Politics

బీఆర్ఎస్ బీజేపీ పొత్తులపై.. క్లారిటీ ఇచ్చిన కిషన్ రెడ్డి..

ప్రభుత్వాన్నికూల్చడానికి కేసీఆర్ దగ్గర ఉన్న ప్లాన్ ఏంటీ..

బీజేపీ బీఆర్ఎస్ పొత్తు.. కాంగ్రెస్ కి ఇబ్బందికరమేనా..

పార్లమెంట్ ఎన్నికలు ( Parliament Elections) సమీపిస్తున్న కొద్ది తెలంగాణ (Telangana) రాజకీయాలు వేడెక్కుతున్నాయి. ఎవరికి వారే విజయమే లక్ష్యంగా పావులు కదుపుతున్నారు. ఈ క్రమంలో గత వారం రోజులుగా బీజేపీ (BJP), బీఆర్ఎస్ (BRS) పొత్తులు పెట్టుకుంటాయని రాష్ట్రంలో ప్రచారం జరుగుతోంది. మెజారిటీ స్థానాలపై కన్నేసిన కమలం, కారుతో పొత్తు ఉంటే సాధ్యం అవుతుందనే ప్రచారం జోరందుకోంది.

అయితే రాష్ట్ర బీజేపీ నేతలు మాత్రం ఈ విషయాన్ని ఎప్పటికప్పుడు ఖండిస్తూ వస్తున్నారు. తాజాగా ఈ ప్రచారంపై కిషన్ రెడ్డి (Kishan Reddy) క్లారిటీ ఇచ్చారు. కేసీఆర్ ను కల్వకుంట్ల కరప్షన్ రావు గా అభివర్ణిస్తూ వీడియో రిలీజ్ చేసిన ఆయన.. అసెంబ్లీ ఎన్నికల ఫలితాల కంటే పార్లమెంట్ ఎన్నికల్లో బీఆర్ఎస్ పెద్ద దెబ్బ తినబోతోందని జోస్యం చెప్పారు. ఒక్క సీటు కూడా బీఆర్ఎస్‌కు రాదని షాకింగ్ కామెంట్స్ చేశారు. మునిగిపోయిన నావతో తమకు పొత్తు ఏంటని ప్రశ్నించారు.

మరోవైపు బీజేపీతో పొత్తుల విషయంలో మల్లారెడ్డి చేసిన వ్యాఖ్యలు రాష్ట్ర రాజకీయాల్లో ఆసక్తిని రేకెత్తించాయి. అయితే ఈ అంశంపై బీఆర్ఎస్ హైకమాండ్ మాత్రం ఇప్పటి వరకు స్పందించలేదు. పొత్తులపై అసలు మాట్లాడవద్దని నేతలను అతర్గతంగా ఆదేశించినట్లు సమాచారం. కానీ రాష్ట్ర రాజకీయాల్లో మాత్రం ఇంకా అనుమానాలు రేకెత్తుతున్నాయి. బీజేపీ, బీఆర్ఎస్ పొత్తులు పెట్టుకుంటే.. కాంగ్రెస్ కి ఇబ్బందికరమనే టాక్ వినిపిస్తోంది.

ఈ క్రమంలో బీఆర్ఎస్ కూడా బీజేపీతో కలిసి మెజార్టీ లోక్ సభ సీట్లు గెల్చుకుని ఎన్నికల తర్వాత కాంగ్రెస్ ప్రభుత్వాన్ని కూలగొట్టొచ్చనే ప్లాన్ లో కేసీఆర్ ఉన్నారంటూ తెరవెనుక ప్రచారం జరుగుతోంది. కానీ తెరముందు జరిగే సీన్ వేరేలా ఉంది. బీఆర్ఎస్ తో పొత్తుల ఆలోచన అసలు చేయడం లేదని బీజేపీ క్లారిటీ ఇవ్వడంతో స్పష్టత వచ్చింది. కానీ కేసీఆర్ మాత్రం తన వ్యూహాలకు పదును పెట్టి ఏదో సంచలనం సృష్టిస్తారని భావిస్తున్నారు.

మరోవైపు పొత్తులు లేవంటూ స్వయంగా కిషన్ రెడ్డి కూడా ఖండించడంతో పాటు కేసీఆర్ పై ఆరోపణలు చేయడంతో.. బీఆర్ఎస్ గట్టిగా రివర్స్ కౌంటర్ ఇస్తుందని అనుకున్నారు. కానీ ఆ పార్టీ నేతలు పెద్దగా స్పందించడానికి ఆసక్తి చూపకపోవడం విడ్డూరమంటున్నారు.. పైగా కేసీఆర్ (KCR) త్వరలో ఢిల్లీ వెళ్లబోతున్నారని బీఆర్ఎస్ వర్గాల నుంచి టాక్ వినిపిస్తోంది.

తెలంగాణ (Telangana) అటవీ, దేవాదాయ ధర్మాదాయ, పర్యావరణ మంత్రి (Minister) కొండా సురేఖ (Konda Surekha) అస్వస్థతకు గురయ్యారు. గత ఐదు రోజులుగా ఆమె జ్వరంతో బాధ పడుతున్నట్లు సమాచారం. అసెంబ్లీ బడ్జెట్ సమావేశాల్లో పాల్గొంటున్న సమయంలో జ్వరం బారిన పడిన మంత్రి, తన మంత్రిత్వశాఖల పరిధిలోని కార్యక్రమాలను ఇంటి నుంచే పర్యవేక్షిస్తూ వస్తున్నారు.

అయితే గత ఐదు రోజులుగా జ్వరం తగ్గకపోవడంతో పలు వైద్య పరీక్షలు చేసిన వైద్యులు డెంగ్యూ పాజిటివ్‌ (Dengue Fever)గా నిర్ధారించారు. మరోవైపు ప్రతిష్టాత్మక మేడారం జాతర ప్రారంభం కానుండటంతో ఆ పనులపై ఫోకస్ చేస్తున్నారు. జ్వరంతో బాధ పడుతూనే మేడారం జాతర (Medaram Jatara) పనుల పురోగతిని, ఏర్పాట్ల వివరాలు అధికారులను అడిగి మంత్రి తెలుసుకొంటున్నారు.

ఈమేరకు కొండా సురేఖ, జాతర ఏర్పాట్లు, భక్తుల సౌకర్యాలపై అధికారులకు అవసరమైన సలహాలు, సూచనలు ఇస్తున్నారు. మరో రెండు, మూడు రోజుల్లో ఆమె పూర్తిగా కోలుకుంటారని వైద్యులు వెల్లడించారు. అనంతరం మేడారం సమ్మక్క సారక్క జాతరలో మంత్రి పాల్గొననున్నట్లు సమాచారం. ఇక మేడారం జాతర పనులు మొదలైనప్పటి నుంచి కొండా సురేఖా, సీతక్క ఇక్కడి పనులను పర్యవేక్షిస్తున్న విషయం తెలిసిందే..

*లోక్‌సభ ఎన్నికల్లో విజయమే లక్ష్యంగా బీజేపీ అడుగులు..
* రాష్ట్రంలో 17 లోక్‌సభ స్థానాలు, 119 అసెంబ్లీ నియోజకవర్గాలను చుట్టేలా ప్రణాళికలు..
*5 క్లస్టర్లలో 4 వేల 238 కిలోమీటర్ల మేర రథయాత్రలకు శ్రీకారం..

అసెంబ్లీ ఎన్నికల్లో బీజేపీ (BJP) గట్టి పోటీ ఇస్తుందని అంతా భావించారు.. కానీ అంచనాలన్నీ తారుమారు అయ్యాయి. ఆశించిన స్థాయిలో రాష్ట్రంలో కమలం వికసించలేదు. ఈ దశలో లోక్‌సభ ఎన్నికలను ప్రతిష్టాత్మకంగా తీసుకొన్న కాషాయం అధిష్టానం.. సత్తా చాటాలనే ఉద్దేశంతో వ్యూహారచనలు చేస్తున్నట్లు సమాచారం. ఈ క్రమంలో రాష్ట్రంలో 17 లోక్‌సభ స్థానాలు, 119 అసెంబ్లీ నియోజకవర్గాలను చుట్టేలా సిద్దం అవుతున్నారు.

ఈ మేరకు బీజేపీ అధిష్టానం 17 పార్లమెంట్ స్థానాలను ఐదు క్లస్టర్లుగా విభజించింది. ఆ 5 క్లస్టర్లలో మొత్తం 4 వేల 238 కిలోమీటర్ల మేర రథయాత్రలు చేయాలని సంకల్పించింది. ఇందులో భాగంగా నేడు ఆ పార్టీ రాష్ట్ర అధ్యక్షడు కిషన్​రెడ్డి (Kishan Reddy) ప్రచార రథాలను ప్రారంభించారు. ఈ సందర్భంగా ఆయన చార్మినార్​ భాగ్యలక్ష్మి అమ్మవారి ఆలయంలో ప్రత్యేక పూజలు నిర్వహించారు.

ఈ సందర్భంగా కేంద్రంలో మూడోసారి బీజేపీ అధికారంలోకి రాబోతోందని ధీమా వ్యక్తం చేశారు. ఎక్కువ సీట్లు గెలిచే లక్ష్యంతోనే విజయ సంకల్పయాత్ర (Vijay Sankalp Yatra) ప్రారంభించినట్లు తెలిపారు. ప్రచారంలో భాగంగా రోడ్‌ షోలు నిర్వహిస్తూ, ప్రజలను కలుస్తూ యాత్ర నిర్వహిస్తామని ఆయన తెలిపారు. వచ్చే నెల 2వ తేదీన యాత్ర ముగింపు కార్యక్రమం ఉంటుందని కిషన్ రెడ్డి పేర్కొన్నారు.

వచ్చే ఎన్నికల్లో కనీసం 10 లోక్‌సభ స్థానాలు, 35 శాతం ఓటు బ్యాంకు సాధించాలని పార్టీ నాయకత్వం లక్ష్యంగా పెట్టుకున్నట్లు వివరించారు. ఇక ఆయా క్లస్టర్ల పరిధిలో కేంద్రమంత్రి కిషన్‌రెడ్డి, ఎంపీ బండి సంజయ్‌ (Bandi Sanjay), ఎంపీ లక్ష్మణ్‌, డీకే అరుణ, ఈటల రాజేందర్‌ తదితర పార్టీల సీనియర్‌ నేతలు పాల్గొంటారని సమాచారం. ఇక యాత్ర ముగింపు సభకు ప్రధాని మోదీ హాజరు కానున్నట్టు పార్టీ వర్గాల సమాచారం.

ఇందులో భాగంగా కేంద్ర ప్రభుత్వం మోడీ సారథ్యంలో పదేళ్లలో సాధించిన విజయాలు, విపక్షాల వైఫల్యాలను విజయ సంకల్ప యాత్రల ద్వారా ప్రజలకు వివరించనున్నట్లు వెల్లడించారు. మరోవైపు బస్సుయాత్రల్లో భాగంగా నిర్వహించే కార్నర్ మీటింగ్ లకు బీజేపీ పాలిత రాష్ట్రాల సీఎంలు, కేంద్రమంత్రులు, జాతీయ పార్టీల నేతలు హాజరవుతారని పార్టీ వర్గాలు తెలిపాయి. ఆదిలాబాద్ జిల్లా ముథోల్ వద్ద కుమురం భీమ్ క్లస్టర్ యాత్రను అస్సాం సీఎం హిమంత బిస్వా శర్మ ప్రారంభించనున్నారు.

యాత్ర 21 అసెంబ్లీ నియోజకవర్గాలు, 3 పార్లమెంట్ నియోజకవర్గాల మీదుగా సాగి నిజామాబాద్ జిల్లా బోదన్‌లో ముగుస్తుందని తెలిపారు.. ఇదిలా ఉండగా హైదరాబాద్‌ ఎంపీ స్థానాన్ని కూడా కైవసం చేసుకుంటామని కిషన్‌రెడ్డి జోస్యం చెప్పారు. పాతబస్తీ ముస్లిం సోదరలు కూడా మోడీ గెలవాలని ఆశిస్తున్నట్లు పేర్కొన్నారు. విజయ సంకల్పయాత్రను విజయవంతం చేయాలని విజ్ఞప్తి చేశారు. యాత్ర మొత్తాన్ని రోడ్‌షోల ద్వారానే నిర్వహిస్తామని పేర్కొన్నారు.