National

రాజస్థాన్‌ (Rajasthan)లో పోలింగ్ (Polling) ప్రారంభమైంది. మొత్తం 200లకు గాను 199నియోజక వర్గాలకు పోలింగ్ నిర్వహిస్తున్నారు. కరన్ పూర్ నియోజకవర్గంలో కాంగ్రెస్ అభ్యర్థి గుర్మిత్ సింగ్ మరణించడంతో ఆ స్థానానికి ఎన్నికను వాయిదా వేశారు. ఉదయం 7 గంటల నుంచే ఓటర్లు తమ ఓటు హక్కును వినియోగించుకునేందుకు లైన్లలో బారులు తీరారు. సాయంత్రం 7 గంటల వరకు పోలింగ్ కొనసాగుతుందని అధికారులు తెలిపారు.

ఈ ఎన్నికల్లో మొత్తం 1862 మంది అభ్యర్థులు పోటీ చేస్తున్నారు. రాష్ట్రంలో 5 కోట్ల 25 లక్షల మంది ఓటర్లు ఉన్నారు. మొత్తం 51 వేలకు పైగా పోలింగ్ కేంద్రాలను ఈసీ ఏర్పాటు చేసింది. లక్షా 70 వేలకు పైగా భద్రతా సిబ్బందిని మోహరించింది. 2.74 లక్షల మంది సిబ్బంది ఎన్నికల విధులను నిర్వహిస్తున్నారు. డిసెంబర్ 3న ఓట్ల లెక్కింపు ప్రక్రియను చేపట్టనున్నారు.

కేంద్ర మంత్రి కైలాశ్ బైతు తన ఓటు హక్కును వినియోగించుకున్నారు. బల్టోరాలోని పోలింగ్ బూత్‌లో ఆయన ఓటు వేశారు. రాజస్థాన్ ప్రజలు బీజేపీకి అనుకూలంగా ఓటు వేస్తారని తెలిపారు. 150కి పైగా స్థానాల్లో బీజేపీ విజయం సాధిస్తుందని ధీమా వ్యక్తం చేశారు. బీజేపీ ఎంపీ పీపీ చౌదరి బావీ నియోజక వర్గంలో ఓటు వేశారు. బీజేపీ ఎంపీ, జోత్వారా నియోజక వర్గ అభ్యర్థి రాజ్యవర్దన్ సింగ్ రాథోడ్ జైపూర్‌లోని పోలింగ్ బూత్‌లో ఓటు హక్కు వినియోగించుకున్నారు.

కేంద్ర మంత్రి గజేంద్ర సింగ్ షకావత్ జోద్ పూర్ పోలింగ్ సెంటర్‌లో ఓటు వేశారు. కేంద్ర మంత్రి అర్జున్ రామ్ మేఘ్ వాల్ బికనూర్ లో ఓటు వేశారు. రాష్ట్రంలో కాషాయ జెండా ఎగడరం ఖాయమన్నారు. కాంగ్రెస్ నేత సచిన్ పైలట్ జైపూర్ లోని సివిల్ లైన్స్ ఏరియాలో ఓటు హక్కు వినియోగించుకున్నారు. ఆయన టోంక్ నియోజకవర్గం నుంచి అభ్యర్థిగా బరిలో ఉన్నారు.

అంతకు ముందు రాజస్థాన్ ఎన్నికల నేపథ్యంలో ప్రధాని మోడీ ట్వీట్ చేశారు. రాష్ట్రంలో పెద్ద ఎత్తున ఓటర్లు తమ ఓటు హక్కును వినియోగించుకుని సరికొత్త రికార్డు సృష్టించాలని ప్రధాని మోడీ కోరారు. ఈ ఎన్నికల్లో మొదటి సారి ఓటు హక్కు పొంది తమ తొలి ఓటు హక్కును వినియోగించుకోబోతున్న యువతీ-యువకులందరికీ ప్రధాని శుభాకాంక్షలు తెలిపారు.

చైనా (China)లో హెచ్‌9ఎన్‌2 వైర‌స్ కేసులు భారీగా నమోదవుతున్నాయి. చాలా మంది చిన్నారులు నుమోనియా (Pneumonia) లక్షణాలతో ఆస్పత్రుల్లో చేరుతున్నారు. ఇప్పటికే ఈ విషయాన్ని ప్రపంచ ఆరోగ్య సంస్థ ( WHO)కూడా వెల్లడించింది. తాజాగా ఈ పరిస్థితిపై భారత ప్రభుత్వం ఓ ప్రకటన చేసింది.

చైనాలో పరిస్థితులను నిశితంగా పరిశీలిస్తున్నామని కేంద్ర ఆరోగ్య మంత్రిత్వ శాఖ తెలిపింది. ఏవియన్ ఇన్ ఫ్లూ యెంజా, శ్వాసకోశ వ్యాధుల వల్ల భారత్‌కు పెద్దగా రిస్క్ లేదని వెల్లడించింది. ప్రస్తుత పరిస్థితుల నుంచి ఎలాంటి అత్యవసర పరిస్థితులు ఏర్పడినా ఎదుర్కొనేందుకు భారత్ సిద్ధంగా ఉందన్నారు.

ఇటీవల డ్రాగన్ కంట్రీలో నుమోనియా లక్షణాలతో చాలా మంది పిల్లలు ఆస్పత్రుల్లో చేరారు. ఈ క్రమంలో దీనిపై డబ్ల్యూహెచ్ఓ స్పందించింది. నుమోనియా కేసుల‌కు కొత్త త‌ర‌హా ప్యాథోజ‌న్‌తో ఎలాంటి సంబంధాలు లేవని చైనా వివరణ ఇచ్చిందని పేర్కొంది. గత నెల నుంచి చైనాలో పిల్ల‌ల్లో శ్వాస‌కోశ వ్యాధులు న‌మోదు అవుతున్న‌ట్లు డేటా ప్రకారం తెలుస్తోందని వెల్లడించింది.

ఈ క్రమంలో వ్యాధులకు సంబంధించిన మరింత డేటాను అందించాలని చైనాను కోరామని తెలిపింది. బీజింగ్‌లో కానీ, లియానింగ్‌లో కానీ ఎలాంటి కొత్త ప్యాథోజెన్స్‌ను గుర్తించ లేద‌ని చైనా చెప్పినట్టు పేర్కొంది. ‘ఇది కొత్త వ్యాధి లేదా కొత్త వైరస్ వ్యాప్తి కాదని, మైకోప్లాస్మా, న్యుమోనియా వంటి తెలిసిన వ్యాధికారక వ్యాప్తి అని చైనా చెప్పంది’అని డబ్ల్యూహెచ్ఓ వివరించింది.

కాంగ్రెస్, ఎమ్ఐఎం, బీఆర్ఎస్ మూడు పార్టీలు ఒకటేనని అసోం సీఎం హిమంత బిస్వ శర్మ (Himantha Biswa Sharma) అన్నారు. ఏఐఎంఐఎం నేత అసద్దీన్ ఓవైసీ (Asaduddin Owaisi) యూపీ, హర్యానాలకు వచ్చి చూడాలన్నారు. అక్కడకు వస్తే ఐదు నిమిషాల్లో ఆయన ఇసాబ్ పూర్తి చేస్తామని తెలిపారు. తెలంగాణలో బీజేపీ జెండాను ఎగురవేస్తామని వెల్లడించారు.

వికారాబాద్ జిల్లా పరిగిలో బీజేపీ అభ్యర్థికి మద్దతుగా సీఎం హిమంత బిస్వ శర్మ ప్రచారం చేపట్టారు. బీజేపీ అభ్యర్థి మారుతి కిరణ్ కు మద్దతుగా రోడ్ షోలో పాల్గొని హిమంత బిస్వ శర్మ మాట్లాడుతూ… రాష్ట్రంలో బీజేపీ అధికారంలోకి వస్తే బీసీని సీఎం చేస్తామని అన్నారు. దళితున్ని సీఎం చేస్తానన చెప్పి ప్రజలను సీఎం కేసీఆర్ మోసం చేశారని ధ్వజమెత్తారు.

ప్రజలందరికీ న్యాయం చేసే పరిపాలన కేవలం బీజేపీతోనే సాధ్యమన్నారు. కాంగ్రెస్ అధికారంలోకి వస్తే ముస్లింలకు రిజర్వేషన్ కల్పిస్తామని చెబుతోందన్నారు. ముస్లింల కోసం ఐటీ పార్క్ ఏర్పాటు చేస్తామని సీఎం కేసీఆర్ అంటున్నాడన్నారు. హైదరాబాద్‌కు ఏ పార్టీలు వచ్చిన ఓవైసీకి జిందాబాద్ కొడుతున్నాయని ఫైర్ అయ్యారు. మొన్న హైదరాబాద్‌లో పోలీసులకు ఓవైసీ దంకీ ఇచ్చాడన్నారు.

బీఆర్ఎస్, కాంగ్రెస్, ఎంఐఎం పార్టీలతో తమకు ఎలాంటి సంబంధాలు లేవని స్పష్టం చేశారు. పరిగిలో ఎమ్మెల్యే అభ్యర్థి మారుతి కిరణ్ కు ఒక్క అవకాశం ఇవ్వాలన్నారు. ప్రజలంతా మారుతి కిరణ్ కు ఓటు వేసి గెలిపించాలన్నారు. మారుతి కిరణ్ ను గెలిపిస్తే పరిగి నియోజకవర్గాన్ని పూర్తి స్థాయిలో అభివృద్ధి చేసి చూపిస్తామని హిమంత బిస్వ శర్మ హామీ ఇచ్చారు.

బీఆర్​ఎస్ (BRS)​ ప్రభుత్వానికి ఎక్స్ పైర్ డేట్ (Expiredate) ముగిసిందని ఏఐసీసీ అగ్రనేత ప్రియాంక గాంధీ (Priyanka Gandhi) అన్నారు. రాష్ట్రంలో కాంగ్రెస్ గాలి జోరుగా వీస్తోందని తెలిపారు. పదేండ్లుగా అధికారంలో ఉన్న కేంద్ర, రాష్ట్ర ప్రభుత్వాలు అహంకారంతో విర్రవీగుతున్నాయని అని మండిపడ్డారు. ఆ ప్రభుత్వాల పాలనలో పై స్థాయి నుంచి కింది స్థాయి వరకు పూర్తిగా అవినీతి విచ్చల విడిగి పెరిగిపోయిందన్నారు.

ఉమ్మడి వరంగల్​ జిల్లా పాలకుర్తిలో నిర్వహించిన కాంగ్రెస్​ విజయ భేరి సభలో ప్రియాంక గాంధీ పాల్గొన్నారు. ఈ సభలో ఆమె మాట్లాడుతూ… పదేండ్లుగా తెలంగాణ రాష్ట్రం ఒకే కుటుంబం చేతిలో బందీగా ఉంటుందోన్నారు. ప్రజల త్యాగాల వల్ల ఈ రాష్ట్రం ఏర్పడిందన్నారు. అందుకే ఈ రాష్ట్రం అభివృద్ధి చెందాలని ఆమె ఆకాంక్షించారు. రాష్ట్రం కోసం ప్రాణత్యాగం చేసిన అమరుల ఆకాంక్షలు నెరవేరాయో లేదో తెలంగాణ ప్రజలు ఆలోచించుకోవాలన్నారు.

కేంద్రం పెట్రోల్​, డీజిల్​ ధరలను పెంచడంతో అన్ని వస్తువుల ధరలు పెరిగాయన్నారు. జీఎస్టీ, పెట్రోల్​ ధరల వల్ల నిత్యావసరాల ధరలు పెరిగాయన్నారు. నిత్యావసరాల ధరలు తగ్గాలంటే మళ్లీ కాంగ్రెస్​ అధికారంలోకి రావాలన్నారు. అధికారంలోకి రాగానే రైతులకు రూ.2 లక్షల వరకు రుణమాఫీ చేస్తామన్నారు. రైతులకు ధాన్యంపై క్వింటాల్​కు అదనంగా రూ.500 బోనస్​ ఇస్తామన్నారు.

పోరాడి సాధించుకున్న ఈ తెలంగాణలో ఎంతమందికి ఉద్యోగాలు వచ్చాయని ఆమె ప్రశ్నించారు. నిరుద్యోగంలో దేశంలోనే తెలంగాణ నంబర్​ వన్ స్థానంలో ఉందన్నారు. బీఆర్ఎస్ సర్కార్ నిర్వహించిన ఉద్యోగ పరీక్షల్లో కుంభకోణాలు జరిగాయన్నారు. పేపర్లు లీక్ కావడంతో యువత నిరాశకు గురైందన్నారు. కొంత మంది ఆత్మహత్యలు కూడా చేసుకున్నారని ఆరోపించారు. కాంగ్రెస్​ గెలిస్తే.. నిరుద్యోగుల కష్టాలు తొలగిపోతాయన్నారు.

గృహిణికి ఎన్నో కష్టాలు ఉంటాయన్నారు. పిల్లలకు స్కూల్​ ఫీజులు, అనారోగ్య సమస్యలు వంటి చాలా సమస్యలుంటాయన్నారు. అందుకే కాంగ్రెస్​ అధికారంలోకి రాగానే మహిళల కష్టాలు తొలగిస్తామన్నారు. ప్రతి నెల మహిళ ఖాతాలో రూ.2500 జమచేస్తామన్నారు. గ్యాస్​ సిలిండర్ ను రూ.500కే అందజేస్తామన్నారు. ఆర్టీసీ బస్సుల్లో మహిళలకు ఉచిత ప్రయాణం కల్పిస్తామన్నారు.

– ప్రపంచమంతా ఒకటేనని భారత్ చెబుతుంది
– ప్రతీ ఒక్కరిని ఆర్యులుగా చేస్తాం
– హిందూ సంప్రదాయాలన్నీ ధర్మానికి ఉదాహరణలు
– ప్రపంచం సవ్యమైన మార్గంలో నడవడం లేదు
– ఒకరిపై ఒకరు ఆధిపత్యం తగదు
– శాంతి, సామరస్యం కావాలంటే భారత్ తో అనుబంధం అవసరం
– వరల్డ్ హిందూ కాంగ్రెస్- 2023లో ఆర్ఎస్ఎస్ చీఫ్

హిందూ ధర్మం గురించి రాష్ట్రీయ స్వయం సేవక్ సంఘ్ చీఫ్ మోహన్ భగవత్ ఆసక్తికర వ్యాఖ్యలు చేశారు. ఈ ప్రపంచమంతా ఒకే కుటుంబం అని అన్నారు. ప్రతి ఒక్కరినీ ఆర్యులుగా చేస్తామని వెల్లడించారు. అదే సంస్కృతి అని తెలిపారు. ఇక్కడ సంస్కృతి అనే పదం సరిపోదన్నారు. కానీ, మెరుగైన సమాజం కోసం తాను ఈ పదాన్ని ఉపయోగించాల్సి వచ్చిందని చెప్పారు. థాయ్‌ లాండ్‌ రాజధాని బ్యాంకాక్‌ లో నిర్వహించిన ‘వరల్డ్ హిందూ కాంగ్రెస్- 2023’ లో మోహన్ భగవత్ పాల్గొన్నారు.

ఈ సందర్భంగా మాట్లాడుతూ.. మేధోపరమైన విభేదాలు ఉన్నప్పటికీ మన హిందూ సంప్రదాయాలన్నీ ధర్మానికి ఉదాహరణలు అని చెప్పారు. క్రమశిక్షణను పాటించేందుకు గాను దేశంలోని సాంప్రదాయాలన్నింటినీ శుద్ధి చేయాల్సి ఉందన్నారు. మనం ప్రతి చోటుకీ వెళ్తామని, అక్కడ ప్రతి ఒక్కరి హృదయాలను స్పృశిస్తామని, వాళ్లు అంగీకరించినా, అంగీకరించకపోయినా మనం మాత్రం అందరితో కనెక్ట్ కావాల్సి ఉంటుందని తెలిపారు.

ఇప్పుడు సకల సౌఖ్యాలు పొందినప్పటికీ ఈ ప్రపంచం పూర్తిగా సంతృప్తి చెందడం లేదన్నారు. నేటి ప్రపంచం సవ్యమైన మార్గంలో నడవడం లేదన్న ఆయన.. 2000 ఏండ్లుగా శాంతి, సంతోషం తీసుకు వచ్చేందుకు ఈ ప్రపంచం చాలా వరకు ప్రయోగాలు చేసిందని చెప్పారు. అందరూ కూడా భౌతికవాదం, కమ్యూనిజం, పెట్టుబడిదారీ విధానాన్ని ఉపయోగించడంతో పాటు వివిధ మతాలను ప్రయత్నించి తమ శ్రేయస్సు పొందారు కానీ ఇప్పటికీ భౌతిక సుఖాలు ఉన్నప్పటికీ ప్రజలు సంతోషంగా లేరన్నారు.

ప్రజలు ఇప్పుడు భౌతిక సౌఖ్యాన్ని పొందేందుకు అన్ని విధాలుగా ప్రయత్నిస్తున్నారని చెప్పారు. దీని కోసం ఒకరితో ఒకరు పోట్లాడుతున్నారని.. ఒకరిపై ఒకరు ఆధిపత్యం చెలాయిస్తున్నారన్నారు. ఇదంతా మనం చేస్తూనే ఉన్నామని.. ఇది సరికాదని సూచించారు. మనం అసుర విజయాన్ని కూడా అనుభవించామని అన్నారు.

కొవిడ్ తర్వాత ఈ ప్రపంచం పునరాలోచించడం మొదలు పెట్టిందన్న ఆయన.. ఇలాంటి పరిస్థితుల్లో ప్రపంచానికి ఇప్పుడు భారత్ ఓ మార్గాన్ని చూపిస్తోందన్నారు. ప్రపంచమంతా ఒకే కుటుంబమని భారత్ చెబుతోందని.. కొన్ని నెలల క్రితం ప్రపంచ ముస్లిం కౌన్సిల్ ప్రధాన కార్యదర్శి భారతదేశానికి వచ్చారని గుర్తు చేశారు. ప్రపంచంలో శాంతి, సామరస్యం కావాలంటే భారత్ తో అనుబంధం అవసరమని అన్నారు మోహన్ భగవత్.

దేశ రాజధాని ఢిల్లీ (Delhi)లో వాయు నాణ్యత మరింత పడిపోయింది. ఢిల్లీలో గత ఆరు రోజులుగా ఎయిర్ క్వాలిటీ ఇండెక్స్ (AQI) అత్యంత పేలవం (Very Poor)గా ఉంది. తాజాగా ఏక్యూఐ తీవ్ర ప్రమాదకర స్థాయికి చేరుకుంది. ఈ రోజు ఉదయం 7.05 గంటలకు ఢిల్లీలో ఏక్యూఐ 401తీవ్ర స్థాయిలో చేరుకుందని అధికారులు తెలిపారు.

ఇక ఆనందర్ విహార్ ప్రాంతంలో ఏక్యూఐ 418గా నమోదైనట్టు పేర్కొన్నారు. ఆర్కే పురం 424, అలీపూర్ 434, అశోక్ విహార్ 427, భవనా 456, ద్వారకా సెక్టార్ 399, ఐజీఐ 391, ఐటీఓ 356, జహంగిరి పురి 445, జేఎల్ఎన్ స్టేడియం 385, లోధీ రోడ్ 356, నరేలా 422, నజాఫ్ ఘర్ 385, న్యూ మోతీ బాగ్ 399, ఓక్లాలో 415 గా నమోదైనట్టు వెల్లడించారు.

అదే సమయంలో ప్రతాప్ గంజ్ 416, పంజాబీ బాగ్ 433, రోహిణీ 438, షాదీపూర్ 366, వివేక్ విహార్ 444, వజీర్ పూర్ 448గా ఉంది. ఇక నోయిడాలోని సెక్టార్ 125లో 353, సెక్టార్ 62లో 367, సెక్టార్ 1లో 341, సెక్టార్ 116లో 319గా రికార్డు అయింది. ఢిల్లీలో ఏక్యూఐ శుక్రవారం కూడా అత్యంత పేలవంగా ఉంటుందని, శనివారం నాటికి అది తీవ్ర స్థాయికి చేరుతుందని,

మళ్లీ చాలా పేలవకరంగా మారే అవకాశం ఉందని అధికారులు అంచనా వేశారు. కానీ ఒక రోజు ముందుగానే ఏక్యూఐ తీవ్ర స్థాయికి చేరుకోవడం గమనార్హం. బుధవారంతో పోలిస్తే ఏక్యూఐ నిన్న స్వల్పంగా మెరుగుపడింది. 24 గంటల్లో ఢిల్లీ సరాసరి వాయు నాణ్యగత గురువారం 390 (అత్యంత పేలవంగా) ఉందని కేంద్ర కాలుష్య నియంత్రణ బోర్డు వెల్లడించింది. అంతకు ముందు బుధవారం సరాసరి ఏక్యఐ 395(అత్యంత పేలవం)తో పోలిస్తే కాస్త మెరుగుపడినట్టు తెలిపింది.