Breaking News

ప్రముఖ రచయిత్రి అరుందతి రాయ్ (Arundhati Roy) చిక్కుల్లో పడ్డారు. ఆమెకు వ్యతిరేకంగా పిటిషన్ దాఖలైంది. ఓ ఇంటర్వ్యూలో ఆమె ‘దేశ వ్యతిరేక’వ్యాఖ్యలు చేశారని, ఆమెపై చర్యలు తీసుకోవాలని కోరుతూ కలకత్తా హైకోర్టులో మితా బెనర్జీ (Mita Banerjee) అనే వ్యక్తి పిటిషన్ దాఖలు చేశారు.

అరుందతి రాయ్ తన ట్విట్టర్‌ ఖాతాలో ఓ ఇంటర్వ్యూను షేర్ చేశారని బెనర్జీ తెలిపారు. అందులో భారత్‌ను ‘హిందూ ఫాసిస్ట్ సంస్థ’అని వ్యాఖ్యానించారని మండిపడ్డారు. మరోవైపు ఈ వ్యాఖ్యలను నటుడు ప్రకాష్ రాజ్ రీ ట్వీట్ చేశారని తెలిపారు. అందువల్ల ప్రకాష్ రాజ్ పై కూడా చర్యలు తీసుకోవాలని కోరారు.

భారతదేశ పౌరురాలిగా అరుందతి రాయ్ పోస్ట్ “దురదృష్టకరం” అని అన్నారు. రాయ్ ఇంటర్వ్యూ ఇచ్చిన పశ్చిమాసియా మీడియా సంస్థకు అల్-ఖైదా నాయకుడు ఒసామా బిన్ లాడెన్‌తో సంబంధాలు కలిగి ఉన్నాయని పిటిషనర్ ఆరోపించారు. వీటన్నింటినీ పరిగణనలోకి తీసుకుని అరుందతి రాయ్ పై చర్యలు తీసుకోవాలని కోరారు.

ఈ పిటిషన్ పై సోమవారం కోల్‌కతా హైకోర్టులో విచారణ జరిగింది. ఈ సందర్బంగా పిటిషనర్ వాదనలను హైకోర్టు పరిగణనలోకి తీసుకుంది. ఈ కేసుకు సంబంధించి సంబంధాలు ఉన్న వ్యక్తులందరికీ తాజాగా నోటీసులు జారీ చేయాలని న్యాయస్థానం ఆదేశించింది. అనంతరం కేసును హైకోర్టు వాయిదా వేసింది.

ఆర్టికల్ 370 రద్దు ( Abrogation Of Article 370)ను సమర్థిస్తూ సర్వోన్నత న్యాయస్థానం (Supreme Court) ఇచ్చిన తీర్పుపై రాష్ట్రీయ స్వయం సేవక్ సంఘ్ (RSS)కీలక వ్యాఖ్యలు చేసింది. సుప్రీం కోర్టు ఇచ్చిన తీర్పు జాతీయ సమైక్యతను మరింత బలోపేతం చేస్తుందని తెలిపింది. ఆర్టికల్ 370ని ఆర్ఎస్ఎస్ మొదటి నుంచి వ్యతిరేకిస్తూ వస్తోందని సంఘ్ పబ్లిసిటీ చీఫ్ సునీల్ అంబేకర్ వెల్లడించారు.

ఆర్టికల్ 370 రద్దుకు సుప్రీంకోర్టు చట్టబద్ధత కల్పించడం స్వాగతించదగిన విషయమని పేర్కొన్నారు. ఈ విషయాన్ని ఆర్ఎస్ఎస్ స్వాగతిస్తోందని చెప్పారు. ఆర్‌ఎస్‌ఎస్ కూడా ఈ విషయంలో అనేక తీర్మానాలు చేసిందని గుర్తు చేశారు. జమ్మూ కశ్మీర్‌కు ప్రత్యేక హోదా కల్పించే నిబంధనను రద్దు చేయాలని డిమాండ్ చేస్తూ గతంలో పలు ఉద్యమాల్లో ఆర్ఎస్ఎస్ పాల్గొందన్నారు.

సుప్రీం కోర్టు నిర్ణయం జాతీయ సమైక్యతను బలోపేతం చేస్తుందన్నారు. ఆర్టికల్ 370 కారణంగా జమ్మూ కశ్మీర్‌లో ఏండ్ల తరబడి అన్యాయానికి గురవుతున్న ప్రజలకు ఈ నిర్ణయం ఉపశమనం కలిగిస్తుందని వివరించారు. మరోవైపు ఆర్‌ఎస్‌ఎస్ అనుబంధ మహిళా సంస్థ సంవర్ధినీ న్యాస్ కూడా సుప్రీంకోర్టు తీర్పుపై హర్షం వ్యక్తం చేసింది.

ఆర్టికల్ 370ని రద్దు అనేది జమ్మూ కశ్మీర్‌ను భారత్‌లోని ప్రధాన స్రవంతిలో విలీనం చేసేందుకు బాటలు వేసిందని తెలిపింది. పౌరులందరికీ సమాన హక్కులు, అవకాశాలను పెంపొందించడం కోసం మార్గం సుగమం చేసిందని పేర్కొంది. ఆర్టికల్ 370 రద్దుకు అనుకూలంగా తీర్పు ఇచ్చినందుకు సుప్రీం కోర్టుకు ధన్యవాదాలు చెప్పింది.

ఖలిస్తాన్ (Kalisthan) ఉగ్రవాది హర్దీప్ సింగ్ నిజ్జర్ (Hardeep Singh Nijjar) తో పాటు ఖలిస్తాన్ ఉగ్రవాదులను అణచి వేయాలని నార్త్ అమెరికాలో భారత దౌత్యవేత్తలకు భారత ప్రభుత్వం సీక్రెట్ మెమోను జారీ చేసిందన్న వార్తలపై కేంద్రం స్పందించింది. ఈ వార్తలను భారత్ తీవ్రంగా ఖండించింది.

ఆ నివేదిక పెద్ద ఫేక్ అని భారత విదేశీ వ్యవహారాల మంత్రిత్వ శాఖ ప్రతినిధి అరిందమ్ బాగ్చీ వెల్లడించారు. ఇది పూర్తిగా కల్పిత కథనం అన్నారు. పాకిస్తానీ ఇంటెలిజెన్స్ చెప్పిన బూటకపు కథనాలను మీడియా ప్రచారం చేసిందన్నారు. భారత్‌కు వ్యతిరేకంగా జరుగుతున్న తప్పుడు ప్రచారంలో ఈ నివేదిక భాగమని ఆయన వెల్లడించారు.

అవన్నీ నకిలీ నివేదికలన్నారు. అలాంటి మెమోను భారత ప్రభుత్వం జారీ చేయలేదని స్పష్టం చేశారు. ఖలిస్థానీ ఉగ్రవాది హర్‌దీప్‌ సింగ్‌ నిజ్జర్ హత్య నేపథ్యంలో భారత్-కెనడా మధ్య దౌత్యపరమైన ఉద్రిక్తతలు కొనసాగుతున్నాయి. ఈ క్రమంలో అమెరికాకు చెందిన ఆన్‌లైన్‌ మీడియా సంస్థ ‘ది ఇంటర్‌సెప్ట్‌’ఓ కథనాన్ని ప్రచురించింది.

పశ్చిమ దేశాల్లో ఆశ్రయం పొందుతున్న ఖలిస్తాన్ ఉగ్రవాదులను అణచి వేయాలని భారత ప్రభుత్వం ఓ సీక్రెట్ మెమో జారీ చేసిందని కథనాలు రాసింది. ఖలిస్తాన్ ఉగ్రవాది హర్దీప్ సింగ్ నిజ్జర్ హత్యకు రెండు నెలల ముందు ఈ ఏడాది ఏప్రిల్‌లో ఈ మెమోను జారీ చేసినట్టు మీడియా సంస్థ పేర్కొంది.

ఒడిశా (Odissa)లో కాంగ్రెస్ ఎంపీ ధీరజ్ సాహు (Deeraj Sahu) నివాసంలో ఆదాయ పన్ను శాఖ తనిఖీలు వరుసగా ఆరవ రోజు కూడా కొనసాగాయి. జార్ఖండ్, ఒడిశాలో సాహుకు సంబంధించి పలు ప్రాంతాల్లో ఇప్పటి వరకు రూ. 353 కోట్ల సొమ్మును ఐటీ అధికారులు స్వాధీనం చేసుకున్నారు. దేశంలో ఐటీ రెయిడ్స్ లో ఈ స్థాయిలో డబ్బు పట్టుబడటం ఇదే తొలిసారి అని ఐటీ అధికారులు చెబుతున్నారు.

ఐదు రోజుల పాటు ఈ డబ్బును అధికారులు లెక్కించారు. లెక్కింపు సమయంలో కౌంటింగ్ మెషిన్స్ మొరాయించాయి. దీంతో లెక్కింపు ప్రక్రియ ఆలస్యం అయింది. మొత్తం 176 డబ్బు సంచుల్లోని కట్టలను అధికారులు లెక్కించారు. ఈ మొత్తాన్ని బాలంగిర్ ఎస్​బీఐ బ్రాంచీలో డిపాజిట్ చేసినట్లు అధికారులు వెల్లడించారు. ఈ కరెన్సీ మొత్తం బిజినెస్ గ్రూపు, పంపిణీదారుల, ఇతరులు దేశీయ మద్యం అమ్మకాల ద్వారా సంపాదించిన “ఖాతాలో చూపబడని” డబ్బు అని అధికారులు అన్నారు.

కాంగ్రెస్ ఎంపీ నివాసంలో భారీగా డబ్బు సంచులు దొరకడంపై బీజేపీ తీవ్రంగా మండిపడింది. బీజేపీ ఎంపీలంతా పార్లమెంట్ ఆవరణలోని గాంధీ విగ్రహం వద్ద కాంగ్రెస్​కు వ్యతిరేకంగా నిరసనకు దిగారు. కాంగ్రెస్​ ఎంపీ ధీరజ్ సాహు నివాసంలో భారీగా డబ్బుల సంచుల వ్యవహారంపై రాహుల్ గాంధీ, సోనియా గాంధీ ఎందుకు మాట్లాడట్లేదని బీజేపీ జాతీయ అధ్యక్షుడు నడ్డా ప్రశ్నించారు. ఈ విషయంలో వారు మౌనం వీడాలని ఆయన డిమాండ్​ చేశారు.

కాంగ్రెస్​, అవినీతి ఒకే నాణనికి రెండు ముఖాలు అని ధ్వజమెత్తారు. రాహుల్​ గాంధీ, ధీరజ్​ సాహు నేతృత్వంలో సాగుతున్న ఈ లిక్కర్​ దందాలో పట్టుబడ్డ ఈ నల్లధనం ఎక్కడి నుంచి వచ్చిందని ప్రశ్నించారు. ఇది ఎవరికి చెందుతుంది అనే సమాధానాలు చెప్పాలని డిమాండ్ చేశారు. ‘ఒక ఎంపీ ఇంట్లో భారీగా నగదు పట్టుబడటం చూస్తే తనకు చాలా ఆశ్చర్యంగా ఉందని అమిత్ షా అన్నారు.

ఈ అవినీతిపై ఇండియా కూటమిలోని పార్టీలన్నీ ఎందుకు నోరు విప్పడం లేదని ప్రశ్నించారు. కేంద్ర దర్యాప్తు సంస్థలైన ఐటీ, ఈడీ వంటి వాటిని ప్రధాని మోడీ దుర్వినియోగం చేస్తున్నారంటూ ప్రతిపక్షాలు ఎందుకు పదే పదే గొడవ చేస్తున్నాయో తనకు ఇప్పుడు అర్థమవుతోందన్నారు. ఎందుకంటే వారి అవినీతి బయటపడుతుంది కాబట్టే వారు అలాంటి ఆరోపణలు చేస్తున్నారని అన్నారు.

మధ్యప్రదేశ్ (Madhya Pradesh) నూతన సీఎంగా మోహన్ యాదవ్ (Mohan Yadav) ఎన్నికయ్యారు. పార్టీ శాసనసభా పక్ష నేతగా ఆయన్ని పార్టీ సభ్యులు ఎన్నుకున్నారు. గతంలో ఆయన మంత్రిగా పని చేశారు. ప్రస్తుతం ఆయన ఉజ్జయిని దక్షిణ ఎమ్మెల్యేగా ఉన్నారు. మరోవైపు కేంద్ర మంత్రి నరేంద్ర సింగ్ తోమర్ ఇటీవల అసెంబ్లీకి ఎన్నికయ్యారు. ఈ నేపథ్యంలో ఆయన ఈ రోజు తన పదవికి రాజీనామా చేశారు.

అసెంబ్లీ నూతన స్పీకర్‌‌గా ఆయన్ని ఎన్నుకోనున్నారు. మరోవైపు మాజీ ఆర్థిక మంత్రి జగదీశ్ దేవడా, మాజీ మంత్రి రాజేంద్ర శుక్లాను డిప్యూటీ సీఎంగా ఎన్నికయ్యారు. రాజధాని భోపాల్‌లో బీజేపీ శాసనసభాపక్ష సమావేశాన్ని నిర్వహించారు. ఈ సమావేశానికి పార్టీ పరిశీలకులుకుగా హర్యానా సీఎం మనోహర్‌లాల్‌ ఖట్టర్‌, బీజేపీ ఓబీసీ మోర్చా జాతీయ అధ్యక్షుడు లక్ష్మణ్, మధ్యప్రదేశ్‌ బీజేపీ అధ్యక్షుడు డీవీ శర్మ హాజరయ్యారు.

సీఎం అభ్యర్థి విషయంలో పార్టీ ఎమ్మెల్యేల అభిప్రాయాలను వారు అడిగి తెలుసుకున్నారు. అనంతరం మోహన్ యాదవ్ పేరును ప్రతిపాదించగా దానికి ఎమ్మెల్యేలంతా ఓకే చెప్పారు. నూతన సీఎంగా ఎన్నికైన మోహన్ యాదవ్ కు పార్టీ అధిష్టానం అభినందనలు తెలిపింది. మరోవైపు తనకు ఇంత గొప్ప అవకాశాన్ని ఇచ్చిన పార్టీ అధిష్టానానికి ఆయన ధన్యవాదాలు తెలిపారు.

తాను ఒక చిన్న నాయకుడినన్నారు. తనలాంటి నాయకుడికి ఇంత గొప్ప బాధ్యతలు అప్పగించినందుకు కేంద్ర, రాష్ట్ర నాయకత్వానికి ఆయన కృతజ్ఞతలు తెలిపారు. అందరి ప్రేమాభిమానాలతో తన భాద్యతలను నెరవేర్చేందుకు ప్రయత్నిస్తానన్నారు. మోహన్ యాదవ్ కు రాష్ట్రీయ స్వయంసేవక్ సంఘ్ తో ఆయనకు మంచి సంబంధాలు ఉన్నాయి. శివరాజ్ సింగ్ చౌహాన్ ప్రభుత్వంలో ఆయన ఉన్నత విద్యాశాఖ మంత్రిగా పనిచేశారు.

మోహన్ యాదవ్ పదేండ్ల క్రితం రాజకీయాల్లోకి అడుగు పెట్టారు. 2013లో తొలిసారి ఎమ్మెల్యేగా ఆయన ఎన్నికయ్యారు. ఆ తర్వాత 2018 ఎన్నికల్లో విజయం సాధించారు. 2020లో అప్పటి శివరాజ్‌ సింగ్ చౌహన్‌ ప్రభుత్వంలో తొలిసారిగా మంత్రిగా పని చేశారు. తాజాగా జరిగిన ఎన్నికల్లో ఉజ్జయిని దక్షిణ నియోజకవర్గం నుంచి పోటీ చేసి వరుసగా మూడోసారి విజయం సాధించారు.

రాజ్యసభలో రెండు కశ్మీర్ బిల్లుల (jammu Kashmir Bills)ను కేంద్ర హోం మంత్రి అమిత్ షా (Amit Shah) ఈ రోజు ప్రవేశ పెట్టారు. జమ్ము కశ్మీర్ రిజర్వేషన్ (సవరణ)బిల్లు-2023, జమ్ము కశ్మీర్ పునర్ వ్యవస్థీకరణ (సవరణ)బిల్లు-2023లకు ఇప్పటికే లోక్ సభ ఆమోదం తెలిపింది. తాజాగా పెద్దల సభలో అనుమతి కోసం ఈ బిల్లులను రాజ్యసభలో కేంద్రం ప్రవేశ పెట్టగా విపక్షాలు అభ్యంతరం వ్యక్తం చేశాయి.

ఈ బిల్లులకు వైసీపీ ఎంపీ విజయ్ సాయి రెడ్డి మద్దతు తెలిపారు. తమ పార్టీ, సీఎం జగన్ కూడా ఈ బిల్లులకు మద్దతుగా ఉన్నారని చెప్పారు. కశ్మీర్ సమస్య పరిష్కారానికి నెహ్రూవియన్ సూడో సెక్యులరిజం అడ్డుగా ఉందని మండిపడ్డారు. ఆర్టికల్ 370, పాకిస్తాన్‌తో రెండవ యుద్ధంలో పాక్ ఆక్రమిత కశ్మీర్‌ను తిరిగి పొందడంలో విఫలమవడాన్ని కాంగ్రెస్ చేసిన తప్పిదాలుగా ఆయన అభివర్ణించారు.

పరిస్థితిని సరిదిద్దడానికి బంగ్లాదేశ్ యుద్ధం తర్వాత అవకాశం వచ్చిందని, సిమ్లా డిక్లరేషన్ పై సంతకం చేసే సమయంలో ఆ అవకాశాన్ని కోల్పోయామని గుర్తు చేశారు. కాంగ్రెస్ ప్రభుత్వ తప్పిదాలుగా తాను భావించిన వాటిని కేంద్ర హోం మంత్రి ప్రస్తావించారన్నారు. ఈ విషయంలో అమిత్ షాను ఆయన ప్రశంసించారు. ఎన్నికలు జరగని పీఓకేలోని 24 స్థానాలకు సభ్యులను నామినేట్ చేయాలని ఆయన ప్రతిపాదించారు.

కశ్మీర్‌లో వలసదారులకు నగదు సహయాన్ని మరింత పెంచాలన్నారు. ఆర్టికల్ 370 రద్దు చేసినప్పటి నుండి జమ్మూ కశ్మీర్ గణనీయమైన పురోగతిని సాధించిందని వెల్లడించారు. జమ్ము కశ్మీర్ కు సంబంధించి జవహర్‌లాల్ నెహ్రూ తీసుకున్న నిర్ణయాలు తీవ్రమైన పరిణామాలకు దారితీశాయని పేర్కొన్నారు. అవి చాలా ‘పెద్ద తప్పిదాలు’గా ఆయన పేర్కొన్నారు.

ఆర్టికల్-370 రద్దుపై సుప్రీం కోర్టు ( Supreme Court) ఇచ్చిన తీర్పుపై ప్రధాని మోడీ (PM Modi) స్పందించారు. ఆర్టికల్ 370 విషయంలో సర్వోన్నత న్యాయస్థానం ఇచ్చిన తీర్పు చారిత్రకమైనదిగా ప్రధాని మోడీ అభివర్ణించారు. ఈ తీర్పు జమ్ము కశ్మీర్, లడఖ్‌లోని సోదరీ సోదరీమణులకు ఆశ, పురోగతి, ఐక్యత కలిగించే ప్రకటన అని పేర్కొన్నారు. సుప్రీం కోర్టు తీర్పు భారతీయులమైన మనం, అన్నిటికంటే ప్రియమైన, అధికంగా గౌరవించే ఐక్యత సారాంశాన్ని బలపరిచిందన్నారు.

ఆర్టికల్ 370 వల్ల ప్రగతి ఫలాలు జమ్ము కశ్మీర్ ప్రజలకు అందకుండా పోయాయన్నారు. అలా నష్టపోయిన బలహీన, అట్టడుగు వర్గాలకు ప్రయోజనాలు అందించేందుకు తమ ప్రభుత్వం నిబద్దతతో పని చేస్తోందని తెలిపారు. ఈ రోజు తీర్పు కేవలం చట్టపరమైన తీర్పు మాత్రమే కాదన్నారు. జమ్ము కశ్మీర్ ప్రజలకు ఇది ఒక ఆశాకిరణమని వెల్లడించారు.

ఇది ప్రజల ఉజ్వల భవిష్యత్తుకు ఇచ్చిన గొప్ప వాగ్దానం అన్నారు. బలమైన, మరింత ఐక్యతతో కూడిన భారతదేశాన్ని నిర్మించాలనే తమ సమిష్టి సంకల్పానికి ఇది ఒక నిదర్శనమని చెప్పారు. ఇది నయా జమ్మూకాశ్మీర్ అంటూ హ్యాష్ ట్యాగ్ చేశారు. మరోవైపు ఆర్టికల్‌ 370 రద్దు అనేది అణగారిన వర్గాల హక్కులను పునరుద్ధరించిందని కేంద్ర హోం మంత్రి అమిత్ షా తెలిపారు.

వేర్పాటువాదం, రాళ్లదాడులు సమసిపోయాయని ట్వీట్‌ చేశారు. జమ్ము కశ్మీర్ ప్రాంత మంతా ఇప్పుడు మధురమైన సంగీతం, సాంస్కృతిక వైభవంతో విరాజిల్లుతోందని బీజేపీ జాతీయ అధ్యక్షుడు జేపీ నడ్డా అన్నారు. ఈ తీర్పుతో దేశంలొ ఐక్యత మరోసారి కొనసాగిందన్నారు. సుప్రీం తీర్పును తమ పార్టీ స్వాగతిస్తోందని జేపీ నడ్డా అన్నారు.

ఆర్టికల్ 370 రద్దుపై సుప్రీం కోర్టు వెల్లడించిన తీర్పు చాలా విచారకరంగా ఉందని డెమోక్రటిక్ ప్రోగ్రెసివ్ ఆజాద్ పార్టీ ఛైర్మన్ గులాం నబీ ఆజాద్ పేర్కొన్నారు. ఈ తీర్పు అత్యంత దురదృష్టకరమన్నారు. సర్వోన్నత న్యాయస్థానం తీర్పుతో ప్రజలు సంతోషంగా లేరని వెల్లడించారు. శాంతిభద్రతలకు విఘాతం కలిగించబోమని నేషనల్ కాన్ఫరెన్స్ నేత ఒమర్ అబ్దుల్లా స్పష్టం చేశారు.

ఈ తీర్పుతో తాము తీవ్ర నిరాశకు గురయ్యామన్నారు. నీ నిరుత్సాహ పడబోమన్నారు. జమ్ముకశ్మీర్‌ ప్రయోజనాల కోసం పోరాటం కొనసాగిస్తామన్నారు. జమ్మూకశ్మీర్​ అనేక ఎత్తుపల్లాలను చూసిందని పీడీపీ చీఫ్​ మెహబూబా ముఫ్తీ తెలిపారు. ఆర్టికల్ 370 తాత్కాలిక నిబంధన అంటూ సుప్రీం కోర్టు వ్యాఖ్యలు చేయడం మన ఓమి కాదన్నారు. దేశప్రజలు తీర్పును పండుగ జరుపుకొంటున్నారన్నారు. కానీ ఈరోజు జమ్ముకశ్మీర్​ జైలుగా మారిందన్నారు.

ఇక సుప్రీం కోర్టు తీర్పును కాంగ్రెస్, శివసేనలు స్వాగతించాయి. జమ్ముకశ్మీర్‌లో వీలైనంత త్వరగా కేంద్రం ఎన్నికలు నిర్వహించాలని కాంగ్రెస్ ఎంపీ అధీర్ రంజన్ చౌదరి కోరారు. జమ్ముకశ్మీర్‌కు రాష్ట్ర హోదాను పూర్తిగా పునరుద్ధరించాలని విజ్ఞప్తి చేశారు. సుప్రీం కోర్టు తీర్పును శివసేన నేత ఉద్దవ్ ఠాక్రే స్వాగతించారు. పాక్ ఆక్రమిత కశ్మీర్​ను భారత్​లో కలిపి వీలైనంత త్వరగా ఎన్నికలు నిర్వహించాలన్నారు.