National

పలు రాష్ట్రాల్లో నామినేషన్ల (Nominations) పర్వం నడుస్తోంది. నామినేషన్లు అంటే అభ్యర్థుల (Candidates) హడావుడి మామూలుగా ఉండదు. పదుల సంఖ్యలో కార్లు, వందలాది మందితో ర్యాలీ, చుట్టూ పది మంది డ్యాన్సులు, బాణా సంచా మోతలు అబ్బో చెప్పాలంటే మాటలు సరిపోవు. ఒక్క మాటలో చెప్పాలంటే అభ్యర్థి ఎంత సౌండ్ పార్టీనో ఇక్కడే అర్థమవుతుంది. అందుకే నామినేషన్ కార్యక్రమానికి అభ్యర్థులు అధిక ప్రాధాన్యత ఇస్తారు.

మధ్య‌ప్రదేశ్ కు చెందిన స్వంతంత్ర అభ్యర్థి ప్రియాంక్ సింగ్ ఠాకూర్ మాత్రం ఇందుకు భిన్నంగా ఆలోచించాడు. బుర్హాన్ పూర్ అసెంబ్లీ నియోజక వర్గంలో నామినేషన్ వేసేందుకు ఖరీదైన కార్లలో కాకుండా గాడిదపై ఊరేగుతూ వచ్చి నామినేషన్ వేశారు. దీనికి సంబంధించిన వీడియో ఇప్పుడు సోషల్ మీడియాలో వైరల్ అవుతోంది.

రాష్ట్రంలో రాజకీయ పార్టీలు వారసత్వ రాజకీయాలను ప్రోత్సహిస్తున్నాయని ఆయన ఆరోపించారు. కొంత మంది సెలెక్టెడ్ కుటుంబ సభ్యులు ఓటర్లను ఫూల్స్ చేస్తుననారని ఆయన మండిపడ్డారు. పార్టీల రాజకీయ విధానానికి నిరసగా తాను ఇలా గాడిదపై వచ్చానని చెప్పారు. ఇది ఇలా వుంటే ఆయన నామినేషన్ వేసిన విధానం వినూత్నంగా ఉందని నెటిజన్లు అంటున్నారు.

బుర్హాన్ పురా నియోజక వర్గంలో కాంగ్రెస్ తరఫున సురేంద్ర సింగ్ షేరా పోటీ చేస్తున్నారు. ప్రస్తుతం ఆయన ఇక్కడ సిట్టింగ్ ఎమ్మెల్యేగా ఉన్నారు. ఇక బీజేపీ నుంచి మాజీ మంత్రి, పార్టీ అధికార ప్రతినిధి అర్చనా చిట్నీస్ బరిలోకి దిగుతున్నారు. రాష్ట్రంలో నవంబంర్ 17న అసెంబ్లీ ఎన్నికల పోలింగ్ ను నిర్వహించనున్నారు.

అసోం (Assam) ప్రభుత్వం కీలక నిర్ణయం తీసుకుంది. రాష్ట్రంలో ప్రభుత్వ ఉద్యోగులెవరైనా రెండో వివాహం (Second Marriage) చేసుకోవాలంటే ముందస్తుగా ప్రభుత్వం నుంచి అనుమతి తీసుకోవాలని వెల్లడించింది. కొన్ని మతాలు రెండో వివాహానికి అనుమతించినప్పటికీ సర్వీసు నిబంధనల ప్రకారం వాళ్లు ఖచ్చితంగా ప్రభుత్వ అనుమతి తీసుకోవాల్సిందేనని తేల్చి చెప్పింది.

జీవిత భాగస్వామి జీవించి ఉండగా మరో వ్యక్తిని వివాహం చేసుకోకుండా రాష్ట్ర ప్రభుత్వ ఉద్యోగులకు అసోం సర్కార్ ఇటీవల ఆదేశాలు జారీ చేసింది. ఒక వేళ జీవిత భాగస్వామి జీవించి ఉండగా ప్రభుత్వ ఉద్యోగి ఎవరైనా రెండో వివాహం చేసుకుంటే వారిపై చట్ట పరంగా కఠినమైన చర్యలు తీసుకుంటామని ఇటీవల హెచ్చరించింది.

ఉద్యోగి మరణించిన తర్వాత ఆ ఉద్యోగి భార్యలిద్దరూ పెన్షన్ కోసం గొడవ పడుతూ ప్రభుత్వాన్ని ఆశ్రయిస్తున్నారని సీఎం హిమంత బిస్వ శర్మ చెప్పారు. అలాంటి వివాదాలను తీర్చడం ప్రభుత్వానికి పెద్ద సమస్యగా మారుతోందన్నారు. వివాదాస్పద వాదనల కారణంగా చాలా మంది వితంతువులు పింఛన్‌లకు దూరమవుతున్నారని పేర్కొన్నారు.

ఈ నిబంధనలు గతంలో కూడా ఉండేవని అన్నారు. కానీ వాటిని ఎవరూ అమలు చేయలేదని తెలిపారు. ఇప్పుడు ఆ నిబంధనలను తాము అమలు చేయాలని అనుకుంటున్నామన్నారు. ప్రభుత్వ ఉద్యోగి హిందువు లేదా ముస్లిం ఏ మతమైనా కానీ రెండో వివాహం చేసుకోవాలంటే ఖచ్చింగా ప్రభుత్వం నుంచి అనుమతి తీసుకోవాల్సిందేనన్నారు. అది రాష్ట్ర ప్రభుత్వ రికార్డుల్లోకి రావాల్సిందేనన్నారు.

తమిళనాడు (Tamilnadu) సీఎం, డీఎంకే చీఫ్ ఎంకే స్టాలిన్ (Stalin) కీలక వ్యాఖ్యలు చేశారు. లోక్ సభ సార్వత్రిక ఎన్నికలు ముగిసే వరకు తమిళనాడు గవర్నర్ ఆర్ఎన్ రవిని తొలగించవద్దని ప్రధాని మోడీ, కేంద్ర హోం మంత్రి అమిత్ షాలను స్టాలిన్ కోరారు. గవర్నర్ విమర్శల వల్ల తమ పార్టీకి బలం చేకూరుతోందన్నారు.

రాజ్ భవన్ ఎదుట పెట్రోల్ బాంబు దాడి ఘటనపై డీఎంకే సర్కార్ పై గవర్నర్ ఆర్ఎన్ రవి విమర్శలు గుప్పిస్తున్న నేపథ్యంలో స్టాలిన్ ఈ మేరకు వ్యాఖ్యలు చేశారు. ఓ వివాహ వేడుకలో ఆయన మాట్లాడుతూ… గవర్నర్ ఆర్ఎన్ రవి తమ పార్టీకి సమాంతరంగా ప్రచారం చేస్తున్నారని వ్యంగ్యాస్త్రాలు సంధించారు.

గవర్నర్ ప్రచారం తమ పార్టీకి పరోక్షంగా బలం చేకూరుస్తోందని చెప్పారు. అందువల్ల గవర్నర్ ను 2024 ఎన్నికల వరకు మార్చవద్దని కేంద్రాన్ని ఆయన కోరారు. గవర్నర్ వ్యాఖ్యలను ప్రజలెవరూ సీరియస్ గా తీసుకోవడం లేదని వెల్లడించారు. గవర్నర్ వ్యాఖ్యలకు ఎవరూ అంత పెద్దగా ప్రాధాన్యత ఇవ్వడం లేదని చెప్పారు.

రాష్ట్రంలో పరిపాలనా సంబంధమైన విషయాల్లో గత కొన్ని నెలలుగా సర్కార్ వర్సెస్ గవర్నర్ ఎపిసోడ్ నడుస్తోంది. ఈ నేపథ్యంలో గవర్నర్ ఆర్ఎన్ రవిని బీజేపీకి వర్కింగ్ ఏజెంట్ గా డీఎంకే అభివర్ణిస్తోంది. బీజేపీయేతర ప్రభుత్వాలు ఉన్న ప్రాంతాల్లో రాష్ట్రాల స్వయం ప్రతిపత్తికి ఆటంకం కలిగించేందుకు గవర్నర్ ను ఓ సాధనంగా వాడుకుంటోందని డీఎంకే ఆరోపిస్తోంది.

కర్ణాటక (Karnataka) కాంగ్రెస్ ఎమ్మెల్యే మాండ్య రవి గౌడ్ (Mandya Ravi Goud) కీలక వ్యాఖ్యలు చేశారు. రెండున్నరేండ్ల తర్వాత సీఎం సిద్దరామయ్య పదవీ కాలం ముగుస్తుందని తెలిపారు. ఆయన స్థానంలో డిప్యూటీ సీఎం డీకే శివ కుమార్ సీఎం అవుతారని తెలిపారు. ఇందులో రెండో మాటలకు అవకాశమే లేదని ఆయన వెల్లడించారు.

పార్టీ కోసం డీకే శివకుమార్ ఎంతో కష్టపడ్డారని ఆయన వెల్లడించారు. ఇందులో ఏ మాత్రం సందేహం లేదన్నారు. మీడియాలో ప్రతి పక్ష బీజేపీ అసత్య ప్రచారాలు చేస్తోందంటూ ఆయన మండిపడ్డారు. అధికార మార్పిడికి సంబంధించి ముందే ఏదైనా ఒప్పందం జరిగిందా అని మీడియా అడిగిన ప్రశ్నకు బదులిస్తూ…….

అటువంటి ఏ ఒప్పందం గురించి తనకు తెలియదన్నారు. హైకమాండ్ స్థాయిలో జరిగే చర్చల గురించి తనకు తెలియదని చెప్పారు. కానీ రాష్ట్ర అధ్యక్షుడిగా పార్టీకి ఆయన చేసిన సేవలను బట్టి సీఎం అవుతారని తెలిపారు. శివ కుమార్ ను సీఎం చేసేందుకు సిద్ద రామయ్య రాజీనామా చేస్తారా అని అడిగిన ప్రశ్నకు సమాధానం ఇస్తూ…

ఇలాంటి విషయాలను ఇప్పుడు ఎందుకు చర్చించాలి? అవి ఆయన ప్రశ్నించారు. ప్రస్తుతానికి ప్రభుత్వం సమర్ధవంతంగా పనిచేస్తోందని స్పష్టం చేశారు. ప్రజల సంక్షేమంపైనే తమ ప్రభుత్వం దృష్టి పెట్టిందన్నారు. కానీ. సరైన సమయం వచ్చినప్పుడు ఆ విషయంలో హై కమాండ్ నిర్ణయాలు తీసుకుంటుందన్నారు.

ఢిల్లీ( Delhi)లోని ఆప్ (AAP) సర్కార్‌పై బీజేపీ (BJP) తీవ్ర స్థాయిలో విమర్శలు గుప్పించింది. ఢిల్లీలో కాలుష్యాన్ని నియంత్రించడంలో కేజ్రీవాల్ విఫలమయ్యారంటూ బీజేపీ విరుచుకు పడింది. కాలుష్య నియంత్ర‌ణపై ఆప్ స‌ర్కార్ నేర‌పూరిత నిర్ల‌క్ష్యం వహిస్తోందని, తద్వారా ప్ర‌జ‌ల ప్రాణాల‌ను హ‌రిస్తోంద‌ని దుయ్య‌బ‌ట్టింది.

వాయు కాలుష్యాన్ని నియంత్రించే విషయంలో ఆప్ సీరియస్ గా లేదని ఢిల్లీ బీజేపీ చీఫ్ వీరేంద్ర సచ్ దేవ్ మండిపడ్డారు. ఢిల్లీలో పెరుగుతున్న కాలుష్యం కేవలం రెండు నెలల సమస్య కాదన్నారు. ఇది ఏడాది మొత్తం ఉండే సమస్య అని మండిపడ్డారు. కాలుష్య నివారణకు చర్యలు తీసుకోకుండా ప్రభుత్వం రోజుకో కారణాలు చెబుతోందన్నారు.

కాలుష్యంపై ఆప్ సర్కార్ కేవలం డిక్లరేషన్లు చేస్తోందన్నారు. ఈ విషయంలో ఆప్ చాలా సునాయాసంగా అబద్దాలు చెబుతోందని మండిపడ్డారు. పంట వ్యర్థాల దహనం చేస్తున్న 53 శాతం ఘటనలు పంజాబ్ లోనే నమోదవుతున్నాయని చెప్పారు. సెప్టెంబర్ 15 నుంచి అక్టోబర్ 26 వరకు 7136 పంట వ్యర్థాల దహనం కేసులు నమోదైతే అందులో 3,293 కేసులు పంజాబ్ నుంచే నమోదయ్యాయన్నారు.

ఇది ఇలా వుంటే కాలుష్యాన్ని నియంత్రించేందుకు కేజ్రీవాల్ స‌ర్కార్ వ‌ద్ద ఎలాంటి విధానం లేద‌ని బీజేపీ ఐటీ సెల్ చీఫ్ అమిత్ మాల‌వీయ ఫైర్ అయ్యారు. పంజాబ్‌లో పంట వ్యర్ధాల‌ను త‌గుల‌బెట్ట‌డం వ‌ల్లనే దేశ రాజధానిలో వాయు కాలుష్యం పెరిగిపోతోందని ఆప్ 2020లో పేర్కొంద‌న్నారు. కానీ ఇప్పుడు ఢిల్లీలో కాలుష్యానికి కార‌ణాలేంట‌నేది తెలియ‌ద‌ని ఆప్ స‌ర్కార్ చెబుతోందన్నారు.

మన భవిష్యత్ ఇప్పుడు దశాబ్దం లేదా ఒక శతాబ్దం దూరంలో లేదని ప్రధాని మోడీ (PM Modi) అన్నారు. సాంకేతిక పరిజ్ఞానం కారణంగా భవిష్యత్ ఇప్పుడు, ఇక్కడే ఉందన్నారు. బీజేపీ (BJP) తొమ్మిదేండ్ల పాలనలో ప్రపంచంలోనే అతి పెద్ద ఎకోసిస్టమ్‌గా భారత ఎకోసిస్టమ్ మారిందన్నారు. ఇప్పుడు ప్రపంచంలో మనం మూడవ స్థానంలో వున్నామని చెప్పారు.

ఢిల్లీలోని ప్రగతి మైదాన్​లోని భారత్​ మండపంలో 7వ ఇండియన్​ మొబైల్ కాంగ్రెస్ (IMC)​ను ప్రధాని మోడీ ప్రారంభించారు. ఈ సందర్బంగా ప్రధాని మోడీ మాట్లాడుతూ….. గతేడాది అక్టోబర్ 2న దేశంలో 5జీ టెక్నాలజీని ప్రారంభించామని ప్రధాని గుర్తు చేశారు. ఏడాది కాలంలో దేశ వ్యాప్తంగా 5 లక్షల 5జీ బేస్ స్టేషన్లు ఉన్నాయని చెప్పారు.

ప్రస్తుతం ఇప్పుడు పంచమంతా భారత్​లో తయారైన ఫోన్లనే ఉపయోగిస్తోందని అన్నారు. 2014లో ప్రారంభమైన కృషి వల్ల ఈ తొమ్మిదేండ్ల కాలంలో భారత్ టెక్నాలజీ దిగుమతి దారు నుంచి ఎగుమతి దారుగా ఎదిగిందన్నారు. శాంసంగ్ కంపెనీకి చెందిన​ ఫోల్డ్​ 5 మొబైల్స్​, యాపిల్ కంపెనీకి సంబంధించిన ఐఫోన్​ 15 ఇప్పుడు ఇండియాలోనే తయారవుతున్నాయని వివరించారు. ఇటీవలే దిగ్గజ గూగుల్ కంపెనీ భారత్​లోనే తమ పిక్సెల్​ ఫోన్లను తయారుచేస్తామని ప్రకటించిందన్నారు.

గతంలో మొబైల్ బ్రాడ్ బ్యాండ్ స్పీడ్ విషయంలో ప్రపంచంలో భారత్ 118వ స్థానంలో ఉండేదని పేర్కొన్నారు. కానీ ఇప్పుడు మనం 43వ స్థానానికి చేరుకున్నామని తెలిపారు. టెక్నాలజీ భవిష్యత్ అంతా​ భారత్ లోనే ఉందని వెల్లడించారు. అతి త్వరలోనే 6జీ సేవలను అందించడంలోనూ భారత్ ముందు ఉంటుందని ప్రధాని ఆశాభావం వ్యక్తం చేశారని అన్నారు.

2014 అనేది కేవలం ఒక తేదీ కాదన్నారు. అది ఒక మార్పునకు నాంది పలికిందన్నారు. ఫోన్లు పాతబడితే ఇప్పుడు ఎవరూ వాడటం లేదన్నారు. ఒక వేళ ఎవరైనా వాటిని ఉపయోగించినా, అవి సరిగ్గా పనిచేయవన్నారు. ప్రస్తుతం కాంగ్రెస్​ నేతృత్వంలోని యూపీఏ పరిస్థితి కూడా అలాగే మారిందని ఎద్దేవా చేశారు.

ఢిల్లీ (Delhi)లో వాయు కాలుష్యం ప్రమాదకర స్థాయిలో పెరిగిపోయింది. వాయు నాణ్యత సూచీ (Air Quality Index) గణనీయంగా పడిపోయినట్టు అధికారులు చెబుతున్నారు. తాజాగా ఢిల్లీలో వాయు నాణ్యత ప్రమాదకర స్థాయికి చేరుకోవడంతో అధికారులు ఆందొళన వ్యక్తం చేస్తున్నారు. ఢిల్లీలో వాయు నాణ్యత సూచీ 309గా నమోదైనట్టు సఫర్ సంస్థ వెల్లడించింది.

వాయు నాణ్యత సూచీ అత్యంత పేలవంగా ఉన్నట్టు సఫర్ పేర్కొంది. కేంద్ర కాలుష్య నియంత్రణ బోర్డు డేటా ప్రకారం ఆనంద్ విహార్ ప్రాంతంలో వాయు నాణ్యత 326గా నమోదైంది. బురారీ ప్రాంతంలో ఏక్యూఐ 305గా నమోదైంది. ఢిల్లీలో గురువారం సరాసరి వాయు నాణ్యత సూచీ 256 గా నమోదైంది. నోయిడా గురుగావ్ లల్లో ఏక్యూఐ వరుసగా 208, 252గా నమోదైనట్టు అధికారులు తెలిపారు.

నోయిడా, గురుగావ్ రెండు నగరాల్లోనూ వాయు నాణ్యత సూచీ పేలవమైన స్థాయిలో ఉన్నట్టు పేర్కొన్నారు. గురుగావ్‌లో వాయు నాణ్యత సూచీ గురువారంతో పోలీస్తే ఈ రోజు పెద్దగా మార్పులు కనిపించలేదు. అదే సమయంలో నోయిడాలో మాత్రం ఏక్యూఐ మరింత పడిపోయింది. గురుగావ్ లో గురువారం వాయు నాణ్యత సూచీ 230 ఉండగా, నోయిడాలో 191 ఉన్నట్టు వెల్లడించారు.

అక్టోబర్ నుంచి జనవరి మధ్యలో పంజాబ్, హర్యానా రాష్ట్రాల్లో రైతులు పంట వ్యర్థాలను దహనం చేస్తూ వుంటారు. ఈ నేపథ్యంలో ఆ నెలల్లో ఢిల్లీలో వాయు కాలుష్యం ఎక్కువగా ఉంటుందని అధికారులు అంటున్నారు. ఈ ఏడాది ఇప్పటి వరకు 250 పంట వ్యర్థాల దహనం ఘటనలు రిపోర్టు అయినట్టు అధికారులు అన్నారు.