Politics

తెలంగాణ (Telangana) రాష్ట్రంలో కాంగ్రెస్ (Congress) ప్రభుత్వం ప్రవేశపెట్టిన ఆరు గ్యారంటీల దరఖాస్తు ఫారాలపై.. బీఆర్ఎస్ (BRS) నాయకులు ఒక్కొక్కరు విరుచుకు పడుతున్నారు.. ఈ క్రమంలో బీఆర్‌ఎస్‌ ఎమ్మెల్యే జగదీశ్‌ రెడ్డి (Jagadish Reddy).. కాంగ్రెస్ ప్రభుత్వ తీరుపై మండిపడ్డారు.. కాంగ్రెస్‌ నాయకులు ఎన్నికల ప్రచారంలో ఇచ్చిన హామీలు అమలు చేయడం చేతకాక అయోమయంలో పడుతున్నారని విమర్శించారు.

అధికారంలోకి రావాలనే ఆలోచనతో అడ్డగోలు హామీలిచ్చిన కాంగ్రెస్ నేతలు.. ప్రస్తుతం ప్రజాపాలన పేరుతో తప్పించుకునేందుకు ప్రయత్నిస్తున్నారని జగదీశ్‌ రెడ్డి ఆగ్రహం వ్యక్తం చేశారు. గతంలో ఏ అప్లికేషన్లు లేకుండా లబ్దిదారులను ఎంపిక చేశామని జగదీశ్‌ రెడ్డి వివరించారు.. సూర్యాపేటలో మీడియాతో మాట్లాడిన జగదీశ్‌ రెడ్డి.. బీఆర్ఎస్ ప్రభుత్వం హయాంలో దళారి వ్యవస్థ లేకుండా ఆన్‌లైన్‌ విధానం పెట్టామని తెలిపారు.

కాంగ్రెస్ ప్రభుత్వం ప్రకటించిన ఆరు గ్యారంటీల దరఖాస్తు ఫారాలు అసంబద్ధంగా ఉన్నాయని జగదీశ్‌ రెడ్డి ఆరోపించారు.. కౌలు రైతులను పాసు పుస్తకం నంబర్లు అడుగుతున్నారని వెల్లడించారు. ఈ తతంగాన్ని అంతా ప్రజలు గమనిస్తున్నారని తెలిపిన జగదీశ్‌ రెడ్డి.. ప్రజలు పథకాలు అడుగుతున్నారని, పత్రాలు కాదని.. కాంగ్రెస్ నేతలపై ఆగ్రహం వ్యక్తం చేశారు.

ప్రభుత్వం ఆడుతోన్న పత్రాల డ్రామాలు ఎక్కువకాలం రాష్ట్రంలో సాగవని జగదీశ్‌ రెడ్డి తెలిపారు.. ఇప్పుడిప్పుడే మీ మోసాలు తెలంగాణ ప్రజలు గుర్తిస్తున్నారని తెలిపిన ఎమ్మెల్యే జగదీశ్‌ రెడ్డి.. హామీలు అమలు చేయలేకపోతే ప్రజలు వెంటపడి తరుముతారని హెచ్చరించారు. మాటల్లో కాదని చేతల్లో మీ పనితనం చూపించాలని ఎమ్మెల్యే జగదీశ్‌ రెడ్డి విమర్శించారు..

తెలంగాణ (Telangana) రాష్ట్ర ఉద్యమం నాటినుంచే కేసీఆర్‌ (KCR)పై, ఆయన కుటుంబంపై తీవ్రపదజాలంతో విరుచుకుపడే నేతగా రేవంత్ రెడ్డికి పేరుంది. పదేళ్ల పాలనలో బీఆర్‌ఎస్‌ ప్రభుత్వం ఆర్థిక అరాచకత్వానికి పాల్పడిందని, దొరల గడీలు బద్దలు కొట్టే రోజు వస్తుందని ఎన్నో సభల్లో రేవంత్ రెడ్డి తెలిపారు.. అన్నట్టుగానే రాష్ట్రంలో కాంగ్రెస్ (Congress) ప్రభుత్వం ఏర్పడింది..

రేవంత్ రెడ్డి ముఖ్యమంత్రిగా ప్రమాణ స్వీకారం జరిగింది. అప్పటి నుంచి రేవంత్ ఎన్నో మార్పులకి శ్రీకారం చూట్టారని జనం అనుకొంటున్నారు.. ఇకపోతే జనవరి 15-19 తేదీల మధ్య దావోస్‌లో జరగనున్న వరల్డ్ ఎకనామిక్ ఫోరమ్‌లో రేవంత్ రెడ్డి (Revanth Reddy) పాల్గొననున్నారు. తెలంగాణ ముఖ్యమంత్రి హోదాలో తొలిసారి రేవంత్ రెడ్డి విదేశీ పర్యటన ఖరారైంది. సీఎంతో పాటు ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు, ఉన్నతాధికారులు దావోస్‌కు వెళ్లనున్నారు.

ప్రపంచంలోని ప్రముఖ కంపెనీల సీఈవోలతో రేవంత్ రెడ్డి సమావేశం కానున్నారు. ఇందులో భాగంగా రాష్ట్రంలో పెట్టుబడులు పెట్టడం వల్ల కలిగే అవకాశాలు, ప్రయోజనాల గురించి వారికి వివరించనున్నట్టు తెలుస్తోంది. ప్రపంచ ఆర్థిక సదస్సులో వందకుపైగా దేశాల నుంచి రాజకీయ నేతలు, వ్యాపారవేత్తలు పాల్గొననున్నారు. మన దేశం నుంచి కేంద్ర మంత్రులతో వివిధ రాష్ట్రాలకు చెందిన మంత్రులు, అధికారులు సైతం ఈ సదస్సులో పాల్గొంటున్నారు. కాగా ల్యాబ్ నుంచి లైఫ్ టు లైఫ్ – సైన్స్ ఇన్ యాక్షన్ అనే అంశంతో ఐదు రోజుల పాటు ఈ సమావేశాలు జరగనున్నాయి.

మరోవైపు గత పదేళ్లలో హైదరాబాద్ నగరం అభివృద్ధి చెందిన విధానాన్ని.. ఇక్కడ పెట్టుబడుల వల్ల కలిగే లాభాలను ఈ సదస్సులో వివరించి.. మరిన్ని పెట్టుబడులు తెలంగాణకు వచ్చే విధంగా రేవంత్ రెడ్డి సమావేశం ఉంటుందని అధికారిక సమాచారం.. కాగా ముఖ్యమంత్రిగా ప్రమాణ స్వీకారం చేసిన అనంతరం రేవంత్ రెడ్డి.. నగరాభివృద్ధికి కట్టుబడి ఉన్నానని స్పష్టం చేసిన సంగతి తెలిసిందే. అదీగాక ఇటీవల డిప్యూటీ సీఎం భట్టి విక్రమార్కతో కలిసి ప్రధాని మోదీని మర్యాదపూర్వకంగా కలిసిన రేవంత్ రెడ్డి.. రాష్ట్ర అభివృద్ధికి సహకరించాలని కోరారు..

ప్రజాపాలన (Praja Palana)లో ప్రజలకు సేవ అటుంచితే దరఖాస్తుదారుల జేబులకు చిల్లులు పడుతున్నాయనే ఆరోపణలు వస్తున్నాయి.. తొలి రోజే వేల సంఖ్యలో దరఖాస్తుదారులు కేంద్రాలకు పోటెత్తారు. అరకొరగా తీసుకువచ్చిన దరఖాస్తులు ప్రతి కేంద్రంలో మొదటి గంటలోనే అయిపోవడంతో.. జిరాక్స్‌ సెంటర్లకు వెళ్లి తీసుకోవాలని ప్రజలకు సిబ్బంది తెలియజేయడం కనిపించింది.

దీంతో ఇదే అదనుగా భావించిన కొందరు దళారులు ఒకో దరఖాస్తు ఫారాన్ని రూ.40-రూ.50 తీసుకొని ఇస్తున్నట్టు ఆరోపణలు వస్తున్నాయి.. మరోవైపు, దరఖాస్తుల కోసం మీసేవ, జిరాక్స్‌ సెంటర్ల వైపు ప్రజలు పరుగులు తీస్తుండటంతో.. కొత్త దందా మొదలైందని అంటున్నారు.. ఈ అవకాశాన్ని క్యాష్ చేసుకొంటున్న కొందరు.. సందట్లో సడేమియాలా మీసేవ సెంటర్ల, జిరాక్స్‌ సెంటర్లు నిర్వాహకులు, కొన్ని చోట్ల కిరణాషాపు యాజమానులు బ్లాక్‌ దందాకు తెరలేపారు. ఒక్కో దరఖాస్తుకు రూ.50 నుంచి 100 వరకు రేటు ఫిక్స్ చేశారు..

మరోవైపు ఈ విషయం జీహెచ్ఎంసీ (GHMC) కమిషనర్ రోనాల్డ్ రాస్ (Commissioner Ronald Ross) దృష్టికి వెళ్లడంతో.. ప్రజాపాలన అప్లికేషన్లు (Application) అమ్మితే కఠిన చర్యలు తీసుకుంటామని వార్నింగ్ ఇచ్చారు. 5 గ్యారంటీలకు సంబంధించిన అభయ హస్తం దరఖాస్తులకు ఎలాంటి కొరత లేదన్న జీహెచ్ఎంసీ కమిషనర్.. అందరికీ ఉచితంగా అందజేస్తామని తెలిపారు. ఎట్టి పరిస్థితుల్లో బయట కొనుగోలు చేయవద్దని సూచించారు.

ప్రజాపాలన అప్లికేషన్లు శివారులోని పటాన్‌చెరు (Patancheru)లో రూ. 20 చొప్పున అమ్మిన మీ సేవా నిర్వాహకుడిపై అధికారులు గురువారం కేసు నమోదు చేశారని రోనాల్డ్ రాస్ అన్నారు. కాగా.. ప్రజా పాలన పథకం అప్లికేషన్ ఫారమ్ ను మీ సేవలో రూ.60 కు విక్రయిస్తున్నారని నిన్న బీజేపీ ఎమ్మెల్యే రాజాసింగ్ సంచలన వ్యాఖ్యలు చేసిన విషయం తెలిసిందే. ప్రజా పాలన కార్యక్రమం నెల రోజులు పొడగించాలని ఆయన డిమాండ్ చేశారు. ప్రజా పాలన పథకంలో అధికారులు తగిన ప్రచారం చేయలేదని మండిపడ్డారు. ప్రజాపాలన అంటే ముందుగానే ప్రజలకు అవగాహన కల్పించాలని రాజాసింగ్ వెల్లడించారు..