారు. 2019లో జమ్ము కశ్మీర్ లోని రాజౌరి ప్రాంతంలో సైనికులను ఆయన కలిశారు. 2020లో లాంగేవాలా, 2021లో కశ్మీర్ లోని నౌషెరా, 2022లో కార్గిల్ లో మోడీ దీపావళి జరుపుకున్నారు.

ఉత్తరాఖండ్‌ (Uttarakhand) లో ఘోర ప్రమాదం చోటు చేసుకుంది. ఉత్తర కాశీ జిల్లాలో నిర్మాణంలో ఉన్న సొరంగం (Tunnel) ఒకటి కూలి (Collapsed) పోయింది. సొరంగంలో 40 మంది కూలీలు చిక్కుకున్నారు. సమాచారం అందుకున్న రాష్ట్ర విపత్తు ప్రతిస్పందన బృందాలు ఘటనా స్థలానికి చేరుకున్నాయి.

వెంటనే సహాయక చర్యలు మొదలు పెట్టాయి. యమునోత్రి జాతీయ రహదారి విస్తరణ పనుల్లో భాగంగా సొరంగ నిర్మాణం చేపట్టారు. సిల్క్యారా నుంచి దండల్‌ గావ్ వరకు ఈ సొరంగ మార్గాన్ని నిర్మిస్తున్నారు. నిర్మాణ పనుల్లో కూలీలు పాల్గొన్న సమయంలో సొరంగం ఒక్క సారిగా కూలిపోయింది.

ప్రాణ నష్టం గురించి ఇంకా ఎలాంటి సమాచారం లేదని అధికారులు తెలిపారు. సొరంగంలో చిక్కుకున్న వారిని రక్షించేందుకు ప్రయత్నిస్తుమన్నారు. కూలీలను రక్షించేందుకు మూడు రోజుల సమయం పట్టవచ్చని అంచనా వేస్తున్నట్టు పేర్కొన్నారు.

శిథిలాలను తొలగించేందుకు వర్టికల్ డ్రిల్లింగ్ మిషన్లను ఉపయోగిస్తున్నామన్నారు. సొరంగంలోకి ఆక్సిజన్ పైపులు పంపి రక్షణ చర్యలు చేపట్టామన్నారు. ఘటనా స్థలంలో పోలీసు బలగాలు, రాష్ట్ర, జాతీయ విపత్తు ప్రతిస్పందన బృందాలు సహాయక చర్యలు చేపడుతున్నాయని అన్నారు.

దీపావళి పండుగ రోజు రాజస్థాన్‌ (Rajasthan)లో విషాదం చోటు చేసుకుంది. బుండి జిల్లాలో కారు(Car), ట్రక్కు (Truck) ఒకదానికొకటి ఢీ కొన్నాయి. ఈ ఘటనలో నలుగురు మృతి చెందారు. మృతులంతా ఒకే కుటుంబానికి చెందిన వారని పోలీసులు వెల్లడించారు. మధ్యప్రదేశ్ నుంచి పుష్కర్ ప్రాంతానికి వెళ్తుండగా ప్రమాదం చోటు చేసుకున్నట్టు తెలిపారు.

హిందోళీ పోలీసు స్టేషన్ పరిధిలో జాతీయ రహదారి 52పై వెళ్తుండగా ఓ ట్రక్కును కారు ఢీ కొట్టింది. దీంతో కారులో ప్రయాణిస్తున్న నలుగురు మృతి చెందారు. మృతులను దేవీ సింగ్ (50), ఆయన భార్య మాన్ కోర్ కన్వర్ (45), రాజారాం (40), జితేంద్ర (20)లుగా గుర్తించినట్టు పోలీసులు పేర్కొన్నారు.

జాతీయ రహదారిపై కారు వేగంగా వెళ్తోందని హిందోళ్ సీఐ మనోజ్ సికర్వాల్ తెలిపారు. ఆ సమయంలో ముందు వెళ్తున్న ట్రక్కు సడెన్ బ్రేక్ వేసినట్టు వెల్లడించారు. ఈ క్రమంలో ట్రక్కును కారు ఢీ కొట్టిందన్నారు. దీంతో ముగ్గురు అక్కడికక్కడే మృతి చెందారన్నారు. మాన్ కోర్ కన్వర్ కు తీవ్రగాయాలైనట్టు చెప్పారు.

మహిళను సమీపంలోని ఆస్పత్రికి తరలించామన్నారు. చికిత్స పొందుతూ మహిళ మృతి చెందారన్నారు. ప్రస్తుతం డ్రైవర్ పరారీలో ఉన్నాడన్నారు. నిందితుని కోసం గాలింపు చర్యలు చేపట్టామన్నారు. మృత దేహాలకు శవపరీక్షలను నిర్వహిస్తున్నట్టు వివరించారు

దేశ వ్యాప్తంగా దీపావళి (Deepavali) వేడుకలను ఘనంగా జరుపుకుంటున్నారు. పండుగ నేపథ్యంలో బస్టాండులు(Bus Stand), రైల్వే స్టేషన్లు చాలా రద్దీగా కనిపిస్తున్నాయి. అయితే పండుగ నేపథ్యంలో పెరిగిన రద్దీకి అనుకూలంగా ఏర్పాట్లను చేయడంలో భారతీయ రైల్వే విఫలం అయిందంటు సామాన్య ప్రజల నుంచి విమర్శలు వెల్లువెత్తుతున్నాయి.

ఎక్కడ చూసినా రద్దీగా ఉన్న రైళ్లు, టికెట్ కౌంటర్ల వద్ద భారీగా క్యూ లైన్లు, ప్లాట్ ఫారమ్ లపై ఎటు చూసినా ఇసుక వేస్తే రాలనంత జనం కనిపిస్తున్నారు. దీనికి సంబంధించిన వీడియోలు ఇప్పుడు సోషల్ మీడియాలో వైరల్ అవుతున్నాయి. ఈ క్రమంలో రైల్వే శాఖపై నెటిజన్లు తీవ్ర స్థాయిలో మండిపడుతున్నారు.

ప్రయాణికులు ట్విట్టర్ వేదికగా తమ బాధలను పంచుకుంటున్నారు. తాను రిజర్వేషన్ చేసుకున్నానని, టికెట్ కూడా కన్ఫార్మ్ అయిందని గుజరాత్ కు చెందిన ప్రయాణికుడు ఒకరు తెలిపారు. రైలులో జనం కిక్కిరిసి ఉన్నారని, కనీసం రైలులోకి ఎక్కేందుకు కూడా తనకు అవకాశం దొరకలేదన్నారు. దీంతో వడోదర రైల్వే స్టేషన్ లో రైలు మిస్ అయ్యానన్నాడు.

భారతీయ రైల్వే పనితీరు సరిగా లేదని ఆయన మండిపడ్డారు. తన దీపావళి వేడుకలన నాశనం చేసినందుకు ధన్యవాదాలు అని ఎద్దేవా చేశారు. తనకు థర్డ్ ఏసీ కన్ఫార్మ్ టికెట్ ఉన్నప్పటికీ తనకు ఇలాంటి అనుభవం ఎదురైందన్నారు. కనీసం రైల్వే పోలీసులు కూడా తనకు సహాయం చేయలేదన్నారు. తనతో పాటు చాలా మంది రైలు ఎక్కలేకపోయారన్నారు.

రైలులో చాలా మంది డోర్ల వద్ద నిల్చుని ఉన్నారని, రైలులో ఎక్కేందుకు ఎవరికీ అవకాశం ఇవ్వడం లేదన్నారు. వాళ్లు ముందే రైలు డోర్లను క్లోజ్ చేసుకున్నారని, ఎంత పిలిచినా ఓపెన్ చేయలేదన్నారు. పోలీసులు కూడా చూసీ చూడనట్టు వ్యవహరించారని తెలిపారు. దీనిపై వడోదర డివిజన్ రైల్వే మేనేజర్ స్పందించారు. ఇలాంటి ఘటనలు జరగకుండా చూసుకోవాలని పోలీసులను ఆదేశించారు.

మరోవైపు సూరత్ లో తొక్కిసలాట చోటు చేసుకుంది. బిహార్ కు వెళ్లే ప్రత్యేక రైలులో ఎక్కేందుకు ప్రయాణికులు ఒక్కసారిగా వచ్చారు. దీంత్ో తొక్కిసలాట చోటు చేసుకుంది. ఈ ఘటనలో ఒకరు మరణించగా, ఇద్దరికి తీవ్రగాయాలయ్యాయని అధికారులు వెల్లడించారు. పలువురికి స్పృహ తప్పినట్టు తెలిపారు. మరోవైపు పండుగ నేపథ్యంలో దేశ వ్యాప్తంగా 1700 ప్రత్యేక రైళ్లను ఏర్పాటు చేశామన్నారు. అదనంగా 26 లక్షల బెర్తులను ఏర్పాటు చేశామని రైల్వే శాఖ వెల్లడించింది.