Politics

తెలంగాణలో అసెంబ్లీ ఎన్నికల(Telangana Assembly Elections-2023) నేపథ్యంలో పాఠశాలలకు సెలవులు(School Holidays) రానున్నాయి. పోలింగ్ జరిగే ప్రభుత్వ పాఠశాలలకు సెలవులు ఇచ్చే విషయాన్ని ఎన్నికల కమిషన్‌ సూచన మేరకు అధికారంగా ప్రకటించనున్నారు. పోలింగ్ నవంబర్ 30న ఉండగా ఆ రోజుతో పాటు, ఒక రోజు ముందు అంటే.. నవంబర్ 29న కలిపి పాఠశాలలకు రెండు రోజులు సెలవులు ప్రకటించనున్నట్లు తెలుస్తోంది.

రాష్ట్ర వ్యాప్తంగా ఉన్న ప్రభుత్వ పాఠశాలల్లో మొత్తం 1.06 లక్షల మంది ఉపాధ్యాయులు ఉన్నారు. వారిలో 80శాతం మంది ఉపాధ్యాయులు ఎన్నికల విధుల్లో పాల్గొననున్నారు. అయితే పోలింగ్‌ కేంద్రాలుగా ఉండే ప్రభుత్వ పాఠశాలలకు సిబ్బంది ఒకరోజు ముందుగానే చేరుకోవాల్సి ఉంటుంది. నవంబర్‌ 29న ఉదయం 7 గంటలలోపే ఈవీఎంలను తీసుకునేందుకు ఉపాధ్యాయులు నిర్ణీత కేంద్రంలో రిపోర్టింగ్ చేయాల్సి ఉంటుంది. దీంతో పాఠశాలలకు నవంబర్‌ 29, 30 తేదీల్లో సెలవులు ఇవ్వాల్సిందే.

అయితే, ఉపాధ్యాయ సంఘాలు మరో రోజు సెలవు కోరుతున్నాయి. ఎన్నికల విధులు ముగించుకుని ఇంటికి చేరేసరికి అర్ధరాత్రి అవుతుందని, డిసెంబర్ 1న సెలవు ఇవ్వాలని రాష్ట్ర గెజిటెడ్‌ ప్రధానోపాధ్యాయుల సంఘం అధ్యక్షుడు రాజభాను చంద్రప్రకాశ్, తెలంగాణ మోడల్‌ స్కూల్‌ టీచర్స్‌ అసోసియేషన్‌ (టీఎంఎస్‌టీఏ) రాష్ట్ర అధ్యక్షుడు భూతం యాకమల్లు ఎన్నికల సంఘాన్ని విన్నవించారు.

ఎన్నికల కమిషన్ రాష్ట్ర వ్యాప్తంగా ఓటర్ల తుది జాబితాను సిద్ధం చేస్తోంది. ఇప్పటికే విడుదలైన గ్రేటర్‌ హైదరాబాద్‌ జాబితాలో మొత్తం 15 నియోజకవర్గాలు ఉండగా.. ఇక్కడ మొత్తం 45,36,852 మంది ఓటర్లు ఉన్నారు. తాజా ఓటర్ల జాబితాలో 77,522 మంది కొత్త ఓటర్లు ఉన్నారు. అందులు పురుషులు 23,22,623 మంది, మహిళలు 22,13,902, దివ్యాంగులు 20,207 మంది, ఎన్‌ఆర్‌ఐలు 883, సర్వీస్‌ ఓటర్లు 404, ట్రాన్స్‌జెండర్‌ ఓటర్లు 327, 80 ఏళ్లు పైబడిన ఓటర్లు 80,037మంది ఉన్నట్లు అధికారులు తెలిపారు.

మరోవైపు, ఎన్నికలు దగ్గర పడుతుండడంతో మద్యం సరఫరాపై ఎన్నికల సంఘం ఫోకస్ చేసింది. తెలంగాణలోని 18 మద్యం డిస్టిలరీలపై నిఘా పెట్టినట్లుగా ఎక్సైజ్‌ శాఖ జాయింట్ కమిషనర్ సురేశ్ తెలిపారు. 10 టీమ్ లను ఏర్పాటు చేసి ఒక్కో టీమ్ కి ఎక్సైజ్ సూపరింటెండెంట్‌ను ఇన్‌చార్జిగా నియమించినట్లు చెప్పారు. లిక్కర్ ఉత్పత్తి, సప్లై, సంబంధింత రిజిస్టర్లను పరిశీలించినట్లు వివరించారు. సీసీ కెమెరాలను పరిశీలించడంతో పాటు మద్యం అక్రమ రవాణా జరగకుండా నిఘా పెట్టినట్లుగా వెల్లడించారు.

ఎన్నికల(Telangana Elections) వేళ రాజకీయ నాయకుల ఇళ్లలో పోలీసుల దాడులు కలకలం రేపుతున్నాయి. తాజాగా హైదరాబాద్‌లోని హయత్‌నగర్‌లో కాంగ్రెస్‌ నేత మధుయాష్కీ గౌడ్(Madhu yashki goud) గెస్ట్‌ హౌస్‌లో పోలీసులు అర్ధరాత్రి సోదాలు నిర్వహించారు. దీంతో అర్ధరాత్రి అక్కడ టెన్షన్ వాతావరణం చోటుచేసుకుంది.

మధుయాష్కీ ఇంట్లో పెద్ద మొత్తంలో డబ్బు ఉందన్న సమాచారంతో పోలీసులు దాడికి పాల్పడినట్లు తెలుస్తోంది. అయితే అసలు ఫిర్యాదు ఎవరు ఇచ్చారు? సెర్చ్ వారెంట్ ఉందా? అంటూ మధుయాష్కీ పోలీసులను ప్రశ్నించారు. ఈ సోదాల్లో మధుయాష్కి ఇంట్లో రూ.5.5లక్షల నగదును గుర్తించి సీజ్ చేశారు. లెక్కలు చెప్పాలని మధుయాష్కిని కోరారు.

ఎలాంటి సెర్చ్ వారెంట్ లేకుండా మధుయాష్కీ ఇంటిపై దాడి చేయడంపై కాంగ్రెస్‌ శ్రేణులు ఆగ్రహం వ్యక్తం చేస్తున్నాయి. ఓటమి భయంతోనే బీఆర్ఎస్, బీజేపీలు కలిసి ఇలాంటి చర్యలకు పాల్పడుతున్నారని మధుయాష్కీ గౌడ్ ఆగ్రహం వ్యక్తం చేశారు. పోలీసులపై ఎలక్షన్‌ కమిషన్‌కు ఫిర్యాదు చేస్తామని తెలిపారు.

విషయం తెలుసుకున్న కాంగ్రెస్ శ్రేణులు సైతం మద్దతుగా మధుయాష్కీ నివాసం వద్దకు చేరుకున్నాయి. ఇది ఎమ్మెల్యే సుధీర్‌రెడ్డి పనే అని వారు ఆరోపిస్తున్నారు. ఇదిలా ఉంటే.. అర్ధరాత్రి మధుయాష్కీ గౌడ్ నివాసం ఇంటిపై పోలీసుల దౌర్జన్యానికి పాల్పడ్డారని తెలంగాణ కాంగ్రెస్‌ ట్వీట్‌ చేసింది.

అర్థరాత్రి మధుయాష్కీ గౌడ్ నివాసం ఇంటిపై పోలీసుల దౌర్జన్యం. అనుమతి లేకుండా ఇంట్లోకి చొరపడ్డారు.

సోదాల పేరుతో కుటుంబ సభ్యులను భయబ్రాంతులకు గురిచేసిన పోలీసులు.

ఎలాంటి సెర్చ్ వారెంట్ లేకుండా మధుయాష్కీ గౌడ్ గారి అర్థరాత్రి ఇంట్లోకి వచ్చి ఇబ్బందులకు గురి చేసిన పోలిసులు.#ByeByeKCR pic.twitter.com/rGPr14TImo

— Telangana Congress (@INCTelangana) November 14, 2023

కాంగ్రెస్ (Congress) పార్టీ నేతలు ఎన్నికల ప్రచారంలో గరం గరం మాటలతో దూసుకుపోతున్నారు.. బీఆర్ఎస్ (BRS)పై ఏకధాటిగా విమర్శలు చేస్తూ.. కారు టైర్లను పంక్చర్ చేయడానికి పదునైన మాటలు వాడుతున్నారని అనుకుంటున్నారు. ఇప్పటికే రేవంత్ (Revanth) ఫామ్ లో ఉండగా.. కాంగ్రెస్ పార్టీ మునుగోడు అభ్యర్ధి కోమటిరెడ్డి రాజగోపాల్ రెడ్డి రంగంలోకి దిగారు.. టూర్ కి వెళ్ళినట్టు బీజేపీలోకి వెళ్లి వచ్చిన రాజగోపాల్ రెడ్డి ఇప్పుడే చార్జ్ అయిన రిమోట్ కారులా ప్రచారంలో దూసుకుపోతున్నారని అనుచరులు ఆనందపడుతున్నారు.

మునుగోడు మండలం కొరటికల్, గూడపూర్, కల్వలపల్లి, పులిపలుపుల గ్రామాల్లో ఎన్నికల ప్రచారం నిర్వహించిన కోమటిరెడ్డి రాజగోపాల్ రెడ్డి (Komati Reddy Rajagopal Reddy) బీఆర్ఎస్ పై కీలక వ్యాఖ్యలు చేశారు. చెయ్యి గుర్తు జిందా తిలిస్మాత్ లాంటిదని.. ఇది అన్ని సమస్యలకు పరిష్కారం చూపుతుందని తెలిపారు. అసెంబ్లీలో ఏ ఎమ్మెల్యే కొట్లాడలేనంతగా మునుగోడు (Munugodu) సమస్యల పరిష్కారం కోసం నేను పోరాడానని రాజగోపాల్ రెడ్డి వెల్లడించారు.

మునుగోడు అభివృద్ధి కోసం ఎమ్మెల్యే పదవికి 18 నెలల ముందు రాజీనామా చేశానని రాజగోపాల్ రెడ్డి తెలిపారు. నా రాజీనామా దెబ్బకి కేసీఆర్, కేటీఆర్ (KTR) 119 మంది ఎమ్మెల్యేలను మీ కాళ్ళ దగ్గరికి తీసుకొచ్చానన్నారు. మునుగోడు నియోజకవర్గానికి మూడున్నర ఏళ్లలో ఒక్క రూపాయి కూడా ఇవ్వని కేసీఆర్ నా రాజీనామాతో 500 కోట్ల అభివృద్ధికి నిధులు ఇచ్చాడని రాజగోపాల్ రెడ్డి అన్నారు.

బీఆర్ఎస్, బీజేపీ (BJP) ఒక్కటే అని అర్థం అయ్యిందన్న రాజగోపాల్ రెడ్డి.. మద్యం కుంభకోణంలో కవితను అరెస్టు చేయకపోవడానికి కారణం వారి మధ్య ఉన్న ఒప్పందం అని విమర్శించారు. 6 గ్యారంటీ పథకాల గురించి ప్రజలకు వివరించారు. మీ ఓటు పంచర్ కాబోయే కారుకేస్తారా.. అన్నం పెట్టే చేయికేస్తారా తేల్చుకోండని పేర్కొన్నారు.. ఈ సందర్భంగా మునుగోడులో కారు మునగడం ఖాయమని రాజగోపాల్ రెడ్డి అన్నారు.

రేవంత్ రెడ్డి (Revanth Reddy) టీపీసీసీ (TPCC) చీఫ్ గా నియామకం అయిన తరువాత దూకుడు పెంచారు. నిత్యం ప్రజల్లోనే ఉంటూ ప్రతిపక్ష పార్టీలపై తనదైన శైలిలో విమర్శనాస్త్రాలు సంధిస్తున్నారు. రాష్ట్రంలో కాంగ్రెస్ (Congress)ను అధికారంలోకి తీసుకురావడమే లక్ష్యంగా సాగుతున్న రేవంత్.. బీఆర్ఎస్ (BRS)పై అప్డేట్ అస్త్రాలతో విరుచుకు పడుతున్నారని కార్యకర్తలు సంబరపడుతున్నారు. స్టేషన్ ఘన్ పూర్‌ (Station Ghanpur)లో జరిగిన కాంగ్రెస్ విజయభేరి సభలో పాల్గొన్న రేవంత్ రెడ్డి.. గులాబీ దళం పై కీలక వ్యాఖ్యలు చేశారు.

నిరుద్యోగ యువత అడవిలో అన్నలుగా మారడానికి తెలంగాణ కాంగ్రెస్ ఇవ్వలేదని రేవంత్ మండిపడ్డారు. నమ్మించి ఇంత కాలం మోసం చేసిన బీఆర్ఎస్ పాలనపై.. ప్రజలకు నమ్మకం పోయిందన్న రేవంత్.. ఉద్యోగాలు రాని యువత అంతా కాంగ్రెస్ గెలవకపోతే అడవిలో అన్నలుగా మారే ప్రమాదం ఉందని హెచ్చరించారు.. రాష్ట్రంలో ఉన్న 30 లక్షల మంది నిరుద్యోగులు.. ఉద్యోగాల కోసం పోరాడి అలసిపోయారని ఆగ్రహం వ్యక్తం చేశారు.

శ్రీలంకలో నాయకులకు జరిగిన సన్మానం రాష్ట్రంలో బీఆర్ఎస్ నాయకులకు జరిగే రోజులు దగ్గరలో ఉన్నాయని రేవంత్ గుర్తు చేశారు. అలాంటి పరిస్థితే వస్తే ప్రభుత్వంలో ఒక్కరు కూడా ఉండరని సంచలన వ్యాఖ్యలు చేశారు. కాంగ్రెస్ పై తప్పుడు ప్రచారాలు చేస్తూ.. రైతుబంధు బంద్ అవుతుందని బీఆర్ఎస్ నేతలు దుష్ప్రచారం చేయడం సిగ్గు చేటని రేవంత్ మండిపడ్డారు.

కాంగ్రెస్ ప్రభుత్వం రైతు ప్రభుత్వమని పేర్కొన్న రేవంత్.. పార్టీ అధికారంలోకి వస్తే రైతులతో పాటు కౌలు రైతులకు సైతం భరోసా ఇస్తామని.. ఉపాధి హామీ కూలీకి వెళ్లే ప్రతి ఒక్కరికీ ఏడాదికి రూ.12 వేలు వచ్చేలా చేస్తామని తెలిపారు. ఈ ఎన్నికల్లో కేసీఆర్ (KCR) ఓడిపోతే 200 యూనిట్ల లోపు విద్యుత్ వాడే ఇళ్లకు కరెంట్ బిల్లు కట్టాల్సిన అవసరం లేకుండా చేస్తామన్నారు. మరోవైపు ఇల్లు కట్టుకునే వారికి రూ.5 లక్షల ఆర్థిక సహాయం అందజేస్తామని తెలిపారు. అభివృద్థి పేరుతో దోపిడి చేస్తున్న దళారులు కావాలా.. ప్రజా క్షేమమే తమ క్షేమంగా భావించే కాంగ్రెస్ కావాలో తేల్చుకొందని రేవంత్ వెల్లడించారు..

సీఎం కేసీఆర్(Cm Kcr) ఇంద్రలోకాన్ని చూపిస్తూ ప్రజలను మభ్యపెడుతున్నాడని కాంగ్రెస్ పాలేరు ఎమ్మెల్యే అభ్యర్థి పొంగులేటి శ్రీనివాసరెడ్డి(Ponguleti Srinivasa Reddy) విమర్శించారు. ఖమ్మం జిల్లా తిరుమలాయపాలెం మండలంలో మంగళవారం ఆయన ఎన్నికల ప్రచారం నిర్వహించారు. ఈ సందర్భంగా సీఎం కేసీఆర్‌పై కీలక వ్యాఖ్యలు చేశారు.

2014కు ముందు కేసీఆర్ ఆర్థిక పరిస్థితి ఏంటి?.. గడిచిన తొమ్మిదిన్నర సంవత్సరాల్లో కేసీఆర్ ఆర్థిక పరిస్థితి ఏంటో ప్రజలు ఆలోచించాలన్నారు. ఎప్పుడు ఎన్నికలు వచ్చినా.. తెలంగాణ యాసలో మాట్లాడుతూ ప్రజలను మభ్య పెడుతుంటాడని.. ప్రజలు జాగ్రత్తగా ఉండాలని చెప్పారు.

దొరలకు, నాలుగు కోట్ల తెలంగాణ ప్రజలకు మధ్య ఎన్నికల యుద్ధం జరుగుతోందని అని పొంగులేటి వ్యాఖ్యానించారు. ఈ ఎన్నికల పోరులో ప్రజలు జాగ్రత్తగా ఉండాలని సూచించారు. కేసీఆర్ చేస్తున్న ప్రయత్నాలను నమ్మవద్దని హితవు పలికారు. తొమ్మిదేళ్ల పాలనలో కేసీఆర్ ష్ట్రానికి ఒరగబెట్టింది ఏమీ లేదన్నారు.

ఏంతో మంది కవులు, కళాకారులు, ఉద్యమకారులు, విద్యార్థుల బలిదానం ఫలితంగా తెలంగాణ రాష్ట్రం వచ్చిందన్నారు. కానీ కేవలం ఒకే ఒక్క కుటుంబం తమ ప్రయోజనాల కోసం ప్రజలను వాడుకుంటుందని ఆరోపించారు. కుటుంబ పాలనను అంతం చేయాలని పిలుపునిచ్చారు.