Breaking News

కాంగ్రెస్ (Congress) పై సమాజ్ వాది పార్టీ చీఫ్ అఖిలేశ్ యాదవ్ (Akilesh Yadav) మరోసారి తీవ్ర స్థాయిలో మండిపడ్డారు. సీట్ల విషయంలో కాంగ్రెస్‌తో ఒప్పందం కుదరక పోవడంతో ఆ పార్టీపై ఆయన విమర్శల దాడిని పెంచారు. తమకు సీట్లు ఇవ్వకూడదని కాంగ్రెస్ అనుకుంటే ముందే ఆ విషయాన్ని చెప్పి ఉండాల్సిందన్నారు. ఇప్పుడు ఎస్పీ కేవలం తనకు పట్టు ఉన్న స్థానాల్లో మాత్రమే పోటీ చేస్తోందన్నారు.

ఇప్పుడు మధ్య ప్రదేశ్ తర్వాత జాతీయ స్థాయిలో ఎన్నికల్లో ఇండియా కూటమి పోటీ చేయాల్సి ఉందన్నారు. భవిష్యత్‌లో కూడా కాంగ్రెస్ ఇలానే ప్రవర్తిస్తే ఆ పార్టీతో కలిసి ఎవరు పోటీ చేస్తారని ఆయన ప్రశ్నించారు. మనమంతా ఇలానే అయోమయంతో బీజేపీకి వ్యతిరేకంగా పోటీ చేస్తే విజయాన్ని సాధించలేమని ఆయన తేల్చి చెప్పారు.

ఇండియా కూటమిలో తాము ఉన్నప్పటికీ ఎస్పీ ఎప్పుడూ పీడీఏ(వెనుకబడిన, దళిత, అల్పా సంఖ్యాక వర్గాల) స్ట్రాటజీతో ముందుకు సాగుతుందన్నారు. మొదట పీడీఏ ఏర్పడిందన్నారు. ఆ తర్వాతే ఇండియా కూటమి ఏర్పాటైందని ఆయన తెలిపారు. అందుకే తాము పీడీఏ వ్యూహాన్నే అనుసరిస్తామని తాను గతంలో కూడా చాలా సార్లు చెప్పానని గుర్తు చేశారు.

ఈ క్రమంలో ఇండియా కూటమి నుంచి ఎస్పీ వైదొలుగుతుందనే వార్తలు వినిపిస్తున్నాయి. ఇక బీజేపీ విద్వేషపూరిత రాజకీయాలు చేస్తోందని ఆయన మండిపడ్డారు. ఈ విషయంపై ప్రజలకు అవగాహన కలిగించేలా సమాజ్ వాది పార్టీ ఇలాంటి కార్యక్రమాలను నిర్వహిస్తుందని ఆయన పేర్కొన్నారు. తాను షాజహాన్ పూర్ వెళ్లానన్నారు. అక్కడ ఎక్కడ చూసినా రోడ్లపై చెత్తే కనిపిస్తోందన్నారు. డబుల్ ఇంజన్ సర్కార్ పాలనలో మౌలిక సౌకర్యాలు పూర్తిగా దెబ్బ తిన్నాయన్నారు.

దేశీయ తొలి ప్రాంతీయ సెమీ హై స్పీడ్ రైలు ‘నమో భారత్’ (Namo Barath)ను ప్రధాని మోడీ (PM Modi)  ఈ రోజు ప్రారంభించారు. ఢిల్లీ-ఘజియాబాద్- మీరట్ రీజినల్ ర్యాపిడ్ ట్రాన్సిట్ ట్రాన్సిట్ సిస్టమ్ కారిడార్ (RRTS)లో ఈ రైలు పరుగులు పెట్టింది. ఇది దేశానికి చారిత్రాత్మక సమయం అని ప్రధాని మోడీ వెల్లడించారు. దేశంలో తొలి ర్యాపిడ్ రైల్ సర్వీసును జాతికి అంకితం ఇస్తున్నట్టు ఆయన పేర్కొన్నారు.

నాలుగేండ్ల క్రితం ఢిల్లీ-ఘజియాబాద్-మీరట్ రీజినల్ కారిడార్ ప్రాజెక్టుకు శంకుస్థాపన చేశానని చెప్పారు. ఇప్పుడు సాహిబా బాద్ నుంచి దుహాయ్ డిపో వరకు నమో భారత్ రైలును ప్రారంభించుకున్నామని పేర్కొన్నారు. తాము దేనికైతే శంకు స్థాపన చేస్తామో దాన్ని ఖచ్చితంగా పూర్తి చేస్తామని ఆయన స్పష్టం చేశారు. ఈ విషయంలో తాను గతంలో చెప్పానని, మళ్లీ ఇప్పుడు కూడా చెబుతున్నానన్నారు.

నమో భారత్ రైలు అనేది దేశంలో మహిళ సాధికారతకు చిహ్నమని తెలిపారు. ఈ నూతన రైలులో డ్రైవర్ నుంచి సిబ్బంది వరకు అంతా మహిళలేనని వివరించారు. ఇది దేశంలో పెరుగుతున్న మహిళా సాధికారతకు చిహ్నమని వెల్లడించారు. ఈ సందర్బంగా ప్రధాని మోడీ తన చిన్న నాటి రోజులను గుర్తు చేసుకున్నారు. తాను చిన్న తనంలో రైల్వే ప్లాట్ ఫారమ్ పై గడిపానన్నారు.

ఇప్పుడు ఈ ఆధునిక రైలులో ప్రయాణించే అవకాశం తనకు లభించిందన్నారు. రైల్వేల నూతన రూపాన్ని చూసి తన మనసు సంతోషంతో నిండిపోయిందన్నారు. ఈ అనుభవం చాలా సంతోషాన్ని ఇస్తోందన్నారు. నవరాత్రుల్లో శుభకార్యాలు చేసే సంప్రదాయం మనకు ఉందన్నారు. భారత దేశపు మొట్టమొదటి నమో భారత్ రైలుకు ఈరోజు మా కాత్యాయనీ ఆశీస్సులు అందాయన్నారు.

‘నమో భారత్’ను ప్రారంభించిన అనంతరం ప్రధాని మోడీ ఆ రైలులో ప్రయాణించారు. ప్రయాణంలో భాగంగా విద్యార్థులు, ర్యాపిడ్ ఎక్స్ రైలు సిబ్బందితో ఆయన కాసేపు ముచ్చటించారు. ఈ రైలు 180 కిలో మీటర్ల వేగంతో ప్రయాణిస్తుంది. ఇందులో అత్యాధునిక సౌకర్యాలను కల్పించారు. ఈ కార్యక్రమంలో యూపీ గవర్నర్‌ ఆనందీబెన్‌ పటేల్‌, సీఎం యోగి ఆదిత్యనాథ్‌, కేంద్రమంత్రి హర్‌దీప్‌ సింగ్‌ పురి తదితరులు పాల్గొన్నారు.

కెనడా (Canada) లోని ట్రూడో సర్కార్ కీలక నిర్ణయం తీసుకుంది. భారత్ లోని 41 మంది దౌత్య వేత్తలను ఉపసంహరించు కుంటున్నట్టు తెలిపింది. దౌత్య వేత్తలు భారత్ ను వీడి కెనడాకు చేరుకుంటున్నట్టు తెలిపింది. భారత్ (India) విధించిన డెడ్ లైన్ గడువు ముగియడంతో ఈ మేరకు నిర్ణయం తీసుకున్నట్టు కెనడా ప్రభుత్వం వెల్లడించింది.

కెనడాలో ఖలిస్తాన్ ఉగ్రవాది హర్దీప్ సింగ్ నిజ్జర్ హత్యకు గురయ్యాడు. ఈ హత్య వెనుక భారత్ హస్తం ఉందని కెనడా ఆరోపించింది. ఈ మేరకు కెనడాలో భారత దౌత్య వేత్తను బహిష్కరిస్తున్నట్టు ప్రకటించింది. కెనడా వ్యాఖ్యలను భారత్ తీవ్రంగా ఖండించింది. వెంటనే కెనడాకు చెందిన దౌత్య వేత్తను బహిష్కరిస్తున్నట్టు భారత్ ప్రకటించింది. ఆయన భారత్ ను విడిచి వెళ్లిపోవాలని ఆదేశించింది.

భారత్‌లోని 41 మంది దౌత్య వేత్తలను వెనక్కి పిలిపించాలని కెనడాకు భారత్ ప్రభుత్వం సూచించింది. దౌత్య వేత్తలను రీకాల్ చేసేందుకు కెనడాకు ఈ నెల 10 వరకు గడువు ఇచ్చింది. గడువు తీరిన తర్వాత వారి అధికారాలను రద్దు చేస్తామంటూ భారత్ హెచ్చరించిందంటూ ఇటీవల వార్తలు వచ్చాయి. తాజాగా గడువు తీరడంతో కెనడా ఈ మేరకు నిర్ణయం తీసుకుంది.

కెనడా ఎలాంటి ప్రతికార చర్యలు తీసుకోబోదని విదేశాంగ మంత్రి మెలానీ జోలి వెల్లడించారు. ఇప్పుడు బహిష్కరణకు గురైన కెనడా దౌత్యవేత్తలందరికీ గతంలో భారత్ మంచి గుర్తింపు ఇచ్చిందన్నారు. ఆ దౌత్యవేత్తలందరూ తమ విధులను చిత్తశుద్ధితో పని చేశారని అన్నారు. వారంతా రెండు దేశాలకు ఎక్కువ ప్రయోజనం చేకూర్చేలా పని చేశారని వెల్లడించారు.