Breaking News

మణిపూర్‌ (Manipur) లో ఈ ఏడాది మేలో హింస చెలరేగింది. తాజాగా మణిపూర్‌ హింసకు సంబంధించిన వీడియో (Video) ఒకటి సోషల్ మీడియాలో తెగ వైరల్ అవుతోంది. అందులో కుకి తెగకు చెందిన ఓ వ్యక్తి సజీవదహనం అవుతూ కనిపించడం కలకలం రేపుతోంది. ఈ వీడియో నేపథ్యంలో కేంద్రంపై విపక్ష ఇండియా కూటమి మరోసారి తీవ్ర స్థాయిలో విరుచుకు పడింది.

వీడియోను షేర్ చేస్తూ… ఈ వీడియో మణిపూర్ కు సంబంధించిందని పేర్కొంది. కుకి తెగకు చెందిన వ్యక్తి సజీవ దహనం అయ్యాడని పేర్కొంది. ఈ ఘటన చాలా దురదృష్ట కరమన్నారు. ఇది అమానవీయ ఘటన అని మండిపడింది. మోడీజీ ఇప్పుడు పక్క దేశాల్లో పరిస్థితులపై తీవ్ర విచారాన్ని వ్యక్తం చేస్తున్నారంటూ ఎద్దేవా చేసింది. మణిపూర్ ను కాపాడటంలో ప్రధాని మోడీ విఫలమయ్యారంటూ ఆగ్రహం వ్యక్తం చేసింది. మరోవైపు శివసేన ఎంపీ ప్రియాంక చతుర్వేది షేర్ చేశారు.

మణిపూర్ నుంచి మరో భయంకరమైన వీడియో వెలుపడుతోందన్నారు. ఒక గిరిజన వ్యక్తిని కందకంలో సజీవ దహనం చేయడం కనిపిస్తోందని పేర్కొన్నారు. అది ఈ ఏడాది మేలో జరిగిన ఘటనకు సంబంధించిన వీడియో అని పోలీసు అధికారి తెలిపారని చెప్పారు. హింస జరిగి ఇన్ని రోజులు గడుస్తున్నా ఇప్పటికి మణిపూర్ అంశంపై ప్రభుత్వం ఇంకా చర్చించలేదన్నారు.

ఇప్పటికీ ఆ అంశానికి కేంద్రం ప్రాధాన్యత ఇవ్వలేదని మండిపడ్డారు. ఏడు సెకన్లు ఉన్న వీడియో ఆదివారం మణిపూర్ వాట్సాప్ గ్రూపుల్లో చెక్కర్లు కొట్టింది. ఇది ఇలా వుంటే మణిపూర్‌లో మరోసారి ఆంక్షలను పొడిగించారు. జిల్లాలో ఎలాంటి ర్యాలీలు, నిరసన ప్రదర్శనలు, సమావేశాలకు అనుమతులు లేవని, ఈ ఆదేశాలు వెంటనే అమలులోకి వస్తాయని జిల్లా అధికారులు ప్రకటించారు.

కర్ణాటక (Karnataka)లో బాణ సంచా దుకాణం (Firecracker Shop) లో జరిగిన అగ్ని ప్రమాదం (Fire Accident)లో మృతుల సంఖ్య పెరిగింది. ప్రమాదంలో మృతుల సంఖ్య 14కు చేరినట్టు పోలీసులు (Police) తెలిపారు. ఈ ప్రమాదంలో గాయపడి చికిత్స పొందుతున్న వ్యక్తుల్లో ఇద్దరు మరణించినట్టు పేర్కొన్నారు.

కర్ణాటక- తమిళనాడు సరిహద్దుల్లోని అట్టిబెలె ప్రాంతంలో ఓ బాణసంచా దుకాణంలో మంటలు చెలరేగాయి. దీంతో పేలుడు సంభవించాయి. ఈ ఘటనలో 12 మంది అక్కడికక్కడే సజీవ దహనం అయ్యారు. మరో ఏడుగురికి తీవ్ర గాయాలు అయ్యాయి. సమాచారం అందుకున్న పోలీసులు ఘటనా స్థలానికి చేరుకున్నారు. క్షతగాత్రులను సెయింట్ జార్జ్ మెడికల్ కాలేజీ ఆస్పత్రి, ఆక్స్ ఫర్డ్ మెడికల్ కాలేజీకి తరలించారు.

బాణసంచా దుకాణం యజమానికి కుమారుడు నవీన్ రెడ్డితో మరో ఇద్దరిని సెయింట్ జార్జ్ ఆస్పత్రికి తరలించారు. వారికి 30 వరకు కాలిన గాయాలు వున్నాయని వైద్యులు తెలిపారు. వారి పరిస్థితి ఆందోళనకరంగా ఉందని, 72 గంటలు గడిస్తే కానీ ఏం చెప్పలేమని వైద్యులు పేర్కొన్నారు. మృత దేహాలను గుర్తించడం ఇబ్బందిగా మారిందని పోలీసులు చెబుతున్నారు.

మృతులను ప్రకాష్ (20), వెట్టప్పన్ (25), కేశవన్ (23), విజయ రాఘవన్ (20), ఇల్లం బరుతి (19), ఆకాశ్ (23), గిరి (22), సచిన్ (22), ప్రభాకరణ్ (17), వసంత్ రాజ్ (23), అప్పాస్ (23)లుగా గుర్తించామన్నారు. మిగత మృత దేహాలను గుర్తించేందుకు ప్రయత్నిస్తున్నట్టు చెప్పారు. మృతుల్లో ఎక్కువగా బాణ సంచా దుకాణ సిబ్బంది ఉన్నట్టు చెప్పారు.

ఐదు రాష్ట్రాల అసెంబ్లీ ఎన్నికల (Assembly Elections) షెడ్యూల్ (Schedule) ను విడుదల చేసేందుకు కేంద్ర ఎన్నికల సంఘం (Election Commission Of India) రెడీ అవుతోంది. తెలంగాణ (Telangana) తో పాటు మధ్య ప్రదేశ్, చత్తీస్ గఢ్, రాజస్థాన్, మిజోరాం రాష్ట్రాల అసెంబ్లీ ఎన్నికల షెడ్యూల్ ను ఈ రోజు ప్రకటించే అవకాశం ఉంది.

ఈ మేరకు భారత ప్రధాన ఎన్నికల అధికారి రాజీవ్ కుమార్ (Rajiv Kumar) మీడియా సమావేశం నిర్వహించనున్నారు. ఢిల్లీలోని నిర్వచన్ సదన్ లో ఈ రోజు మధ్యాహ్నం 12 గంటలకు సమావేశాన్ని నిర్వహించనున్నారు. కేంద్ర ఎన్నికల సంఘం కమిషనర్లు అనుప్ చంద్ర పాండే, అరుణ్ గోయల్ తో కలిసి ఆయన షెడ్యూల్ ను విడుదల చేయనున్నారు.

నవంబర్ మధ్య నుంచి డిసెంబర్ మొదటి వారంలో ఐదు రాష్ట్రాల్లో అసెంబ్లీ ఎన్నికలు నిర్వహించే అవకాశం ఉన్నట్టు ఇప్పటికే ఈసీ వర్గాలు పేర్కొన్నాయి.
తెలంగాణలో డిసెంబర్ మొదటి వారంలో ఎన్నికలు జరిగే అవకాశం ఉన్నట్టు తెలుస్తోంది. ఇతర రాష్ట్రాలతో కలిసి తెలంగాణ ఎన్నికల ఫలితాలను డిసెంబర్ 10న ప్రకటించే అవకాశం ఉన్నట్టు సమాచారం.

తెలంగాణ, రాజస్థాన్, మధ్య ప్రదేశ్ లల్లో ఒకే విడతలో ఎన్నికలు జరిగే అవకాశం ఉంది. ఇక చత్తీస్ గఢ్ లో మాత్రం రెండు విడుతల్లో ఎన్నికలు నిర్వహించే అవకాశం ఉన్నట్టు తెలుస్తోంది. డిసెంబర్ 17తో మిజోరాం అసెంబ్లీ గడువు ముగియనుంది. తెలంగాణ, రాజస్థాన్, చత్తీస్ గఢ్, మధ్య ప్రదేశ్ అసెంబ్లీ గడువు వచ్చే ఏడాది జనవరితో ముగియనుంది. ఎన్నికల షెడ్యూల్ ప్రకటనతో నేటి నుంచి ఎన్నికల కోడ్ అమలులోకి రానుంది.

బాలీవుడ్ బాద్ షా షారుక్ ఖాన్‌ (Sharukh Khan) కు మహారాష్ట్ర సర్కార్ సెక్యూరిటీని పెంచింది. తాజాగా ఆయనకు వై ప్లస్ (Y Plus) కేటగిరి భద్రతను కల్పిస్తున్నట్టు రాష్ట్ర ప్రభుత్వం తెలిపింది. ఇటీవల ఆయనకు బెదిరింపులు వస్తున్న నేపథ్యంలో ప్రభుత్వం ఈ మేరకు నిర్ణయం తీసుకున్నట్టు అధికార వర్గాలు తెలిపాయి. బెదిరింపుల గురించి వివరించేందుకు అధికార వర్గాలు నిరాకరించాయి.

షారుక్ ఖాన్ కు భద్రత కల్పించే విషయంలో రాష్ట్రంలోని అన్ని పోలీసు కమిషనరేట్లకు రాష్ట్ర ఇంటెలిజెన్స్ విభాగం లేఖ రాసింది. షారుక్ ఖాన్ కు వై ప్లస్ భద్రత కల్పించాలని, ఎక్కడికి వెళ్లినా ఆయనకు ఎస్కార్ట్ పంపించాలని అన్ని కమిషనరేట్లు, జిల్లా పోలీసు కార్యాలయాలకు, ప్రత్యేక రక్షణ విభాగాలకు ఈ నెల 5న ఇంటెలిజెన్స్ విభాగం లేఖ పంపింది.

షారుక్ ఖాన్ కు ఇటీవల వస్తున్న బెదిరింపుల నేపథ్యంలో ఉన్నత అధికారుల కమిటీ సమావేశం అయింది. ఆయన భద్రతపై ఆ సమావేశంలో సమీక్ష నిర్వహించి ఈ మేరకు నిర్ణయం తీసుకున్నట్టు తెలుస్తోంది. వై ప్లస్ సెక్యూరిటీ కింద ఆయనకు 11 మంది పోలీసులతో భద్రత కల్పించనున్నారు. అందులో ఆరుగురు కమాండోలు, నలుగురు పోలీసులు, ఒక ట్రాఫిక్ క్లియరెన్స్ వెహికల్ ఉంటుందన్నారు.

ఉన్నతాధికారుల కమిటీ నుంచి తదుపరి ఆదేశాలు వచ్చే వరకు ఈ ఆదేశాలు అమలులో వుంటాయని లేఖలో పేర్కొన్నారు. ఇటీవల పఠాన్ సినిమాలోని భేషరమ్ రంగ్ పాటపై వివాదం రాజుకుంది. ఆ పాటలో దీపికా కాషాయ రంగు బికినీలో కనిపించింది. దీనిపై హిందూ సంఘాలు, ముస్లిం సంఘాలు మండిపడుతున్నాయి. ఈ నేపథ్యంలో షారుక్ ఖాన్ కు ప్రాణహాని ఉందని పోలీసు వర్గాలకు సమాచారం అందినట్టు తెలుస్తోంది. దీంతో ఈ నిర్ణయం తీసుకున్నట్టు వార్తలు వినిపిస్తున్నాయి.