Breaking News

మహిళా రిజర్వేషన్ల చట్టం ఒక పోస్ట్ డేటెడ్ (Post Dated Check) చెక్కు అని బీఆర్ఎస్ ఎమ్మెల్సీ కల్వకుంట్ల కవిత (kalvakuntla Kavitha) అన్నారు. పార్లమెంట్ ఆమోదం లభించిన తర్వాత కూడా రిజర్వేషన్ల చట్టం అమలు కావడం లేదని తెలిపారు. కేంద్రంలో అధికారంలో వున్న పార్టీ మహిళా రిజర్వేషన్ల ద్వారా ప్రయోజనాలు పొందాలని ప్రయత్నించిందన్నారు.

బ్రిటన్‌లోని ఆక్స్‌ఫర్డ్ యూనివర్సిటీలో ‘ఎక్స్‌ప్లోరింగ్‌ ఇన్‌క్లూసివ్‌ డెవలప్‌మెంట్‌-ది తెలంగాణ మాడల్‌’అనే అంశంపై కవిత ప్రసంగించారు. భారత్‌కు తెలంగాణ అభివృద్ధి మోడల్ దిక్చూచి అని అన్నారు. స్వల్ప కాలంలోనే సీఎం కేసీఆర్ నాయకత్వంలో తెలంగాణ శరవేగంగా అభివృద్ధి చెందిందని చెప్పారు.

అహింసా మార్గంలో తెలంగాణను సాధించిన గాంధీ సీఎం కేసీఆర్ అని పేర్కొన్నారు. బీడు వారిన భూములను పచ్చని పంట పొలాలుగా తీర్చిదిద్ది దేశానికి స్ఫూర్తినిచ్చారని వెల్లడించారు. ప్రకృతి వనరులను సద్వినియోగం చేసుకోవడంలో తెలంగాణ అన్ని రాష్ట్రాల కన్నా ముందుకు ఉందన్నారు. తెలంగాణ మోడల్ అంటే ఆర్థిక గణాంకాలు కాదన్నారు. అది మారిన తెలంగాణ జీవన స్థితి గతులని వివరించారు.

ఉమ్మడి రాష్ట్రంలో రైతుల ఆత్మహత్యల్లో తెలంగాణ రెండో స్థానంలో ఉండేదన్నారు. 2700 మెగావాట్ల విద్యుత్తు కొరత ఉండేదన్నారు. సరైన విద్యుత్తు సౌకర్యాలు లేక పరిశ్రమలను వారంలో రెండు రోజులపాటు మూతబడి ఉండేవన్నారు. రాష్ట్రంలో తాగునీటి ఎద్దడి ఎక్కువగా ఉండేదన్నారు. స్వరాష్ట్రంలో సమూలమైన సంస్కరణలు తీసుకు వచ్చి పూర్తిగా ఆ పరిస్థితులను కేసీఆర్ మార్చి వేశారన్నారు.

జాతీయ సగటుకు మించి తెలంగాణ పయనిస్తోందన్నారు. జీఎస్‌డీపీలో దేశంలోనే తెలంగాణ రెండో స్థానంలో ఉందన్నారు. తెలంగాణ ఏర్పాటయ్యే సమయానికి రూ.112162 ఉన్న తలసరి ఆదాయం 2022-23 నాటికి రూ.3,14,732కి పెరిగిందన్నారు. తలసరి ఆదాయం పెరుగుదలలో ఇతర రాష్ట్రాలకు మించి దూసుకెళ్తొందన్నారు.

చివరి గింజ వరకు పంటను బీఆర్ఎస్ సర్కార్ కొనుగోలు చేస్తోందన్నారు. ప్రపంచంలోనే అతి పెద్ద ఎత్తిపోతల పథకమైన కాళేశ్వరం ప్రాజెక్టును కేవలం మూడున్నరేండ్లలోనే పూర్తి చేసిన ఘనత సీఎం కేసీఆర్‌కు దక్కుతుందన్నారు. 2014లో రూ.62 లక్షల కోట్లుగా ఉన్న రాష్ట్ర బడ్జెట్ ఇప్పుడు రూ. 2 లక్షల 94 వేల కోట్లకు చేరిందన్నారు. పరిశ్రమల ఏర్పాటును వేగవంతంగా అనుమతులు ఇస్తున్నామన్నారు. టీఎస్ ఐపాస్ విధానం ద్వారా కేవలం 15 రోజుల్లోనే అనుమతులు ఇస్తున్నామని చెప్పారు.

బీఆర్ఎస్ ఎంపీ, ఆ పార్టీ దుబ్బాక అభ్యర్థి కొత్త ప్రభాకర్ రెడ్డి (Kotha Prabhkar Reddy) పై జరిగిన దాడిపై ఎమ్మెల్యే రఘు నందన్ రావు (MLA Raghunandan Rao) స్పందించారు. కొత్త ప్రభాకర్ రెడ్డిపై దాడి దురదృష్టకరమని చెప్పారు. దాడికి పాల్పడిన వ్యక్తి ఓ ఛానల్ రిపోర్టర్ అని ఓ వెబ్ సైట్ ద్వారా తెలుస్తోందన్నారు. దళిత బంధు అందలేదనే ఆవేదనతోనే ఆ వ్యక్తి దాడి చేసినట్టు మీడియాలో వార్తలు వచ్చాయన్నారు.

కొత్త ప్రభాకర్ రెడ్డిపై దాడికి తానే కారణమంటూ ప్రచారం జరుగుతోందని, అందులో వాస్తవం లేదన్నారు. ప్రభాకర్ రెడ్డిపై దాడి ఘటనతో తనకు ఎలాంటి సంబంధం లేదని స్పష్టం చేశారు. అనవసరంగా తనపై బురదజల్లేందుకు ప్రయత్నాలు చేస్తున్నారని మండిపడ్డారు.
కాంగ్రెస్ నేతలతో నిందితుడు కలిసి దిగిన ఫోటోలు ఫేస్ బుక్ పేజీలో వున్నాయని చెప్పారు.

నిందితుడు ఏ పార్టీకి చెందిన వ్యక్తి అనే విషయాన్ని సీపీ స్పష్టంగా చెప్పి వుంటే బాగుండేదని ఆయన అన్నారు. తప్పు చేసిన వాళ్లు తమ పార్టీ కార్యకర్తలైతే తానే తీసుకొచ్చి పోలీసులకు అప్పగిస్తానన్నారు. దళితబంధు రాలేదనే ఆవేదనతోనే ఆ వ్యక్తి దాడి చేసినట్టు మీడియాలో వార్తలు వచ్చాయన్నారు. పోలీసుల దర్యాప్తులో అసలు విషయాలు బయటకు వస్తాయన్నారు.

కార్యకర్తలు సంయమనం పాటించాలని కోరారు. సోషల్ మీడియాలో వచ్చే ప్రచారాన్ని నమ్మొద్దని విజ్ఞప్తి చేశారు. నిందితుడు మద్యం మత్తులో ఉన్నాడని పేర్కొన్నారు. దాడి తర్వాత బీజేపీ కార్యకర్తలను పోలీసులు అదుపులోకి తీసుకుంటున్నారని ఆయన తీవ్ర అసహనం వ్యక్తం చేశారు. దిపాయన్ పల్లికి చెందిన కార్యకర్త స్వామిని పోలీసులు మఫ్టీలో ఎత్తుకెళ్లారని ఆరోపించారు.

దుబ్బాక బీజేపీ కార్యాలయంపై కొంత మంది దాడి చేశారని ఆయన ఆరోపించారు. తమ సిబ్బందిపై పలువురు కౌన్సిలర్లు దాడి చేశారని అన్నారు. ఇంత జరుగుతున్నా పోలీసులు మాత్రం ప్రేక్షక పాత్ర వహించారని మండిపడ్డారు. ఎన్నికల కోడ్ అమలులో ఉందని, తన దిష్టి బొమ్మను దగ్దం చేస్తుంటే పోలీసులు ఏం చేస్తున్నారని ఆయన ప్రశ్నించారు.

టీఎస్పీఎస్సీ (TSPSC) పేపర్ లీకేజీపై మంత్రి కేటీఆర్ (KTR) చేసిన వ్యాఖ్యలపై కేంద్ర మంత్రి, బీజేపీ తెలంగాణ చీఫ్ కిషన్ రెడ్డి (Kishan Reddy) తీవ్రంగా మండిపడ్డారు. దొంగలు పడ్డ ఆరు నెలలకు కుక్కలు మొరిగినట్లు కేటీఆర్ మాటలు ఉన్నాయని ఆయన ఫైర్ అయ్యారు. మార్చిలో కుంభకోణం వెలుగు చూస్తే ఇప్పటి వరకు ఎందుకు మన్ను తిన్న పాములాగా ఉన్నారంటూ తీవ్రంగా విరుచుకుపడ్డారు.

పేపర్ లీకేజీ జరిగిన సమయంలో టీఎస్పీఎస్సీని ఎందుకు ప్రక్షాళన చేయలేదని ప్రశ్నించారు. మళ్లీ అధికారంలోకి వస్తే ప్రక్షాళన చేస్తామనటం హాస్యాస్పదమని చెప్పారు. లీకేజీ జరిగినప్పుడు తనకేమి సంబంధమని కేటీఆర్ వితండ వాదం చేసిన మాట వాస్తవం కాదా అని ప్రశ్నించారు. ఇప్పుడే మళ్లీ బీఆర్ఎస్ అధికారంలోకి వచ్చినట్లు కేటీఆర్ మాట్లాడుతున్నారని ఆగ్రహం వ్యక్తం చేశారు.

ఎన్నికల తర్వాత సీఎం అయినట్లు కేటీఆర్ పగటి కలలు కంటున్నారని ఎద్దేవా చేశారు. రాబోయే ఎన్నికల్లో బీఆర్ఎస్ ఓటమి ఖాయమన్నారు. కేసీఆర్, కేటీఆర్ ఓడిపోవడం ఖాయమని స్పష్టం చేశారు. కేసీఆర్ కుటుంబం ఫాంహౌస్‌కు పరిమితం కావటం ఖాయమని వెల్లడించారు. యువతపై నిజంగా కేసీఆర్ కు ప్రేమ ఉంటే ఎప్పుడో ఉద్యోగాలను భర్తీ చేసేవారని అన్నారు. కేసీఆర్ సర్కార్ వల్లే 30 లక్షల కుటుంబాలు రోడ్డున పడ్డాయని ఆరోపించారు.

వరంగల్ విద్యార్థిని ప్రవళిక ఆత్మహత్య పాపం కేసీఆర్, బీఆర్ఎస్ సర్కార్ దేనని ఆరోపణలు గుప్పించారు. వైఫల్యాలను కప్పి పుచ్చుకునేందుకు ప్రవళిక అత్యహత్యను రాష్ట్ర ప్రభుత్వం వాడుకోవటం సిగ్గుచేటని నిప్పులు చెరిగారు. కేసీఆర్ పాలనలో టీఎస్పీఎస్సీ పరీక్షలు 17 సార్లు వాయిదా పడ్డాయని వివరించారు. పరీక్షల వాయిదాలో కేసీఆర్ సర్కార్ గిన్నీస్ రికార్డు సృష్టించిందన్నారు.

టికెట్ల కేటాయింపుల విషయంలో పార్టీదే తుది నిర్ణయమని చెప్పారు. నవంబర్ ఒకటిన పార్టీ అధ్యక్షుడితో చర్చించి మూడో లిస్టుపై నిర్ణయం తీసుకుంటామన్నారు. ప్రజాస్వామిక పద్ధతిలోనే అభ్యర్థుల ఎంపిక జరుగుతుందని స్పష్టం చేశారు. బీఆర్ఎస్ కుటుంబపార్టీ అని ఫైర్ అయ్యారు. తమది అలాంటి పార్టీ కాదన్నారు. మెదక్ బీఆర్ఎస్ ఎంపీ కొత్త ప్రభాకర్ రెడ్డిపై జరిగిన దాడిని ఆయన ఖండించారు. ఏ అభ్యర్థిపైనా దాడి జరగడం మంచి పద్ధతి కాదన్నారు.