Breaking News

రాజస్థాన్‌ (Rajasthan) లో తమ పార్టీ తరఫున పోటీ చేసే అభ్యర్థుల మొదటి విడత జాబితాను కాంగ్రెస్ ప్రకటించింది. మొదటి విడత జాబితాలో మొత్తం 33 మంది అభ్యర్థుల పేర్లను కాంగ్రెస్ (Congress) విడుదల చేసింది. రాజస్థాన్ సీఎం అశోక్ గెహ్లాట్ ( Ashok Gehlot) సర్దార్ పురా నియోజక వర్గం నుంచి పోటీకి దిగుతున్నారు.

మరోవైపు సచిన్ పైలట్ టాంక్ నియోజక వర్గం నుంచి బరిలో దిగుతున్నారు. రాజస్థాన్ అసెంబ్లీ స్పీకర్ సీపీ జోషి నత్ ద్వారా నియోజక వర్గం నుంచి పోటీలో ఉంటున్నారు. ఇక పార్టీ రాష్ట్ర అధ్యక్షుడు గోవింద్ సింగ్ దోతస్ర లక్ష్మణ్ ఘర్, పంజాబ్ కాంగ్రెస్ మాజీ ఇంఛార్జ్ హరీశ్ చౌదరి బెయిటూ నుంచి, దివ్య మెడర్నా ఓషియన్ నుంచి పార్టీ బరిలో దింపింది.

మరోవైపు బీజేపీ తమ పార్టీ తరఫున పోటీ చేసే రెండో విడత అభ్యర్థుల జాబితాను విడుదల చేసింది. రెండో విడత జాబితాలో మొత్తం 83 మంంది పేర్లను కాషాయ పార్టీ ప్రకటించింది. రాష్ట్ర మాజీ ముఖ్యమంత్రి, ఆ పార్టీ సీనియర్ నేత వసుంధర రాజే సింధియా జాలార్ పథాన్ నియోజక వర్గం నుంచి పోటీ చేస్తారని బీజేపీ పేర్కొంది.

ఇక రాజేంద్ర ప్రసాద్ (తారా నగర్), రాష్ట్ర బీజేపీ మాజీ అధ్యక్షులు సుతీశ్ పూనియా (అంబర్), కాళీ చరణ్ సరఫ్ (మాలవీయా నగర్), వాసుదేవ్ దేవ్ నానీ (అజ్మీర్ ఉత్తర), నర్పత్ సింగ్ రజ్వీ (చిత్తోర్ ఘర్), అనితా బాదేల్ (అజ్మీర్ దక్షిణ) నుంచి పోటీలో ఉంటారని పేర్కొంది.

ఇంజనీరింగ్ కళాశాలలో ఓ సాంస్కృతిక కార్యక్రమంలో జై శ్రీ రాం (Jai Shri Ram) అని నినాదాలు చేసిన విద్యార్థిని ఆ కళాశాల ప్రొఫెసర్ మందలించారు. స్టేజీ మీద నుంచి దిగి వెళ్లి పోవాలని ఆదేశించారు. ఈ ఘటన యూపీలోని ఘజియాబాద్ ఏబీఈస్ (ABES) ఇంజనీరింగ్ కళశాలలో చోటు చేసుకుంది. దీనికి సంబంధించిన వీడియో సోషల్ మీడియాలో వైరల్ అవుతోంది. వీడియోలోని వివరాల ప్రకారం…..

ఘజియాబాద్‌లోని ఏబీఈఎస్ ఇంజనీరింగ్ కళాశాలలో ‘నవ తరంగ్ 2023-24’పేరిట స్టూడెంట్ ఇండక్షన్ కార్యక్రమాన్ని నిర్వహించారు. ఈ కార్యక్రమంలో భాగంగా స్టేజి మీద ఉన్న విద్యార్థి ఒకరు జై శ్రీరాం అంటూ మిగతా విద్యార్థులను పలకరించారు. దీంతో మిగతా విద్యార్థులంతా తిరిగి జై శ్రీరాం అని అన్నారు. ఈ విషయాన్ని గమనించిన ఆ కళాశాల ప్రొఫెసర్ మమతా గౌతమ్ తీవ్ర ఆగ్రహంతో ఊగి పోయారు.

వెంటనే జై శ్రీ రాం అని నినాదాలు ఎందుకు ఇచ్చావని ఆ విద్యార్థిని తీవ్రంగా మందలించారు. ఇలాంటి పనులు చేసేందుకే నువ్వు కళాశాలకు వస్తున్నావా అంటూ తీవ్రంగా మండిపడ్డారు. ఇది కళాశాలకు చెందిన సాంస్కృతిక కార్యక్రమమని అన్నారు. ఇలాంటి వాటిని కళాశాలలో అనుమతించబోమని తెలిపారు. అక్కడి నుంచి వెళ్లి పోవాలంటూ ఆ విద్యార్థిపై తీవ్ర ఆగ్రహం వ్యక్తం చేశారు.

ఇంతలో అక్కడి విద్యార్థులు ఆమెకు సర్ధి చెప్పే ప్రయత్నం చేశారు. మొదట తామే జై శ్రీరాం అని నినాదాలు చేశామన్నారు. దానికి ఆ విద్యార్థి బదులుగా జై శ్రీరాం అన్నాడని పేర్కొన్నారు. కానీ ఆ ప్రొఫెసర్ వినిపించుకోలేదు. వీడియో ఇప్పుడు సోషల్ మీడియాలో వైరల్ అవుతోంది. దీంతో ఈ ఘటనపై నెటిజన్లు స్పందిస్తున్నారు. ఇతర విద్యార్థులు జై శ్రీరాం అని పలక రించడంతోనే ప్రతిగా ఆ విద్యార్థి కూడా అలానే పలకరించారని అంటున్నారు. అసలు విషయం తెలుసుకోకుండా విద్యార్థిపై ఆగ్రహం వ్యక్తం చేసిన ప్రొఫెసర్ పై చర్యలు తీసుకోవాలని డిమాండ్ చేస్తున్నారు.

ఛత్తీస్‌గఢ్ సీఎం భూపేశ్ భాఘేల్ (Bhupesh Baghel ) సంచలన వ్యాఖ్యలు చేశారు. అవకాశం దొరికితే తనపై చర్యలు తీసుకునేందుకు కేంద్రం (Union Governament) రెడీగా ఉందని అన్నారు. తనను అరెస్టు చేసేందుకు కేంద్రానికి ఎలాంటి అవకాశం దొరకడం లేదన్నారు. లేదంటే కేంద్రం తనను వదిలి పెట్టేదా అని ఆయన ప్రశ్నించారు.

బీజేపీ తన అధికారాలను, దర్యాప్తు సంస్థలను దుర్వినియోగం చేస్తోందని ఆయన మండిపడ్డారు. రాష్ట్ర ప్రజలను ఆకర్షించేందుకు బీజేపీ దగ్గర ఎలాంటి కార్యక్రమాలు కానీ పథకాలు గానీ లేవని చెప్పారు. అందుకే వీలైనంత వరకు రాష్ట్ర ప్రభుత్వాన్ని అప్రతిష్ట పాలు చేసేందుకు బీజేపీ ప్రయత్నాలు చేస్తోందని వెల్లడించారు.

ఇప్పుడు బీజేపీకి పోరాడే సామర్థ్యం లేదన్నారు. 15 సంవత్సరాల పాటు అధికారంలో ఉండి ప్రత్యేక ప్రయోజనాలను ఉపయోగించుకోవడానికి అలవాటు పడ్డారని ఆరోపించారు. ఇప్పుడు పోరాడేందుకు రాష్ట్రంలో బీజేపీకి అవకాశం లేదన్నారు. అందుకే ప్రభుత్వం పరువును తీసే పనిలో పడ్డారని మండిపడ్డారు.

రాష్ట్రంలో నవంబర్ 1 నుంచి ప్రారంభం కానున్న ధాన్యం సేకరణ డ్రైవ్ ను ప్రభావితం చేసేందుకే రైస్ మిల్లర్లపై కేంద్ర ఏజెన్సీలు దాడులు చేస్తున్నాయని తెలిపారు. ఛత్తీస్‌గఢ్ ప్రభుత్వాన్ని ఇబ్బంది పెట్టేందుకే ఈ చర్య అన్నారు. అధికారం కోసం బీజేపీ చాలా దిగ జారిపోయిందన్నారు. చివరికి రైతులకు కలిగే ఆర్థిక నష్టం గురించి కూడా బీజేపీ ఆలోచించడం లేదన్నారు.