Politics

తెలంగాణ (Telangana)లో కొత్త ప్రభుత్వం ఏర్పాటు వేగవంతం అయ్యింది. ఈ రెండు రోజుల్లో సీఎం ఎవరనేది క్లారిటీ రానుందని ప్రచారం జరుగుతుంది. ఈ నేపథ్యంలో గ్రేటర్‌ హైదరాబాద్ (Hyderabad) పరిపాలనలో కీలకమైన విభాగాల్లో మార్పులు చేర్పులు జరగనున్నట్టు తెలుస్తుంది. రాష్ట్రంలో కాంగ్రెస్ ప్రభుత్వం (Congress) ఏర్పాటు తర్వాత ప్రస్తుతం ఉన్న సిబ్బందికి స్థానచలనం జరిగే అవకాశాలు ఉన్నట్టు వార్తలు వస్తున్నాయి.

అయితే ఇప్పటి వరకు హెచ్‌ఎండీఏ (HMDA)కు పూర్తిస్థాయి కమిషనర్‌ లేకపోవడంతో సమస్యల పరిష్కారంలో జాప్యం జరుగుతుందనే టాక్ ఉంది. పూర్తిస్థాయి కమిషనర్‌ లేకపోవడంతో కొన్నాళ్లుగా హెచ్‌ఎండీఏలో పాలన గాడి తప్పిందనే విమర్శలు వెల్లువెత్తుతున్నాయి. రాష్ట్రంలో కొత్త ప్రభుత్వం రానున్న దృష్ట్యా హెచ్‌ఎండీఏకు నూతన కమిషనర్‌ను నియమించే అవకాశం ఉంది.

మరోవైపు జలమండలి ఎండీగా దానకిషోర్‌ బాధ్యతలు చేపట్టి ఆరేళ్లు దాటింది. ఈ క్రమంలో ఇక్కడి నుంచి బదిలీ చేసి కీలక విభాగాల్లో సేవలను ఉపయోగించుకునే అవకాశం ఉన్నట్లు సమాచారం. ఇక ఎన్నికల ముందే జీహెచ్​ఎంసీ కమిషనర్‌గా రోనాల్డ్‌ రాస్‌ బాధ్యతలు చేపట్టడంతో ఆయన్నే కొనసాగిస్తారా లేదా అనేది కొద్దిరోజుల్లో స్పష్టత రానున్నట్టు తెలుస్తుంది.

మరోవైపు ఎన్నికల సమయంలో సైబరాబాద్‌ కమిషనర్‌ స్టీఫెన్‌ రవీంద్రపై పీసీసీ అధ్యక్షుడు రేవంత్‌ రెడ్డి ఆరోపణలు చేసిన విషయం తెలిసిందే. కాగా ఆయన బదిలీ కూడా ఉంటుందని సమాచారం. ఇక నగర కమిషనర్‌ సందీప్‌ శాండిల్య ఎన్నికల సమయంలో బాధ్యతలు తీసుకున్నారు. రాచకొండ కమిషనర్‌ డీఎస్‌ చౌహాన్‌ (Rachakonda Cp Chauhan) కూడా ఏడాది కిందటే వచ్చారు. వీరిరువురిని కొనసాగిస్తారా? లేదా అనేది కొద్దిరోజుల్లో స్పష్టత రానుంది. అలాగే ఏడాది కిందట వచ్చిన నగర ట్రాఫిక్‌ విభాగం అదనపు కమిషనర్‌ సుధీర్‌బాబును కూడా బదిలీ చేసే అవకాశం ఉందని ప్రభుత్వ వర్గాల నుంచి సమాచారం..

తెలంగాణ (Telangana)లో బీఆర్ఎస్ ఓటమి పై నిజామాబాద్ ఎంపీ ధర్మపురి అరవింద్ స్పందించారు.. బీఆర్ఎస్ పార్టీ పతనం మొదలైందని సంచలన వ్యాఖ్యలు చేశారు. ప్రజల్లో బీఆర్ఎస్ పై అభిమానం తగ్గిపోయిందని తెలిపిన అరవింద్.. కేసీఆర్ ప్రతిపక్ష నేతగా కూడా రావొద్దు అని కోరుకుంటున్నట్టు వెల్లడించారు.. బీఆర్ఎస్ నేతల అహంకార ధోరణి వల్లే ఆ పార్టీ ఓటమిని మూటగట్టుకుందని తెలిపారు.

రాష్ట్రంలో ఏడాది క్రితం వరకు బీఆర్ఎస్ (BRS)కు బీజేపీ (BJP) ప్రత్యామ్నాయం అనే భావన ఉండేదని, కానీ బీజేపీ ఆ నమ్మకాన్ని కోల్పోయిందని కీలక వ్యాఖ్యలు చేశారు అరవింద్.. పార్టీ వైఫల్యం విషయంలో బీజేపీ అధిష్టానం లోటుపాట్లు పరిశీలించి, చర్చ చేయాల్సిన అవసరం ఉందని అభిప్రాయపడ్డారు. ఇక కేసీఆర్ (KCR) శకం ముగిసిందని, అందుకు సగం సంతోషంగా ఉందని అరవింద్ వెల్లడించారు.

దొరల గడీల నుంచి తెలంగాణకి విముక్తి లభించిందని తెలిపిన అరవింద్.. రాష్ట్రంలో హుందాతనంతో కూడిన పరిస్థితులు నెలకొంటాయని ఆశిస్తున్నట్టు వెల్లడించారు.. దాడుల సంస్కృతికి స్టాప్ పడుతుందని, భాష కూడా మారుతుందని భావిస్తున్నట్టు అరవింద్ తెలిపారు. ఇక రాష్ట్రంలో కాంగ్రెస్ జీరో స్థాయిలో ఉండేదని.. పీసీసీ పగ్గాలు రేవంత్ రెడ్డికి ఇచ్చాక కూడా కాంగ్రెస్ గెలుస్తుందనే నమ్మకం లేని పరిస్థితి నుంచి ఈ స్థాయికి చేరుకోవడం వెనక రేవంత్ కృషి ఎంతో ఉందని అరవింద్ (Aravind) తెలిపారు.

బీజేపీ, బీఆర్ఎస్ ఒకటేనన్న ఆరోపణ నిజం అని నమ్మి.. ఢిల్లీ లిక్కర్ స్కామ్ లో కవిత అరెస్ట్ కాకపోవడం వెనక బీజేపీ ఉందనే భావనతోనే ప్రజలు కాంగ్రెస్ పై ఆసక్తి చూపినట్టు అరవింద్ వెల్లడించారు. వచ్చే ఎన్నికల్లో బీజేపీ, కాంగ్రెస్ మధ్యనే పోటీ ఉంటుందని తెలిపారు.. బీఆర్ఎస్ బాల్కొండలో రూ.34 కోట్లు పంచిందని ఆరోపించిన అరవింద్.. బీఆర్ఎస్ పార్టీ పతనానికి ఇది ఆరంభం మాత్రమే అని విమర్శించారు..

తెలంగాణ (Telangana) అసెంబ్లీ ఎన్నికల్లో రికార్డ్ సృష్టించిన నియోజక వర్గం కామారెడ్డి (kamareddy)..ఇక్కడి నుంచి కేసీఆర్ (KCR).. రేవంత్ రెడ్డి (Revanth Reddy) బరిలోకి నిలవడం రాజకీయ వర్గాలలో పెను సంచలనానికి కారణం అయ్యింది. అయితే వీరిద్దరూ కాకుండా బీజేపీ అభ్యర్థి అనూహ్యంగా గెలవడం చర్చకు దారితీసింది. అయితే ఈ గెలుపు పై కిషన్‌రెడ్డి కీలక వ్యాఖ్యలు చేశారు.

కామారెడ్డిలో రాష్ట్ర ముఖ్యమంత్రి, కాబోయే ముఖ్యమంత్రిని ఓడించి తమ పార్టీ చరిత్ర సృష్టించిందని కిషన్‌రెడ్డి (Kishan Reddy) పేర్కొన్నారు. జాతీయ నాయకత్వం కామారెడ్డి ఫలితం పట్ల హర్షం వ్యక్తం చేసిందని తెలిపారు. 2024 కేంద్రంలో అధికారంలోకి వచ్చి మోడీ హ్యాట్రిక్ సాధిస్తారని కిషన్‌రెడ్డి ధీమా వ్యక్తం చేశారు. ఇందుకు ఉదాహరణ మూడు రాష్ట్రాల అసెంబ్లీ ఎన్నికల్లో బీజేపీ (BJP) విజయాన్నిపేర్కొన్నారు..

మరోవైపు అయిదేళ్ల పోరాట ఫలితమే వెంకట రమణారెడ్డికి విజయాన్ని అందించిందని కిషన్‌రెడ్డి గుర్తుచేశారు. ఈ ఎన్నికల ఫలితాలను విశ్లేషించుకుని, అధికార కాంగ్రెస్‌కు ప్రత్యామ్నాయంగా బీజేపీ భవిష్యత్ కార్యాచరణ ఉంటుందని కిషన్ రెడ్డి వివరించారు. వచ్చే ఐదేళ్లు క్రియాశీల, నిర్మాణాత్మక ప్రతిపక్ష పార్టీ పాత్ర పోషిస్తామని తెలిపిన కిషన్ రెడ్డి.. వచ్చే పార్లమెంట్ ఎన్నికల్లో మోడీకే తమ ఓటు వేస్తామనే సంకేతాన్ని తెలంగాణ ప్రజలు ఇచ్చినట్టు సృష్టం చేశారు..

తెలంగాణ (Telangana)లో ప్రభుత్వం ఇంకా ఏర్పాటు కూడా కాలేదు అప్పుడే.. హైదరాబాద్ (Hyderabad) ఉస్మానియా యూనివర్శిటీలో విద్యార్థులు ఆందోళనకు దిగారు. అధ్యక్షా ఈ పరిణామాలకు అర్థ ఏంటనే ప్రశ్నలు కూడా మొదలైయ్యాయి. కాగా ఉస్మానియా యూనివర్శిటీలో నెలకొన్న సమస్యల పై ఇప్పటికే బీఆర్ఎస్ (BRS) ప్రభుత్వంలో కూడా విద్యార్థులు ఆందోళన చేసిన విషయం తెలిసిందే..

కాగా కాంగ్రెస్ (Congress) ప్రభుత్వం ఏర్పాటు కాకముందే మరోసారి యూనివర్శిటీలో ఆందోళనలు మొదలైయ్యాయి. ఈ క్రమంలో విద్యార్థులు ఓయూ వీసీ చాంబర్లోకి చొచ్చుకెళ్లారు. ఇకనైనా ఓయూ వీసీ నియంతృత్వ పాలన వీడాలని.. రాత్రి 11 గంటల తర్వాత ఓయూలో గేట్స్ మూసివేయాలని, బారిగేడ్లు, కంచెలు తొలగించాలని విద్యార్థులు డిమాండ్ చేశారు. ఈ క్రమంలో వీసీ రవీందర్ కి, విద్యార్థులకు తీవ్ర వాగ్వివాదం జరిగింది.

మరోవైపు యూనివర్శిటీ విద్యార్థులు.. పెంచిన ఫీజులను వెంటనే తగ్గించాలని, పేద విద్యార్థులకు విద్య భారం కాకుండా చూడాల్సిన బాధ్యత ఓయూ అధికారులపై ఉందని వెల్లడించారు. ఉస్మానియా యూనివర్శిటీ (Osmania University)లో కనీస మౌలిక సదుపాయాలు కల్పించడంలో వీసీ విఫలమయ్యారని ఆరోపించారు. పరిపాలన భవనంలో ఉన్న బారిగేడ్లు, కంచెలు తొలగించాలని తెలుపుతూ.. వీసీకి వ్యతిరేకంగా నినాదాలు చేశారు.

బీఆర్ఎస్ ప్రభుత్వం ఉన్నప్పుడు ఓయూలో నిర్బంధాలు ఎక్కువగా ఉండేవని వెల్లడించిన విద్యార్థులు.. వాటన్నింటినీ తొలగించి విద్యార్థులకు అన్ని మౌలిక వసతులు కల్పించాలని కోరారు. కాంగ్రెస్ పార్టీ అధికారంలోకి రాగానే నిర్బంధాలన్ని తొలగిపోయి, ఓయూ వీసిని కలవాలంటే ఎలాంటి షరతులు ఉండకూడదని డిమాండ్ చేశారు.. కాగా ఈ ఆందోళనలో పరిశోధక విద్యార్థులు, కాంగ్రెస్ పార్టీ విద్యార్థి నాయకులు పాల్గొన్నారు.

రాష్ట్రంలో కాంగ్రెస్ (Congress) సుదీర్ఘ విరామం తర్వాత అధికారంలోకి రావడంతో ఆ పార్టీ నేతలు సంబురాలు చేసుకుంటున్నారు.. మరోవైపు స్వయంకృతాపరాధం తో ఓటమిని మూటగట్టున్న బీఆర్ఎస్ (BRS)..ఓటమికి చింతిస్తూ.. ఇక నుంచి ముందుకు ఎలా వెళ్లాలనే ప్రణాళికలను సిద్దం చేసుకుంటుంది. ఈ క్రమంలో రాష్ట్రంలో బలమైన ప్రతిపక్షంగా అవతరించాలనే ఆలోచనలు చేస్తున్నట్టు తెలుస్తుంది.

ఇప్పటికే కేటీఆర్ (KTR) ఈ విషయం గురించి ప్రస్తావించగా.. మాజీ మంత్రి నిరంజన్ రెడ్డి (Niranjan Reddy) కూడా కీలక వ్యాఖ్యలు చేశారు. కాంగ్రెస్ ప్రజల కోసం పనిచేయక పోయినా.. రాష్ట్రంలో ఒక్క గంట కరెంట్ ఆగినా వెంటాడుతాం.. వేటాడుతామని తెలిపారు. వనపర్తి (Wanaparthi) జిల్లా బీఆర్ఎస్ పార్టీ కార్యాలయంలో ఏర్పాటు చేసిన సమావేశంలో పాల్గొన్న నిరంజన్ రెడ్డి.. కాంగ్రెస్‌ ప్రభుత్వం ఏర్పడిన వెంటనే రైతుబంధు ఇవ్వాలని హుకుం జారీచేశారు..

మరోవైపు వ్యవసాయం గెలిచినప్పుడు ఎగరలేదు.. ఓడినప్పుడు బాధపడనని తెలిపిన నిరంజన్ రెడ్డి.. నా ఓటమి నన్ను బాధపెట్టలేదు. కానీ, కేసీఆర్‌ కామారెడ్డిలో ఓడిపోవడం బాగా కలచివేసిందన్నారు.. రాజకీయాల్లో గెలుపు, ఓటమిలు కామన్ అని పేర్కొన్న నిరంజన్ రెడ్డి.. ఓడిపోయానని ఎక్కడికి వెళ్లను.. గ్రామాల్లో తిరుగుతూ ప్రజా సమస్యల పరిష్కారానికి కృషి చేస్తామని పేర్కొన్నారు.

కాంగ్రెస్ పాలనలో ప్రజలు మోస పోయామనే విషయం తెలుసుకోవడానికి ఎక్కువ సమయం పట్టదని నిరంజన్ రెడ్డి స్పష్టం చేశారు. ఓటమికి గల కారణాలను విశ్లేషించుకుంటున్నామని.. ఎన్నికల ఫలితాలను సమీక్షించుకొని ముందుకెళ్తామన్నారు.. మళ్ళీ అధికారంలోకి రావడాని శాయశక్తులా ప్రయత్నిస్తామని తెలిపిన నిరంజన్ రెడ్డి.. ప్రజల పక్షాన పోరాటం చేసే సమయం ఆసన్నమైందని వెల్లడించారు..