Politics

చేతిలో అధికారం ఉన్నంత వరకే నేతలు మాటలు వింటారు.. అది చేయి జారిపోయిందా ఆ పార్టీ రూపురేఖలు పూర్తిగా మారిపోతాయని రాజకీయాల్లో ఎన్నో సార్లు నిరూపించబడింది. ప్రస్తుతం బీఆర్ఎస్ (BRS) పరిస్థితి ఇలాగే మారిందని అనుకొంటున్నారు. ఆ పార్టీ అధికారంలో ఉన్నన్ని రోజులు ఎదురు చెప్పిన వారు లేరు.. ఒక్క సారి ఓటమి పలకరించగానే పార్టీ వీడే వారి సంఖ్య పెరుగుతుండటం గులాబీ బాస్ ను ఆందోళనకి గురి చేస్తోందని అంటున్నారు.

అయితే ఈ విషయాన్ని పసిగట్టిన కేసీఆర్ (KCR) అలర్ట్ అయ్యారని తెలుస్తోంది. నిన్న ఎమ్మెల్యేగా ప్రమాణ స్వీకారం చేసిన అనంతరం పార్టీ ఎమ్మెల్యేలు, ముఖ్య నేతలతో సమావేశమై వారికి కీలక సూచనలు చేసినట్లు తెలుస్తోంది. కాగా ఇటీవల పలువురు బీఆర్ఎస్ ఎమ్మెల్యేలు ముఖ్యమంత్రి తో టచ్ లోకి వెళ్లడంపై ఆగ్రహం వ్యక్తం చేసినట్లు టాక్ వినిపిస్తోంది. అయితే గతంలో కేసీఆర్ స్వరంలో ఉన్న ధీమా ప్రస్తుతం లేదనీ, పార్టీ ఎమ్మెల్యేలపై ఆయనకు పట్టు జారిందనే ప్రచారం మొదలైంది.

అసలే అసంతృప్తిగా ఉన్న నేతలు బీఆర్ఎస్ కు బైబై చెప్పడానికి సిద్దంగా ఉన్నారు.. ఈ సమయంలో అప్పటిలా గట్టిగా మందలిస్తే ఇప్పుడే యాక్షన్ లోకి దిగుతారనే భయం మొదలైందనేది పార్టీ వర్గాల సమాచారం. ఇలాంటి పరిస్థితుల్లో కర్ర విరగకుండా, పాము చావకుండా వ్యవహరించి ఎమ్మెల్యేల వలసలను నిరోధించాలన్న టాస్క్ తో కేసీఆర్ ఉన్నారని అనుకొంటున్నారు.

ఇందులో భాగంగా మంచి ఉద్దేశంతో ప్రభుత్వంలో ఉన్న వారిని కలిస్తే తప్పు లేదనీ, అయితే అలా కలవడం వల్ల ప్రజల్లోకి తప్పుడు సంకేతాలు వెళ్ళే అవకాశాలున్నాయని వివరించినట్టు తెలుస్తోంది. మరోవైపు లోకసభ ఎన్నికలలో (Lok Sabha Elections) బీఆర్ఎస్ చతికిలపడితే.. వలసలను ఆపడం సాధ్యం కాదని పరిశీలకులు విశ్లేషిస్తున్నారు.

ఇప్పటికే ఈ ఎన్నికల్లో ఒంటరి పోరుకు సిద్దమైన బీఆర్ఎస్.. ఈ గడ్డుపరిస్థితుల నుంచి గట్టెక్కితే గాని వాడిపోతున్న గులాబీ, రాష్ట్రంలో వికసించే అవకాశాలు బలపడతాయని విశ్లేషకుల భావన.. ఈ నేపథ్యంలో వచ్చే లోక్ సభ ఎన్నికలు బీఆర్ఎస్ కు మాత్రమే కాదు కేసీఆర్ కు కూడా ‘డూ ఆర్ డై’ లా మారాయని అంటున్నారు.. అయితే ప్రస్తుతం పోటీ అంతా కాంగ్రెస్ (Congress), బీజేపీ (BJP) మధ్య ఉండే అవకాశాలున్నాయని భావిస్తున్నారు..

తెలంగాణ (Telangana) వ్యాప్తంగా గ్రామ సర్పంచుల ఐదేళ్ల పదవీకాలం నేటితో ముగిసింది. దీంతో ప్రభుత్వఆదేశాలతో ఆయా పంచాయతీల్లో ప్రత్యేకాధికారులను నియమించేందుకు అధికార యంత్రాంగం అంతా సిద్ధం చేసింది. అయితే గత డిసెంబరులో రాష్ట్ర ఎన్నికల సంఘం పంచాయతీ ఎన్నికలకు సిద్ధం కావాలని ఆదేశించినప్పటికీ కొత్తగా కొలువుదీరిన కాంగ్రెస్‌ (Congress) ప్రభుత్వం ఇందుకు సంసిద్ధత వ్యక్తం చేయలేదు.

దీంతో రాష్ట్రంలో ప్రత్యేకాధికారుల పాలన అనివార్యమైంది. శుక్రవారం నుంచి పంచాయతీల్లో ప్రత్యేకాధికారులు పాలన కొనసాగించే అవకాశముందని సమాచారం.. కానీ ఇందుకు సమ్మతించని సర్పంచులు ఎన్నికల షెడ్యూల్ వచ్చే వరకూ తమనే పదవిలో కొనసాగించాలని కోరుతున్నారు. లేదా పెండింగ్‌లో ఉన్న బిల్లులు మంజూరు చేసిన తర్వాత‌ స్పెషల్ ఆఫీసర్ల పాలన‌ అమలు చేయాలని పట్టుబడుతున్నారు.

అయితే ప్రభుత్వం మాత్రం కొనసాగింపు ఉండదని ఇప్పటికే తేల్చి చెప్పేసింది. మరోవైపు ఈ అంశంపై స్పందించిన బీఆర్ఎస్ (BRS) వర్కింగ్ ప్రెసిడెంట్ కేటీఆర్ (KTR).. పదవీకాలం ముంగిచుకొన్న సర్పంచ్‌లకు కీలక సందేశం పంపించారు. సర్పంచ్ పదవికి మాత్రమే విరమణ.. ప్రజాసేవకు కాదని పేర్కొన్నారు. తెలంగాణ ప్రజానీకానికి ఐదేళ్ల కాలం పాటు సేవ చేసిన గ్రామ సర్పంచులు పదవి విరమణ చేస్తున్న సందర్భంగా కృతజ్ఞతలు తెలియచేస్తున్నానని వెల్లడించారు.

మరోవైపు పంచాయతీ ఎన్నికలకు 2019 జనవరి 1వ తేదీన షెడ్యూలు, నోటిఫికేషన్‌ వెలువడింది. అదే నెలలో 21, 25, 30 తేదీల్లో మూడు విడతలుగా ఎన్నికలు నిర్వహించారు. ఫిబ్రవరి 1వ తేదీన గెలిచిన వారు పదవీ బాధ్యతలు స్వీకరించారు. ఇకపోతే 2018 పంచాయతీరాజ్‌ చట్టం ప్రకారం పంచాయతీల పాలకవర్గాల పదవీకాలం ముగిసేలోపు ఎన్నికలను నిర్వహించాలి కానీ.. ప్రస్తుత పరిస్థితుల దృష్ట్యా ఎన్నికలను నిర్వహించే పరిస్థితి లేకపోవడంతో ప్రత్యేకాధికారుల ద్వారా పంచాయతీ పాలన కొనసాగించేందుకు ప్రభుత్వం ఆదేశాలు జారీ చేసింది.

హైదరాబాద్‌ (Hyderabad)లో పెరుగుతున్న ట్రాఫిక్‌ (Traffic)ను నియంత్రించేందుకు సమగ్ర ప్రణాళికను రూపొందించాలని ముఖ్యమంత్రి అధికారులను ఆదేశించారు. నగరంలో ట్రాఫిక్‌ నిర్వహణ, నియంత్రణపై సమీక్ష నిర్వహించిన రేవంత్ రెడ్డి (Revanth Reddy).. పలు సూచనలు చేశారు. అంతర్జాతీయ నగరంగా అభివద్ధి చెందుతున్న నేపథ్యంలో భవిష్యత్‌ అవసరాలకు అనుగుణంగా ముందు చూపుతో చర్యలు చేపట్టాలన్నారు.

గ్రేటర్ హైదరాబాద్ పరిధిలో రోజురోజుకు ట్రాఫిక్ పెరుగుతున్న నేపథ్యంలో.. ట్రాఫిక్ నియంత్రణకు పోలీసు శాఖ అత్యంత ప్రాధాన్యం ఇవ్వాలని స్పష్టం చేసిన సీఎం.. ట్రాఫిక్ సిబ్బంది కొరతను అధిగమించేందుకు మూడు నెలల్లో హోంగార్డులను నియమించాలని అధికారులను ఆదేశించారు. అంతేకాకుండా ఇతర విభాగాల్లో పని చేస్తున్న హోంగార్డులను వెనక్కి పిలిచి వారి సేవలను వినియోగించుకోవాలని సూచించారు.

వాహనాల రద్దీ ఎక్కువగా ఉండే సమయాల్లో లా అండ్ ఆర్డర్ పోలీసులను కూడా ట్రాఫిక్ నియంత్రణ విధులకు వినియోగించుకోవాలని సూచించిన రేవంత్ రెడ్డి.. సిటీలో రహదారులు, జంక్షన్ల విస్తరణపై దృష్టి పెట్టాలని తెలిపారు. ముఖ్యంగా ఎల్బీనగర్ జంక్షన్ తరహాలో సబ్ వే, అండర్ పాస్, సర్ఫేస్ వే నిర్మాణాలు చేపట్టే అవకాశాలను రద్దీ ఎక్కువగా ఉండే కూడళ్లలో పరిశీలించాలని పేర్కొన్నారు.

ఆటోమేటిక్‌ సిగల్‌ వ్యవస్థ మీద పూర్తిగా ఆధారపడకుండా, ప్రధాన జంక్షన్ల వద్ద సిబ్బంది ఉండేలా ఏర్పాట్లు చేయాలని ఆదేశించారు. మూడు కమిషనరేట్ల పోలీస్‌ అధికారులు, మున్సిపల్‌ జోనల్‌ కమిషనర్లు ప్రతినెలా సమావేశమై ట్రాఫిక్‌పై సమీక్షలు జరపాలని.. ఇబ్బందులున్న ప్రాంతాల్లో తగిన చర్యలు తీసుకోవాలని ఆదేశించారు. గ్రేటర్ హైదరాబాద్ పరిధిలో మల్టీ లెవల్ పార్కింగ్ కేంద్రాల నిర్మాణాన్ని ప్రోత్సహించేలా ప్రత్యేక పార్కింగ్ పాలసీని రూపొందించాలని వెల్లడించారు.

లే అవుట్లకు హెచ్‌ఎండిఏ అనుమతులు ఇచ్చేటప్పుడు రోడ్లు, పార్కులు, మౌలిక వసతులపై క్షేత్ర స్థాయిలో పరిశీలించి నిర్ణయం తీసుకోవాలని అన్నారు. ట్రాఫిక్‌ నిర్వహణ, వసతులపై దేశంలోని ఇతర నగరాలు, విదేశాల్లో ఎలాంటి పద్దతులను అనుసరిస్తున్నారనే విషయంపై అధ్యయనం చేయాలన్నారు. మరోవైపు ఈ సమీక్షకు సీఎస్ శాంతికుమారి (CS Shanthi Kumari), డీజీపీ రవిగుప్తా, హైదరాబాద్, రాచకొండ, సైబరాబాద్ కమిషనర్లు, జీహెచ్ఎంసీ ఉన్నతాధికారులు హాజరయ్యారు.

– చాలా రోజుల తర్వాత అసెంబ్లీకి కేసీఆర్
– బెంజ్ కారులో ఎంట్రీ
– ఎమ్మెల్యేగా ప్రమాణ స్వీకారం
– ప్రతిపక్ష నేత కార్యాలయంలో పూజలు
– ఉత్సాహంలో గులాబీ శ్రేణులు

కొత్తగా రాష్ట్రం ఏర్పడిన తర్వాత తెలంగాణ సీఎంగా రెండుసార్లు పదవి చేపట్టిన కేసీఆర్.. అసెంబ్లీ ఎన్నికల ఓటమి తర్వాత ప్రత్యక్షంగా, పరోక్షంగా రాజకీయాలకు ఇన్నాళ్లూ దూరంగా ఉన్నారు. అనారోగ్య కారణాల వల్ల ఇంటికే పరిమితమయ్యారు. అయితే.. చాలా రోజుల తర్వాత గులాబీ బాస్ అసెంబ్లీలో అడుగు పెట్టారు. వైట్ కలర్ కొత్త బెంజ్ కారులో ఎంట్రీ ఇచ్చిన ఆయనకు గులాబీ శ్రేణులు స్వాగతం పలికారు.

చేతి కర్ర పట్టుకొని వచ్చిన కేసీఆర్ వెంట.. మాజీ మంత్రులు, మాజీ ఎమ్మెల్యేలు, ప్రస్తుత ఎమ్మెల్యేలు, ఎంపీలు, ఎమ్మెల్సీలు, తదితరులు ఉన్నారు. అసెంబ్లీలో గజ్వేల్‌ ఎమ్మెల్యేగా.. కేసీఆర్ చేత స్పీకర్‌ ప్రసాద్‌ కుమార్‌ ప్రమాణం చేయించారు. ప్రమాణం అనంతరం అసెంబ్లీలోని ప్రతిపక్ష నేత కార్యాలయంలో పూజలు చేశారు.

మొన్నటి ఎన్నికల్లో కేసీఆర్‌ గజ్వేల్‌ ఎమ్మెల్యేగా ఎన్నికయ్యారు. డిసెంబర్‌ లో కొత్తగా ఎన్నికైన ఎమ్మెల్యేలతో ప్రొటెం స్పీకర్‌ అక్బరుద్దీన్‌ ఒవైసీ ప్రమాణం చేయించారు. మరికొందరు స్పీకర్ ప్రసాద్ సమక్షంలో అసెంబ్లీలో చేశారు. కానీ, తుంటి ఎముక ఆపరేషన్ కారణంగా ఇంటికే పరిమితమైన కేసీఆర్.. ఇప్పటిదాకా చేయలేదు.

ఈ నేపథ్యంలో గురువారం ఆయన అసెంబ్లీకి వచ్చి ఎమ్మెల్యేగా ప్రమాణం చేశారు. సీఆర్ ఎంట్రీ కోసం ఇన్ని రోజులుగా ఆశతో ఎదురుచూసిన గులాబీ నేతలకు ఆయన రాకతో జోష్ వచ్చినట్లు కనిపిస్తోంది. త్వరలో పార్లమెంట్ ఎన్నికలు ఉన్న నేపథ్యంలో గులాబీ బాస్ ఎలాంటి వ్యూహాలు రచిస్తారో ఆనేది ఆసక్తికరంగా మారింది.