Politics

తెలంగాణ (Telangana)లో బీఆర్ఎస్ (BRS) నేతలు ఎన్నికల ప్రచారంలో దూసుకుపోతున్నారు. ఇప్పటికే ప్రచారంలో ప్రతిపక్షాలపై తీవ్ర విమర్శలు గుప్పిస్తూ గెలిచి హ్యాట్రిక్ కొట్టాలని చూస్తున్నారు. కానీ పంటికింద రాయిలా కాంగ్రెస్ మారిందని భావిస్తున్న బీఆర్ఎస్ ఈ ఎన్నికలను ఛాలెంజ్ గా తీసుకున్నట్టు తెలుస్తుంది. మరోవైపు కేటీఆర్(KTR)..హరీష్ రావు (Harish Rao) విరామం లేకుండా ప్రచారాలు నిర్వహిస్తూ.. ప్రజల్లో బీఆర్ఎస్ చరిష్మా తగ్గకుండా చూసుకుంటున్నారు.

మరోవైపు కోరుట్ల నియోజకవర్గంలో నిర్వహిస్తున్న ఎన్నికల ప్రచారంలో పాల్గొన్న కవిత (Kavitha).. ప్రతిపక్షాల పై విరుచుకుపడ్డారు. తెలంగాణను దొంగల చేతుల్లోకి పోనివ్వద్దని అన్నారు. ఎమ్మెల్యే కల్వకుంట్ల విద్యాసాగర్ రావు, బీఆర్ఎస్ అభ్యర్థి కల్వకుంట్ల సంజయ్ తో కలిసి కవిత బండలింగాపూర్ గ్రామంలో ఎన్నికల ప్రచారం నిర్వహించారు. సీఎం కేసీఆర్ (KCR) అధికారం చేపట్టాక గ్రామాల్లో చెరువులు నిండుకుండలా మారాయని కవిత తెలిపారు.

చెరువు ఎండిపోయినప్పుడు కప్పలు అక్కడి నుంచి వెళ్లిపోతాయి. కానీ చేపలు మాత్రం చెరువు నిండినా ఎండినా అక్కడే ఉంటాయని తెలిపిన కవిత.. బీఆర్ఎస్ పార్టీ వాళ్లు చేపల్లాంటి వాళ్లని, కాంగ్రెస్, బీజేపీ వాళ్లు కప్పల వంటి వాళ్లని విచిత్ర పోలికతో విమర్శించారు.. చెరువులు ఎండిన నాడు ప్రజలతో ఉన్న బీఆర్ఎస్.. చెరువులు నిండిన నాడు కూడా ప్రజలతోనే ఉందని వివరించారు.

మరోవైపు బీజేపీ గెలిచినా లాభం లేదని, బీజేపీ అభ్యర్థి గెలిచినా ఒంటి కొమ్ము సొంటికాయలా ఉంటారు కానీ అధికారంలోకి వచ్చేది లేదని స్పష్టం చేశారు. కర్ణాటకలో కాంగ్రెస్ పార్టీ వంద మాటలు చెప్పి అధికారంలోకి వచ్చిందని, కానీ ఒక్కటి కూడా నెరవేర్చలేదని కవిత ఆరోపించారు. కాంగ్రెస్, బీజేపీ మాటమీద నిలబడే పార్టీలు కాదని.. బీఆర్ఎస్ గెలిస్తే ప్రజల బతుకులు బాగుంటాయని కవిత అన్నారు.

ఎన్నికల ప్రచారంలో నేతలు ఒకరి తప్పులు ఒకరు ఎత్తి చూపుకోవడంతోనే సరిపోతుందని.. ఇన్నాళ్లుగా గుర్తుకు రాని విషయాలన్ని ఇప్పుడే గుర్తుకు వచ్చినట్టు చెబుతున్నారని జనం అనుకుంటున్నారు. కాగా ప్రస్తుతం ప్రతిపక్షాలను చీల్చి చెండాడితేనే ఓట్లు రాబట్టు కోవచ్చు అనే ఫార్మాట్ లో ఎన్నికల బరిలో ఉన్న అభ్యర్థులు భావిస్తున్నట్టు ముచ్చటించుకుంటున్నారు.

మరోవైపు కాంగ్రెస్ (Congress)కు దమ్కిలిస్తూ బీఆర్ఎస్ (BRS) అభ్యర్థులు ప్రచారాలు చేసుకోవడం జనాల్లో ఆసక్తిగా మారింది. ఈ క్రమంలో జనగామ (Jnagam) జిల్లాలోని పలు గ్రామాల్లో ఎన్నికల ప్రచారం నిర్వహించిన మంత్రి ఎర్రబెల్లి (Errabelli) కాంగ్రెస్ పై కీలక విమర్శలు చేశారు. పాలకుర్తి సభలో ప్రజలను తన్నిన వ్యక్తి రేవంత్ రెడ్డి అని ఆరోపించిన ఎర్రబెల్లి.. సీఎం కేసీఆర్ చేస్తున్న అభివృద్ధిని చూసి మరోసారి BRS పార్టీని ఆశీర్వదించాలని తెలిపారు.

కాంగ్రెస్ పరిపాలిత ప్రాంతాలలో సరిగ్గా కరెంటు కూడా ఇవ్వని కాంగ్రెస్ గురించి.. రేవంత్ రెడ్డి (Revanth Reddy) బ్రోకర్ మాటలు చెబుతున్నాడాని ఎర్రబెల్లి విమర్శించారు. రాష్ట్రంలో వచ్చేది బీఆర్ఎస్ ప్రభుత్వమే.. పాలకుర్తి లో ఎగిరిది బీఆర్ఎస్ జెండానే అని దయాకర్ ధీమా వ్యక్తం చేశారు. మరోవైపు జనగామ జిల్లా పాలకుర్తి మండలం సిరిసన్న గూడెం, కంబాలకుంట తండాను ఎన్నికల ప్రచారంలో భాగంగా పర్యటించిన ఎర్రబెల్లి దయాకర్.. కేసీఆర్ రాకముందు తండా పరిస్థితి ఎలా ఉందో, ఇప్పుడు ఎలా ఉందో గుర్తు చేసుకోవాలని అక్కడి ప్రజలను కోరారు.

తాగునీరు లేక, విష జ్వరాలతో బాధపడుతున్న తండా ప్రజలను గత ప్రభుత్వాలు ఏనాడూ పట్టించుకోలేదని ఎర్రబెల్లి ఆరోపించారు. ప్రత్యేక తెలంగాణ ఏర్పడిన తర్వాత కేసీఆర్ హామీ మేరకు తండాలను పంచాయతీలుగా మార్చి లంబాడీలకు విద్య, ఉద్యోగాల్లో 10 శాతం రిజర్వేషన్లు కల్పించామని వెల్లడించారు. కేసీఆర్ మళ్లీ అధికారంలోకి వస్తే గిరిజనులతో పాటు రేషన్ కార్డులు ఉన్న వారికి రూ.400లకే సన్న బియ్యం, సిలిండర్లు ఇస్తామని హామీ ఇచ్చారు. అనంతరం వరంగల్ జిల్లా మాజీ ఎంపీపీ కంజర ఐలయ్య రాయపర్తితో పాటు మరికొందరు ఎర్రబెల్లి సమక్షంలో బీఆర్‌ఎస్‌ కండువా కప్పుకున్నారు.

తాగి పడుకునే కేసీఆర్‌(Kcr)ను అల్లాతో పోలుస్తారా? అని బీజేపీ జాతీయ ప్రధాన కార్యదర్శి బండి సంజయ్(Bandi Sanjay) సంచలన వ్యాఖ్యలు చేశారు. బీఆర్ఎస్ అధికారంలోకి రాకపోతే నమాజ్ మైకులు బంద్ అవుతాయని ఇటీవల ఎన్నికల ప్రచారంలో మంత్రి కేటీఆర్ చేసిన వ్యాఖ్యలకు కౌంటర్ ఇచ్చారు. పటాన్ చెరులో గురువారం పర్యటించిన ఆయన మాట్లాడారు.

వినాయక చవితికి మైకులు పెట్టుకోవాలంటే పోలీసులు పర్మిషన్ తీసుకోవాలా? అని బండి సంజయ్ ప్రశ్నించారు. ఆలయాల్లో పూజలు చేసే సాధుసంతులు, పూజారులు బయటికి రావాల్సిన అవసరం ఉందన్నారు. ముస్లిం మత పెద్దల వలే సాధువులు బయటకు రావాలని పిలుపునిచ్చారు. ఎన్నికలు రాగానే కేసీఆర్‌కు రామజన్మ భూమి గుర్తుకొస్తుందని బండి సంజయ్ ఎద్దేవా చేశారు.

బీఆర్ఎస్ నేతలు మసీదుకు వచ్చి నమాజ్ చేస్తున్నారని ముస్లిం సమాజం వారికి ఓట్లు గుద్దుతున్నారన్నాని బండి సంజయ్ అన్నారు. మసీదుకు పోయినా.. రాజకీయ నాయకులు టోపీలు పెట్టుకుని అల్లాను మొక్కడం లేదన్నారు. కనీసం అల్లా గురించి వారికి తెలియదన్నారు. టోపీ పెట్టుకొని సీతారాముడికే దండం పెడుతున్నారని అన్నారు. కేసీఆర్ అవసరం అనుకుంటే రామాయణాన్ని మార్చి అయోధ్యలో రాముడు పుట్టలేదని తిరిగి చరిత్ర రాస్తాడని వ్యాఖ్యానించారు.

బీజేపీని గెలిపిస్తే మియాపూర్ నుంచి సంగారెడ్డి వరకు మెట్రో రైలు వేస్తామని తెలిపారు. హైదరాబాద్‌కు మెట్రో ఇచ్చేందే ప్రధాని మోడీ అన్నారు. కేసీఆర్ ఉద్యోగాలు ఇస్తానని, నిరుద్యోగ భృతి ఇస్తానని యువతను మోసం చేశాడని ఆరోపించారు. యువతకి ఉద్యోగాలు రాలేదు కానీ కేసీఆర్ కుటుంబంలో మాత్రం అందరికీ ఉద్యోగాలు వచ్చాయన్నారని విమర్శించారు. మోడీ 6 లక్షల మందికి ఉద్యోగాలు ఇచ్చారని బండి సంజయ్ గుర్తుచేశారు.

సీఎం కేసీఆర్(Cm kcr), మంత్రి మల్లారెడ్డి(Minister Mallareddy) మేడ్చల్‌ జిల్లాలో తోడు దొంగల్లా భూకబ్జాలకు పాల్పడుతున్నారని టీపీసీసీ అధ్యక్షుడు రేవంత్‌రెడ్డి ఆరోపించారు. కాంగ్రెస్ పార్టీ(Congress) ఎన్నికల ప్రచారంలో భాగంగా జవహార్‌నగర్‌లో నిర్వహించిన కార్నర్ ‌మీటింగ్‌లో రేవంత్ ‌మాట్లాడారు.

సీఎం కేసీఆర్ జవహార్ నగర్ ప్రజలకు ఇచ్చిందేమీ లేదని.. ఒక్క డంపింగ్ యార్డు తప్పా.. అంటూ ఎద్దేవా చేశారు. డంపింగ్ యార్డు తరలింపునకు కోర్టు ఆదేశాలు ఇచ్చినా ప్రభుత్వం చర్యలు తీసుకోలేదని మండిపడ్డారు. కరెంట్, రైతు బంధుపై- కేసీఆర్ మతిలేని మాటలు మాట్లాడుతున్నారంటూ ఆరోపించారు.

రాష్ట్రంలో పేదలు బతికే పరిస్థితి లేదని రేవంత్ ఆవేదన వ్యక్తం చేశారు. నియోజకవవర్గంలో మల్లారెడ్డి పేదోళ్ల గుడిసెలు కూల్చి.. వారికి నిలువ నీడ లేకుండా చేశాడని దుయ్యబట్టారు. పేదలపై ప్రతాపం చూపే అధికారులు చెరువులను మింగిన మల్లారెడ్డిపై చర్యలెందుకు తీసుకోరని ఆగ్రహం వ్యక్తం చేశారు. జవహర్ నగర్ డంపింగ్ యార్డు సమస్యకు శాశ్వత పరిష్కారం చూపాల్సిన అవసరం ఉందన్నారు.

చెరువుల పక్కన భూములు కొని చెరువులను మింగిన ఘనుడు మల్లారెడ్డి అని ఆరోపించారు. టికెట్లు అమ్ముకున్న మల్లారెడ్డికి కేసీఆర్ మళ్లీ ఎమ్మెల్యే టికెట్ ఇచ్చాడని దుయ్యబటారు. మరీ కేసీఆర్ ఎన్ని వందల కోట్లకు టికెట్ అమ్ముకున్నారని ప్రశ్నించారు. కేసీఆర్ లక్ష కోట్లతో కట్టిన కాళేశ్వరం ప్రాజెక్టు మూడేళ్లకే కుంగిందని.. తెలంగాణను ఆగం చేసిన కేసీఆర్‌ను పొలిమేరలు దాటే వరకు తరమాలని ప్రజలను కోరారు.

రాష్ట్ర ప్రభుత్వం తెస్తామన్న ఐటీ పార్కు ఎక్కడికి పోయిందని రేవంత్ ప్రశ్నించారు. ముదిరాజ్‌లకు ఒక్కసీటూ ఇవ్వలేదన్నారు. రాష్ట్రం కేసీఆర్‌ను ప్రజలు నమ్మే స్థితిలో లేరన్నారు. కాంగ్రెస్ అధికారంలోకి రాగానే.. సోనియా గాంధీ ప్రకటించిన ఆరు హామీలను అమలుచేసి తీరుతామన్నారు. తెలంగాణ సమగ్ర అభివృద్ధి కోసం – 2050 విజన్‌తో ముందుకెళ్తామని చెప్పారు.