National

కాంగ్రెస్ పై ఏఐఎంఐఎం అధినేత (AIMIM Chief), హైదరాబాద్ ఎంపీ అసదుద్దీన్ ఓవైసీ ( Asaduddin Owaisi)తీవ్ర స్థాయిలో విరుచుకు పడ్డారు. ఆ పార్టీ సీనియర్ నేత ఇటీవల కాంగ్రెస్ గూటికి చేరారని చెప్పారు. అదేవిధంగా కమల్ నాథ్ కూడా బీజేపీలో చేరబోతున్నట్టు ప్రచారం జరుగుతోందని పేర్కొన్నారు. గతంలో ఎంఐఎంను బీజేపీ బీ టీమ్ అంటూ విమర్శలు చేశారని చెప్పారు. ఇప్పుడు ఆర్ఎస్ఎస్ నిజమైన టీమ్ ఏదో…బీజేపీకి బీ టీమ్ ఏదో ఇప్పుడు వెలుగులోకి వచ్చిందని తెలిపారు.

మహారాష్ట్రలోని అఖోలాలో ఓ బహిరంగ సభలో ఆయన ఈ మేరకు వ్యాఖ్యలు చేశారు. అశోక్ చవాన్ బీజేపీలో చేరారని, ఇప్పుడు కమల్ నాథ్ కూడా ఆయన్ని ఫాలో అవుతున్నారని అన్నారు. ఇప్పుడు బీజేపీ బీ టీమ్ ఏదో అర్థమైందన్నారు. మన సమాజంలో సెక్యులరిజం పేరుతో మనల్ని భయపెట్టిస్తున్న పాములను గుర్తించాలని కోరారు. ఎన్సీపీ నేత, మహారాష్ట్ర డిప్యూటీ సీఎం అజిత్ పవార్ పై ఓవైసీ తీవ్ర స్థాయిలో ధ్వజమెత్తారు.

అజిత్ పవార్ తన సోదరి సుప్రియా సూలేకు వ్యతిరేకంగా తన సతీమణిని బరిలోకి దించుతున్నారని తనకు తెలిసిందని అన్నారు. అసలు మహారాష్ట్ర రాజకీయాల్లో ఏం జరుగుతోందని ప్రశ్నించారు. ముస్లింలు డిసెంబరు 6, 1992ని ఎప్పటికీ మరచిపోకూడదని సూచించారు. బాబ్రీ మసీదు ఇప్పటికీ ఉందని, అదే అలాగే ఉంటుందని మనం గుర్తుంచుకోవాలన్నారు.

లేదంటే మరో బాబ్రీ (సంఘటన) జరుగుతుందని హెచ్చరించారు. యూదులు హోలోకాస్ట్‌ను గుర్తుంచుకున్నట్లే ముస్లింలు బాబ్రీని గుర్తుంచుకోవాలన్నారు. మసీదులను రక్షించడం ముస్లింల కర్తవ్యమని చెప్పారు. ఈ కర్తవ్యాన్ని తాము ఎప్పటికీ మరువలేమని వివరించారు. 2024 ఎన్నికల్లో లోక్‌సభలో ముస్లిం సభ్యుల ప్రాతినిధ్యం పెరగాలని, మహారాష్ట్ర నుంచి 4 సీట్లు గెలవాలని ఎంఐఎం కార్యకర్తలు లక్ష్యంగా పెట్టుకోవాలని విజ్ఞప్తి చేశారు.

నటుడు, ‘మక్కల్ నీది మయ్యమ్’ (Makkal Needhi Maiam) అధ్యక్షుడు కమల్ హాసన్ (Kamal Hasan) కీలక వ్యాఖ్యలు చేశారు. రాబోయే లోక్ సభ సార్వత్రిక ఎన్నికల్లో తమ పార్టీ పొత్తులు పెట్టుకోబోతోందని వెల్లడించారు. మరో రెండు రోజుల్లో ఈ మేరకు ఓ ప్రకటన చేస్తానని పేర్కొన్నారు.

తన రాబోయే చిత్రం ‘థగ్ లైఫ్’షూటింగ్ కోసం కమల్ హాసన్ అమెరికా వెళ్లారు. షూటింగ్ ముగిసిన అనంతరం ఆయన సోమవారం చెన్నై ఎయిర్ పోర్టులో దిగారు.
చెన్నై విమానాశ్రయంలో మీడియాతో కమల్ హాసన్ మాట్లాడుతూ….పార్లమెంట్ ఎన్నికలకు తమ పార్టీ సన్నాహాలను గురించి ఆయన వివరించారు. ఎన్నికల పనులు బాగా జరుగుతున్నాయని పేర్కొన్నారు.

మరో రెండు రోజుల్లో ఒక మంచి శుభవార్తతో మిమ్మల్ని కలుస్తానని తెలిపారు. తాము ఒక మంచి అవకాశం కోసం చూస్తున్నామని తెలిపారు. పొత్తులకు సంబంధించి మరో రెండు రోజుల్లో తన నిర్ణయాన్ని ప్రకటిస్తానని పేర్కొన్నారు. గత ఏడాది సెప్టెంబర్‌లో డీఎంకే నేత, తమిళనాడు మంత్రి ఉదయనిధి స్టాలిన్ కీలక వ్యాఖ్యలు చేశారు.

పార్లమెంటరీ ఎన్నికలకు ముందు కమల్ హాసన్‌కు చెందిన ఎంఎన్‌ఎంతో పొత్తు పెట్టుకోవాలని తాము అనుకుంటున్నట్టు ఒక హింట్ ఇచ్చారు. ఎన్నికల సమయంలో కమల్‌హాసన్‌ మక్కల్‌ నీది మయ్యమ్‌ పార్టీతో పొత్తులపై పార్టీ నేతలు నిర్ణయం తీసుకుంటారని ఉదయ్ నిధి స్టాలిన్ పేర్కొన్నారు. ఈ క్రమంలో కమల్ హాసన్ వ్యాఖ్యలు ప్రాధాన్యత సంతరించుకున్నాయి.

రాబోయే సార్వత్రిక లోక్ సభ ఎన్నికల్లో బహుజన సమాజ్ వాది పార్టీ ఇతర పార్టీలతో పొత్తులు పెట్టుకోబోతందని వార్తలు వస్తున్నాయి. ఈ నేపథ్యంలో ఈ వార్తలపై బీఎస్పీ అధినేత్రి (BSP Chief) మాయావతి (Mayawati) స్పందించారు. తాము ఎవరితోనూ పొత్తులు పెట్టుకోబోవడం లేదని స్పష్టం చేశారు.

ఈ ఎన్నికల్లో బీఎస్పీ ఒంటరిగానే పోటీ చేస్తుందని వెల్లడించారు. రాబోయే లోక్ సభ ఎన్నికల్లో ఏ పార్టీతోనూ తాము పొత్తులు పెట్టుకోబోమని బీఎస్పీ పదే పదే స్పష్టంగా చెబుతోందని తెలిపారు. అయినప్పటికీ పొత్తుల గురించి ప్రతిరోజూ పుకార్లు వ్యాప్తి చెందుతూనే ఉన్నాయని అన్నారు. దీన్నిబట్టి బీఎస్పీ లేకుండా కొన్ని పార్టీలు ఎన్నికల్లో రాణించలేవని రుజువు అవుతోందని ఎద్దేవా చేశారు.

రాబోయే లోక్ సభ ఎన్నికల్లో ఒంటరిగా పోటీ చేయాలనేది తమ పార్టీ నిర్ణయమని ఆమె చెప్పారు. మొత్తం సమాజం ప్రయోజనాలను, సంక్షేమాన్ని దృష్టిలో ఉంచుకుని, ముఖ్యంగా పేదలు, దోపిడీకి గురవుతున్న అణగారిన వర్గాల శ్రేయస్సును దృష్టిలో ఉంచుకుని, దేశవ్యాప్తంగా ఉన్న ప్రజల కోసం తన సొంతబలంతో పోటీ చేసేందుకు బీఎస్పీ నిర్ణయించిందన్నారు.

పొత్తుల విషయంలో గత నెలలో బీఎస్పీ అధినేత్రి మాయావతి కీలక వ్యాఖ్యలు చేశారు. తమతో పొత్తుల వల్ల మిత్ర పక్షాలకే లాభం చేకూరుతోందని, తమ పార్టీకి పెద్దగా ప్రయోజనాలు రావడం లేదన్నారు. ఈ సార్వత్రిక లోక్ సభ ఎన్నికల్లో తాము ఎవరితోనూ పొత్తు పెట్టుకోబోవడం లేదని తెలిపారు. కానీ ఎన్నికల అనంతరం పొత్తులపై ఫలితాల అనంతరం ఆలోచిస్తామని వెల్లడించారు.

సందేశ్ కాళీ ఘటన విషయంలో బీజేపీ (BJP)పై పశ్చిమబెంగాల్ సీఎం, టీఎంసీ అధినేత్రి మమతా బెనర్జీ (Mamata Benarjee) తీవ్ర స్థాయిలో విమర్శలు చేశారు. సందేశ్ కాళీలో జరిగిన గోరంత ఉంటే దాన్ని బీజేపీ కొండంత చేసి చూపిస్తోందని ఫైర్ అయ్యారు. టీఎంసీ నేతలపై లైంగిక వేధింపుల, భూకబ్జా ఆరోపణలను వచ్చాయని, వాటిపై దర్యాప్తు జరిపేందుకు అధికారులను అక్కడకు పంపిస్తున్నామని తెలిపారు.

టీఎంసీ నేతలు ఎవరైనా భూమిని అక్రమంగా ఆక్రమించుకుంటే దాన్ని తిరిగి గిరిజనులకు ఇచ్చేస్తామని చెప్పారు. తానెప్పుడూ అన్యాయాన్ని సమర్ధించలేదని చెప్పారు. ఏ మహిళ కూడా ఎఫ్‌ఐఆర్‌ దాఖలు చేయలేదని వెల్లడించారు. కేసు నమోదు చేయాలని పోలీసులను ఆదేశించానని అన్నారు. తమ బ్లాక్ ప్రెసిడెంట్‌ని పోలీసులు అరెస్టు చేశారని వివరించారు. ఇలాంటి కేసుల్లో ఎంత మంది బీజేపీ నేతలను అరెస్టు చేశారు? అని ప్రశ్నించారు.

బీజేపీ పాలన ఇందిరాగాంధీ కాలం నాటి ఎమర్జెన్సీని తలపిస్తోందన్నారు. బీజేపీ నేతృత్వంలోని కేంద్రం, దర్యాప్తు సంస్థలను దుర్వినయోగం చేస్తూ తమ నేతలను అరెస్ట్ చేస్తున్నారంటూ ఫైర్ అయ్యారు. బీజేపీ, కాంగ్రెస్, సీపీఎం చేతులు కలిపాయని ఆరోపణలు గుప్పించారు. ఇందిరా గాంధీ కూడా ఓడిపోయారనే విషయాన్ని బీజేపీ గుర్తుంచుకోవాలని అన్నారు.

1975-77లో ఎమర్జెన్సీ కాలంలో 2000 మందిని అరెస్టు చేశారని గుర్తు చేశారు. ఎన్నికల్లో గెలుస్తామని ఇందిరా గాంధీ దీమా వ్యక్తం చేశారని తెలిపారు. కానీ ఆ ఎన్నికల్లో ఓడిపోయారని చెప్పారు. ఇప్పుడు ఈడీని, సీబీఐని ఎన్నికల కోసం బీజేపీ ఉపయోగిస్తోందని తీవ్ర విమర్శలు చేశారు. ఈ రోజు కూడా సీబీఐ, ఈడీ, ఎన్నికల కమిషన్‌‌ను ఉపయోగించి ప్రజలను జైళ్లో పెట్టడాన్ని వ్యతిరేకించే హక్కు మనకు ఉందన్నారు.

దేశ సాయుధ బలగాల నైతిక స్థైర్యాన్ని దెబ్బతీసేందుకు కూడా వెనుకాడకపోవడం కాంగ్రెస్ (Congress) చేసిన అతిపెద్ద పాపమని ప్రధాని నరేంద్ర మోడీ (PM Modi) అన్నారు. భారత భద్రతకు, సైనిక బలగాలను నష్టం చేకూర్చేందుకు దొరికిన ఏ అవకాశాన్ని ఆ పార్టీ వదులుకోలేదంటూ తీవ్ర ఆరోపణలు గుప్పించారు.

కాంగ్రెస్‌లోని ఓ వర్గం మోడీని విమర్శించడం, తిట్టడమే పనిగా పెట్టుకుందని ఫైర్ అయ్యారు. ఢిల్లీలో జరుగుతున్న బీజేపీ నేషనల్ కన్వెన్షన్‌లో ప్రధాని మోడీ ప్రసంగిస్తూ….ఎన్డీఏ వాగ్దానం చేస్తున్న వికసిత్ భారత్ (అభివృద్ధి చెందిన భారత్) గురించి కూడా ఇండియా కూటమి నేతలు ప్రస్తావించలేరని అన్నారు. ఐదేండ్ల క్రితం మన వైమానిక దళానికి రాఫెల్ జెట్ రాకుండా అడ్డుకునేందుకు కాంగ్రెస్ ప్రయత్నించిందని ఆరోపణలు చేశారు.

మన భద్రతా బలగాలు చేసిన సర్జికల్ స్ట్రైక్ పై ప్రశ్నలు సంధించారని ఫైర్ అయ్యారు. సర్జికల్ స్ట్రైక్ జరిగినప్పుడు ప్రూఫ్ కావాలని కాంగ్రెస్ నేతలు అడిగారని మండిపడ్డారు. కాంగ్రెస్‌లో ఓ వర్గం తనపై ఆరోపణలు చేయడమే పనిగా పెట్టుకుందన్నారు. రాబోయే లోక్ సభ సార్వత్రిక ఎన్నికల్లో బీజేపీ మరోసారి అధికారంలోకి వస్తుందని ప్రధాని మోడీ అన్నారు. మోడీ సర్కార్ మరోసారి విజయం సాధిస్తుందని విదేశాలకు కూడా తెలుసునని తెలిపారు. ఎన్నికలు ఇప్పటికీ ఇంకా జరగలేదన్నారు.

కానీ జూలై, ఆగస్టు, సెప్టెంబర్‌లలో పలు కార్యక్రమాలకు హాజరు కావాలని తనకు విదేశాల నుంచి ఇప్పటకే ఆహ్వానాలు అందాయని చెప్పారు. ఈ ఆహ్వానాలు ఏమి సూచిస్తాయి? అన్నారు. అంటే ప్రపంచవ్యాప్తంగా ఉన్న పలు దేశాలు బీజేపీ ప్రభుత్వం పునరాగమనంపై పూర్తి విశ్వాసంతో ఉన్నాయని పేర్కొన్నారు. మోడీ మరోసారి విజయం సాధిస్తారని వారికి కూడా తెలుసన్నారు.

తాను అధికారాన్ని ఆస్వాదించేందుకు మూడవ సారి పదవిని కోరుకోవడం లేదని చెప్పారు. దేశం కోసం పనిచేయాలని తాను అనుకుంటున్నానని చెప్పారు. తాను తన ఇంటి గురించి ఆలోచించి ఉంటే కోట్లాది మందికి ఇళ్లు కట్టించే అవకాశం ఉండేది కాదన్నారు. ఎన్డీఏ 400లకు పైగా సీట్లు గెలుస్తుందన్నారు.

బీజేపీ జాతీయ అధ్యక్షుడు జేపీ నడ్డా (JP Nadda) పదవీ కాలాన్ని ఆ పార్టీ పొడిగించింది. ఈ ఏడాది జూన్ వరకు ఆయన పదవీ కాలాన్ని పొడగిస్తున్నట్టు వెల్లడించింది. ఈ మేరకు ఈ ఏడాది జనవరిలోనే కేంద్ర హోం మంత్రి అమిత్ షా (Amit Shah) ప్రకటించారు. తాజాగా పార్టీ జాతీయ కౌన్సిల్ ఈ నిర్ణయానికి ఆమోదం తెలిపింది.

అంతేకాకుండా జేపీ నడ్డాకు కొన్ని విశేష అధికారాలను పార్టీ కట్టబెట్టింది. పార్టీ పార్లమెంటరీ బోర్డు ఆమోదానికి లోబడి స్వతంత్రంగా ముఖ్యమైన నిర్ణయాలు తీసుకునే అధికారాన్ని జేపీ నడ్డాకు ఇచ్చారు. ఢిల్లీలో రెండు రోజులుగా బీజేపీ జాతీయ కౌన్సిల్ సమావేశాలను నిర్వహిస్తున్నారు. ఈ సమావేశంలో పలు కీలక అంశాలపై చర్చిస్తున్నారు.

రాబోయే లోక్‌సభ సార్వత్రిక ఎన్నికల కోసం పార్టీ అనుసరించాల్సిన వ్యూహాలు, ప్రచార కార్యక్రమాల గురించి చర్చించేందుకు వేలాది మంది పార్టీ సభ్యులు అగ్ర నాయకత్వం నేతృత్వంలో సమావేశమయ్యారు. పార్టీ జాతీయ అద్యక్షుడి పదవీ కాలాన్ని పొడిగించాలని గతంలో తీసుకున్న నిర్ణయంపై తాజాగా చర్చించి దానికి పార్టీ ఆమోదం తెలిపింది.

జేపీ నడ్డా 2019లో బీజేపీ వర్కింగ్ ప్రెసిడెంట్‌గా బాధ్యతలు చేపట్టారు. ఆ తర్వాత 2020లో పూర్తిస్థాయి పార్టీ అధ్యక్ష పదవిని చేపట్టారు. ఇది ఇలా వుంటే శనివారం నడ్డా మాట్లాడుతూ… పార్టీ కార్యకర్తల బలాలు, సామర్థ్యాలపై తనకు గట్టి నమ్మకం ఉందని చెప్పారు. రాబోయే లోక్‌సభ ఎన్నికల్లో పార్టీ 370 కంటే ఎక్కువ సీట్లు గెలవాలని, ఎన్డీయే 400 సీట్లను దాటేలా చూడాలని బీజేపీ సభ్యులందరికీ పిలుపునిచ్చారు.

కాంగ్రెస్‌ (Congress)పై కేంద్ర హోం మంత్రి అమిత్ షా (Amit Shah) తీవ్ర స్థాయిలో విరుచుకుపడ్డారు. విపక్ష ఇండియా కూటమికి చెందిన నేతలు తమ పిల్లలు తమ పార్టీలో ప్రముఖ పదవులు చేపట్టాలని కోరుకుంటారని అన్నారు. తమ కుటుంబం కోసం అధికారం చేజిక్కించుకోవడమే లక్ష్యంగా పెట్టుకున్న వారు ఎప్పటికైనా పేదల సంక్షేమం గురించి ఆలోచిస్తారా అని ప్రశ్నించారు.

దేశ రాజధాని ఢిల్లీలో నిర్వహించిన బీజేపీ నేషనల్ కన్వెన్షన్‌‌కు కేంద్ర హోం మంత్రి అమిత్ షా హాజరయ్యారు. ఈ సందర్బంగా అమిత్ షా ప్రసంగిస్తూ….రాజకీయాల్లో ఇండియా కూటమి లక్ష్యం ఏమిటి? అని నిలదీశారు. ప్రధాని నరేంద్ర మోడీ స్వయం సమృద్ధితో కూడిన భారత దేశాన్ని లక్ష్యంగా పెట్టుకున్నారని తెలిపారు.

కానీ రాహుల్ గాంధీని ప్రధానిని చేయడమే సోనియాగాంధీ లక్ష్యమని చెప్పారు. కుమార్తెను ముఖ్యమంత్రిని చేయడమే పవార్ సాహెబ్ లక్ష్యమని ఎద్దేవా చేశారు. మేనల్లున్ని సీఎంగా చేయడమే మమతా బెనర్జీ టార్గెట్ అన్నారు. ఇక కొడుకును సీఎంగా చేయడమే ఎంకే స్టాలిన్ లక్ష్యం… లాలూయాదవ్ తన కొడుకును సీఎం చేయాలని లక్ష్యంగా పెట్టుకున్నారని విమర్శించారు.

కాంగ్రెస్ తన బుజ్జగింపు రాజకీయాల వల్లే రామాలయ ప్రతిష్ఠాపన వేడుక ఆహ్వానాన్ని తిరస్కరించిందని ఫైర్ అయ్యారు. ఇండియా కూటమి, ముఖ్యంగా కాంగ్రెస్… దేశంలో ప్రజాస్వామ్య స్ఫూర్తిని నాశనం చేసిందని ఆరోపణలు గుప్పించారు. అవినీతి, బంధుప్రీతి, బుజ్జగింపులు, కులతత్వంతో దేశంలో ప్రజాస్వామ్యం అని కాంగ్రెస్ రంగు పులుముకుందని నిప్పులు చెరిగారు.

ఇండియా కూటమిలో ఏడు కుటుంబ పార్టీలు ఉన్నాయని పేర్కొన్నారు. దేశంలో కుటుంబ రాజకీయాలకు మోడీ పుల్ స్టాప్ పెట్టారన్నారు. కాంగ్రెస్, ఇండియా కూటమి… దళితులు, ఆదివాసీలు, వెనుకబడిన తరగతులను తమ ఓటు బ్యాంకుగా ఉపయోగించుకోవడానికి ప్రయత్నించిందని తీవ్ర ఆగ్రహం వ్యక్తం చేశారు.

మొదటిసారిగా ఆ వర్గాలకు బీజేపీ ప్రభుత్వం హక్కును కల్పించిందని వెల్లడించారు. దేశంలో రాజకీయం పాండవులు, కౌరవుల్లాగా మారిపోయిందన్నారు. తమది పాండవుల కూటమని, కాంగ్రెస్ ది కౌరవుల కూటమి అని వ్యాఖ్యలు చేశారు. రాబోయే లోక్ సభ ఎన్నికల్లో కౌరవులను పాండవుల కూటమి ఓడిస్తుందని తెలిపారు.

ఎన్సీపీ చీఫ్ శరద్ పవార్ కుమార్తె, ఎంపీ సుప్రియా సూలే (Supriya Sule)పై మహారాష్ట్ర డిప్యూటీ సీఎం అజిత్ పవార్ (Ajit Pawar) సతీమరణి సునేత్ర పవార్ (Sunetra Pawar)పోటీ చేస్తారని ప్రచారం జరుగుతోంది. రాబోయే లోక్‌సభ ఎన్నికల్లో బారామతి నియోజక వర్గంలో సుప్రియా సూలేకు వ్యతిరేకంగా పోటీ చేస్తారని వార్తలు వస్తున్నాయి.

ఈ నేపథ్యంలో ఈ వార్తలపై సుప్రియా సూలే స్పందించారు. భారత్ ప్రజాస్వామ్య దేశమని సుప్రియా సూలే అన్నారు. ప్రజాస్వామ్యంలో ఎవరైనా ఎన్నికల్లో పోటీ చేయవచ్చని తెలిపారు. అలాంటప్పుడు ఇది ఫ్యామిలీ ఫైట్ ఎలా అవుతుందని ఆమె ప్రశ్నించారు. ఆ పార్టీకి బలమైన అభ్యర్థి ఉంటే వారితో మాట్లాడేందుకు తాను సిద్ధంగా ఉన్నానని ఈ సందర్బంగా వెల్లడించారు.

వారు ఏ అంశం.. ఏ సమయంలోనైనా.. ఏ ప్రదేశంలో నిర్ణయించినా కూర్చుని వారితో చర్చించడానికి తాను సిద్ధంగా ఉన్నానని పేర్కొన్నారు. తాను పార్లమెంట్ ఎన్నికల్లో పోటీ చేయబోతున్నట్టు వెల్లడించారు. నిరుద్యోగం, ద్రవ్యోల్బణం, పేటీఎం అంశం, ఎలక్టోరల్ బాండ్లు ఇలా అవినీతి ఆరోపణలు ఎదుర్కొన్న వ్యక్తులు.. అవినీతికి పాల్పడిన వారందరూ… దోషులుగా తేలితే… వారంతా బీజేపీలో చేరుతున్నారని ఆరోపించారు.

దేశంలో అవినీతి జరిగిందా లేదా.. ఇదే పెద్ద సమస్య అని అన్నారు. సుప్రియా సూలే ప్రస్తుతం బారామతి నియోజకవర్గం నుంచి ఎంపీగా ఉన్నారు. గతంలో ఈ నియోజకవర్గం నుంచి చాలా సార్లు శరద్ పవార్ ప్రాతినిధ్యం వహించారు. ఈ క్రమంలో పవార్ ఫ్యామిలీకి చెక్ పెట్టేందుకు అజిత్ పవార్ సతీమణి రంగంలోకి దిగుతున్నారని వార్తలు ఊపందుకున్నాయి.