National

కేంద్ర హోం మంత్రి అమిత్‌ షా (Amit Shah)కు త్రుటిలో పెను ప్రమాదం తప్పింది. రాజస్థాన్‌లో (Rajasthan) ఆయన ఎన్నికల ప్రచార రథం ఓ విద్యుత్ తీగకు తాకింది. దీంతో వెంటనే నిప్పు రవ్వలు ఎగసిపడ్డాయి. ఆ తర్వాత వైరు తెగిపోయింది. దీంతో వెంటనే విద్యుత్‌ను నిలిపి వేశారు. పెను ప్రమాదం తప్పడంతో అంతా ఊపిరి పీల్చుకున్నారు.

శాసన సభ ఎన్నికల ప్రచారం నిమిత్తం కేంద్ర హోం మంత్రి అమిత్ షా రాజస్థాన్‌లోని నాగౌర్‌లో పర్యటించారు. అక్కడ ఎన్నికల ర్యాలీలో పాల్గొన్నారు. బిదియాద్ గ్రామం నుంచి పర్ బస్తార్ కు ఎన్నికల ప్రచారం కోసం వెళుతుండగా ఆయన ప్రచార రథం పై భాగం విద్యుత్ తీగను తాకింది.

వెంటనే నిప్పు రవ్వలు ఎగసి పడ్డాయి. దీంతో ఒక్క సారిగా బీజేపీ నేతలు కంగారు పడ్డారు. వెంటనే తేరుకుని అమిత్ షా ప్రచార రథాన్ని నిర్వాహకులు వెంటనే ఆపివేశారు. విద్యుత్‌ను నిలిపి వేసి వెంటనే మరమ్మతులు చేపట్టారు. వెంటనే అమిత్ షాను వెరొక ప్రచార రథంలో ఎక్కించి ప్రచారాన్ని కొనసాగించారు.

అనంతరం కుచమాన్, మక్రానా, నాగౌర్ ప్రాంతాల్లో ఆయన ప్రసంగించారు. ఘటనకు సంబంధించి వీడియో సోషల్ మీడియాలో వైరల్ అవుతోంది. దీనిపై రాష్ట్ర ముఖ్యమంత్రి అశోక్ గెహ్లాట్ స్పందించారు. ఈ ఘటనపై విచారణకు ఆదేశిస్తున్నట్టు వెల్లడించారు.

ఐదు రాష్ట్రాల ఎన్నికల్లో భాగంగా చత్తీస్‌గఢ్ (Chhattisgarh), మిజోరాం (Mizoram)లో ఎన్నికలు నిర్వహించారు. మిజోరాంలో మొత్తం 40 అసెంబ్లీ స్థానాలకు ఈ రోజు పోలింగ్ నిర్వహించారు. సాయంత్రం 5 గంటల వరకు 77.04 శాతం పోలింగ్ నమోదైంది. సాయంత్రం 5 గంటల వరకు 77.04 శాతం ఓటింగ్ నమోదైనట్టు ఎన్నికల సంఘం వెల్లడించింది.

సెర్జిప్ జిల్లాలో అత్యధికంగా 83.96 శాతం ఓటింగ్ నమోదైనట్టు పేర్కొంది. సెర్చిఫ్ తర్వాత మమిత్ 83.42 శాతం, నహతియాల్ 82.62 శాతం, కవజవాల్ 82.39, కొలాసిబ్‌లో 80.13 శాతం ఓటింగ్ నమోదైనట్టు తెలిపింది. ఇక ఐజ్వాల్ జిల్లాలో అత్యల్ప ఓటింగ్ నమోదైనట్టు పేర్కొంది. జిల్లాలో 73.09 శాతం ఓటింగ్ నమోదైనట్టు ప్రకటించింది.

దక్షిణ మిజోరాంలోని సియాహలో అత్యల్పంగా 76.41 శాతం, సైత్వాల్ 75.12 శాతం నమోదైనట్టు అధికారులు చెప్పారు. మరోవైపు నక్సలైట్ల ప్రాబల్యం ఎక్కువగా ఉన్న బస్తర్ జిల్లాతో సహా మొత్తం 20 అసెంబ్లీ స్థానాలకు ఈ రోజు పోలింగ్ నిర్వహించారు. పోలింగ్ నేపథ్యంలో ఆయా జిల్లాల్లో భారీ బందోబస్తును పోలీసులు ఏర్పాటు చేశారు.

పోలింగ్ సందర్భంగా హింసాత్మక ఘటనలు చోటు చేసుకున్నాయి. సుక్మా జిల్లాల్లో నక్సలైట్లు కాల్పులు జరిపారు. ఈ కాల్పుల్లో నలుగురు భద్రతా సిబ్బంది తీవ్రంగా గాయపడ్డారు. ఖైరగఢ్-చుయుఖదాస్-చౌకిలో అత్యధికంగా 76 శాతం పోలింగ్ నమోదైంది. బిజాపూర్‌లో అత్యల్పంగా 40.98 శాతం, ఉత్తర్ బస్తర్ కాంకెర్‌లో 75.71, కొండగావ్‌లో 75.35, రాజ్‌నంద్‌గావ్‌లో 75.1 శాతం, బస్తర్ (జలంధర్)లో 72.41 శాతం పోలింగ్ నమోదైంది.

దేశ రాజధాని ఢిల్లీలో వాయు కాలుష్యం ( Air Pollution) మరోసారి ప్రమాదకర స్థాయికి చేరింది. ఈ క్రమంలో కాలుష్యాన్ని తగ్గించేందుకు మరోసారి సరి-బేసి విధానాన్ని అమలు చేసేందుకు ఆప్ (AAP) సర్కార్ రెడీ అవుతోంది. ఈ క్రమంలో ఆప్ ప్రభుత్వంపై బీజేపీ, నేత ఎంపీ రమేశ్ బిదూరీ (Ramesh Bidhuri) తీవ్ర విమర్శలు గుప్పించారు.

దీపావళికి పండుగకు ముందు ఈ నిబంధనను తీసుకు రావడాన్ని సనాతన ధర్మంపై ఆప్ సర్కార్ చేస్తున్న కుట్రగా ఆయన ఆరోపించారు. దీపావళి రోజు హిందువులంతా ఒకరి నొకరు కలుసుకోకూడదనే సీఎం కేజ్రీవాల్ ఈ నిర్ణయం తీసుకున్నారంటూ తీవ్ర స్థాయిలో ధ్వజమెత్తారు.

ఆప్ జాతీయ కన్వీనర్ కేజ్రీవాల్‌ను అర్బ‌న్ న‌క్స‌లైట్‌గా బీజేపీ నేత అభివర్ణించారు. దేశాన్ని నాశ‌నం చేసేందుకు విదేశీ శ‌క్తుల‌తో సీఎం కేజ్రీవాల్ చేతులు క‌లిపార‌ని తీవ్ర విమర్శలు చేశారు. కేజ్రీవాల్ వంటి నేత‌ల వల్ల భార‌త సంస్కృతి పూర్తిగా క‌నుమ‌రుగవుతోంద‌ని ఆయన తీవ్ర ఆందోళ‌న వ్య‌క్తం చేశారు.

దీపావళి పండుగ రోజు బాణా సంచాపై నిషేధం విధించడాన్ని ఆయన తప్పుబట్టారు. విదేశీయుల నుంచి ఆప్ నేతలు డబ్బులు తీసుకుని ఇలా మన పండుగలపై ఉద్దేశ పూర్వకంగా నిషేధం విదిస్తున్నారని దుయ్యబట్టారు. లౌకిక మేధావులుగా చెప్పుకుంటున్న కేజ్రీవాల్ లాంటి వ్యక్తులు కాలుష్యాన్ని అరికట్టేందుకు స‌రైన ప‌రిష్కార మార్గాన్ని కనిపెట్టాలన్నారు.

దేశంలో కాంగ్రెస్ (Congress) ఎప్పుడు అధికారంలోకి వచ్చినా మావోయిస్టులు (Maoist), ఉగ్రవాదుల (Terrorists) బలం పెరుగుతుందని ప్రధాని మోడీ అన్నారు. దేశంలో నక్సలైట్ల హింసను అరికట్టడంలో కాంగ్రెస్ పూర్తిగా విఫలమైందని ఆయన తీవ్ర విమర్శలు చేశారు. చత్తీస్‌గఢ్‌లో మావోయిస్టుల బెడదను తగ్గించడంలో కాంగ్రెస్ విఫలమైందని ఫైర్ అయ్యారు.

చత్తీస్‌గఢ్‌లో రెండో దశ ఎన్నికల కోసం ప్రధాని మోడీ ఈ రోజు ప్రచారాన్ని నిర్వహించారు. బహిరంగ ర్యాలీలో పాల్గొని ప్రధాని మోడీ మాట్లాడుతూ…. ‘నేను ప్రజలకు సేవచేసేందుకే పుట్టాను. మీకు సేవ చేసే భాగ్యం నాకు కల్పించారు’అని అన్నారు. చత్తీస్ గఢ్‌లో మావోయిస్టుల బెడద ఉందన్నారు.

మావోయిస్టుల బెడదను తగ్గించడంలో కాంగ్రెస్ విఫలమైందన్నారు. ఆదివాసీల సంక్షేమానికి బీజేపీ ప్రభుత్వం అత్యధిక ప్రాధాన్యత ఇస్తుందని వెల్లడించారు. ఆదివాసి కుటుంబం నుంచి వచ్చిన ఓ మహిళ ఈ దేశానికి రాష్ట్రపతి అవుతారని ఎవరైనా ఊహించారా అని ప్రజలను ఆయన అడిగారు.

గిరిజన కుటుంబాలకు చెందిన చాలా మంది మహిళలు అదృశ్యమవుతున్నారని ఆరోపించారు. కాంగ్రెస్ బుజ్జగింపు, ఉదాసీన రాజకీయాల ఫలితంగా రాష్ట్రంలోని సుర్గుజా ప్రాంతంలో పండుగలు జరుపుకోవడం అత్యంత కష్టంగా మారిందన్నారు. ఇధి ఇలా వుంటే ఈ రోజు చత్తీస్‌గఢ్‌లో మొదటి విడత పోలింగ్ జరుగుతోంది.

పట్టు వదలని విక్రమార్కు(Vikaramarkha)ల గురించి విన్నాం… గజనీ (Mahmud of Ghazni) దండయాత్రల గురించి చదివాం. కానీ రాజస్థాన్‌కు చెందిన ఈ వ్యక్తి మాత్రం వేరే లెవల్. ఐదు దశాబ్దాలుగా ఎన్నికల్లో అలుపెరగని పోరాటం చేస్తున్నారు. ఇప్పటి వరకు 20 ఎన్నికల్లో పోటీ చేసి ఓడిపోయారు. ఊపిరి ఉన్నంత వరకు తన దండయాత్ర కొనసాగుతూనే ఉంటుందని అంటున్నారు ఆ వ్యక్తి.

జైపూర్‌కు చెందిన తీతర్ సింగ్ జాతీయ ఉపాధి హామీ పథకంలో కూలీగా పని చేస్తున్నారు. గత 50 ఏండ్లుగా ఆయన ఎన్నికల్లో పోటీ చేస్తూ ఉన్నారు. ఇప్పటి వరకు ఇరవై ఎన్నికల్లో పాల్గొన్నాడు. ఎన్నికల్లో పోటీ చేసిన ప్రతి సారీ ఓటమి చెందారు. అయితే ప్రతి ఎన్నికల్లోనూ ఆయన డిపాజిట్ దక్కించుకోవడం గమనార్హం.

తాజాగా త్వరలో జరగబోయే ఎన్నికల్లో ఆయన కరన్ పూర్ అసెంబ్లీ నియోజక వర్గం నుంచి ఆయన పోటీ చేస్తున్నారు. అసలు ఇన్ని సార్లు ఎందుకు పోటీ చేస్తున్నారు మీడియా ప్రశ్నించగా… తాను ఎందుకు పోటీ చేయకూడదని ప్రశ్నించారు. పేదలకు ప్రభుత్వం భూమి ఉచితంగా ఇవ్వాలని, మౌలిక సదుపాయాలు కల్పించాలన్నారు.

తాను ఏదో పాపులారిటీ కోసమో లేదా రికార్డుల కోసమో పోటీ చేయడం లేదన్నారు. తమ హక్కులను సాధించుకునేందుకు ఎన్నికలు ఒక ఆయుధం అని అన్నారు. తమ హక్కులను సాధించుకునే వరకు ఈ పోరాటం సాగుతూనే ఉంటుందన్నారు. ఇటీవల ఆయన తన నామినేషన్ పత్రాలను అధికారులకు సమర్పించారు.

బంగాళాఖాతం (Bay Of Bengal)లో భూకంపం (Earthquake) సంభవించింది. రిక్టర్ స్కేలుపై భూకంప తీవ్రత 4.2గా నమోదైనట్టు నేషనల్ సెంటర్ ఫర్ సిస్మోలజీ(NCS) వెల్లడించింది. దీంతో బంగాళాఖాతంలో భారీగా అలలు తీర ప్రాంతానికి పోటెత్తాయి. ఉదయం 5.32 గంటలకు భూకంపం సంభవించినట్టు పేర్కొంది.

ఈ భూకంపం వల్ల ఎలాంటి ఆస్తి, ప్రాణ నష్టం గానీ జరగలేదని అధికారులు వెల్లడించారు. అండమాన్ నికోబార్ దీవులకు వాయవ్య దిశగా సుమారు 200 నాటికల్‌ మైళ్ల దూరంలో భూకంప కేంద్రం ఉన్నట్లు ఎన్‌సీఎస్ గుర్తించింది. సముద్ర అంతర్భాగంలో 10 కిలోమీటర్ల లోతులో భూమి కంపించినట్టు పేర్కొంది.

మరోవైపు ఉత్తర ప్రదేశ్, ఢిల్లీలోని పలు ప్రాంతాల్లో భూకంపం సంభవించింది. పిత్తోర్ గఢ్ ప్రాంతంలో భూమి కంపించింది. రిక్టర్ స్కేలుపై భూకంప తీవ్రత 5.6గా ఉన్నట్టు ఎన్ సీఎస్ వెల్లడించింది. భూకంప కేంద్రం నేపాల్ లో కేంద్రీకృతం అయినట్టు పేర్కొంది. దార్చులా, దిదీహట్, బంగపానీ ప్రాంతాల్లో ప్రకంపనలు సంభవించాయి.

ఇక నేపాల్ రాజధాని ఖట్మండూలో నిన్న భూకంపం సంభవించింది. ఉదయం జాజర్ కోట్ దాని పరిసర ప్రాంతాల్లో భూమి కంపించింది. రిక్టర్ స్కేలుపై 5.2 తీవ్రతతో భూకంపం వచ్చింది. బలమైన భూకంపం కావడంతో దాని ప్రభావం రాజధాని ఖట్మండుపై కూడా పడిందని తెలిపింది.