Politics

రాష్ట్రంలో కాంగ్రెస్ ప్రభుత్వం వస్తే రైతు బంధు.. బంద్ అవుతోందని బీఆర్ఎస్ (BRS) నేతలు ఎన్నికల సమయంలో తెగ ప్రచారం చేశారు.. తీరా ఎన్నికల కోడ్ అమలులో ఉన్న సమయంలో కాంగ్రెస్ పార్టీ, రైతు బంధుకి అడ్డు తగులుతోందని, రైతులని నమ్మించే ప్రయత్నాలు చేశారు.. ప్రస్తుతం బీఆర్ఎస్​ ప్రతిపక్షంలోకి రాగానే రైతుబంధు ఎప్పుడు ఇస్తారని మాజీ మంత్రులు ప్రశ్నిస్తున్నారని బీసీ సంక్షేమ, రవాణా శాఖ మంత్రి పొన్నం ప్రభాకర్ మండిపడ్డారు..

కాంగ్రెస్ (Congress) ప్రభుత్వంలో మంత్రిగా బాధ్యతలు స్వీకరించిన తర్వాత.. తొలిసారిగా పొన్నం ప్రభాకర్​ (Ponnam Prabhakar) గజ్వేల్​ (Gajwel)కు వచ్చారు. ఆయనకి డీసీసీ అధ్యక్షుడు గజ్వేల్ మాజీ ఎమ్మెల్యే తూముకుంట నర్సారెడ్డి ఆధ్వర్యంలో కాంగ్రెస్ శ్రేణులు ఘనస్వాగతం పలికారు. అనంతరం పొన్నం ప్రభాకర్ మాట్లాడుతూ.. రైతు బంధు పై కీలక వ్యాఖ్యలు చేశారు. రైతుకు పెట్టుబడి 100 శాతం ఇస్తామని తెలిపారు. గత ప్రభుత్వం డిసెంబర్ ఆఖరిలో ఇచ్చేదని, తాము కూడా అలాగే ఇస్తామని వెల్లడించారు.

గజ్వేల్ నుంచి గెలిచిన కేసీఆర్ (KCR) ఒక్కసారైనా ఇక్కడి ప్రజలను కలిశారా? అని ప్రశ్నించారు. ప్రజాభవన్​గా.. ప్రగతిభవనాన్ని మార్చి ప్రజలకి అందుబాటులోకి తెచ్చామని పొన్నం పేర్కొన్నారు.. ప్రజల సమస్యలను అక్కడ తెలుసుకునే విధంగా చర్యలు తీసుకుంటున్నామని తెలిపారు. త్వరలోనే భూ నిర్వాసితుల సమస్యల పరిష్కారానికి కృషి చేస్తామని పొన్నం ప్రభాకర్ హమీ ఇచ్చారు.

రైతుబంధులో చాలా లోపాలు ఉన్నాయని వెల్లడించిన పొన్నం ప్రభాకర్.. వాటిని సవరించి వీలైనంత త్వరలో రైతు బంధు నగదు అందిస్తామని రైతులకి తెలిపారు.. రైతు బంధు విషయంలో ఎవరు ఆందోళన చెందవద్దని వివరించారు.. గత ప్రభుత్వ అనుభవాలు ప్రజలకు నేర్పించిన పాఠాలని తెలిపిన పొన్నం ప్రభాకర్.. కాంగ్రెస్ ప్రభుత్వం ప్రజల ప్రభుత్వమని వెల్లడించారు.. ప్రజా శ్రేయస్సు కోసం కాంగ్రెస్ పాటుబడుతోందని.. రేవంత్ రెడ్డి ప్రభుత్వంలో అందరికీ న్యాయం అందేలా కృషి చేస్తామని పొన్నం ప్రభాకర్ వివరించారు..

తెలంగాణ (Telangana)లో కాంగ్రెస్ అధికారంలోకి వచ్చినప్పటి నుంచి.. బీఆర్ఎస్ (BRS)లోని పలువురు నేతలు పార్టీ మారుతున్నారంటూ వార్తలు సోషల్ మీడియాలో హాల్ చల్ చేస్తున్నాయి.. అయితే ఈ వార్తల్లో పేరు వినిపించిన నేతలు, తర్వాత పార్టీ మార్పుపై క్లారిటీ ఇవ్వడం తెలిసిందే.. ప్రస్తుతం ఈ సెగ శాసన మండలి ఛైర్మన్ గుత్తా సుఖేందర్ రెడ్డిని (Gutha Sukender Reddy) తాకింది.

ఆయన పార్టీ మారుతోన్నట్టు వార్తలు వస్తున్న నేపథ్యంలో తాను పార్టీ మారడం లేదని. ఆ అవసరం కూడా తనకు లేదని సుఖేందర్ రెడ్డి స్పష్టం చేశారు.. విలేకరుల సమావేశంలో మాట్లాడిన సుఖేందర్ రెడ్డి.. నేను పార్టీ మారుతున్నట్లు సోషల్ మీడియాలో దుష్ప్రచారం జరగడం విచారకరం అన్నారు.. రాజ్యాంగబద్ధమైన శాసన మండలి ఛైర్మన్ పదవిలో ఉన్న తనకు ఏ పార్టీతో సంబంధం లేదని తెలిపారు.. చట్టబద్ధంగా నా కర్తవ్యాన్ని నేను నిర్వహిస్తూ..
ప్రభుత్వానికి సంపూర్ణ సహకారం అందిస్తానని సుఖేందర్ రెడ్డి వెల్లడించారు.

మరోవైపు రాష్ట్రంలో కొత్తగా ఏర్పడిన ప్రభుత్వం కూడా సాధ్య అసాధ్యలను బేరీజు వేసుకోవాలని, ప్రజలకు వాస్తవ పరిస్థితి వివరించి పథకాలు అమలు చేయాలని సుఖేందర్ రెడ్డి సూచించారు. కాంగ్రెస్ (Congress)పార్టీ ఆరు గ్యారెంటీలు నమ్మి ప్రజలు ఓట్లు వేశారని, తాను అనుకోవడం లేదని, ఆయన అన్నారు. బీఆర్ఎస్ ఎమ్మెల్యేల మీద ఉన్న వ్యతిరేకత, కేసీఆర్ పదవికి గండంగా మారిందని సుఖేందర్ తెలిపారు..

జీహెచ్‌ఎంసీ పరిధిలో బీఆర్ఎస్‌ ఎమ్మెల్యేలు, కేటీఆర్ పనితీరుకు ఓట్లు పడ్డాయని.. ప్రజా సమస్యల పరిష్కారమే తన లక్ష్యమని, శాశ్వతంగా ఎవరికీ అధికారం ఉండదని సుఖేందర్ వెల్లడించారు. రాష్ట్రాన్ని అభివృద్ధి చేసే దిశగా ప్రస్తుత పాలకులు ఆలోచించాలని.. విమర్శలకు ఇది సమయం కాదని తెలిపారు.. ఉమ్మడి నల్గొండ జిల్లాకు రెండు మంత్రి పదవులు రావడం ఆనందంగా ఉందని సుఖేందర్ రెడ్డి వెల్లడించారు..

తెలంగాణ (Telangana)లో కాంగ్రెస్ ఆరు హామీలతో అధికారంలోకి వచ్చిన విషయం తెలిసిందే.. వీటిని అమలు చేయాలంటే రాష్ట్ర ఖజానాపై భారం అధికంగా ఉంటుందనే వాదనలు వినిపిస్తున్నాయి.. ఈ నేపథ్యంలో అప్పుల కుప్పగా మారిన రాష్ట్రం పరిపాలన, కొత్త ప్రభుత్వానికి కత్తిమీద సాములా మారిందని అనుకొంటున్నారు.. రాష్ట్రాన్ని అభివృద్ధి చేయాలంటే నిధులు కావాలి.. ఆ నిధులు ఎక్కడి నుంచి సమకూర్చుకోవాలనే ఆలోచనలో కాంగ్రెస్ (Congress) ప్రభుత్వం ఉన్నట్టు తెలుస్తోంది.

ఈ క్రమంలో తెలంగాణ ఆర్థిక పరిస్థితిపై డిప్యూటీ సీఎం భట్టి విక్రమార్క (Bhatti Vikramarka) కీలక వ్యాఖ్యలు చేశారు.. రాష్ట ప్రజలకు ఆర్థిక పరిస్థితి తెలిసేలా శ్వేత పత్రం త్వరలో విడుదల చేస్తామని అన్నారు. ఎంతో నమ్మకంతో తెలంగాణ ప్రజలు కాంగ్రెస్ పార్టీకి అధికారం అప్పచెప్పారని.. అంతే బాధ్యతగా తమ ప్రభుత్వం నడుచుకోంటుందని తెలిపారు.. మధిర నియోజకవర్గం ప్రజల ఆశీస్సులతో ఉన్నతి పదవి చేపట్టానని తెలిపిన భట్టి విక్రమార్క.. మధిర ప్రజలందరి కృతజ్ఞతలు తెలిపారు.

ఇక ప్రత్యేక రాష్ట్రాన్ని నిధులు, నియామకాలు, ఆత్మగౌరవం కోసం కొట్లాడి తెచ్చుకుంటే.. బీఆర్ఎస్ (BRS) ప్రభుత్వం అస్తవ్యస్తంగా మార్చిందని భట్టి విక్రమార్క ఆరోపించారు. రాష్ట్ర సంపద అంతా దోపిడీ చేసి.. రాష్ట్రాన్ని 70 ఏళ్ళు వెనక్కి నెట్టారని భట్టి ఆగ్రహం వ్యక్తం చేశారు. కేసీఆర్ (KCR) హయాంలో భూస్వామ్య వ్యవస్థ ఏర్పడి, రాష్ట్ర భూ సంపద అంతా కబ్జాలకు గురైందని భట్టి విక్రమార్క మండిపడ్డారు..

కాంగ్రెస్ ప్రభుత్వంలో ప్రతి వ్యవస్థను ప్రజల కోసమే తీర్చిదిద్దుతామన్నారు. ఆరు హామీల్లో కేవలం రెండు రోజుల్లోనే రెండు హామీలు ప్రారంభమయ్యాయని.. 100 రోజుల్లో ఆరు హామీలను అమలు చేస్తామని భట్టి విక్రమార్క తెలిపారు.. బీఆర్ఎస్ చేసిన అవినీతిని ప్రజల ముందుకు సాక్షాలతో తీసుకొస్తామని భట్టి విక్రమార్క అన్నారు..