Politics

తెలంగాణ (Telangana) రాష్ట్ర ముఖ్యమంత్రి రేవంత్ రెడ్డి (Revanth Reddy)కి బీజేపీ (BJP) ఎంపీ బండి సంజయ్ బహిరంగ లేఖ రాశారు. బీఆర్ఎస్ అంటేనే అగ్గిమీద గుగ్గిలంలా మండిపడే బండి.. అందులో కాంగ్రెస్ పై సైతం విమర్శలు గుప్పించిన బండి.. రేవంత్ రెడ్డికి బహిరంగ లేఖ రాయడం.. కొంత ఆశ్చర్యాన్ని కలిగించినా.. కాంగ్రెస్ ప్రభుత్వాన్ని అభినందిస్తోన్నట్టు లేఖలో పేర్కొనడం కాంగ్రెస్ పాలనకి కితాబ్ ఇచ్చినట్టని అనుకొంటున్నారు.

ఇకపోతే బండి సంజయ్.. రేవంత్ రెడ్డికి రాసిన లేఖను గమనిస్తే.. మిడ్ మానేరు ముంపు బాధితుల సమస్యను అసెంబ్లీలో ప్రస్తావించడం అభినందనీయమని లేఖలో ప్రస్తావించారు. దీర్ఘకాలికంగా పెండింగ్ లో ఉన్న మిడ్ మానేరు బాధితుల సమస్యలను లేఖలో తెలిపారు బండి సంజయ్ (Bandi Sanjay). ఒక్కో బాధిత కుటుంబానికి ఇండ్ల నిర్మాణానికి రూ. 5 లక్షల 4 వేలు చెల్లించాలని పేర్కొన్నారు.

ఇండస్ట్రీయల్ కారిడార్ ను నీలోజిపల్లి నుంచి నందిగామ, ఆగ్రహారం వరకు ఏర్పాటు చేయాలని తెలిపిన బండి సంజయ్.. స్కిల్ డెవలెప్ మెంట్ కాలేజీ ఏర్పాటుని సైతం పరిశీలించాలని లేఖలో తెలిపారు. అర్హత లేకున్నా మిడ్ మానేరు ముంపు ప్యాకేజీ పరిహారం తీసుకున్న రాజ్యసభ సభ్యులు సంతోష్ రావు సహా మాజీ సీఎం కుటుంబ సభ్యులపై చర్యలు తీసుకోవాలని లేఖలో పేర్కొన్నారు.

రాష్ట్రాన్ని భ్రష్టు పట్టించిన అవినీతి పరులని విడిచి పెట్టద్దని లేఖలో పేర్కొన్న బండి సంజయ్.. త్యాగాల పునాదులపై ఏర్పడ్డ తెలంగాణలో ప్రజా అకాంక్షలకు అనుగుణంగా పాలన కొనసాగిస్తూ, ప్రజాస్వామ్యబద్దంగా పాలన సాగించాలని సూచించారు.

తెలంగాణ రాష్ట్ర ఆర్థిక పరిస్థితి ప్రస్తుతం పైన పటారం లోన లొటారంలా మారిందనే ఆరోపణలు వస్తోన్న క్రమంలో.. రాష్ట్రాన్ని కాంగ్రెస్ (Congress) ప్రభుత్వం ఎలా ముందుకి తీసుకెళ్తుందనే అనుమానాలు కలుగుతోన్నాయి. అభివృద్ధి జరిగిందని చెప్పుకొంటున్న గత పాలకులు.. ఇంతలా అప్పులు ఎలా పెరిగాయి? బీఆర్ఎస్ నేతల ఆస్తులు అంతలా ఎలా పెరిగాయి? అనే ప్రశ్నలకి సమాధానం ఇవ్వడం లేదనే ఆరోపణలు వెల్లువెత్తుతోన్నాయి.

అయితే రేవంత్ రెడ్డి ప్రభుత్వం వెనక్కి తగ్గేది లేదంటుంది. ఇప్పటికే అవినీతిపై చర్యలకి అడుగు వేస్తూనే.. మరోవైపు ఆరు గ్యారంటీలు అమలుపై కసరత్తు ప్రారంభించిందని తెలుస్తోంది. ఈ క్రమంలో రెవెన్యూ, ఐ అండ్ పీఆర్, గృహ నిర్మాణశాఖా మంత్రి పొంగులేటి శ్రీనివాస్ రెడ్డి (Ponguleti Srinivas Reddy).. వివిధ అంశాలపై పలు కీలక వ్యాఖ్యలు చేశారు..

రాష్ట్ర ఖజానాను ఖాళీ చేసి బీఆర్ఎస్ (BRS) ప్రభుత్వం మాకు ఇచ్చిందని తెలిపిన పొంగులేటి.. ప్రభుత్వం చేసిన తప్పులు ఏమిటి అనే దానిపై సమీక్ష జరుపలేదన్నారు. సీఎం రేవంత్ రెడ్డి (Revanth Reddy)కి.. అధికారుల మీద రాజకీయ పార్టీల మీద ఏనాడూ కక్ష్య సాధింపు లేదన్నారు. ఆక్రమణకు గురైన ప్రభుత్వ భూముల విషయంలో మాత్రం ప్రభుత్వం కఠినంగా వ్యవహరిస్తుందని వెల్లడించారు. ప్రభుత్వం సొమ్మును దోచుకున్న ఎవ్వరినీ క్షమించం అంటూ క్లారిటీ ఇచ్చిన పొంగులేటి.. ఎంత పెద్ద నాయకుడు అయిన వదిలిపెట్టం అని స్పష్టత ఇచ్చారు.

మరోవైపు బీఆర్ఎస్ పై మండిపడ్డ పొంగులేటి శ్రీనివాస్ రెడ్డి వారిలాగా మాయమాటలు చెప్పడం మాకు సాధ్యం కాదన్నారు. మేము అలా చేయమని, ఆరు గ్యారెంటీలను సామాన్య ప్రజలకు తప్పక అందిస్తామని తెలిపారు. జర్నలిస్టులకు ఇచ్చిన హామీలను సామాన్యులకు ఇచ్చే ఇళ్లను విడతల వారీగా ఇస్తామన్నారు. తెలంగాణలో ఇల్లు లేదు అనే మాట రాకుండా చూస్తామని పొంగులేటి తెలిపారు. ప్రతిపక్షాలు సహకరించక పోయిన పర్వాలేదు కానీ కారు కూతలు కూయకండని ఆయన హెచ్చరించారు..

డాక్టర్ బీఆర్ అంబేడ్కర్ సచివాలయం(BR Ambedkar Secretariat)లో సోమవారం రవాణా, బీసీ సంక్షేమ శాఖ మంత్రి పొన్నం ప్రభాకర్‌(Minister Ponnam Prabhakar) బాధ్యతలు స్వీకరించారు. ఆయన పేషీలోకి రాగానే వేదపండితులు ఆశీర్వచనాలు అందించారు.

బాధ్యతల స్వీకరించిన అనంతరం ఆయన టీఎస్ఆర్టీసీ, రవాణా శాఖలకు సంబంధించిన మూడు ఫైళ్లపై సంతకం చేశారు. 2023-24 ఆర్థిక సంవత్సరం 3వ త్రైమాసికానికి బస్‌పాస్‌లకు రాయితీల ఖర్చు రీయింబర్స్‌మెంట్ కోసం 212.50 కోట్లను విడుదల చేస్తూ ఒక ఫైలుపై సంతకం చేశారు.

మరో సంతకం 2023-24 ఆర్థిక సంవత్సరం 3వ త్రైమాసికానికి గానూ 162.50 కోట్ల రూపాయలను విడుదల చేస్తూ మరొక ఫైల్‌పై సంతకం చేశారు. అదేవిధంగా ఎల్‌.రాజ్య లక్ష్మి, హెడ్ ట్రాన్స్‌పోర్ట్ కానిస్టేబుల్‌కు ఒక రూ.లక్ష రూపాయలు మెడికల్ క్లెయిమ్‌ మంజూరు చేస్తూ మూడో ఫైల్‌పై సంతకం చేశారు.

ఈ సందర్భంగా మంత్రులు తుమ్మల నాగేశ్వరరావు, జూపల్లి కృష్ణారావు, ఎమ్మెల్యేలు వివేక్, ఆది శ్రీనివాస్, టీఎస్‌ఆర్‌టీసీ ఎండీ సజ్జనార్‌, ఎమ్మెల్సీ జీవన్ రెడ్డి, ముఖ్య కార్యదర్శులు బుర్రా వెంకటేశం, వాణీప్రసాద్‌ తదితరులు అభినందించారు.

రాష్ట్రంలో కాంగ్రెస్ (Congress) విజయంపై సీపీఐ (CPI) జాతీయ కార్యదర్శి నారాయణ (Narayana) సంచలన వ్యాఖ్యలు చేశారు. సీపీఐ ఓట్లు కలవడం వల్లే తెలంగాణలో కాంగ్రెస్ విజయం సాధించిందని తెలిపారు. మిగతా మూడు రాష్ట్రాల్లో కమ్యూనిస్టులతో పొత్తు లేకపోవడం వల్లే కాంగ్రెస్ ఓడిపోయిందని నారాయణ చేసిన వ్యాఖ్యలు రాజకీయ వర్గాలలో హిట్ పెంచుతోన్నాయి.

మరోవైపు రాజస్థాన్ (Rajasthan) ఛత్తీస్ ఘడ్, మధ్యప్రదేశ్ లో అవలంభించిన ఒంటెద్దు పోకడల వల్లే కాంగ్రెస్ ఓడి పోయిందన్న నారాయణ.. ఈ ఓటమి గుణపాఠంగా తీసుకోవాలని తెలిపారు. అదీగాక తెలంగాణ (Telangana)లో ఎంపీ సీటుకు పోటీ చేస్తామని నారాయణ వెల్లడించడం సంచలనంగా మారింది. కాగా కేరళలో 4, తమిళనాడు 2, బెంగాల్ 3, బస్తర్ లో సైతం పోటీ చేస్తోన్నట్టు ఆయన తెలిపారు.

మరోవైపు నారాయణ ప్రకటనకు కాంగ్రెస్ అధిష్టానం ఎలా స్పందిస్తోందనేది కీలకంగా మారింది. అసలు తెలంగాణలో సీపీఐ కి, కాంగ్రెస్ ఎంపీ సీటు ఇస్తుందా..? అనేది రాష్ట్ర రాజకీయాల్లో చర్చాంశనీయంగా మారింది. అయితే ఇప్పటికే కాంగ్రెస్, సీపీఐ మధ్య పొత్తు కొనసాగుతున్న విషయం తెలిసిందే.. మరి ఎంపీ సీటుపై కాంగ్రెస్ స్పందిస్తుందా? లేదా? అనేది తెలియాల్సిఉంది.

మరోవైపు భూ సమస్యలపై కాంగ్రెస్ ప్రభుత్వం అఖిల పక్ష సమావేశం పెట్టాలని, సీపీఐ జాతీయ కార్యవర్గ సభ్యుడు చాడ వెంకటరెడ్డి డిమాండ్ చేశారు. బీఆర్ఎస్ పాలనలో చితికి పోయిన ప్రజలు, నిరుద్యోగులు.. కాంగ్రెస్ ప్రభుత్వం పై కొండంత ఆశతో ఉన్నట్టు ఆయన వెల్లడించారు. కేసీఆర్ పుణ్యమా అని ఇప్పటి వరకి రేషన్ కార్డులు దక్కని వారు ఆశతో ఎదురు చూస్తోన్నట్టు తెలిపిన వెంకటరెడ్డి.. బీఆర్ఎస్ నేతల్లో ఇంకా అహంకారం తగ్గలేదని విమర్శించారు. గత ప్రభుత్వాన్ని తలదన్నేలా ప్రజల పట్ల శ్రద్ధ వహించాలని కాంగ్రెస్ ప్రభుత్వాన్ని కోరారు చాడ వెంకటరెడ్డి..