National

పాక్‌లో మైనార్టీలపై జరుగుతున్న అఘాయిత్యాలు, హిందూ ఆలయాల (Hindu Temples)పై దాడులను ప్రపంచ హిందూ ఫౌండేషన్ వ్యవస్థాపకులు, గ్లోబల్ చర్మన్ స్వామి విజ్ఞానానంద్ (Swami Vigyananand) ఖండించారు. పాక్‌లో మైనారిటీల ప్రయోజనాలను కాపాడాలని అంతర్జాతీయ సంస్థలను ఆయన కోరారు. పాక్‌లో హిందూ దేవాలయాలపై నిరంతర దాడులు దీర్ఘకాలికంగా ఆ దేశ స్వంత వారసత్వాన్ని నాశనం చేస్తోందన్నారు.

థాయ్‌లాండ్‌ రాజధాని బ్యాంకాక్‌లో జరిగిన వరల్డ్‌ హిందూ కాంగ్రెస్‌‌లో స్వామి విజ్ఞానానంద్ మాట్లాడుతూ…. దేశ విభజన అనంతరం పాక్‌లో మైనార్టీలు నిరంతరం బెదిరింపులకు గురవుతున్నారని చెప్పారు. ముఖ్యంగా హిందువులు, క్రిస్టియన్లలు వేధింపులకు గురవుతున్నారని అన్నారు. హిందువుల సంఖ్య తగ్గిపోతోందని జనాభా లెక్కలను చూస్తే తెలుస్తుందన్నారు.

పాక్‌లో ఇప్పుడు కేవలం ఒకటి లేదా ఒకటిన్నర శాతం కంటే తక్కువ మంది హిందువులు ఉన్నారని తెలిపారు. మైనారిటీల ప్రయోజనాలను కాపాడేందుకు అంతర్జాతీయ హిందూ సమాజాన్ని సమీకరించి బహుళ పాక్షిక సంస్థలపై ఒత్తిడి తీసుకురావాలని ఆయన కోరారు. ఆలయానికి రావడం వారసత్వ సంపద అని పేర్కొన్నారు.

ఆ దేవాలయాలన్నింటినీ సరైన రీతిలో పాకిస్తాన్ కాపాడి ఉంటే పిరమిడ్ ల నుంచి ఈజిఫ్టు ఎలా లాభపడింతో ఇప్పుడు పాక్ కూడా అలాగే లబ్ది పొంది ఉండేదన్నారు. పాకిస్తాన్ ప్రభుత్వ మనస్తత్వం, అక్కడి సమాజం తీరు, సమాజంలోని తీవ్రవాదం అనేవి అక్కడి మైనార్టీలకు హాని కలిగిస్తున్నాయన్నారు. పాక్ కేవలం ఆలయాలను ధ్వంసం చేయడంలేదని వారి వారసత్వాన్ని ధ్వంసం చేసుకుంటున్నారని మండిపడ్డారు. పాకిస్తాన్‌కు దాని స్వంత చరిత్ర లేదా వారసత్వం లేదన్నారు. కాబట్టి దీర్ఘకాలికంగా వారు పాకిస్తాన్‌ను నాశనం చేస్తున్నారని చెప్పారు.

ఆర్ఎస్ఎస్ (RSS) నేత దత్తాత్రేయ హోసబలే (Dattatreya Hosabale) కీలక వ్యాఖ్యలు చేశారు. సమాజం ఎదుర్కొంటున్న సవాళ్లను పరిష్కరించేందుకు ప్రపంచ వ్యాప్తంగా హిందూ సంస్థలను బలోపేతం చేయాల్సిన అవసరం ఉందని అన్నారు. హిందూ సమాజం తన గొంతుకను సమర్థవంతంగా వినిపించేందుకు వివిధ హిందూ సంస్థల మధ్య మెరుగైన సమన్వయం కావాలని అన్నారు.

థాయ్‌లాండ్‌ రాజధాని బ్యాంకాక్‌లో జరిగిన వరల్డ్‌ హిందూ కాంగ్రెస్‌ ఆర్‌ఎస్‌ఎస్‌ జనరల్‌ సెక్రటరీ హోసబాలే ప్రసంగిస్తూ.. కులం, ఉపకులం, వర్గం, గురువుల ప్రాతిపదికన ప్రపంచంలోని అనేక ప్రాంతాల్లో అనేక సంఘాలు, సంస్థలు, ఫోరమ్‌లు ఏర్పడ్డాయని తెలిపారు. ఇవి ఒకరి పనికి మరొకరు హాని తలపెట్టే పనిలో ఉన్నాయని చెప్పారు.

ఈ వైవిధ్యమైన సంస్థల వల్ల హిందూ సమాజం నష్టపోయిందన్నారు. హిందూ సమాజం మన లక్ష్యాన్ని మరచిపోకూడదన్నారు. చాలా సార్లు హిందూ సమాజంలోని వైవిధ్యం కారణంగా చాలా చోట్ల విభేదాలు తలెత్తాయని పేర్కొన్నారు. భిన్నాభిప్రాయాలు, వైరుధ్యాలను అధిగమించేందుకు సంస్థల మధ్య సమన్వయం మెరుగవ్వాలని సూచించారు.

సమస్యలపై హిందూ సమాజం తమ గొంతును సమర్థంగా వినిపించాలని పిలుపునిచ్చారు. హిందూ సంస్థలు తమలో తాము సమాచారాన్ని పంచుకోవాలి, మెరుగైన సమన్వయాన్ని ఏర్పరచుకోవాలని కోరారు. మతమార్పిడి, హిందువుల హక్కులను అణచివేయడం, పాశ్చాత్య ప్రపంచంలోని అనేక విశ్వవిద్యాలయాలలో హిందూ అధ్యయనాలు, భారతీయ భాషల విభాగాలు లేకపోవడం వంటి కొన్ని సవాళ్లు ఉన్నాయన్నారు. వాటిని మెరుగైన సంస్థ ద్వారా పరిష్కరించాల్సిన అవసరం ఉందన్నారు.

దేశ వ్యాప్తంగా బీజేపీ (BJP) ఓటమి కోసమే తమ పోరాటమని సీపీఎం జాతీయ ప్రధాన కార్యదర్శి సీతారాం ఏచూరి (Sitaram Yechury) తెలిపారు. బాధ్యత లేకుండా బీజేపీ పాలన నడుస్తోందని ఫైర్ అయ్యారు. ఈశాన్య రాష్ట్రాల్లో మెజారిటీ సీట్లు రాకున్నా ప్రభుత్వాన్ని ఏర్పాటు చేసిన చరిత్ర ఉందన్నారు. ఒకటి, రెండు సీట్లు వచ్చినా ప్రభుత్వాన్ని ఏర్పాటు చేసిన చరిత్ర బీజేపీదని చెప్పారు.

మోడీ సర్కార్ కు అకౌంటబిలిటీ లేదని విమర్శలు చేశారు. ఉత్తరాఖండ్ టన్నెల్ ఘటనపై అకౌంటబిలిటీ లోపించిందన్నారు. టన్నెల్ నిర్మాణానికి ఎవరు అనుమతి ఇచ్చారని ప్రశ్నించారు. ఇప్పుడు టన్నెల్ కూలిన ఘటనకు భాధ్యత ఎవరు వహించాలి? అని నిలదీశారు. ఎన్నికల సమయంలో కోడ్ ఉల్లంఘనకు ప్రధాని మోడీ పాల్పడుతున్నారని ఆరోపించారు.

తెలంగాణలో సీపీఎం ఒంటరిగా బరిలో నిలిచినా తమకు నష్టం లేదన్న భావనలో కాంగ్రెస్ ఉందన్నారు. తెలంగాణలో ఒక వేళ హంగ్‌ వస్తే బీజేపీతో బీఆర్‌ఎస్‌, కలుస్తుందన్నారు. బీజేపీ వ్యతిరేక కూటమి ఏర్పాటు కోసం అందరినీ ఏకం చేస్తామని గతంలో కేసీఆర్ చెప్పారని గుర్తు చేశారు. కానీ ఇప్పుడు కేసీఆర్ ఒంటరిగా పోటీ చేస్తున్నారని ఫైర్ అయ్యారు.

సీపీఎం పోటీలో లేని చోట ఇండియా కూటమిలో ఉన్నాం కాబట్టి కాంగ్రెస్‌కే తమ మద్దతు ఉంటుందని స్పష్టం చేశారు. రాష్ట్రంలో హంగ్‌ వస్తే కాంగ్రెస్‌కు సీపీఎం మద్దతు ఇస్తుందని తేల్చి చెప్పారు. అయిదు రాష్ట్రాల ఎన్నికల్లో బీజేపీ కష్టకాలంలో ఉందని పేర్కొన్నారు. మధ్యప్రదేశ్‌లో బీజేపీ కొంత బలంగా కనిపిస్తోందని, కానీ అది ఫలితాల్లో మాత్రం కనిపించకపోవచ్చని అన్నారు.

పొలిటికల్ బాండ్ల పేరిట రాజకీయ పార్టీలు లీగల్‌గా అవినీతికి పాల్పడుతున్నాయన్నారు. పొలిటికల్ పార్టీల ఖర్చుపై ఒక పరిమితి ఉండాలని సూచించారు.మణిపూర్ ఘటన వెనుక రాజకీయ కుట్ర కోణం దాగి ఉందని తెలిపారు. గవర్నర్ల తీరుపై సుప్రీం కోర్టు తీర్పును అమలు చేయాలని కోరారు. సుప్రీంకోర్టు, ఎలక్షన్ కమిషన్, ఈడీ, సీబీఐ బీజేపీ చేతిలో బంది అయ్యాయని విమర్శలు గుప్పించారు. బీజేపీకి అతిపెద్ద మిత్రపక్షాలు ఈడీ, సీబీఐ అని అన్నారు.. ఆ మిత్రులతో కలిసి బీజేపీ దేశంలో ఏదైనా చేయగలదన్నారు.

హలాల్ ఉత్పత్తుల (Halal Products) తయారీ, విక్రయం, నిల్వపై యూపీ సర్కార్ (UP Governament) నిషేధం విధించింది. దీంతో కేవలం యూపీలోనే కాకుండా ఇతర రాష్ట్రాల్లో కూడా హలాల్ ఉత్పత్తులపై నిషేధం విధించాలని డిమాండ్లు వెల్లువెత్తుతున్నాయి. ఈ క్రమంలో హలాల్ ఉత్పత్తులపై కేంద్రం నిషేధం విధించే అవకాశం ఉందని వార్తలు వస్తున్నాయి. ఈ క్రమంలో హలాల్ ఉత్పత్తుల నిషేధం పై కేంద్ర హోం మంత్రి అమిత్ షా (Amit Shah) స్పందించారు.

హలాల్ సర్టిఫైడ్ ఉత్పత్తుల విక్రయాలపై నిషేధం విధించేందుకు కేంద్రం ఎలాంటి నిర్ణయం తీసుకోలేదని అమిత్ షా వెల్లడించారు. ఈ విషయంపై ఇప్పటి వరకు తాము ఎలాంటి నిర్ణయం తీసుకోలేదని షా వెల్లడించారు. అమిత్ షా ప్రస్తుతం తెలంగాణలో పర్యటిస్తున్నారు. మీడియా సమావేశంలో ఆయన మాట్లాడుతూ….గత దశాబ్ద కాలంగా పోటీ చేస్తున్న పార్టీల పనితీరును చూసి ఓటు వేయాలని ప్రజలను కోరారు.

ప్రజల ఓటు అనేది కేవలం ఎమ్మెల్యే, ప్రభుత్వ తల రాతను మాత్రమే నిర్ణయించదన్నారు. ఈ రాష్ట్ర ప్రజల భవితవ్యాన్ని కూడా నిర్ణయిస్తుందన్నారు. అందువల్ల గత దశాబ్దకాలంగా పార్టీల పనితీరును పరిగణనలోకి తీసుకున్న తర్వాతే ఓట్లు వేయాలని కోరారు. అన్ని పార్టీల పనితీరును గమనించాక ప్రజలు తప్పకుండా మోడీ నేతృత్వంలోని బీజేపీకి ఓటు వేస్తారని నమ్మకం ఉందన్నారు.

బీఆర్‌ఎస్ బుజ్జగింపు రాజకీయాలకు పాల్పడుతోందని షా ఆరోపించారు. మతపరమైన రిజర్వేషన్లు కేసీఆర్ ఇచ్చారని మండిపడ్డారు. ఇది రాజ్యాంగ విరుద్ధమని ఆయన స్పష్టం చేశారు. తాము మతపరమైన మైనారిటీలకు 4 శాతం కోటాకు స్వస్తి పలుకుతామన్నారు. ఆ రిజర్వేషన్ ను షెడ్యూల్డ్ తెగలు, షెడ్యూల్డ్ కులాలు ఇతర వెనుకబడిన తరగతులకు ఇస్తామన్నారు.

రాజస్థాన్‌ (Rajasthan)లో పోలింగ్ (Polling) ప్రశాంతంగా జరుగుతోంది. 199 అసెంబ్లీ స్థానాలకు పోలింగ్ నిర్వహిస్తున్నారు. రాష్ట్ర వ్యాప్తంగా 51 వేలకు పైగా పోలింగ్ కేంద్రాలను ఈసీ ఏర్పాటు చేసింది. ఉదయం 9 గంటల వరకు 9.77 శాతం ఓటింగ్ నమోదైనట్టు అధికారులు తెలిపారు. అత్యధికంగా బారన్ ప్రాంతంలో 12.97 శాతం, దోలాపూర్‌లో 12.66 శాతం ఓటింగ్ నమోదైన్నట్టు వెల్లడించారు.

ఎన్నికల సందర్భంగా ఓ గ్రామంలో కేవలం ఒక కుటుంబం కోసం పోలింగ్ బూత్‌ను ఏర్పాటు చేశారు. పాక్ సరిహద్దుల్లోని బార్మర్ జిల్లా పార్క్ గ్రామంలో 35 మంది కోసం ఓ పోలింగ్ బూత్ ను ఎన్నికల సంఘం ఏర్పాటు చేసింది. ఈ 35 మంది కూడా ఒకే కుటుంబానికి చెందిన వారు కావడం విశేషం. గతంలో పోలింగ్ నేపథ్యంలో గ్రామస్తులు తీవ్ర ఇబ్బందులు ఎదుర్కొనే వారు.

గతంలో ఈ గ్రామస్తులు ఓటు వేసేందుకు 20 కిలో మీటర్లు ప్రయాణం చేయాల్సి వచ్చేది. ఇది ఎడారి ప్రాంతం కావడంతో ఓటు హక్కు కోసం ఒంటెలపై లేదా కాలినడకన 20 కిలో మీటర్లు ప్రయాణించాల్సి వచ్చేది. ఈ క్రమంలో ఆ ప్రయాణం మహిళలకు, వృద్ధులకు సవాలుగా మారింది. కానీ ఈ ఏడాది ఎన్నికల సంఘం తీసుకున్న నిర్ణయంతో వారికి ఇబ్బందులు తొలగిపోయాయి.

ఈ ఏడాది ఆ గ్రామంలోనే పోలింగ్ బూత్ ఏర్పాటుకు ఎన్నికల సంఘం నిర్ణయించింది. దీంతో ఆ గ్రామస్తుల్లో ఆనందం వెల్లివిరిసింది. దీంతో ఆ గ్రామ ఓటర్లు సంతోషంగా తమ ఓటు హక్కును వినియోగించుకుంటున్నారు. ఆ గ్రామంలో 18 మంది పురుషులు, 17 మంది మహిళ ఓటర్లు ఉన్నారు. ఇది ఇలా వుంటే ఈ ఎన్నికల్లో విజయంపై అటు బీజేపీ, ఇటు కాంగ్రెస్ ధీమాను వ్యక్తం చేస్తున్నాయి.