Breaking News

బంగారు తెలంగాణ చేస్తామని చెప్పి బొందలగడ్డ తెలంగాణగా మార్చారంటూ కేసీఆర్ (KCR) పై టీపీసీసీ చీఫ్ రేవంత్ రెడ్డి ( Revanth Reddy) ఫైర్ అయ్యారు. మాట్లాడిన ప్రతిసారీ తెలంగాణ నెంబర్ 1 అని చెప్తున్నాడన్నారు. రైతుల ఆత్మహత్యల్లో తెలంగాణ నంబర్ 1 అని అన్నారు. నిరుద్యోగ సమస్యల్లో రాష్ట్రం నెంబర్ వన్ అని తీవ్రంగా ధ్వజమెత్తారు.

నర్సాపూర్‌లో నిర్వహించిన కాంగ్రెస్ విజయభేరి బహిరంగ సభలో టీపీసీసీ చీఫ్ రేవంత్ రెడ్డి పాల్గొన్నారు. ఈ సందర్బంగా ఆయన మాట్లాడుతూ… చీమలు బారులు తీరినట్లుగా వేలాది మంది ఈ సభకు తరలి వచ్చారన్నారు. మీ అందరికి అభినందనలు అని తెలిపారు. నాయకులు పదవుల కోసం అమ్ముడుపోయారని, కానీ పార్టీని గెలిపించేందుకు కార్యకర్తలు ఇక్కడికి వచ్చారని వ్యాఖ్యానించారు. పార్టీ ఫిరాయించిన ఒక నమ్మక ద్రోహికి బీఆర్ఎస్ ఇక్కడ టికెట్ ఇచ్చిందన్నారు.

దేశంలోనే తెలంగాణను నంబర్ 1 తాగుబోతుల అడ్డాగా మార్చారని మండిపడ్డారు. అమ్ముడు పోయి కేసీఆర్ పంచన చేరిన వారిని అసెంబ్లీ గేటు కూడా తాకనివ్వద్దని పిలుపు నిచ్చారు. ఇందిరమ్మ రాజ్యం అంటే ఆకలి కేకల రాజ్యమని కేసీఆర్ అంటున్నాడని ఫైర్ అయ్యారు. ఇందిరమ్మ రాజ్యం అంటే లాంబాడీలను ఎస్టీ జాబితాలో చేర్చిన పార్టీ ఇందిరమ్మ రాజ్యమన్నారు.

నర్సాపూర్ అనేది లాంబాడి సోదరుల అడ్డా అని అన్నారు. నర్సాపూర్‌ను చార్మినార్ జోన్‌లో కలిపే అంశాన్ని కాంగ్రెస్ పరిగణనలోకి తీసుకుంటుందని హామీ ఇచ్చారు. లంబాడీల అభివృద్ధికి ఈ ప్రభుత్వం చేసిందేమీ లేదన్నారు. తాము అధికారంలోకి రాగానే లంబాడీ తండాల అభివృద్ధి కోసం రూ.100 కోట్ల ప్రత్యేక నిధులు ఇచ్చే బాధ్యత తమ పార్టీదన్నారు.

తండాల్లో మారుమూల పల్లెల్లో పేదలకు నిలువ నీడనిచ్చి. ఇందిరమ్మ ఇండ్లు ఇచ్చిన రాజ్యం ఇందిరమ్మ రాజ్యమన్నారు. భూమి ఆత్మగౌరవం, 25 లక్షల ఎకరాల అసైన్డ్ భూములను పంచిన రాజ్యం ఇందిరమ్మ రాజ్యమన్నారు. దళితులను ఆత్మగౌరవంతో తలెత్తుకునేలా చేసింది ఇందిరమ్మ రాజ్యమని వెల్లడించారు. పోడు భూములకు పట్టాలు ఇచ్చిన రాజ్యం ఇందిరమ్మ రాజ్యమన్నారు.

సాగునీటి ప్రాజెక్టులు కట్టి వ్యవసాయానికి సాగునీరు అందించిన రాజ్యం ఇందిరమ్మ రాజ్యమన్నారు. స్థానిక సంస్థల్లో ఆడబిడ్డలకు రిజర్వేషన్లు కల్పించింది ఇందిరమ్మ రాజ్యమేనన్నారు. ఇందిరమ్మ రాజ్యమే లేకపోతే, సోనియ గాంధీ తెలంగాణ ఇచ్చి ఉండకపోతే కేసీఆర్ కుటుంబం అడక్కు తినేదన్నారు. సిద్దిపేటలో సింగిల్ విండో డైరెక్టర్‌గా నీకు అవకాశం ఇచ్చింది ఇందిరమ్మ రాజ్యమేనన్నారు. ఆనాడు యూత్ కాంగ్రెస్ అధ్యక్షుడిగా కేసీఆర్ ను నియమించిన సంజయ్ గాంధీ ఇందిరమ్మ కొడుకు అనే సంగతి మరిచిపోయావా? అని మండిపడ్డారు.

తెలంగాణ అసెంబ్లీ ఎన్నికల్లో బీజేపీకి (BJP) మద్దతు పలుకుతున్నట్టు మాదిగ రిజర్వేషన్ పోరాట సమితి (MRPS)ప్రకటించింది. ఈ ఎన్నికల్లో బీజేపీ గెలుపు కోసం కృషి చేయాలని మాదిగ సామాజిక వర్గాన్ని ఎమ్మార్పీఎస్ వ్యవస్థాపకుడు మందకృష్ణ మాదిగ (Manda Krishna Madiga) కోరారు. ఈ మేరకు మాదిగ ఆర్గనైజేషన్‌లకు ఆయన లేఖలు రాశారు.

మాదిగలను సీఎం కేసీఆర్ వెన్నుపోటు పొడిచారని మందకృష్ణ అన్నారు. అటు కేబినెట్ లో కూడా ఎస్సీలకు అవకాశం ఇవ్వలేదని ఆయన మండిపడ్డారు. తెలంగాణలో ఎస్సీలు ఎక్కువగా ఉన్నారని చెప్పారు. అందులోనూ మాదిగ సామాజిక వర్గం ఎక్కువగా ఉందన్నారు. కానీ తమకు ప్రాధాన్యత ఇవ్వలేదని తీవ్ర స్థాయిలో మండిపడ్డారు. అందుకే ఈ అసెంబ్లీ ఎన్నికల్లో బీజేపీకే మన మద్దతు తెలపాలన్నారు.

ఎస్సీ వర్గీకరణ విషయంలో మాదిగలను కాంగ్రెస్ మోసం చేసిందని ఎమ్మార్పీఎస్ వ్యవస్థాపకుడు మందకృష్ణ మాదిగ అన్నారు. అధికారంలో ఉన్న పదేండ్లలో గానీ, ప్రతిపక్షంలో ఉన్న ఈ పదేండ్లలో గానీ ఎస్సీ వర్గీకరణకు కాంగ్రెస్ అసలు మద్దతు తెలపలేదని ఆయన మండిపడ్డారు. మాదిగలకు అనుకూలంగా వచ్చిన పలు నివేదికలను కాంగ్రెస్ విస్మరించిందని తీవ్ర ఆగ్రహం వ్యక్తం చేశారు.

బీసీ అభ్యర్థిని ముఖ్యమంత్రి చేస్తామని ప్రకటించిన బీజేపీకి బీసీ సంఘాలు మద్దతు తెలపాలి కదా అని ఆయన అన్నారు. బీసీలకు రాజ్యాధికారం రావాలని బీసీ సంఘాలు నిన్నటి వరకు మాట్లాడాయన్నారు. ఆ లెక్కన చూస్తే బీసీలకు బీఆర్ఎస్, కాంగ్రెస్ కన్నా బీజేపీ డబుల్ టికెట్లు ఇచ్చిందన్నారు. బలహీన వర్గాల ఆకాంక్షలకు అనుగుణంగా టికెట్ ఇచ్చింది బీజేపీనేనని తెలిపారు.

తెలంగాణలో మార్పు కోరుకుంటే బీఆర్ఎస్ కు ఓటు వేస్తే మార్పు ఎలా వస్తుందని ఆయన ప్రశ్నిచారు. కేసీఆర్ ను ఇప్పటికే రెండు సార్లు సీఎంగా చూశామని, ఇప్పుడు మూడో సారి చూస్తామన్నారు. అంతేగానీ అది మార్పు ఎలా అవుతుందని నిలదీశారు. పోనీ కాంగ్రెస్ కు ఓటు వేస్తే మార్పు వస్తుందా అని ఆయన ప్రశ్నించారు. ఉమ్మడి ఏపీలో మొదటి సీఎం, చివరి సీఎంలు కాంగ్రెస్ నాయకులేనని చెప్పారు.

ఇప్పుడు కాంగ్రెస్ గెలిస్తే మళ్లీ రేవంత్ రెడ్డి వస్తాడన్నారు. మళ్లీ కాంగ్రెస్ నేతలే వస్తే అది మార్పు ఎలా అవుతుందని అడిగారు. 50 శాతం జనాభా ఉండి ఇప్పటి వరకు సీఎం కాలేకపోయామని బీసీ సామాజిక వర్గానికి ఆవేదన ఉందన్నారు. ఉమ్మడి ఆంధ్రప్రదేశ్ నుంచి ఇప్పటి వరకు ఒక్క బీసీ వ్యక్తి సీఎం కాకపోవడం అవమానకరం కాదా అని ఆయన అడిగారు.

ప్రధాని మోడీ మాట ఇచ్చారంటే దాన్ని నెరవేరుస్తాడన్నారు. ఇతర నేతలతో పోలిస్తే మాటకు కట్టుబడి ఉండే నాయకుడు మోడీ అని ఆయన తెలిపారు. అలాంటి నేత వచ్చి బీసీని సీఎం చేస్తానని చెప్పారన్నారు. అలాంటప్పుడు బీసీలు కాంగ్రెస్ కు ఓటు వేస్తే మీరంతా రెడ్లను కోరుకున్నట్టు అవుతుందన్నారు. బీఆర్ఎస్ కు ఓటు వేస్తే వెలమ దొరలను కోరుకున్నట్టు అవుతుందన్నారు. అదేమీ కొత్త కాదన్నారు. బీసీని సీఎం చేసే బీజేపీకి మద్దతివ్వడం మార్పు కాదా అని ప్రశ్నించారు.

అలాంటి బీజేపీని వదిలి బీఆర్ఎస్ తరఫున ప్రచారం చేయడమంటే మేము సీఎం కాకున్నా పర్వాలేదు వెలిమలే పరిపాలించిన పర్వాలేదని ఒప్పుకున్నట్టేకదా అని అడిగారు. అందువల్ల బీసీ సోదరులు, సోదరీమణులు ఈ ఎన్నికల్లో బీజేపీకి ఓటు వేస్తే డిసెంబర్ 4న బీసీ సీఎం అభ్యర్థి ప్రమాణం చేస్తాడన్నారు. ఇంతకు మించి బీసీ సంఘాల ప్రజలకు కావాల్సిందేంటని ఆయన ప్రశ్నించారు.

వర్గీకరణ సమస్య ఎప్పుడు పరిష్కారం అవుతుందో ఇప్పుడే స్ఫష్టంగా చెప్పలేకపోయినా తాను బీజేపీకి మద్దతు ఇస్తున్నానన్నారు. అలాంటిది డిసెంబర్ 4న బీసీ ముఖ్యమంత్రి అవుతారని, అలాంటప్పుడు మీరు ఎందుకు మద్దతు ఇవ్వడం లేదని ఆయన నిలదీశారు. బీసీలకు ఇప్పుడు గొప్ప అవకాశం వచ్చిందన్నారు. దాన్ని సద్వినియోగం చేసుకోవాలన్నారు. బీజేపీకి ఓటు వేయకుపోతే బీసీ రాజ్యాధికార నినాదాన్ని మీరే వదులుకున్నట్టు అవుతుందన్నారు. దొరలకు, పటేళ్లకు ఊడిగం చేసినట్టు అవుతుందన్నారు.

బీసీ నినాదానికి ఆర్ కృష్ణయ్య కేంద్ర బిందువన్నారు. పార్టీలకు అతీతంగా ఉన్నంత వరకు ఆయన మాట వేదంగా ఉందన్నారు. ఒక తప్పటడుగు వల్ల కృష్ణయ్య కొంత వెనుకబడి పోయారన్నారు. ఇప్పుడు ఒక అవకాశం వచ్చిందన్నారు. ఏపీ సీఎంను నమ్ముకున్నంత వరకు, ఏపీ సర్కార్ ఇచ్చిన రాజ్యసభ సీటుకు కట్టుబడి ఉన్నంత వరకు మీరు పుట్టిన తెలంగాణ గడ్డపై రాజ్యాధికారం కోరుకునే హక్కు కోల్పోతారన్నారు. మీరు పుట్టిన గడ్డ మీద బీసీ వ్యక్తి సీఎం కావాలంటే ఇక్కడ బీజేపీకి, బీసీ సీఎం నినాదానికి అనుకూలంగా ఇక్కడ ప్రచారానికి రావాలని కోరారు.