National

కార్టీలియా క్రూయిజ్ కేసులో కీలక పరిణామం చోటు చేసుకుంది. నార్కోటిక్స్ కంట్రోల్ బ్యూరో (NCB) జోనల్ మాజీ డైరెక్టర్ పై కేసు నమోదైంది. ఈ కేసులో ఆయన్ని నిందితునిగా పేర్కొంటూ ఎన్ ఫోర్స్ మెంట్ డైరెక్టరేట్ కేసు నమోదు చేసింది. కార్టీలియా క్రూయిజ్ కేసులో బాలీవుడ్ హీరో షారుఖ్ ఖాన్ కుమారుడు ఆర్యన్ ఖాన్ పేరును చేర్చకుండా ఉండేందుకు సమీర్ వాంఖడే (Sameer Wankhede) లంచం అడిగారని ఆరోపణలు వచ్చాయి.

ఆర్యన్ ఖాన్ నుంచి సమీర్ వాంఖడే రూ. 25 కోట్లు లంచం డిమాండ్ చేసినట్టు అభియోగాలు రావడంతో సీబీఐ రంగంలోకి దిగింది. వెంటనే సమీర్ వాంఖడేపై కేసు నమోదు చేసి దర్యాప్తు మొదలు పెట్టింది. మరోవైపు రూ. 25 కోట్ల లంచం అభియోగాల నేపథ్యంలో సీబీఐ ఎఫ్ఐఆర్ ఆధారంగా అటు ఈడీ కూడా కేసు నమోదు చేసి దర్యాప్తు చేస్తోంది.

ఇది ఇలా వుంటే తనపై ఈడీ మనీలాండరింగ్ కేసు నమోదు చేయడంపై వాంఖడే స్పందించారు. సీబీఐ ఎఫ్ఐఆర్ ఆధారంగా ఈడీ తన పై కేసు నమోదు చేసిందని వివరించారు. ఇది తనను ఆశ్చర్యానికి గురి చేసింది. దీనిపై హైకోర్టులో విచారణ జరుగుతోందన్నారు. తనకు న్యాయవ్యవస్థపై పూర్తి నమ్మకం ఉందని వెల్లడిచారు. ఈ కేసు విచారణలో ఉన్నందున తాను ఇప్పుడు ఎలాంటి వ్యాఖ్యలు చేయలేనన్నారు.

రెండేండ్ల క్రితం కార్టీలియా క్రూయిజ్‌లో మాదక ద్రవ్యాఖల కేసులో ఆర్యన్‌ ఖాన్‌ను ఎన్సీబీ ముంబై జోనల్ డైరెక్టర్ అరెస్టు చేశారు. ఆ తర్వాత విచారణ అనంతరం ఆర్యన్ ఖాన్ కు ఎన్సీబీ క్లీన్ చిట్ ఇచ్చింది. దీంతో వాంఖడే మీద తీవ్ర ఆరోపణలు రావడంతో ఆయన్ని జోనల్ డైరెక్టర్ పదవి నుంచి తప్పించి ఆయనపై విచారణ మొదలు పెట్టారు. ఈ కేసులో ఆర్యన్ ఖాన్ నుంచి వాంఖడేతో పాటు మరో నలుగురు రూ. 25 కోట్లు లంచం డిమాండ్ చేశారనే విషయం వెలుగులోకి వచ్చింది.

దేశానికి బలమైన పునాది వేసే అనేక విప్లవాత్మక సంస్కరణలు (Reforms) ఈ ఐదేండ్ల కాలంలో చాలా వచ్చాయని ప్రధాని నరేంద్ర మోడీ (PM Modi) అన్నారు. ఈ ఐదేండ్ల కాలం సంస్కరణలు , పనితీరు, పరివర్తనకు గుర్తుగా నిలిచిపోతాయని తెలిపారు. అనేక తరాలుగా ఎదురుచూస్తున్న చారిత్రక నిర్ణయాలకు 17వ లోక్​సభ కాలంలో మోక్షం లభించిందని వివరించారు.

బడ్జెట్ సమావేశాల్లో చివరి రోజు లోక్ సభలో ప్రధాని మోడీ మాట్లాడుతూ…. ప్రజలు శతాబ్దాలుగా ఎదురుచూస్తున్న పనులను పూర్తి చేసేందుకు దిగువ సభలోని సభ్యులందరి సమిష్టి కృషిని ప్రధాని ప్రశంసించారు. తమ ప్రభుత్వ పాలనతో ప్రజల్లో ఆత్మవిశ్వాసం పెరిగిందన్నారు. ఈ కాలంలో దేశం గణనీయమైన ప్రగతిని సాధించిందని వెల్లడించారు.

గత ఐదేండ్లలో అనేక కీలక నిర్ణయాలను తీసుకున్నామని తెలిపారు. కరోనా మహమ్మారి వల్ల అనేక కష్టాలు పడ్డామని అన్నారు. ఎన్ని ఆటంకాలు ఎదురైనా దేశంలో అభివృద్ధి మాత్రం ఆగలేదని వివరించారు. సంస్కరణలు, పనితీరు ఒకేసారి కనిపించడం చాలా అరుదని వెల్లడించారు. తమ ప్రభుత్వాన్ని ప్రజలు మరోసారి ఆశీర్వదిస్తారని విశ్వసిస్తున్నామన్నారు.

రామ మందిర ప్రాణ ప్రతిష్ఠ వేడుకకు సంబంధించి ఆమోదాన్ని ప్రస్తావిస్తూ…. దేశ వారసత్వంపై గర్వపడేలా భావి తరాలకు రాజ్యాంగపరమైన అధికారాన్ని అందజేస్తామని ఉద్ఘాటించారు. ఆర్టికల్ 370 రద్దు ఈ కాలంలోనే జరిగిందని గుర్తు చేశారు. ట్రిపుల్ తలాక్​ రద్దు నిర్ణయాన్ని కూడా ఈ సభలోనే తీసుకున్నామని అన్నారు. మహిళల జీవితాల్లో మార్పు తెచ్చేందుకు నారీశక్తి వందన్ చట్టాన్ని తీసుకు వచ్చామన్నారు.

ఉగ్రవాదానికి వ్యతిరేకంగా కఠిన చట్టాలను ఈ లోక్‌సభ ఆమోదించిందని వెల్లడించారు. ట్రాన్స్‌జెండర్లకు పద్మ పురస్కారం ఇచ్చి గొప్ప మార్పు దిశగా అడుగువేశామని పేర్కొన్నారు. డిజిటల్ డేటా ప్రొటెక్షన్‌ చట్టం భావి భారతానికి ఎంతో ఉపయోగకరమన్నారు. ముద్ర యోజన ద్వారా చిరువ్యాపారులకు రుణాలు ఇచ్చామని…తాము చేపట్టిన చర్యలతో రాజ్యాంగ నిర్మాతల ఆత్మలు సంతోషిస్తాయని భావిస్తున్నామన్నారు.

ఏం జరిగినా మీ (స్పీకర్ ఓం బిర్లా) ముఖంలో ఎప్పుడూ చిరునవ్వు ఉంటుందని…. ఈ సభను స్పీకర్ నిష్పక్షపాతంగా నడిపించారని వివరించారు. అందుకు స్పీకర్ ను అభినందిస్తున్నామని చెప్పారు. కోపం, ఆరోపణలు వచ్చిన సమయాలు కూడా ఉన్నాయని.., కానీ మీరు ఈ పరిస్థితులను ఓపికగా నిర్వహించారని ప్రశంసించారు. ఈ సభను అత్యంత తెలివిగా నడిపారని కితాబిచ్చారు.

రాబోయే 25 ఏళ్లు దేశానికి అత్యంత కీలకమన్నారు. అభివృద్ధి చెందిన దేశంగా భారత్‌ ఆవిర్భవించనుందని చెప్పారు. త్వరలోనే దేశంలో ఎన్నికలు జరగనున్నాయని …. ఈ ఎన్నికలపై తనకు చాలా విశ్వాసం ఉందని వివరించారు. ఎన్నికల ద్వారా దేశ ప్రతిష్ఠ మరింత పెరుగుతుందని ప్రధాని మోడీ విశ్వాసం వ్యక్తం చేశారు. రాజకీయ కార్యకలాపాలు ఎప్పుడూ ఉంటాయని… వచ్చే 25 ఏళ్లలో మెరుగైన ఫలితాలు సాధిస్తామన్నది దేశ ఆకాంక్ష అని వెల్లడించారు.

అయోధ్య (Ayodhya)లోని రామ జన్మభూమి ఆలయంలో ప్రాణ ప్రతిష్ఠ కార్యక్రమాన్ని చూడడం, రాముడికి ప్రార్థనలు చేయడం చారిత్రాత్మకమని ఎంపీ సత్యపాల్ సింగ్ (Satya Pal Singh) అన్నారు. ఎన్డీఏ ప్రభుత్వ హయాంలో అయోధ్యలో రామ మందిర నిర్మాణం పూర్తి కావడం, ప్రాణ ప్రతిష్ట గురించి పార్లమెంట్ లో మాట్లాడే అవకాశం రావడం తన అదృష్టంగా భావిస్తున్నానని తెలిపారు.

అయోధ్య రామమందిరంపై ప్రతాప్ చంద్ర సారంగి, సంతోష్ పాండేలతో కలిసి సత్యపాల్ సింగ్ తీర్మానాన్ని ప్రవేశ పెట్టారు. ఈ సందర్బంగా సత్యపాల్ సింగ్ మాట్లాడుతూ…. శ్రీ రామ్ అనేది మత పరమైన అంశం కాదని తెలిపారు. భగవాన్ రామ్ తమకు స్ఫూర్తినిచ్చే మూలం అని చెప్పారు.

శ్రీ రాముడు మర్యాద పురుషోత్తముడని అన్నారు. రాముడిపై చర్చ మనందరికీ ఒక ఆశీర్వాదం అని తెలిపారు. రాముడు మనకు ఒక అనుభూతి అని పేర్కొన్నారు. ఇది మన వారసత్వమన్నారు. శ్రీ రాముడు ప్రతి చోటా ఉన్నారని స్పష్టం చేశారు. ఎన్నో ఏండ్ల భారతీయుల కల సాకారం చేసిన ఘనత ప్రధాని మోడీకి దక్కుతుందన్నారు.

రాముల వారి ఆశీర్వాదంతో దేశం అన్ని రంగాల్లో దూసుకుపోతోందని వెల్లడించారు. అనంతరం కేంద్ర మంత్రి అనురాగ్ ఠాకూర్ మాట్లాడుతూ…. రామమందిరం తమకు ఎప్పటికీ విశ్వాస కేంద్రంగా ఉంటుందన్నారు. రాముడు వస్తాడని బీజేపీ చెబుతోందని, కానీ తేదీ చెప్పడం లేదని కొందరు విమర్శలు చేశారని మండిపడ్డారు. వారికి సమాధానం ఇస్తూ తాము తేదీని ప్రకటించామని, మందిరాన్ని నిర్మించామన్నారు.

రాముడు లేదా రామ‌ చ‌రిత్ర లేకుండా ఈ దేశాన్ని ఊహించ‌లేమ‌ని కేంద్ర హోం మంత్రి అమిత్ షా (Amit Shah) అన్నారు. ప్ర‌తి మ‌తం, ప్ర‌తి భాష‌లోనూ రామాయ‌ణం ఉంద‌ని తెలిపారు. షేక్ స‌దుల్లా మాష్‌కు చెందిన రామ‌య‌న్ యే మాషి కూడా ఉంద‌ని చెప్పారు. జ‌న‌వ‌రి 22వ తేదీ భ‌విష్య‌త్ చ‌రిత్ర‌లో చిర‌స్థాయిగా నిలిచిపోతుంద‌ని అమిత్ షా వెల్లడించారు.

అయోధ్య‌లో రామ్‌ ల‌ల్లా ప్రాణ‌ప్ర‌తిష్ట అంశంపై లోక్ సభలో స్వల్ప కాలిక చర్చ జరిగింది. ఈ సందర్బంగా కేంద్ర హోం మంత్రి అమిత్ షా మాట్లాడుతూ….. ‘ఆగ‌స్టు 5న అయోధ్య‌పై తీర్పు వ‌చ్చిన త‌ర్వాత దేశంలో అల్ల‌ర్లు జ‌రుగుతాయ‌ని అందరూ టెన్షన్ పడ్డారు…. ఆల‌యం నిర్మాణ స‌మ‌యంలోనూ అంతా అదే విషయంపై ఆలోచించారు’అని చెప్పారు.

‘కానీ మోడీ స‌ర్కార్ ఈ కార్యక్రమాన్ని చాలా శాంతియుతంగా నిర్వ‌హించింది. సుప్రీంకోర్టు ఆగ‌స్టు 5న ఇచ్చిన తీర్పును మ‌నమంతా గౌర‌వించాల‌ి. అయోధ్య‌లో మందిర నిర్మాణం కోసం హిందూ స‌మాజం చాలా ఏండ్లు కష్టపడింది. ప్రాణ‌ప్ర‌తిష్ట వేడుక కోసం ప్ర‌ధాని మోడీ 11 రోజుల పాటు ఉప‌వాసం పాటించారు. విష్ణు సంప్ర‌దాయం ప్ర‌కార‌మే అయోధ్య ప్రతిష్టలో ప్రధాని మోడీ పాల్గొన్నార’అని వివరించారు.

‘ఆ స‌మ‌యంలో ఆయ‌న కేవ‌లం కొబ్బ‌రి నీళ్లు మాత్ర‌మే తీసుకున్నారని….. విభిన్న భాష‌ల్లో ఆయ‌న రామ‌భ‌జ‌న చేశార‌ు. ఆ స‌మ‌యంలో దేశ‌వ్యాప్తంగా భ‌క్తి ఉద్య‌మాన్ని ప్రధాని మోడీ న‌డిపించారు. సుమారు 330 ఏండ్ల న్యాయ‌ పోరాటం త‌ర్వాత రామ్‌ల‌ల్లా చివ‌ర‌కు త‌న నివాస స్థానానికి చేరారు. ప్రాణ‌ప్ర‌తిష్ట కార్య‌క్ర‌మాన్ని రాజ‌కీయం చేయ‌లేద‌ు’అని స్పష్టం చేశారు.

ఇక మరోవైపు ఏఐఎంఐఎం ఎంపీ అస‌దుద్దీన్ ఓవైసీ మాట్లాడుతూ…. ‘బాబ్రీ మ‌సీదు జిందాబాద్‌.. జిందాబాద్‌.. భార‌త్ జిందాబాద్ అంటూ నినాదాలు చేశారు. 1992 డిసెంబ‌ర్ 6న బాబ్రీ మ‌సీదు కూల్చివేత‌ను పార్ల‌మెంట్ ఖండించింది. ఆ ఘ‌ట‌న నేపథ్యంలో వీహెచ్‌పీ లాంటి సంస్థ‌లు వ‌ర్గ హింస‌కు పాల్ప‌డ్డాయి. బాబ్రీ మ‌సీదు కూల్చివేత‌కు కార‌ణ‌మైన ఇద్ద‌రు వ్య‌క్తుల‌కు కేంద్ర స‌ర్కార్ భార‌త ర‌త్న అవార్డులు ఇచ్చింది’అని ఓవైసీ ఆరోపించారు.

ప్ర‌ధాని మోడీని ఓ ప్ర‌శ్న వేయాల‌నుకుంటున్నాన‌ని, మోడీ ప్ర‌భుత్వం కేవ‌లం హిందువులకేనా లేదా యావ‌త్ దేశానికా అని ఓవైసీ ప్రశ్నించారు. ఇస్లామిక్ క‌ట్ట‌డాన్ని ధ్వంసం చేయ‌డ‌ం బాధాక‌ర‌మ‌ని సుప్రీంకోర్టు త‌న తీర్పులో వెల్లడించిందన్నారు. సుప్రీం త‌న తీర్పులో అర్కియాల‌జీ స‌ర్వే శాఖ ఇచ్చిన రిపోర్టును కొట్టివేసింద‌ని పేర్కొన్నారు. మసీదును నిర్మించేందుకు ఆల‌యాన్ని కూల్చ‌లేద‌ని ఓవైసీ అన్నారు.

కేంద్ర హోం మంత్రి అమిత్ షా (Amit Shah) కీలక వ్యాఖ్యలు చేశారు. పౌరసత్వ సవరణ చట్టం (CAA)ను త్వరలోనే నోటిఫై చేస్తామని తెలిపారు. లోక్ సభ సార్వత్రిక ఎన్నికల లోపే సీఏఏను అమలు చేస్తామని వెల్లడించారు. దాన్ని ఈ దేశ చట్టం అని పేర్కొన్నారు.

ఢిల్లీలో జ‌రిగిన ఈటీ బిజినెస్ స‌మ్మిట్‌లో అమిత్ షా పాల్గొని మాట్లాడారు. సీఏఏ చుట్టూ ఎలాంటి గందరగోళం ఉండకూడదని చెప్పారు. మన దేశంలోని మైనారిటీలు, ముఖ్యంగా మన ముస్లిం సమాజాన్ని పూర్తిగా తప్పుదోవ పట్టించి రెచ్చగొడుతున్నారని అన్నారు. చట్టంలో ఎలాంటి నిబంధన లేనందున సీఏఏ ఎవరి పౌరసత్వాన్ని కూడా లాక్కోదని స్పష్టం చేశారు.

సీఏఏ అనే చట్టం ఈ దేశ పౌరులకు పౌరసత్వాన్ని అందజేస్తుందే తప్ప…ఎవరి పౌరసత్వాన్ని హరించదని వివరించారు. సీఏఏ అనేది బంగ్లాదేశ్, పాకిస్తాన్‌లలో వేధింపులకు గురైన శరణార్థులకు పౌరసత్వం అందించే చట్టమని వివరించారు. దేశంలో సీఏఏని అమలు చేస్తామన్న హామీని గత కాంగ్రెస్ ప్రభుత్వం వెనక్కి తీసుకుందని షా ఆరోపించారు.

సీఏఏ అనేది కాంగ్రెస్ ప్రభుత్వ ఇచ్చిన హామీ అని తెలిపారు. దేశం విడిపోయి, ఆయా దేశాల్లో మైనారిటీలు వేధింపులకు గురవుతున్నప్పుడు, శరణార్థులకు భారత్‌లో స్వాగతం పలుకుతామని, వారికి భారత పౌరసత్వం కల్పిస్తామని గతంలో కాంగ్రెస్ హామీ ఇచ్చిందని అన్నారు. కానీ ఇప్పుడు వెనక్కి తగ్గుతున్నారని చెప్పారు.

ఉద్యోగుల భవిష్య నిధి(EPF) ఖాతాల్లో నిల్వలపై వడ్డీరేటు ఖరారైంది. 2023-24 ఆర్థిక సంవత్సరానికి 8.25శాతం వడ్డీరేటును నిర్ణయించారు. ఈ మేరకు శనివారం జరిగిన సెంట్రల్‌ బోర్డ్‌ ఆఫ్‌ ట్రస్టీస్‌ సమావేశంలో నిర్ణయం తీసుకున్నట్లు ఈపీఎఫ్‌వో (EPFO) వర్గాలు ప్రకటించాయి.

ఈ వడ్డీ రేటు గత మూడేళ్లతో పోల్చుకుంటే ఇదే అత్యధికం. 2022-23 ఆర్థిక సంవత్సరానికి వడ్డీ రేటును 8.15శాతంగా నిర్ణయించారు. అంతకు ముందు 2021-22లో 8.10శాతం వడ్డీ చెల్లించారు. సీబీటీ ప్రతిపాదనలపై కేంద్ర ఆర్థికశాఖ(Central Finance Department) త్వరలోనే నిర్ణయం తీసుకోనున్నట్లు తెలుస్తోంది.

గత ఆర్థిక సంవత్సరంతో పోలిస్తే ఇది కాస్త ఎక్కువ. సీబీటీ నిర్ణయాన్ని కేంద్ర ఆర్థిక శాఖకు పంపనున్నారు. ప్రభుత్వం నుంచి ఆమోదం వచ్చిన తర్వాత వడ్డీ రేటును ఈపీఎఫ్‌ఓ అధికారికంగా నోటిఫై చేస్తుంది. ఆ తర్వాత వడ్డీ మొత్తాన్ని ఈపీఎఫ్‌ఓ 6 కోట్ల చందాదారుల ఖాతాల్లో జమ చేస్తుంది.

గత పదేళ్లలో వడ్డీ రేట్లు ఇలా ఉన్నాయి. 2013-14 ఆర్థిక సంవత్సరంలో 8.75 శాతం, 2014-15 8.75శాతం, 2015-16 8.8శాతంగా ఉంది. అదేవిధంగా 2016-17లో 8.65 శాతం ఉండగా 2017-18లో 8.55శాతం 2018-19లో 8.65శాతం వడ్డీ రేటు ఉంది. 2019-20 ఆర్థిక సంవత్సరంలో 8.5 శాతం 2020-21లో 8.5శాతం, 2021-22లో 8.1శాతం, 2022-23లో 8.15 శాతంగా ఉంది.