Breaking News

బీఆర్ఎస్ (BRS) ను ఓడించడమే లక్ష్యంగా కాంగ్రెస్ (Congress) గూటికి చేరారు మాజీ ఎంపీ పొంగులేటి శ్రీనివాస్ (Ponguleti Srinivas) రెడ్డి. ఖమ్మంలో భారీ బహిరంగ సభ నిర్వహించి రాహుల్ గాంధీ (Rahul Gandhi) సమక్షంలో కాంగ్రెస్ కండువా కప్పుకున్నారు. ఉమ్మడి ఖమ్మం జిల్లాలో బీఆర్ఎస్ కు ఒక్క సీటు కూడా రానివ్వనని శపథం చేశారు. అయితే.. పొంగులేటికి ముఖ్య అనుచరుడు తెల్లం వెంకట్రావు (Tellam Venkatrao) ఝలక్ ఇచ్చారు. హైదరాబాద్ (Hyderabad) లో మంత్రి కేటీఆర్ (KTR) సమక్షంలో ఆయన బీఆర్ఎస్ గూటికి చేరారు.

తెలంగాణ భవన్‌ లో చేరికల సందర్భంగా కేటీఆర్ మాట్లాడుతూ.. కాంగ్రెస్ మునిగిపోయే నావ అని విమర్శించారు. ఈ విషయాన్ని తెల్లం వెంకట్రావు తొందరగా గ్రహించారని అన్నారు. ఆయన రాజకీయ భవిష్యత్‌ కు తమది భరోసా అని హామీ ఇచ్చారు. తెలంగాణలో కాంగ్రెస్‌ ను నమ్మితే కుక్క తోక పట్టుకున్నట్లేనంటూ సెటైర్లు వేశారు. జల్-జంగల్-జమీన్ విషయంలో ఏం జరుగుతుందో అర్థం చేసుకోండి అంటూ హితవు పలికారు. తెలంగాణలో కోటి ఎకరాల్లో సాగు జరుగుతోందని అన్నారు.

తెలంగాణ అన్ని రంగాలలో అభివృద్ధి జరుగుతోందని చెప్పారు కేటీఆర్. కాంగ్రెస్ నేతలు ఏదేదో చెబుతున్నారని.. తెలంగాణలో అమలువుతున్న పథకాలు.. కాంగ్రెస్ పాలిత రాష్ట్రాల్లో ఉందా? అని ప్రశ్నించారు. ఏం చూసి కాంగ్రెస్ ను ఆదరించాలని అడిగారు. ‘‘భద్రాద్రిలో రెండు హామీలు మాత్రమే పెండింగ్ లో ఉన్నాయని.. ఒకటి భద్రాద్రి రామాలయం అభివృద్ధి.. రెండోది కరకట్టల నిర్మాణం.. మళ్లీ మనమే వచ్చేది. బీఆర్ఎస్ ప్రభుత్వమే వస్తుంది. అన్నీ చేసుకుందాం’’ అని తెలిపారు.

ఇక తెల్లం వెంకట్రావు 2014లో మహబూబాబాద్‌ లోక్‌ సభ నియోజకవర్గం నుంచి వైసీపీ తరఫున పోటీచేసి ఓడిపోయారు. ఆ తర్వాత బీఆర్‌ఎస్‌ లో చేరారు. అప్పటి నుంచి బీఆర్‌ఎస్‌ భద్రాచలం నియోజకవర్గ ఇంచార్జిగా బాధ్యతలు నిర్వర్తించారు. 2018 సాధారణ ఎన్నికల్లో బీఆర్‌ఎస్‌ తరఫున పోటీ చేసి ఓడిపోయారు. కొన్నినెలల నుంచి పొంగులేటితో కలిసి తన రాజకీయ ప్రయాణాన్ని కొనసాగించారు. ఇప్పుడు తిరిగి బీఆర్ఎస్ గూటికి చేరారు.

కేంద్రాన్ని టార్గెట్ చేయడంలో ముందుంటారు బీఆర్ఎస్ ఎమ్మెల్సీ కవిత (MLC Kavitha). ఈమధ్య ఏ కార్యక్రమంలో పాల్గొన్నా.. ప్రతిపక్ష పార్టీలపై విరుచుకుపడుతున్నారు. ఇటు ప్రభుత్వ అధికారిణి స్మితా సబర్వాల్ (Smita Sabarwal) సైతం పలు అంశాలపై సోషల్ మీడియాలో ప్రశ్నిస్తూ వస్తున్నారు. తాజాగా వీరిద్దరిపై సెటైర్లు వేస్తూ ట్వీట్ చేశారు బీజేపీ ఎమ్మెల్యే రఘునందన్ రావు (Raghunandan Rao).

మాజీ సర్పంచ్ లావణ్య గౌడ్ ఘటన, సిద్దిపేటలో బాలికపై అత్యాచారం, పెద్దపల్లి జిల్లాలో బాలికపై సామూహిక అత్యాచార ఘటనలకు సంబంధించిన న్యూస్ క్లిప్స్ ను పోస్ట్ చేసిన రఘునందన్.. రాష్ట్రంలో రోజురోజుకు మహిళలపై లైగింక వేధింపులు, దాడులు పెరిగిపోతున్నాయని మండిపడ్డారు. నిధులు రాక అప్పుల బాధతో, అవమానం భరించలేక మహిళా సర్పంచ్ ఆత్మహత్యయత్నం చేసుకోవడం బాధాకరన్నారు.

మహిళా బిల్లు, మహిళలపైన కపట ప్రేమ చూపించే ఎమ్మెల్సీ కవితకు ఇవి కనిపించవా అంటూ ప్రశ్నించారు రఘునందన్. రాష్ట్ర ప్రభుత్వానికి మహిళల పట్ల ఎందుకు ఇంత వివక్ష అని నిలదీశారు. ఇతర రాష్ట్రాల్లో జరిగే ఘటనలపై స్పందించే స్మితా సబర్వాల్.. మహిళా కమిషన్ చైర్ పర్సన్ సునీత రెడ్డి ఎందుకు మౌనంగా ఉన్నారని అడిగారు. ఈ ఘటనలపై రాష్ట్ర ప్రభుత్వం వెంటనే స్పందించాలని డిమాండ్ చేశారు.

ఆర్మూర్ నియోజకవర్గం ఆలూరు మండలంలోని కల్లెడ గ్రామానికి చెందిన మాజీ సర్పంచ్ లావణ్య ప్రసాద్ గౌడ్.. గ్రామాభివృద్ధి కోసం చేసిన పనులకు సకాలంలో ప్రభుత్వ నిధులు మంజూరు కాక, చేసిన అప్పులు తీర్చలేక ఆత్మహత్యాయత్నానికి పాల్పడ్డారు. రూ.30 లక్షల నిధులతో గ్రామంలో రోడ్లు, డ్రైనేజీలు ఇతర అభివృద్ధి పనులు చేస్తే ఇంతవరకు ఆ పనులకు సంబంధించి ఎంబీ రికార్డ్ చేయలేదని అంటున్నారు.

కాంగ్రెస్ నేత బక్క జడ్సన్ (Bakka Judson) ఏదో ఒక అంశంలో ప్రభుత్వాన్ని ఇరుకున పెట్టే ప్రయత్నం చేస్తున్నారు. మొన్న సచివాలయంలో 300 కోట్ల స్కామ్ జరిగిందని దర్యాప్తు సంస్థలకు ఫిర్యాదు చేసిన ఆయన.. తాజాగా వర్ధన్నపేట బీఆర్ఎస్ ఎమ్మెల్యే ఆరూరి రమేష్ (MLA Ramesh) పై ఎన్ ఫోర్స్ మెంట్ డైరెక్టరేట్ కు ఫిర్యాదు చేశారు. ఈయన ఎమ్మెల్యేగా పోటీ చేసే సమయంలో 2014, 2018లో ఎన్నికల కమిషన్ కు సమర్పించిన అఫిడవిట్ లో ఆస్తుల వివరాలు ఎలా పెరిగాయో విచారణ చేయాలని అందులో కోరారు.

ఎమ్మెల్యేగా గెలిచిన తర్వాత భూ కబ్జాలు చేస్తూ అక్రమంగా ఆస్తులు సంపాదించారని.. దీనిపై ఏసీబీ డైరెక్టర్ కూడా దర్యాప్తు జరపాలని కోరారు. ప్రజలకు తాగునీటిని అందించే లక్ష్యంతో ప్రారంభించిన మిషన్ భగీరథ కార్యక్రమాన్ని వర్ధన్నపేట నియోజకవర్గంలో కూడా అమలు చేశారు. ఈ పనులకు సంబంధించిన కాంట్రాక్టర్ల నుంచి ఎమ్మెల్యే రమేశ్ భారీ మొత్తంలో కమీషన్లు తీసుకుని.. చాలా వరకు పనులు పూర్తి చేయలేదని బక్క జడ్సన్ తన ఫిర్యాదులో ఆరోపించారు.

రమేష్ పై గతంలో రాష్ట్ర ప్రభుత్వ సంస్థలకు చాలుసార్లు ఫిర్యాదు చేసినా ఎవరూ పట్టించుకోలేదన్నారు జడ్సన్. అందుకే, ఆయన ఆస్తులపై విచారణ జరిపించాలని ఈడీ డైరెక్టర్ కోరారు. ఇటు వర్ధన్నపేట నుంచి గతంలో ఎమ్మెల్యేగా గెలిచిన ప్రస్తుత మంత్రి ఎర్రబెల్లి దయాకర్ రావు (Errabelli Dayakar Rao) కూడా ఇదే మాదిరిగా అక్రమంగా ఆస్తులు సంపాదించారని ఆరోపించారు జడ్సన్.

ఫీజుల విషయంలో మరోసారి వార్తల్లోకెక్కింది శ్రీనిధి (Srinidhi) ఇంజినీరింగ్ కాలేజీ. మేడ్చల్ (Medchal) జిల్లా ఘట్ కేసర్ లో ఉన్న కాలేజీకి పెద్ద ఎత్తన విద్యార్థులు (Students), తల్లిదండ్రులు (parents) వచ్చారు. ముందే కట్టించుకున్న ఫీజులు తమకు ఇచ్చేయాలని డిమాండ్ చేశారు. గేటు ముందు ధర్నాకు దిగారు. అయితే.. అప్పటికే పోలీసులకు సమాచారం అందించింది యాజమాన్యం. తల్లిదండ్రులతో కలిసి విద్యార్థులు నిరసనకు దిగడంతో అక్కడ ఉద్రిక్త పరిస్థితులు నెలకొన్నాయి.

ఒకానొక సమయంలో విద్యార్థులకు పోలీసులకు వాగ్వాదం చోటు చేసుకుంది. గతంలో ఆగస్టు 15లోపు బదిలీ ప్రక్రియ పూర్తయ్యేలా చూస్తామని విద్యాసంస్థ హామీ ఇచ్చినట్లు విద్యార్థులు తెలిపారు. అటు బదిలీ జరగక, ఇటు ఫీజు తిరిగివ్వకపోవడంతో ఇలా ఆందోళనకు దిగాల్సి వచ్చిందని చెప్పారు. గేటును తోసుకుంటూ విద్యార్థులు లోపలికి వెళ్లడంతో టెన్షన్ వాతావరణం నెలకొంది.

రాష్ట్రంలో 5 ప్రైవేట్ యూనివర్సిటీల బిల్లుకు ఆ మధ్య అసెంబ్లీ ఓకే చెప్పినా.. గవర్నర్ ఆమోద ముద్ర వేయలేదు. 2022–23 విద్యా సంవత్సరానికి గాను గురునానక్ లో 2,800 వరకూ, శ్రీనిధిలో 300 మంది విద్యార్థులను ముందే చేర్చుకున్నారు. గవర్నర్ ఓకే చెప్పకపోవడంతో ఈ వ్యవహారం వివాదాస్పదమైంది. ఓ సంవత్సరాన్ని కోల్పోవాల్సి రావడంతో విద్యార్థులు, పేరెంట్స్, విద్యార్థి సంఘాలు గురునానక్, శ్రీనిధి కాలేజీల వద్ద పలుమార్లు ఆందోళనలు నిర్వహించారు.

వివాదం ముదరడంతో ప్రభుత్వం కలగజేసుకుంది. గుర్తింపు లేకుండా కొనసాగుతున్న గురునానక్, శ్రీనిధి ప్రైవేట్ యూనివర్సిటీల్లోని స్టూడెంట్లను ఇతర కాలేజీల్లో సర్దుబాటు చేయాలని భావించింది.అయితే.. విద్యార్థులు, తల్లిదండ్రులు తమ డబ్బులు తిరిగి ఇచ్చేయాలని శ్రీనిధి కాలేజీ ముందు ఆందోళనకు దిగారు. యాజమాన్యం మాత్రం అనుమతులు వస్తాయని చెబుతూ వస్తోందని అంటున్నారు వారంతా.

టీపీసీసీ చీఫ్ రేవంత్ రెడ్డి (Revanth Reddy) పై కేసు ఫైల్ అయింది. ఆయనతో పాటు కాంగ్రెస్ నేతలు వంశీచంద్ రెడ్డి, సంపత్ కుమార్‌ లపైనా పోలీసులకు ఫిర్యాదు అందింది. దీంతో నాగర్ కర్నూల్ (Nagar kurnool) పోలీస్ స్టేషన్‌ లో కేసు నమోదైంది. పోలీసులపై రేవంత్ రెడ్డి అనుచిత వ్యాఖ్యల నేపథ్యంలో జిల్లా పోలీస్ అసోసియేషన్ అధ్యక్షుడు గోవర్దన్ పట్వారి ఈ ఫిర్యాదు చేశారు. ఆయన కంప్లయింట్ మేరకు కేసు నమోదు చేసినట్లు పోలీసులు తెలిపారు.

రేవంత్ ఏమన్నారు..?

కాంగ్రెస్‌ కార్యకర్తలపై అక్రమ కేసులు పెడుతున్నారు. మంత్రి శ్రీనివాస్‌ గౌడ్‌ కి కొంతమంది పోలీసులు వత్తాసు పలుకుతున్నారు. వారందరి పేర్లు రెడ్ డైరీలో రాసిపెట్టుకుంటున్నాం. అధికారంలోకి రాగానే బట్టలూడదీసి.. మిత్తితో సహా చెల్లిస్తాం. అధికార పార్టీకి వత్తాసు పలికిన పోలీసులపై చర్యలు తీసుకుంటాం.

వెనక్కి తీసుకోకపోతే యుద్ధమే!

రేవంత్ వ్యాఖ్యలపై పోలీస్ శాఖ సీరియస్ గా ఉంది. రాష్ట్రవ్యాప్త ఆందోళనలకు ప్లాన్ చేస్తున్నారు పోలీసులు. కానిస్టేబుల్ నుండి డీజీ స్థాయి వరకు రేవంత్ వ్యాఖ్యలను తీవ్రంగా తప్పు పడుతున్నారు. వంద రోజుల్లో కాంగ్రెస్ ప్రభుత్వం వస్తుంది.. అప్పుడు పోలీసుల బట్టలు విప్పుతాం అని అనుచిత వ్యాఖ్యలు చేశారని.. ఈ వ్యాఖ్యలను రేవంత్ వెనక్కి తీసుకోకపోతే ఆందోళనలు చేపడతామని అంటున్నారు. అవసరమైతే రేవంత్ కు బందోబస్త్ ను సైతం చేయమని చెబుతున్నారు పోలీసులు.