Breaking News

ఉత్తర కాశీ (Uttar Kashi)లోని టన్నెల్‌ (Tunnel) నుంచి బయట పడిన కార్మికులు భావోద్వేగానికి గురయ్యారు. 17 రోజుల పాటు సొరంగంలో తాము పడిని ఇబ్బందులను గుర్తుకు చేసుకున్నారు. రాళ్ల నుంచి కారిన నీటిని తాగానని టన్నెల్‌లో చిక్కుకున్న కార్మికుడు తెలిపారు. అందుబాటులో ఉన్న మరమరాలు తిని ఇన్ని రోజులు బతికానన్నారు.

మొదటి రెండు రోజులు చాలా ఇబ్బంది పడ్డామని ఝార్ఖండ్​కు చెందిన అనిల్ బేడియా అన్నారు. అసలు తాము బతికి బయటకు వస్తామన్న ఆశలు కూడా లేవని అనిల్ వివరించారు. ఈ ఘటనను తాము ఓ పీడ కలలాగా భావిస్తున్నామని అన్నారు. పది రోజుల తర్వాత అధికారులు అందించిన పండ్లు, నీళ్లు సహా ఇతర ఆహార పదార్థాలను తిన్నామన్నారు.

దాదాపు 70 గంటల తర్వాత అధికారులు తమను సంప్రదించారన్నారు. దీంతో మళ్లీ తమలో ఆశలు మొదలయ్యాయన్నారు. టన్నెల్​లో చిక్కుకున్న వాళ్లలో 15 మంది ఝార్ఖండ్​కు చెందిన వారే ఉన్నారు. కార్మికులంతా క్షేమంగా తిరిగి రావడంతో కుటుంబ సభ్యులు సంతోషంలో మునిగి పోయారు.

ఇక కార్మికులు విజయవంతంగా బయటకు తీసుకు రావడంతో చుట్టు పక్కల గ్రామాల ప్రజలు సంబురాలు చేసుకున్నారు. సొరంగం సమీపంలో బాణ సంచా పేల్చారు. సొరంగం బయట ‘భారత్ మాతా కీ జై’నినాదాలు మారు మోగాయి. ప్రధాని మోడీ జిందాబాద్, సీఎం ధామీ జిందాబాద్ అంటూ నినాదాలు చేశారు.

తమిళ నటుడు, డీఎండీకే అధినేత (DMDK Chief) విజయ్ కాంత్ (vijay Kanth) ఆరోగ్యం క్షీణించింది. ఆయన ఆరోగ్యం ప్రస్తుతం విషమంగా ఉన్నట్టు వైద్యులు చెబుతున్నారు. ప్రస్తుతం చికిత్సకు ఆయన శరీరం సహకరిస్తోందని వైద్యులు తెలిపారు. కానీ ప్రస్తుతం ఆయన ఆరోగ్యం నిలకడగా లేదని హెల్త్ బులిటెన్‌లో వైద్యులు వివరించారు.

ప్రస్తుతం ఆయనకు ఊపిరితిత్తులకు సంబంధించిన చికిత్స చేయాలని వైద్య నిపుణులు సూచనలు చేశారని బులిటెన్ లో తెలిపారు. విజయ్ కాంత్ కు మరో 14 రోజుల చికిత్స అవసరమన్నారు. ఈ క్రమంలో ఆయన అభిమానులు ఆందోళనకు గురవుతున్నారు. తమ అభిమాన హీరో త్వరగా కోలుకోవాలని దేవునికి ప్రార్థనలు చేస్తున్నారు.

అటు ఆయన పార్టీ కార్యకర్తలు కూడా ఆందోళన చెందుతున్నారు. తమ నాయకుడికి ఏమి కావద్దని దేవున్ని కోరుకుంటున్నారు. గత కొంత కాలంగా ఆయన డయాబెటిస్‌‌తో బాధపడుతున్నారు. డయాబెటిస్ వల్ల కుడికాలి మూడు వేళ్లను వైద్యులు గతంలో తొలగించారు. ఆయనకు లివర్ సమస్య కూడా ఉంది. ఇటీవల ఆయనకు శ్వాస తీసుకోవడంలో ఇబ్బందిగా మారింది. దీంతో ఆయన్ని కుటుంబ సభ్యులు ఆస్పత్రికి తరలించారు.

విజయ్ కాంత్ ‘ఇనిక్కుం ఇలమై’ అనే చిత్రంతో సినీ రంగంలోకి అడుగు పెట్టారు. సుమారు 100కి పైగా సినిమాల్లో నటించి మెప్పించారు. 20కు పైగా సినిమాల్లో పోలీసు పాత్రలో నటించి అభిమానులను ఆకట్టుకున్నారు. ఆ తర్వాత ప్రజా సేవ చేయాలని నిర్ణయించుకుని రాజకీయాల్లోకి అడుగుపెట్టారు. 2005లో డీఎండీకే పార్టీని స్థాపించారు.

పేదలకు మోడీ (Modi) సర్కార్ గుడ్ న్యూస్ (Good News) చెప్పింది. ఉచిత రేషన్ పథకాన్ని మరో ఐదేండ్ల పాటు పొడిగిస్తున్నట్టు ప్రకటించింది. వచ్చే ఏడాది జనవరి 1 నుంచి మరో ఐదేండ్ల పాటు ఈ పథకం కొనసాగుతుందని తెలిపింది. ఈ పథకం కింద 81 కోట్ల మంది అర్హులకు నెలకు ఒకరికి 5 కిలోల చొప్పున ఉచిత రేషన్ అందించనున్నట్టు తెలిపింది. పీఎం గరీబ్ కళ్యాణ్ యోజన కింద ఐదేండ్లలో రూ. 11.8లక్షల కోట్లు ఖర్చవుతుందని వెల్లడించింది.

కేంద్రం, రాష్ట్రాల మధ్య పన్ను రాబడి పంపిణీ విషయంలో 16వ ఆర్థిక సంఘం విధివిధానాలకు కేబినెట్ ఆమోదం చెప్పిందని కేంద్ర మంత్రి అనురాగ్ ఠాకూర్ తెలిపారు. 2025 అక్టోబర్ 2025 వరకు 16 వ ఆర్థిక సంఘం తన నివేదికను సమర్పిస్తుందని చెప్పారు. 2026 ఏప్రిల్ నుంచి ప్రారంభమయ్యే ఐదేండ్ల కాలానికి సిఫార్సులు చెల్లుబాటు అవుతాయన్నారు.

ఉత్తరాఖండ్ సొరంగంలో చేపట్టిన రెస్క్యూ ఆపరేషన్ గురించి కూడా ఈ సమావేశంలో చర్చించారు. ఆ సమయంలో ప్రధాని మోడీ తీవ్ర భావోద్వేగానికి గురయ్యారని చెప్పారు. ఎన్నికల ప్రచారంలో ఉన్నప్పటికీ రెస్క్యూ ఆపరేషన్ గురించి ప్రధాని మోడీ ఎప్పటికప్పుడు తెలుసుకున్నారన్నారు. రోజుకు సుమారు రెండు నుంచి మూడు సార్లు సీఎం పుష్కర్ సింగ్ ధామీతో మోడీ మాట్లాడారన్నారు.

మరోవైపు మహిళలకు కూడా కేంద్రం గుడ్ న్యూస్ చెప్పింది. డ్వాక్రా గ్రూపులకు వ్యవసాయ డ్రోన్‌లను అందించేందుకు కొత్త పథకాన్ని ప్రారంభించేందుకు కేబినెట్ పచ్చ జెండా ఊపింది. ఈ పథకం కింద 15వేల డ్వాక్రా గ్రూపులకు డ్రోన్లు అందించాలని, వాటిపై మహిళలకు శిక్షణ అందించాలని నిర్ణయించామన్నారు. వ్యవసాయ అవసరాల కోసం ఈ డ్రోన్​లను రైతులకు డ్వాక్రా గ్రూపులు అద్దెకు ఇవ్వనున్నాయి.

వీక్షిత్ భారత్ సంకల్ప్ యాత్రలో భాగంగా స్వయం సహాయక బృందాలతో మోడీ నేరుగా మాట్లాడుతారని పీఎంఓ పేర్కొంది. వ్యవసాయ రంగంలో టెక్నాలజీని ప్రోత్సహించేలా కేంద్రం ఈ నిర్ణయం తీసుకొందన్నారు. దీంతో పాటు జన్ ఔషది కేంద్రాల సంఖ్యను 10 వేల నుంచి 25 వేలకు పెంచనున్నట్లు ప్రకటించింది.

చైనా (China)లో ఇటీవల న్యుమోనియా (pneumonia) కేసులు ఆందోళన కలిగిస్తున్నాయి. అక్కడి చిన్న పిల్లల్లో శ్వాసకోస సంబంధిత వ్యాధుల బారిన పడుతున్నారు. దీంతో చాలా మంది పిల్లలు ఆస్పత్రుల్లో చేరుతున్నారు. ప్రస్తుతం అక్కడ పాఠశాలలు మూత పడే పరిస్థితి నెలకొంది. అటు ఇప్పటికే ప్రపంచ ఆరోగ్య సంస్థ (WHO)కూడా ఆందోళన వ్యక్తం చేసింది. దీనిపై మరింత సమాచారం అందించాలని చైనాను కోరింది.

చైనాలో ఆందోళనలో నేపథ్యంలో భారత ప్రభుత్వం అలర్ట్ అయింది. ఇప్పటికే అన్ని రాష్ట్రాలను అలర్ట్ చేసింది. ఈ క్రమంలో ఆరు రాష్ట్రాలు అలర్ట్ అయ్యాయి. ఇప్పటికే తమ పౌరులు పలు సూచనలు చేశాయి. తమిళనాడు, కర్ణాటక, రాజస్థాన్, గుజరాత్, హర్యానా, ఉత్తరఖండ్ రాష్ట్రాలు తమ ఆరోగ్య మౌలిక సదుపాయాలను అలర్ట్ మోడ్ లోకి తీసుకు వచ్చాయి.

ఎలాంటి పరిస్థితులనైనా ఎదుర్కొనేందుకు రెడీగా ఉండాలని ఆరోగ్య శాఖ సిబ్బందిని అధికారులు అలర్ట్ చేశారు. కర్ణాటకలో సీజనల్ ఫ్లూపై రాష్ట్ర ప్రభుత్వం పలు సూచనలు చేసింది. సీజనల్ ఫ్లూ అనేది ఒక అంటు వ్యాధి. ఇది సాధారణంగా ఐదు నుంచి ఏడు రోజుల పాటు ఉంటుందని, వ్యాధి సోకిన వారిలో తక్కువ అనారోగ్యం, తక్కువ మరణాల రేటు ఉంటుంది.

కానీ ఇది శిశువులు, వృద్ధులు, గర్భిణీ స్త్రీలు, రోగనిరోధక శక్తి లేనివారికి ఈ వ్యాధి వల్ల ముప్పు వాటిల్లే అవకాశం ఉందని తెలిపింది. అందువల్ల వైద్యాధికారులు అలర్ట్ గా ఉండాలని తెలిపింది. మరోవైపు రాజస్థాన్ లోని అన్ని జిల్లా ఆస్పత్రులు, వైద్య కళాశాలలకు ఒక సలహాను ఆరోగ్య మంత్రిత్వ శాఖ సూచనలు చేసింది. అన్ని వైద్య కళాశాలల ప్రిన్సిపల్స్, చీఫ్ మెడికల్ ఆఫీసర్లు, అన్ని చీఫ్ మెడికల్ ఆఫీసర్లతో పాటు ప్రైవేట్ ఆసుపత్రులను పర్యవేక్షించాలని కోరింది.

ఉత్తర కాశీలో రెస్క్యూ ఆపరేషన్ (Rescue Operation) విజయవంతం అయింది. ఈ క్రమంలో టన్నెల్ (Tunnel) నుంచి సురక్షితంగా బయటకు వచ్చిన కార్మికులతో ప్రధాని మోడీ (PM Modi) ఫోన్‌లో మాట్లాడారు. సొరంగం నుంచి సురక్షితంగా బయట పడినందుకు ప్రధాని మోడీ సంతోషం వ్యక్తం చేశారు. సొరంగంలో 17 రోజుల పాటు చూపిన ధైర్యానికి గాను కార్మికులను ప్రధాని మోడీ అభినందించారు.

రెస్క్యూ టీమ్ తమ వద్దకు చేరుకునే వరకు కార్మికులంతా ఒకటిగా కలిసి ఓపికగా ఎదురు చూశారని అన్నారు. తాను రెస్క్యూ ఆపరేషన్ గురించి సీఎం పుష్కర్ సింగ్ ధామీ నుంచి తాను ఎప్పటికప్పుడు సమాచారాన్ని తెలుసుకుంటూనే ఉన్నానని చెప్పారు. అధికారులతో ఎప్పటికప్పుడు సంప్రదింపులు జరిపానన్నారు. కేవలం సమాచారం ఎప్పుడూ సమస్యలను పరిష్కరించలేదన్నారు.

అందుకే తాను రెస్క్యూ ఆపరేషన్ గురించి ఎప్పటికప్పుడు అప్ డేట్స్ అందినప్పటికీ చాలా ఆందోళనగా ఉన్నానని వెల్లడించారు. మరోవైపు టన్నెల్ లో గడిపిన రోజుల గురించి ప్రధాని మోడీకి కార్మికులు ఈ సందర్బంగా వివరించారు. టన్నెల్‌లో చిక్కుకున్నప్పటికీ తాము ఎప్పుడూ జీవితంపై ఆశ కోల్పోలేదన్నారు. తాము ఒక్క క్షణం కూడా బలహీన పడలేదని, ఆందోళన చెందలేదన్నారు.

తాము మొత్తం 41 మంది టన్నెల్‌లో ఉన్నామని, ఈ 17 రోజుల పాటు అంతా కలిసే ఉన్నామన్నారు. అందుకే తాము ఏ మాత్రం భయపడలేదని తెలిపారు. టన్నెల్‌లో తాము ఎప్పటికప్పుడు కలిసి మాట్లాడుకునే వాళ్లమన్నారు. వాకింగ్, యోగా చేయడం ఇలా అంతా కలిసే చేశామన్నారు. సీఎం పుష్కర్ సింగ్ ధామీతో పాటు రెస్క్యూ సిబ్బంది, అధికారులకు కార్మికులు కృతజ్ఞత తెలిపారు.