Breaking News

దేశవ్యాప్తంగా కాంగ్రెస్ (Congress) క్రౌడ్ ఫండింగ్ (Crowdfunding Drive) కార్యక్రమాన్ని సోమవారం ప్రారంభించింది. కాంగ్రెస్ జాతీయ అధ్యక్షుడు మల్లికార్జున ఖర్గే ఈ కార్యక్రమానికి శ్రీకారం చుట్టారు. మనం ఎప్పుడైతే ధనవంతుల మీద ఆధారపడతామో అప్పుడు మనం ధనవంతుల పాలసీలను ఫాలో కావాల్సి ఉంటుందని ఖర్గే అన్నారు.

మొదటి దేశం కోసం ప్రజల నుంచి కాంగ్రెస్ విరాళాలు సేకరిస్తోందని తెలిపారు. మనం ధనవంతులపై ఆధారపడి పని చేస్తే అప్పు వాళ్ల పాలసీలను ఫాలో కావాల్సి ఉంటుందని వెల్లడించారు. గతంలో స్వతంత్ర్య ఉద్యమ సమయంలో మహాత్మ గాంధీ కూడా ప్రజల నుంచి విరాళాలు సేకరించారని పేర్కొన్నారు.

కాంగ్రెస్‌ 138 ఏళ్లు పూర్తి చేసుకున్న సందర్భంగా ఈ ప్రచారాన్ని నిర్వహిస్తున్నారు. ఇందులో భాగంగా కాంగ్రెస్ వెబ్‌సైట్‌లోని పేమెంట్ లింక్ దాతలను రూ. 138 లేదా రూ. 1380 లేదా 13,800 విరాళాలను అనుమతించనున్నారు. కావాలంటే దాతలు వేరే మొత్తాలను కూడా విరాళంగా ఇవ్వవచ్చన్నారు.

కాంగ్రెస్ జనరల్ సెక్రటరీ కేసీ వేణుగోపాల్ మాట్లాడుతూ…. 1920-21లో ప్రారంసభించిన మహాత్మా గాంధీ చారిత్రాత్మక ‘తిలక్ స్వరాజ్ ఫండ్’ నుండి స్ఫూర్తి పొంది ఈ క్రౌడ్ ఫండింగ్ మొదలు పెట్టామని వెల్లడించారు.

కాంగ్రెస్ చేపట్టిన క్రౌడ్ ఫండింగ్‌పై బీజేపీ తీవ్రంగా విరుచుకుపడింది. 60 ఏండ్లుగా దేశాన్ని దోచుకున్న పార్టీ ఇప్పుడు విరాళాలివ్వాలంటున్నారని ఎద్దేవా చేసింది. కాంగ్రెస్ ఎంపీ ధీరజ్ సాహూ ఇంట్లో దొరికిన నోట్ల కట్టల వ్యవహారం నుంచి దేశం దృష్టి మరల్చేందుకే ఆ పార్టీ ఇలాంటి పనులు చేస్తోందని మండిపడింది. ప్రజా ధనాన్ని గాంధీ కుటుంబానికి సమర్పించేందుకే ఇలాంటి పనులు చేస్తున్నారంటు ఫైర్ అయింది.

డ్రైవర్ లెస్ కార్ల (Driverless Cars)పై కేంద్ర మంత్రి నితిన్ గడ్కరీ (Nitin Gadkari) మరోసారి కీలక వ్యాఖ్యలు చేశారు. డ్రైవర్ రహిత కార్లను భారత్ లోకి అనుమతించబోమని తేల్చి చెప్పారు. ఈ డ్రైవర్ రహిత కార్లను అనుమతిస్తే దేశంలోని 80 లక్షల మంది డ్రైవర్లు నిరుద్యోగులుగా మారుతారని, చాలా మంది ఉపాధి కోల్పోతారని తెలిపారు.

ఐఐఎం (IIM)నాగ్‌పూర్‌లో నిర్వహించిన ఓ కార్యక్రమంలో కేంద్ర మంత్రి పాల్గొన్నారు. ఈ సందర్బంగా కేంద్రమంత్రి మాట్లాడుతూ…. గతంలో భారత్‌లో డ్రైవర్‌ లేని కార్లను ఎట్టి పరిస్థితుల్లోనూ అనుమతించబోమని అమెరికాలోనే చెప్పానని గుర్తు చేశారు. ఎందుకంటే మన దేశంలో పెద్ద సంఖ్యలో ప్రజలు డ్రైవర్లుగా పని చేస్తున్నారని అన్నారు.

అలాంటప్పుడు డ్రైవర్ లేని కార్లను తీసుకు వస్తే అవి వారి ఉద్యోగాలను కొల్లగొడతాయన్నారు. కేవలం తక్కువ జనాభా కలిగిన దేశాలకు మాత్రమే అలాంటి కార్లు పనికి వస్తాయన్నారు. కార్లలో ఆరు ఎయిర్‌బ్యాగ్‌ల ఏర్పాటు, రోడ్లపై బ్లాక్ స్పాట్‌లను తొలగింపు వంటి చర్యలతో రోడ్డు ప్రమాదాాలను పూర్తిగా తగ్గించేందుకు ఒక ఫ్రేమ్ వర్క్ ను రూపొందించామన్నారు.

ప్రజా మౌలిక సదుపాయాలను మెరుగుపరిచేందుకు, అధునాతన సాంకేతిక పరిజ్ఞానాన్ని వినియోగించేందుకు ప్రభుత్వం కట్టుబడి ఉందన్నారు. మరోవైపు హైడ్రోజన్ అనేది భవిష్యత్ ఇంధనం అని అన్నారు. ఇక టెస్లాను తాము స్వాగతిస్తున్నామన్నారు. కానీ చైనాలో కార్లు తయారు చేసి ఇక్కడ విక్రయాలు చేస్తామంటే ఒప్పుకోబోమన్నారు. టెస్లా కార్లను భారత్ లోనే తయారు చేయాలన్నారు.

పార్లమెంట్ లో భద్రతా వైఫల్యం (Parliament Security Breach) ఘటనపై ఉభయ సభలు దద్దరిల్లాయి. విపక్షాల ఆందోళన నేపథ్యంలో ఉభయ సభలు దద్దరిల్లి పోయాయి. భద్రతా వైఫల్యంపై చర్చ చేపట్టాల్సిందేనని పట్టుబట్టాయి. ఈ మేరకు వెల్ లోకి దూసుకు వెళ్లి ఎంపీలు ఆందోళనలు వ్యక్తం చేశారు.

ఈ క్రమంలో లోక్ సభతో పాటు రాజ్యసభలు వాయిదా పడుతూ వచ్చాయి. లోక్ సభలో ఆందోళన వ్యక్తం చేస్తున్న ఎంపీల (MP)పై సభాధిపతి తీవ్ర అసంతృప్తి వ్యక్తం చేశారు. ఎంపీలంతా ఆందోళనలు విరమించి సభాకార్యకలాపాలు సజావుగా జరిగేందుకు సహకరించాలని కోరారు.

కానీ ఎంపీలు ససేమేరా అన్నారు. దీంతో లోక్ సభలో ఏకంగా 31 మంది ఎంపీలపై సస్పెన్షన్ వేటు వేశారు. కాంగ్రెస్ లోక్ సభాపక్ష నేతతో అధీర్ రంజన్ చౌదరితో సహా మొత్తం 31 మందిని సస్పెండ్ చేస్తున్నట్టు స్పీకర్ ప్రకటించారు. శీతాకాల సమావేశాలు ముగిసే వరకు వారిపై ఈ సస్పెన్షన్ అమలులో ఉంటుందని స్పీకర్ ఓం బిర్లా తెలిపారు.

సభా కార్యకలాపాలకు అడ్డుతగులుతున్నారన్న కారణంగా వారిపై సస్పెన్షన్ వేటు వేశారు. మరో ముగ్గురు ఎంపీలను సభాహక్కుల కమిటీ నివేదిక ఇచ్చే వరకు సస్పెండ్ చేశారు. ఆ ముగ్గురు ఎంపీల్లో కే. జయకుమార్, విజయ్ వసంత్, అబ్దుల్ ఖలేక్ లు ఉన్నారు. అంతకు ముందు ఈ నెల 14న 13 మంది ఎంపీలను స్పీకర్ సస్పెండ్ చేశారు.

సస్పెన్షన్ కు గురైన వారిలో కాంగ్రెస్ ఎంపీ మాణిక్యం ఠాకూర్, కనిమొళి, పీఆర్ నటరాజన్, వీకే శ్రీకంఠన్, బెన్సీ బెహనాన్, కే. సుబ్రహ్మణ్యం, ఎస్. వెంకటేశన్, మహమ్మద్ జావెద్ లు ఉన్నారు. మరో వైపు రాజ్యసభలో ఇప్పటికే టీఎంసీ ఎంపీ డరెక్ ఓబ్రెయిన్ సస్పెండ్ అయ్యారు.

ప్రపంచంలో అతిపెద్ద ధ్యాన కేంద్రం స్వర్వేద్ మహామందిర్ (Swarved Mahamandir)ను వారణాసిలో ప్రధాని మోడీ (PM Modi)సోమవారం ప్రారంభించారు. సుమారు 20,000 మంది ఒకేసారి ధ్యానం చేసే సౌకర్యం ఈ యోగా సెంటర్ లో ఉంది. ప్రారంభోత్సవం తర్వాత యూపీ సీఎం యోగీ ఆదిత్య నాథ్ తో కలిసి యోగా సెంటర్ ను ప్రధాని మోడీ సందర్శించారు.

ఏడంతస్తుల భవనంలో దీన్ని నిర్మించారు. మహామందిర్ గోడలపై స్వర్వేద శ్లోకాలు చెక్కబడ్డాయి. ఆలయాన్ని సందర్శించిన సందర్భంగా విహంగం యోగా శతాబ్ది ఉత్సవాల్లో ప్రధాని మోడీ పాల్గొన్నారు. ఈ ఉత్సవాల్లో పాల్గొనడం ఇది రెండవ సారి. అంతకు ముందు డిసెంబర్ 2021లో ఆయన మొదటి సారిగా పాల్గొన్నారు.

19వ శతాబ్దపు ఆధ్యాత్మిక వేత్త, కవి, జ్ఞాని సద్గురు సదాఫల్ డియోజీ మహారాజ్ విహంగం యోగ్ సంస్థాన్ ను స్థాపించారు. యోగా సెంటర్ ను ప్రారంభించిన అనంతరం ప్రధాని మోడీ మాట్లాడారు. ఇప్పుడు వారణాసి అంటే అభివృద్ధి, వారణాసి అంటే పరిశుభ్రత, మార్పు, విశ్వాసంతో పాటు ఆధునిక సౌకర్యాలు ఏర్పాటయ్యాయి.

సాధువుల మార్గదర్శకత్వంలో, కాశీ ప్రజలు అభివృద్ధి, నవ నిర్మాణ పరంగా కొత్త రికార్డులు సృష్టించారని వెల్లడించారు. నేడు స్వర్వేద్ మహామందిర్ దీనికి చక్కని ఉదాహరణ అని పేర్కొన్నారు. తాను స్వర్వేద్ మహామందిర్‌లో పర్యటించినప్పుడు మంత్ర ముగ్దులయ్యానని చెప్పారు. వేదాలు, ఉపనిషత్తులు, రామాయణం, గీత, మహాభారతాల దైవిక బోధనలు స్వర్వేద్ మహామందిర్ గోడలపై చిత్రాల ద్వారా చిత్రీకరించబడ్డాయని అన్నారు.

ఉప రాష్ట్రపతి (Vice President) జగదీప్ ధన్ ఖర్ (Jagdeep Dhankhar) కీలక వ్యాఖ్యలు చేశారు. ‘దేశ వ్యతిరేక కథనాలను’ కోవిడ్ వైరస్‌ (Covid virus)గా ఆయన అభివర్ణించారు. ఆ కథనాలను తటస్థీకరించాలని అన్నారు. ప్రణాళికాబద్ధంగా లేదా అవగాహన లేమి కారణంగా కొంతమంది ‘దేశ వ్యతిరేక’కథనాలను వ్యాప్తి చేస్తూ ఆనందం పొందుతున్నారంటూ తీవ్ర స్థాయిలో ఫైర్ అయ్యారు.

అలాంటివి జరగకూడదని అన్నారు. అటువంటి కథనాలు ప్రజలంతా వ్యతిరేకించాలని పిలుపునిచ్చారు. ఇది కోవిడ్ వైరస్ లాంటిదన్నారు. కురుక్షేత్ర యూనివర్సిటీ, కురుక్షేత్ర డెవలప్‌మెంట్ బోర్డు ఆధ్వర్యంలో ‘వసుధైక కుటుంబం’, భగవద్గీత & గ్లోబల్ యూనిటీ’ అనే అంశంపై నిర్వహించిన మూడు రోజుల అంతర్జాతీయ సెమినార్ ప్రారంభోత్సవ కార్యక్రమానికి ఆయన ముఖ్య అతిథిగా హాజరయ్యారు.

ప్రస్తుతం జరుగుతున్న అంతర్జాతీయ గీతా ఉత్సవాల్లో భాగంగా ఈ కార్యక్రమాన్ని నిర్వహించారు. ఈ సందర్బంగా జగదీప్ ధన్ ఖడ్ మాట్లాడుతూ…. గీత తత్వశాస్త్రం అనేది భారతీయ నాగరికత, దాని సంస్కృతికి గట్టి పునాదిలాంటిందని తెలిపారు. ప్రస్తుతం భారత్ అన్ని రంగాల్లో అభివృద్ధిలో దూసుకు వెళ్తోందని పేర్కొన్నారు.
మనం ఒక ప్రపంచ శక్తి అని వెల్లడించారు.

మనమంతా శాంతి కోసం నిలబడతామన్నారు. మనమంతా ప్రపంచ స్థిరత్వం కోసం నిలబడతామన్నారు. 2047లో మన స్వాతంత్య్ర శతాబ్ది ఉత్సవాలు జరుపుకునే నాటికి భారత్‌ను అత్యంత పటిష్టమైన శక్తిగా అత్యున్నత స్థాయికి తీసుకు వెళ్లాలని కోరుకుంటున్నామన్నారు. రష్యా-ఉక్రెయిన్, ఇజ్రాయెల్-హమాస్ సంఘర్షణను ఈ సందర్బంగా ప్రస్తావించారు. రెండవ ప్రపంచ యుద్ధం తరువాత ప్రపంచం ఈ రోజు చూస్తున్నంత బాధను ఎన్నడూ చూడలేదన్నారు.

ముంబై పేలుళ్ల సూత్రధారి, పరారీలో ఉన్న అండర్ వరల్డ్ డాన్ దావూద్ ఇబ్రహీం (Dawood Ibrahim) అనారోగ్యానికి గురైనట్టు తెలుస్తోంది. ప్రస్తుతం ఆయన కరాచీ (Karachi)లోని ఓ ఆస్పత్రిలో చికిత్స పొందుతున్నట్టు సమాచారం. ఆయనపై విషయ ప్రయోగం జరిగినట్టు సోషల్ మీడియాలో పెద్ద ఎత్తున వార్తలు వస్తున్నాయి. ఇప్పటి వరకు ఈ విషయాన్ని ఎవరూ అధికారికంగా ధ్రువీకరించలేదు.

కరాచీ ఆస్పత్రి వద్ద భారీగా భద్రతా దళాలను మోహరించారు. రెండు రోజుల క్రితం ఆయన ఆస్పత్రిలో చేరినట్టు తెలుస్తోంది. దావూద్ ఉన్న ఫ్లోర్ లోని పేషెంట్ల కుటుంబ సభ్యులు, వైద్యులు, దావూద్ కుటుంబ సభ్యులను మాత్రమే ఆస్పత్రిలోకి అనుమతిస్తున్నారు. ఇది ఇలా వుంటే దావూద్ ఇబ్రహీం ఆరోగ్యం గురించి, ప్రస్తుత పరిస్థితి గురించి తెలుసుకునేందుకు ముంబై పోలీసులు ప్రయత్నిస్తున్నారు.

దావూద్ బంధువులు అలిషా పార్కర్, సాజిద్ వాఘ్లే ద్వారా దావూద్ గురించి మరింత సమాచారం సేకరిస్తున్నట్టు అధికార వర్గాల ద్వారా తెలుస్తోంది. ఈ ఏడాది జనవరిలో దావూద్ సోదరి హసీనా పార్కర్ కుమారుడు జాతీయ దర్యాప్తు సంస్థ (ఎన్ఐఏ) విచారణకు హాజరయ్యారు. దావూద్ రెండో వివాహం చేసుకున్నారని, ప్రస్తుతం కరాచీలో ఉన్నారని వెల్లడించారు. దావూద్ ఇబ్రహీమ్‌, అతని సహాయకులు కలిసి కరాచీ ఎయిర్ పోర్టను నియంత్రిస్తున్నారని ఎన్‌ఐఏ తన ఛార్జిషీట్‌లో పేర్కొంది.

1993లో ముంబై పేలుళ్ల కేసులో ఆయన ప్రమేయం ఉందని, ఆ ప్రణాళికను అమలు చేసింది దావూద్ ఇబ్రహీం అని భారత్ ఆరోపిస్తోంది. ఈ క్రమంలో గత కొన్నేండ్లుగా చట్టానికి దొరక్కుండా దావూద్ ఇబ్రహీం తప్పించుకు తిరుగుతున్నాడు. ప్రస్తుతం భారత్ మోస్ట్ వాంటెడ్ టెర్రరిస్టుల జాబితాలో దావూద్ ఒకడిగా ఉన్నాడు. దావూద్ కరాచీలోనే ఉన్నాడని భారత్ వాదిస్తోంది.

దావూద్ కరాచీలో ఉన్నాడనే వాదనలకు సంబంధించి భారత్ సాక్ష్యాధారాలను కూడా సమర్పించింది. కానీ పాక్ మాత్రం ఆ విషయాన్ని అంగీకరించడం లేదు. 2008లో ముంబైలో 26/11 ఉగ్రదాడుల సమయంలో పాక్ ఉగ్రవాదులకు ఆయుధాలు సమకూర్చింది దావూదే అని భారత్ ఆరోపిస్తోంది.

పాకిస్థాన్‌లో లష్కరే తోయిబా కమాండర్ అద్నాన్ అహ్మద్ అలియాస్ అబు హంజాలాతో పాటు పలువురు వాంటెడ్ టెర్రరిస్టులు పలు నగరాల్లో హతమవుతున్నారు. ఈ ఘటనల నేపథ్యంలో దావూద్ పై విష ప్రయోగం జరిగిందన వార్తలు సంచలనం రేపుతున్నాయి.

హలాల్ మాంసం (Halal Meat)పై కేంద్ర గ్రామీణాభివృద్ధి శాఖ మంత్రి గిరిరాజ్ సింగ్ (Giriraj Singh) కీలక వ్యాఖ్యలు చేశారు. హిందువులు హలాల్ మాంసాన్ని తినకూడదని అన్నారు. ఒక్క వేటుతో జంతువులను వధించడం ద్వారా వచ్చే ఝట్కా మాంసాన్ని మాత్రమే భుజించాలని సూచించారు. ఈ మేరకు హిందువులంతా ప్రమాణం చేయాలని ఆయన కోరారు.

బిహార్‌లోని బెగూసరాయ్‌లో నిర్వహించిన ఓ కార్యక్రమంలో కేంద్ర మంత్రి గిరిరాజ్ సింగ్ పాల్గొన్నారు. ఈ సందర్బంగా గిరిరాజ్ సింగ్ మాట్లాడుతూ…. హిందువులు తమ ఆహార ఆచారాలకు కట్టుబడి ఉండాలని పిలుపునిచ్చారు. హలాల్ మాంసాన్ని తినబోమని తన మద్దతుదారులు ప్రతిజ్ఞ చేయాలని కోరారు. కేవలం హలాల్ మాంసాన్ని మాత్రమే తినే ముస్లింలను తాను అభినందిస్తున్నానన్నారు.

ఇప్పుడు హిందువులు కూడా తమ మతం పట్ల ఇలాంటి నిబద్దతను ప్రదర్శించాలని ఆయన సూచించారు. జంతువుల వధ విషయంలో హిందువులు అనుసరించే పద్దతి ఝట్కా అని తెలిపారు. హిందువులు జంతు బలి చేసినప్పుడల్లా వారు ఒకే వేటుతో జంతువును మరణించేలా చేస్తారని పేర్కొన్నారు. హిందవులు హలాల్ మాంసాన్ని తిని తమను తాము భ్రష్టు పట్టించుకోకూడదన్నారు.

హిందువులు ఎల్లప్పుడూ ఝట్కా మాంసాన్ని తినేందుకు కట్టుబడి ఉండాలని కోరారు. కబేళాలు, ఝట్కా మాంసాన్ని మాత్రమే విక్రయించే దుకాణాలు ఉండేలా కొత్త వ్యాపార నమూనా అవసరమని చెప్పారు. అంతకు ముందు గత నెలలో ఉత్తర ప్రదేశ్ లో మాదిరిగానే బిహార్ లోనూ హలాల్ మాంసం ఉత్పత్తులపై నిషేధం విధించాలని ఆయన కోరారు.

తమిళనాడు (Tamilnadu)ను వరుణుడు వణికిస్తున్నాడు. దక్షిణ తమిళనాడులోని పలు జిల్లాలో భారీ వర్షాలు(Heavy Rains) కురిశాయి. తిరున్యవేలీతో పాటు ట్యూటీకోరన్, టెన్ కాశీ, కన్యాకుమారి జిల్లాలో వర్షాలకు జనజీవనం అస్తవ్యస్థం అయింది. ట్యూటీ కోరన్ జిల్లాలోని తిరుచెందూరు ప్రాంతంలో గడిచిన 15 గంగల్లో 60 సెంమీ వర్షం కురిసింది. అదే సమయంలో కన్యాకుమారిలో 17.3 సెంమీ వర్షం కురిసినట్టు అధికారులు తెలిపారు.

రాష్ట్రంలో ఎడతెగకుండా వర్షాలు కురుస్తున్న నేపథ్యంలో ప్రభుత్వం సెలవు ప్రకటించింది. దీంతో రాష్ట్రంలోని పాఠశాలలు, కళాశాలలు, బ్యాంకులు, ప్రైవేటు సంస్థలు, ప్రభుత్వం రంగ సంస్థలు మూత పడనున్నాయి. తిరున్యవేలీ, తూత్తుకూడి, కన్యాకుమారి జిల్లాల్లో పాపనాశం, పెరుంజని, పెచుపరాయి డ్యామ్ ల నుంచి నీటిని విడుదల చేశారు. దీంతో పలు ప్రాంతాల్లో ఇళ్లలోకి నీళ్లు చేరుకున్నాయి.

ఆయా ప్రాంతాల్లో రోడ్లపై మోకాళ్ల లోతు వరకు నీరు వచ్చి చేరింది. దీంతో ప్రజలు తీవ్ర ఇబ్బందులు ఎదుర్కొన్నారు. మరోవైపు ఈ రోజు కూడా భారీ నుంచి అతి భారీ వర్షాలు కురిసే అవకాశం ఉన్నట్టు భారత వాతావరణ శాఖ (ఐఎండీ) హెచ్చరికలు జారీ చేసింది. రాష్ట్రంలో జరుగుతున్న సహాయకచర్యలను పర్యవేక్షించాలని మంత్రులు, అధికారులను సీఎం స్టాలిన్ ఆదేశించారు.

లోతట్టు ప్రాంతాల ప్రజలను సురక్షిత ప్రాంతాలకు తరలించాలని సూచించారు. జాతీయ విపత్తు ప్రతిస్పందన బృందాల (ఎన్డీఆర్ఎఫ్)తిరున్యవేలి ప్రాంతానికి చేరుకున్నాయి. రాష్ట్రవిపత్తు దళాలకు చెందిన మూడు బృందాలను కన్యాకుమారి ప్రాంతంలో మోహరించినట్టు అధికారులు వెల్లడించారు. వరద ప్రభావిత ప్రాంతాల్లో 4000 మంది పోలీసులను మోహరించినట్టు తెలిపారు.