Politics

తెలంగాణ (Telangana)లో కాంగ్రెస్ (Congress) విజయంతో రాజకీయ సమీకరణాలు మారుతాయని అంతా భావిస్తున్నారు. అధికార పార్టీలో ఉంటేనే అనుకున్నది జరుగుతుందనే భావన నేతల్లో ఉన్న విషయం తెలిసిందే. అందుకే గత రాజకీయాలను గమనిస్తే.. గెలిచింది ఒక పార్టీ నుంచి అయితే.. తర్వాత అధికార పార్టీలోకి వలస వచ్చిన వారు ఎందరో కనిపిస్తారు. మరి ఇప్పుడు రాష్ట్రంలో కాంగ్రెస్ అధికారంలోకి వచ్చింది.

ఈ క్రమంలో వలసల జోరు పెరుగుతుందనే ప్రచారం ఊపందుకుంది. అందులో మొదటి బోణి, భద్రాచలం బీఆర్ఎస్ ఎమ్మెల్యే (BRS MLA) తెల్లం వెంకట్రావ్ (Tellam Venkatarao) కొడుతున్నట్టు వార్తలు వస్తున్నాయి. కాగా తాను బీఆర్ఎస్ (BRS) వీడి కాంగ్రెస్‌లో చేరుతున్నట్లు వస్తోన్న వార్తలపై తెల్లం వెంకట్రావ్ క్లారిటీ ఇచ్చారు. తాను కాంగ్రెస్ పార్టీలో చేరడం లేదని స్పష్టం చేశారు. ఇక ఖమ్మం జిల్లా భద్రాచలం నుంచి బీఆర్ఎస్ తరపున తెల్లం వెంకట్రావు గెలుపొందారు.

మరోవైపు తాను కాంగ్రెస్‌లో చేరుతున్నట్లు తప్పుడు ప్రచారం చేస్తున్నారని తెల్లం వెంకట్రావ్ తెలిపారు. తనపై నమ్మకంతో కేసీఆర్ టికెట్ ఇచ్చారని.. బీఆర్ఎస్ పార్టీ వీడి తాను వెల్లనని వెంకట్రావ్ పేర్కొన్నారు. ఇదిలా ఉండగా ఉమ్మడి ఖమ్మం జిల్లాలోని మొత్తం 10 స్థానాల్లో 9 చోట్ల కాంగ్రెస్ విజయం సాధించగా.. ఒక్క భద్రాచలం నుండే బీఆర్ఎస్ అభ్యర్థి తెల్లం వెంకట్రావు విజయం సాధించారు.

కాగా కాంగ్రెస్ కీలక నేత అయిన పొంగులేటి శ్రీనివాస్ రెడ్డికి, తెల్లం వెంకట్రావు కీలక అనుచరుడనే పేరు ఉంది. ఈ నేపథ్యంలో తెల్లం వెంకట్రావు కూడా కారు దిగి హస్తం గూటికి చేరుతారనే టాక్ రాజకీయ వర్గాలలో జోరుగా వినిపిస్తుంది. కానీ వెంకట్రావు క్లారిటీ ఇచ్చారు. అయితే ఇలాంటి మాటలు ఎంత మంది నేతల నోటి నుంచి వినలేదు.. ముందు లేదంటారు.. తర్వాత నియోజక వర్గం అభివృద్ది కోసం తప్పలేదు అంటారని స్థానిక జనం అనుకుంటున్నారు..

– నెరవేరని బీజేపీ లక్ష్యం
– కాంగ్రెస్ వైపు మొగ్గు చూపిన ఓటర్
– హంగ్ అంటూ హడావుడి
– 8 సీట్లతోనే సరి
– పెరిగిన ఓట్ షేర్ తో కాస్త ఊరట

రాజకీయం ఓ చదరంగం ఆటలాడింది. చదరంగంలో ఎత్తులు సరిగ్గా వేయకుంటే ఒడిపోతారు. రాజకీయంలో కూడా సరైన సమయంలో ఎత్తులు వేయకున్నా అంతే. ఇదే నిజం బీజేపీని చూస్తే అర్థం అవుతుందని రాజకీయ విశ్లేషకులు అంటున్నారు. రాష్ట్రంలో అధికారమే లక్ష్యంగా.. కాంగ్రెస్, బీఆర్ఎస్ వ్యూహాలు, ప్రతి వ్యూహాలతో ఎన్నికల ప్రచారాన్ని హోరెత్తించాయి. బీజేపీ కూడా తగ్గేదేలేదన్నట్టు చేసింది.

ప్రధాని నరేంద్ర మోడీ, అమిత్ షా, జేపీ నడ్డా, బీజేపీ పాలిత రాష్ట్రాల ముఖ్యమంత్రులు, కేంద్ర మంత్రులు, జాతీయ నాయకులు తెలంగాణ ఎన్నికల ప్రచారంలో పాల్గొన్నారు. ఎన్నికల షెడ్యూల్ వెలువడిన తర్వాత ప్రధాని ఏకంగా 5 సార్లు రాష్ట్రానికి వచ్చి 8 బహిరంగ సభలు, ఒక రోడ్ షోలో పాల్గొన్నారు. కానీ, బీజేపీ ముఖ్య నేతలు మాత్రం ప్రభావం చూపించ లేకపోయారు. అదీగాక, వలసలను నిలువరించలేకపోవడం, చేరికలు లేకపోవడం, అధ్యక్ష మార్పు ఇలా అనేక కారణాలతో కమలం పార్టీ ఇమేజ్ అంతా డ్యామేజ్ అయిపోయింది.

ఆఖరికి ట్రిబుల్ ఆర్ అని పిలవబడుతున్న సిట్టింగ్ ఎమ్మెల్యేలైన రాజాసింగ్, రఘునందన్ రావు, ఈటల రాజేందర్ లలో.. రాజాసింగ్ ఒక్కరే గెలిచారు. రఘునందన్, ఈటల అపజయాన్ని మూటగట్టుకున్నారు. రెండు స్థానాల్లో పోటీ చేసిన ఈటల రాజేందర్ సొంత నియోజకవర్గమైన హుజూరాబాద్ లో ఓటమి చవిచూశారు. ఈటల ఓవర్ కాన్ఫిడెన్స్, ఒంటెద్దు పోకడలు ఓటమికి కారణాలుగా చర్చలు జరుగుతున్నాయి. మరోవైపు, ఎమ్మెల్యేలుగా పోటీ చేస్తున్న ఎంపీలు బండి సంజయ్, అరవింద్, సోయం బాపురావు కూడా ఈ ఎన్నికల్లో ప్రభావం చూపలేకపోయారు.

కిషన్ రెడ్డి సొంత నియోజకర్గమైన అంబర్ పేటలో కూడా ఆ పార్టీ అభ్యర్థి కృష్ణ యాదవ్ మూడో స్థానానికి పరిమితమయ్యారు. బీజేపీ, ఆశించిన స్థానాలు దక్కకపోయినా ఓట్ షేర్ మాత్రం సాధించింది. కానీ, పార్టీ ముఖ్యనేతలు వెనుక పడటం మాత్రం మింగుడుపడని అంశంగా మారింది. బండి సంజయ్ ని బీజేపీ అధిష్టానం రాష్ట్ర అధ్యక్ష పదవి నుంచి తొలగించి రాంగ్ టర్న్ తీసుకుందని.. లేకుంటే మరికొన్ని స్థానాల్లో విజయం సాధించేదని రాజకీయ విశ్లేషకుల అభిప్రాయం.