Politics

తెలంగాణ (Telangana)లో కాంగ్రెస్ అధికారంలోకి వచ్చాక కోమటిరెడ్డి వెంకట్‌రెడ్డికి.. రోడ్లు, భవనాలు, సినిమాటోగ్రఫీ శాఖ మంత్రిగా బాధ్యతలు అప్పగించిన విషయం తెలిసిందే.. ఈ క్రమంలో కోమటిరెడ్డి వెంకట్‌రెడ్డి.. టాలీవుడ్ పై కీలక వ్యాఖ్యలు చేశారు.. సినిమా వాళ్ళ నుంచి ఇప్పటి వరకు ఎవరూ ఫోన్ చేయలేదని, దిల్ రాజు ఒక్కడే ఫోన్ చేశారని తెలిపారు.

పదేళ్ళ తర్వాత కాంగ్రెస్ (Congress) ప్రభుత్వం అధికారంలోకి వచ్చిందని ఆనందం వ్యక్తం చేసిన కోమటిరెడ్డి వెంకట్‌రెడ్డి.. ముఖ్యమంత్రి రేవంత్ రెడ్డికి ధన్యవాదాలు తెలిపారు. అమెరికా ఈజ్ గ్రేట్.. అమెరికన్ రోడ్స్ ఈజ్ గ్రేట్ అని పొగడ్తలతో ముంచేసిన కోమటిరెడ్డి వెంకట్‌రెడ్డి (Komati Reddy Venkat Reddy)..నాకు రోడ్లు భవనాలు శాఖ ఇచ్చినందుకు థాంక్స్ అని తెలిపారు.. ఇక్కడి రోడ్లను కూడా అలాగే మార్చడానికి కృషి చేస్తానని వెల్లడించారు..

మరోవైపు అసెంబ్లీలోని గాంధీ విగ్రహం వద్ద బ్యూటిఫికేషన్ పనులు చేపడతామని కోమటిరెడ్డి వెంకట్‌రెడ్డి తెలిపారు.. ఈ రోజు తొమ్మిది ముఖ్య ఫైల్స్ పై సంతకాలు చేసినట్టు పేర్కొన్నారు.. తన నియోజకవర్గ పరిధిలోని రోడ్లను 100 కోట్లతో నాలుగు లైన్లుగా మార్చబోతున్నామని.. ఇందుకు తనకున్న పరిచయాలతో ఢిల్లీ నుంచి నిధులు తీసుకువస్తానని కోమటిరెడ్డి వెంకట్‌రెడ్డి హామీ ఇచ్చారు.

ఎల్బీనగర్ మల్కాపురం వరకు, మల్కాపురం నుంచి సూర్యాపేట వరకు 6 లైన్ల రోడ్డు పనులు త్వరలో ప్రారంభించడానికి ప్రణాళికలు సిద్దం చేస్తున్నట్టు వెల్లడించిన కోమటిరెడ్డి వెంకట్‌రెడ్డి.. వీటి విషయంలో పది రోజుల్లో కేంద్ర ప్రభుత్వం నుంచి ఒక స్పష్టత వస్తుందని క్లారిటీ ఇచ్చారు. హైదరాబాద్ ఎయిర్ పోర్ట్ కంటే ముందే విజయవాడకు వెళ్లే విధంగా రోడ్లను తీర్చిదిద్దుతామని కోమటిరెడ్డి వెంకట్‌రెడ్డి తెలిపారు..

రాష్ట్రంలో భూములను కబ్జా చేస్తున్న వారు రోజు రోజుకు రెచ్చిపోతున్నారు. కబ్జా చేసిన భూములను ఫ్లాట్స్ గా విభజించి అమాయకులకు తక్కువ ధరకు కట్టబెడుతోన్న సంఘటనలు నిత్యం ఎక్కడో ఒక చోట వెలుగులోకి వస్తూనే ఉన్నాయి. తాజాగా నిజామాబాద్ జిల్లాలో ఇలాంటి ఘటన వెలుగు చూసింది.

ఆర్మూర్ (Armour) నియోజకవర్గంలోని కోటార్మూర్ (Kotarmoor) గ్రామంలో 63వ నంబర్ జాతీయ రహదారి పక్కన భూమిని.. 2007లో ముగ్గురు రియల్ ఎస్టేట్ వ్యాపారులు (Real Estate Traders) కొనుగోలు చేశారు. ఆ భూమి అదే గ్రామానికి చెందిన రియల్ వ్యాపారి ప్రొద్దుటూరి నరసింహారెడ్డిది. ఇతని వద్ద నుంచి 40-3,40-4 సర్వే నంబర్లలోని 25 గుంటల భూమిని కొనుగోలు చేసిన ముగ్గురు రియల్ ఎస్టేట్ వ్యాపారులు.. రెండు రోడ్లకు స్థలం పోగా.. మిగిలిన భూమి కంటే అదనంగా ఇతరులకు విక్రయించారు.

అదీగాక వీరు గతంలో గ్రామ ప్రజల నీటి అవసరాల కోసం ఉంచిన భూమిని కూడా కబ్జా చేసి అమ్ముకునేందుకు ప్రయత్నించినట్టు స్థానికులు ఆరోపిస్తున్నారు.. భూములను కబ్జాలు చేస్తూ అమ్మకాలు జరుపుతున్న రియల్ వ్యాపారులకు మున్సిపాలిటీ పాలకవర్గ సభ్యులు సపోర్ట్ ఉన్నట్లుగా ఆరోపణలు వస్తున్నాయి. మరోవైపు కోటార్మూర్ గ్రామంలో గతంలో గ్రామ ప్రజల నీటి అవసరాల కోసం వదిలిన స్థలాన్ని, బోరుబావిని కబ్జా చేసేందుకు ప్రయత్నించిన సంఘటనను ఆధారాలు, ఫొటోలతో సహా ఆర్మూర్ మున్సిపల్ కమిషనర్ ప్రసాద్ చౌహన్‌కు స్థానికులు ఫిర్యాదు చేసినట్టు సమాచారం.

దీంతో రాత్రికి రాత్రే ఆ స్థలంలో బోరుబావిని తీయించిన మున్సిపల్ కమిషనర్‌ను స్థానికులు నిలదీశారు. అయినా ఆ కబ్జా వ్యవహారం అలాగే కొనసాగుతోందని స్థానికులు ఆరోపిస్తున్నారు.. ఈ క్రమంలో ఇలా యధేచ్చగా కబ్జాలకు పాల్పడుతోన్న వీరిపై, వీళ్ళకు వత్తాసు పలుకుతోన్న అధికారులపై చర్యలు తీసుకొని.. భూములను కాపాడాలని స్థానికులు విన్నవించుకుంటున్నారు.

రాష్ట్రంలో కాంగ్రెస్ (Congress) అధికారంలోకి రావడంతో రాజకీయ సమీకరణాలు మారాయి.. ఇన్నాళ్లుగా బీఆర్ఎస్ (BRS)ను టార్గెట్ చేసి తీవ్రమైన ఆరోపణలు చేసిన కాంగ్రెస్ ప్రస్తుతం అధికార పార్టీగా అవతరించింది. గతంలో అధికారంలో ఉన్న బీఆర్ఎస్ ప్రస్తుతం ప్రతిపక్షంగా మారింది. అయితే తెలంగాణలో ప్రభుత్వం ఏర్పడి రెండురోజులు కూడా అవ్వక ముందే.. బీఆర్ఎస్ నేతలు కాంగ్రెస్ పై ఆరోపణలు మొదలు పెట్టడం చర్చగా మారింది.

ఈ క్రమంలో మాజీ మంత్రి హరీష్ రావు (Harish Rao)..వరి ధాన్యం కొనుగోలు ఎప్పుడు ప్రారంభిస్తారు.. బోనస్ కింద రూ.500 ఎప్పుడు ఇస్తారని ప్రశ్నించడంతో.. మంత్రి సీతక్క (Minister Seethakka) కౌంటర్ ఇచ్చారు. అధికారం చేపట్టి రెండు రోజులు కూడా కాకముందే.. తమ ప్రభుత్వాన్ని ప్రశ్నించడం హాస్యాస్పందగా ఉందని, హరీష్ రావుపై సీతక్క ఆగ్రహం వ్యక్తం చేశారు.. పాలన గురించి మీకు తెలియంది కాదని చురకలు అంటించారు..

మరోవైపు హరీష్ రావు ప్రశ్నకు సమాధానంగా.. మీ ప్రభుత్వ హయాంలో రైతులకు బోనస్ ఇచ్చారా? అని మంత్రి సీతక్క ప్రశ్నించారు. బీఆర్ఎస్ ప్రభుత్వం పాలనలో రైతులు అష్టకష్టాలు పడ్డారని తెలిపిన సీతక్క.. వడ్ల కొనుగోళ్లలో మోసం చేశారని, క్వింటాల్ కు 10 కిలోలు కటింగ్ చేసి.. రైతులను ఇబ్బంది పెట్టారని అన్నారు.

వర్షాలకు తడిసిన ధాన్యాన్ని కూడా కొనుగోలు చేయని బీఆర్ఎస్ ప్రభుత్వం.. రైతు సంక్షేమం మరచి రాష్ట్రాన్ని పాలించిందని సీతక్క ఆరోపించారు.. రైతుబంధు ద్వారా వందల ఎకరాలు ఉన్నవారికే బెనిఫిట్ అవుతుందని చెప్పారు. పెద్ద ఫాంహౌస్ ఓనర్లు, మాజీ మంత్రులు రైతుబంధు రాలేదని బాధపడుతున్నారని తెలిపారు. సీఎం రేవంత్ రెడ్డి (Revanth Reddy) సమీక్షించిన తర్వాత రైతులకు డబ్బులు చెల్లిస్తామన్నారు. బీఆర్ఎస్ ప్రభుత్వ హయాంలో ఇష్టానుసారంగా లక్షల కోట్లు అప్పులు చేశారని, విలాసవంతమైన భవనాలు కట్టుకుని దర్జాగా ఉన్నారని మంత్రి సీతక్క ఆగ్రహించారు..

తెలంగాణ (Telangana)లో కొత్తగా ఏర్పాటైన కాంగ్రెస్ (Congress) ప్రభుత్వంపై పలువురు బీఆర్ఎస్ నేతలు సంచలన వ్యాఖ్యలు చేస్తున్న విషయం తెలిసిందే. హస్తాన్ని ఇరుకున పెట్టడానికి కుట్ర జరుగుతున్నదని కొందరు కాంగ్రెస్ అభిమానులు ఆరోపిస్తున్నారు. ఈ క్రమంలో కాంగ్రెస్ ప్రభుత్వం పై.. బీఆర్ఎస్ ఎమ్మెల్యే కడియం శ్రీహరి చేసిన వ్యాఖ్యలు సంచలనంగా మారాయి.

మరోవైపు కడియం శ్రీహరి (Kadiam Srihari) చేసిన వ్యాఖ్యలను భారతీయ జనతా పార్టీ ఖండిస్తున్నట్లు ఆ పార్టీ రాష్ట్ర కార్యదర్శి రఘునందన్​ రావు తెలిపారు. ఎన్నికల్లో కాంగ్రెస్ పార్టీ బొటాబొటిన స్థానాలు గెలుచుకుందని ఆరోపించిన కడియం శ్రీహరి.. ఏడాదిలో బీఆర్ఎస్ (BRS)..బీజేపీ (BJP)..ఎంఐఎం పార్టీలను కలుపుకొని కొత్తగా ప్రభుత్వాన్ని ఏర్పాటు చేస్తుందని అనడం ప్రజాస్వామ్య ప్రక్రియకే పూర్తి విఘాతం కలిగించేలా ఉన్నాయని రఘునందన్ రావు (Raghunandan Rao) అన్నారు.

మజ్లిస్​తో అంటకాగే ఏ పార్టీతో బీజేపీ కలిసి ముందుకు వెళ్లదని రఘునందన్ స్పష్టం చేశారు. అసెంబ్లీలో ప్రొటెం స్పీకర్​గా అక్బరుద్దీన్ ఓవైసీని నియమించడం పట్ల బీజేపీ శాసన సభ్యులు ప్రమాణ స్వీకారం కూడా చేయలేదన్న విషయాన్ని గుర్తు చేశారు. మరోవైపు కొన్ని నెలల్లో జరగబోయే పార్లమెంట్ ఎన్నికలపై టీ బీజేపీ సీనియర్ నేత ఈటల రాజేందర్ కీలక వ్యాఖ్యలు చేశారు.

మరికొన్ని రోజుల్లో జరగనున్న పార్లమెంట్ ఎన్నికల్లో బీజేపీ 400 సీట్లు సాధిస్తుందని ఈటల రాజేందర్ జోస్యం చెప్పారు. అదీగాక తెలంగాణలో ఉన్న 17 పార్లమెంట్ స్థానాలను బీజేపీ క్లీన్ స్వీప్ చేయడం ఖాయమని సృష్టం చేశారు.. ఇక తాజాగా జరిగిన అసెంబ్లీ ఎన్నికల్లో.. సొంత ఇలాకా హుజురాబాద్‌తో పాటు.. గజ్వేల్‌లో కేసీఆర్‌పై పోటీ చేసిన ఈటల రాజేందర్.. ఊహించని విధంగా ఓటమి పాలయ్యారు.