National

ప్రపంచంలో అత్యుత్తమ యూనివర్శిటీల జాబితాను క్వాక్వారెల్లి సైమండ్స్ (QS) సంస్థ విడుదల చేసింది. ఈ జాబితాలో వరుసగా రెండో సారి భారత్‌లో అత్యుత్తమ యూనివర్శిటీగా ఐఐటీ బాంబే (IIT Bombay) నిలిచింది. ఈ ఏడాది జాబితాలో భారత్‌కు చెందిన 148 యూనివర్శిటీలు చోటు దక్కించుకున్నట్టు క్యూఎస్ వెల్లడించింది.

గతంతో పోలిస్తే ఈ ఏడాది అదనంగా భారత్ కు చెందిన మరో 37 వర్శిటీలకు ఈ జాబితాలో స్థానం లభించినట్టు పేర్కొంది. ఈ జాబితాలో అత్యధిక స్థానాలు పొందిన దేశాలు వరుసగా భారత్ (148), చైనా (133), జపాన్ (96)ఉన్నట్టు తెలిపింది. ఇది ఇలా వుంటే మయన్మార్, కంబోడియా, నేపాల్ లకు ఈ జాబితాలో తొలిసారి చోటు దొరికినట్టు పేర్కొంది.

టాప్-100 యూనివర్శిటీల జాబితాలో భారత్ నుంచి ఐఐటీ ఢిల్లీ(46), ఐఐటీ-మద్రాస్ (53), ఇండియన్ ఇనిస్టిట్యూట్ ఆఫ్ సైన్స్(58), ఐఐటీ ఖరగ్ పూర్(59), ఐఐటీ కాన్పూర్-(63), యూనివర్శిటీ ఆఫ్ ఢిల్లీ (94) ఉన్నాయి. గతేడాదితో పోలిస్తే ఈ ఏడాది 21 యూనివర్శిటీల ర్యాంకింగ్స్ మెరుగుపడగా, 15 యూనివర్శిటీల ర్యాకింగ్స్‌లో ఎలాంటి మార్పులు చోటు చేసుకోలేదు.

తాజాగా ఈ ఏడాది 37 వర్శిటీలు కొత్తగా స్థానం సంపాదించుకున్నాయి. ఈ జాబితాలో చైనాకు చెందిన పెకింగ్ వర్శిటీ అగ్రస్థానంలో నిలిచింది. రెండో స్థానంలో నేషనల్ యూనివర్శిటీ ఆఫ్ సింగపూర్ ఉంది. మూడవ స్థానంలో చైనాలోని సింగ్వా వర్శిటీ, నాల్గవ స్థానంలో హంకాంగ్ వర్శిటీ, ఐదవ స్థానంలో నాన్ యంగ్ వర్శిటీ నిలిచింది.

జనాభా నియంత్రణ (birth control) వ్యాఖ్యలపై దుమారం రేగడంతో బిహార్ సీఎం నితీశ్ కుమార్ (Nitish Kumar) స్పందించారు. తన వ్యాఖ్యలకు అసెంబ్లీ సాక్షిగా క్షమాపణలు చెబుతున్నట్టు వెల్లడించారు. తన వ్యాఖ్యలతో జనంలోకి తప్పుడు సందేశం వెళ్లివుంటే వాటిని వెంటనే వెనక్కి తీసుకుంటున్నట్టు ఆయన తెలిపారు.

అసెంబ్లీలో నిన్న సీఎం నితీశ్ కుమార్ మాట్లాడుతూ…. భర్తల చర్యల వల్ల జననాల సంఖ్య బాగా పెరిగిపోతోందన్నారు. కానీ భర్తను ఎలా నియంత్రించాలో చదువుకున్న మహిళలకు తెలుసన్నారు. చదువుకున్న మహిళలు తమ భర్తలను శృంగారంలో నియంత్రించగలరని పేర్కొన్నారు.

అందుకే ఇప్పుడు జననాల రేటు తగ్గుతోందన్నారు. సీఎం వ్యాఖ్యలపై దుమారం రేగింది. సీఎం వ్యాఖ్యలపై బీజేపీ నేతలు తీవ్ర స్థాయిలో ఫైర్ అయ్యారు. నితీశ్ తన వ్యాఖ్యలతో ప్రజాస్వామ్య హుందాతనాన్ని తగ్గించారంటూ బీజేపీ నేతలు ఫైర్ అయ్యారు. అసెంబ్లీలో ఇలాంటి వ్యాఖలు సరికాదన్నారు.

సీఎం క్షమాపణలతో వివాదం సమసి పోతుందని అంతా అనుకున్నారు. కానీ జేడీయూ నేత లలన్ సింగ్ మరోసారి వివాదాన్ని రేకెత్తించారు. సీఎం వ్యాఖ్యల్లో తప్పేముందని లలన్ సింగ్ ప్రశ్నించారు. అందులో అంత అభ్యంతరకరమైనది ఏముందని ఆయన ప్రతిపక్షాలను నిలదీశారు. దీంతో మరోసారి దుమారం రేగుతోంది.

బీజేపీ (BJP)పై కాంగ్రెస్ అగ్రనేత రాహుల్ గాంధీ (Rahul Gandhi) తీవ్ర స్థాయిలో విరుచుకు పడ్డారు. ఆదివాసీలను కాంగ్రెస్ (Congress) కౌగిలించుకుంటే, కాషాయ పార్టీ మాత్రం ఆదివాసిలపై మూత్రం పోసిందని తీవ్ర వ్యాఖ్యలు చేశారు. గిరిజనులను కాంగ్రెస్ ‘ఆదివాసీ’అని పిలిచిందన్నారు.

కానీ బీజేపీ మాత్రం వనవాసి అని పిలుస్తోందన్నారు. ఆదివాసీలకు తాము హక్కులు కల్పించామన్నారు. కానీ బీజేపీ ప్రభుత్వం వచ్చాక ఆదివాసీ హక్కులను లాక్కొందన్నారు. తాము ఆదివాసీలను ఆదరించామన్నారు. కానీ బీజేపీ నేతలు మాత్రం ఆదివాసీలపై మూత్ర విసర్జన చేసి వీడియోలు తీశారని, వాటిని వైరల్ చేసిందన్నారు.

ఈ ఘటలను దేశం మొత్తం గమనించిందన్నారు. నిన్న కూడా చత్తీస్ గఢ్‌లో రాహుల్ గాంధీ బీజేపీపై విరుచుకు పడ్డారు. బీజేపీ నేతలు తమ ప్రసంగాల్లో ప్రతి సారి ఆదివాసీలను వనవాసీ అని సంభోదిస్తున్నారని అన్నారు. వనవాసికి, ఆదివాసికి చాలా తేడా ఉందని వెల్లడించారు. ఈ విషయాన్ని ప్రజలు గమనించాలన్నారు.

మధ్యప్రదేశ్‌లో ఓ వీడియో వైరల్ అయింది. సిద్ది ప్రాంతంలో ఓ గిరిజనుడిపై స్థానిక బీజేపీ నాయకుడు మూత్ర విసర్జన చేసినట్టు వీడియోలో కనిపించింది. సోషల్ మీడియాలో ఈ వీడియో వైరల్ అయింది. దీనిపై నెటిజన్లు, ప్రతిపక్షాలు తీవ్ర స్థాయిలో విరుచుకు పడ్డాయి. ఈ క్రమంలో సీఎం శివరాజ్ సింగ్ చౌహాన్ బహిరంగ క్షమాపణ చెప్పారు.

కేదార్‌నాథ్‌ (Kedarnath)లో ఆసక్తికర ఘటన చోటు చేసుకుంది. కాంగ్రెస్ అగ్రనేత రాహుల్ గాంధీ (Rahul Gandhi), బీజేపీ ఎంపీ వరుణ్ గాంధీ ఒకే చోట కలుసుకున్నారు. అన్నదమ్ములు ఇద్దరు కలుసుకున్న ఫోటోలో ఇప్పుడు సోషల్ మీడియాలో వైరల్ అవుతోంది. అన్నా దమ్ముల అనుబంధం అంటూ నెటిజన్లు కామెంట్స్ చేస్తున్నారు.

వరుణ్ గాంధీ యూపీలో ఎంపీగా ఉన్నారు. రాహుల్ గాంధీ, వరుణ్ గాంధీ వేర్వేరు పార్టీల్లో ఉన్నారు. వారిద్దరూ కలుసుకోవడం అత్యంత అరుదు. కానీ వాళ్లిద్దరినీ ఇటీవల కేదారినాథ్ కలిపింది. గత మూడు రోజులుగా రాహుల్ గాంధీ ఉత్తరాఖండ్‌లో పర్యటిస్తున్నారు. పర్యటన ముగింపు నేపథ్యంలో కేదారి నాథ్ ఆలయాన్ని రాహుల్ గాంధీ సందర్శించారు.

అదే సమయంలో యూపీ నుంచి వరుణ్ గాంధీకి కూడా ఆలయానికి వచ్చారు. ఈ క్రమంలో రాహుల్ గాంధీకి వరుణ్ గాంధీ ఎదురు పడ్డారు. ఇరువురు నేతలు కాసేపు యోగక్షేమాలు విచారించుకున్నారు. వరుణ్ గాంధీ కుమార్తెను కలుసుకున్నందుకు రాహుల్ గాంధీ చాలా సంతోషంగా ఫీల్ అయ్యారని ఆయన సన్నిహిత వర్గాలు వెల్లడించాయి.

ఈ సమావేశంలో రాజకీయాల గురించి ఎలాంటి ప్రస్తావన రాలేదని కాంగ్రెస్ వర్గాలు పేర్కొన్నాయి. ఇది ఇలా వుంటే గత కొంత కాలంగా బీజేపీ సమావేశాలకు వరుణ్ గాంధీ దూరంగా ఉంటున్నారు. పలు కీలక అంశాలపై కేంద్రాన్ని ఆయన విమర్శిస్తూ కీలక వ్యాఖ్యలు చేస్తూ వస్తున్నారు. ఈ నేపథ్యంలో రాహుల్ గాంధీతో సమావేశం ప్రాధాన్యతను సంతరించుకుంది.

దేశ రాజధాని ఢిల్లీ (Delhi)లో వాయు కాలుష్యం (Air Pollution) ఆందోళన కలిగిస్తోంది. ఢిల్లీలో నిన్న వాయు నాణ్యత కాస్త మెరుగుపడినట్టు కనిపించినా ఈ రోజు మరోసారి తీవ్ర ప్రమాదకర స్థాయికి పడిపోయింది. ఇటీవల ముంబైలోనూ వాయు కాలుష్యం పెరిగిపోతుండటం ఆందోళన కలిగిస్తోంది. తాజాగా ఢిల్లీలో వాయు నాణ్యత సూచీ 418గా నమోదైంది.

ఇక పంజాబీ బాగ్ ప్రాంతంలో ఏక్యూఐ 460 రికార్డు అయింది. నరేలాలో ఏక్యూఐ 448, బవానాలో 462, ఆనంద్ విహార్ 452 , రోహిణి 451గా ఉంది. నోయిడా, గురుగ్రామ్ ఇతర చుట్టు పక్కల నగరాల్లో కూడా పరిస్థితి ఆందోళనకరంగా మారింది. ఈ రోజు ఉదయం నోయిడా ఏక్యూఐ 409, గురుగ్రామ్ 370, ఫరీదాబాద్ (396), ఘజియాబాద్ (382)గా నమోదైనట్టు అధికారులు వెల్లడించారు.

మరోవైపు నిన్న రాత్రి ఆనంద్ విహార్ ప్రాంతంలో ఏక్యూఐ అత్యంత ప్రమాదకర స్థాయికి చేరుకుంది. ఏక్యూఐ ఏకంగా 999 తాకడంతో అధికారులు ఆందోళన వ్యక్తం చేస్తున్నారు. దీపావళికి ముందే ఇలాంటి పరిస్థితులు ఉంటే పండుగ తర్వాత పరిస్థితి ఎలా వుంటుందోనని అధికారులు భయాందోళనలు వ్యక్తం చేస్తున్నారు.

వాయు కాలుష్యం పెరుగుతున్న నేపథ్యంలో ఢిల్లీ పర్యావరణ శాఖ మంత్రి గోపాల్ రాయ్ అధికారులతో అత్యవసర సమావేశాన్ని ఏర్పాటు చేస్తున్నారు. కాలుష్యానికి సంబంధించి సుప్రీంకోర్టు నిన్న ఇచ్చిన సూచనలను అమలు చేసేందుకు తీసుకోవాల్సిన చర్యల గురించి అధికారులతో ఆయన చర్చించనున్నారు.

దేశంలో ఎన్ఐఏ (NIA) దాడులు కలకలం రేపుతున్నాయి. మొత్తం 8 రాష్ట్రాలు (States), రెండు కేంద్ర పాలిత ప్రాంతాల్లో ఎన్ఐఏ దాడులు చేస్తోంది. ఉదయం 7 గంటల నుంచే ఎన్ఐఏ బృందాలు దాడులు చేస్తున్నాయి. త్రిపుర, అసోం, పశ్చిమ బెంగాల్, కర్ణాటక, తమిళనాడు, తెలంగాణ, హర్యానా, పుదుచ్చేరి, రాజస్థాన్, జమ్ము కశ్మీర్ లలో ఈ దాడులు జరుగుతున్నట్టు ఎన్ఐఏ వర్గాలు వెల్లడించాయి.

మానవ అక్రమ రవాణా కేసులకు సంబంధించి ఈ దాడులు చేస్తున్నట్ట ఎన్ఐఏ వర్గాలు పేర్కొన్నాయి. కొంతమంది శ్రీలంక జాతీయులు భారత్‌లో అక్రమంగా ఉంటున్నారనే ఆరోపణలపై గత నెలలో ఎన్ఐఏ దాడులు చేసింది. ఈ కేసులో మహ్మద్ ఇమ్రాన్ అనే వ్యక్తిని ఎన్ఐఏ అరెస్టు చేసింది.

ఇమ్రాన్ నుంచి రాబట్టిన సమాచారం మేరకు ఈ దాడులు చేస్తున్నట్టు తెలుస్తోంది. 40 ప్రాంతాల్లో ఈ దాడులు జరుగుతున్నట్టు ఎన్ఐఏ వర్గాలు తెలిపాయి. చెన్నై సమీపంలోని పెరుంబాకం, పదప్పాయ్, మరైమలైనగర్‌లో ఎన్ఐఏ అధికారులు తనిఖీలు నిర్వహిస్తున్నారు.

ఫోర్జరీ సంతకాలతో నకిలీ పత్రాలు సృష్టించిన పలువురిని ఎన్ఐఏ ఈ సందర్బంగా అరెస్టు చేసినట్టు సమాచారం. ఈ కేసులో తాజాగా జ్యూస్ షాపు నిర్వహకుడిని ఎన్ఐఏ అరెస్టు చేసినట్టు తెలుస్తోంది. అతనితో పాటు ఆతని రూమ్ మేట్ ను కూడా ఎన్ఐఏ అదుపులోకి తీసుకున్నట్టు పేర్కొంది.