Politics

తెలంగాణ (Tekangana) సీఎం కేసీఆర్ (CM KCR) ఎన్నికల ప్రచారాన్ని ముమ్మరం చేశారు. ఇప్పటిదాకా రోజుకి 2, 3 సభలు కవర్ చేసిన ఆయన.. సోమవారం నుంచి 4 సభలకు ప్లాన్ చేశారు. ఈ క్రమంలోనే మహబూబ్ నగర్ (Mahabubnagar) జిల్లాలో జరిగే సభలకు హాజరయ్యేందుకు హెలికాప్టర్‌ లో బయలుదేరారు. అయితే.. ఆ హెలికాప్టర్‌ లో సాంకేతిక సమస్య తలెత్తింది.

సమస్యను ముందుగానే పసిగట్టిన పైలట్.. వెంటనే అప్రమత్తమై మార్గమధ్యం నుండి తిరిగి ఆయన వ్యవసాయ క్షేత్రానికి హెలికాప్టర్‌ ను మళ్లించి సురక్షితంగా ల్యాండ్ చేశాడు. ఏవియేషన్​ సంస్థ ప్రత్యామ్నాయ హెలికాప్టర్​ ను ఏర్పాటు చేసింది.

అసెంబ్లీ ఎన్నికల ప్రచారంలో భాగంగా కేసీఆర్‌ సోమవారం ఉమ్మడి పాలమూరు జిల్లాలోని దేవరకద్ర, గద్వాల్, మక్తల్, నారాయణపేట నియోజకవర్గాల్లో జరిగే ప్రజా ఆశీర్వాద సభల్లో పాల్గొననున్నారు. హెలిక్యాప్టర్‌ లో సాంకేతిక లోపం కారణంగా ఆయన పర్యటన ఆలస్యమైంది. సీఎం టూర్ కొనసాగేలా ఏవియేషన్‌ అధికారులు ప్రత్యామ్నాయ ఏర్పాట్లు చేశారు.

పదవుల కోసం పాకులాడే పాలకులు.. పూటగడిస్తే చాలు అనుకునే ప్రజలు.. ధర్మాన్ని కూడా ఒక ధరకి అమ్మేస్తూ ఉంటే ఇంకా ఎవరో వస్తారని ఏదో చేస్తారని ఎదురుచూస్తున్న యువకులు.. ఇవి బీఆర్ఎస్ ప్రభుత్వం పై ప్రతిపక్షాలు వాడుతున్న అస్త్రాలు.. ఇప్పటికే రాష్ట్రాన్ని సర్వనాశనం చేశారని కాంగ్రెస్ చేస్తున్న ఆరోపణలు రాజకీయ వర్గాలలో తీవ్ర దుమారం రేపుతుంది.

ఈ క్రమంలో బీఆర్ఎస్ (BRS)పై కాంగ్రెస్ (Congress) సీఎల్పీ నేత భట్టి విక్రమార్క (Bhatti Vikramarka) కీలక వ్యాఖ్యలు చేశారు. ప్రజల సంపదని దోపిడి చేసి ధనవంతులుగా మారిన అత్యంత అవినీతిపరులు బీఆర్ఎస్ పాలకులు అంటూ మండిపడ్డారు. దొరల అవినీతి దోపిడి వల్లనే తెలంగాణ (Telangana) రాష్ట్రం అభివృద్ధి జరగలేదని భట్టి ఆగ్రహం వ్యక్తం చేశారు. బీఆర్ఎస్ ప్రభుత్వం రాష్ట్రంలో 10 సంవత్సరాలుగా అధికారంలో ఉండి.. పేదలకు ఇల్లు.. నిరుద్యోగులకి ఉద్యోగాలు ఇవ్వక మోసం చేసిందని ఆరోపించారు. రైతులకు పావలా వడ్డీ రుణాలు ఇవ్వలేదని, ఉచితంగా ఇస్తానన్న సబ్సిడీ ఎరువులు ఇవ్వకుండా రైతులను బీఆర్ఎస్ ఆగం చేస్తుందని భట్టి మండిపడ్డారు..

పండిన పంటకు మద్దతు ధర లేక కష్టాలు పడుతున్న రైతుల గోస తప్పక తగులుతుందని భట్టి అన్నారు. మరోవైపు మహిళలకు ఇచ్చే పావుల వడ్డీ రుణాలకు, పేదలకు రేషన్ దుకాణాల ద్వారా పంపిణీ చేసే తొమ్మిది రకాల నిత్యవసర సరుకులకు బీఆర్ఎస్ ప్రభుత్వం మంగళం పాడిందని భట్టి విక్రమార్క సంచలన వ్యాఖ్యలు చేశారు. అమ్మహస్తం పథకం అటకెక్కించి రేషన్ దుకాణాలను.. బియ్యం దుకాణాలుగా మార్చిన ఘనత బీఆర్ఎస్ ప్రభుత్వానికి ఉందని ఎద్దేవా చేశారు.

కాంగ్రెస్ తీసుకొచ్చిన రెండు లక్షల పదహారువేల రూపాయల బంగారు తల్లి పథకాన్ని చంపేసి.. కళ్యాణ్ లక్ష్మి, షాదీ ముబారక్ పథకం తెచ్చిన బీఆర్ఎస్ ప్రభుత్వం.. ఏదో తన జేబులో నుండి మహిళలకు లక్ష రూపాయలు ఇస్తున్నట్టు నటించడం దౌర్భాగ్యమని ఆగ్రహం వ్యక్తం చేశారు. ఏళ్ల తరబడి వేచి చూస్తున్న వితంతువులకు పెన్షన్లు ఇవ్వకుండా ఇబ్బందులు పెడుతున్న బీఆర్ఎస్ ప్రభుత్వాన్ని బొందపెట్టె సమయం ఈ ఎన్నికల ద్వారా వచ్చిందని బట్టి పిలుపునిచ్చారు.

బీఆర్ఎస్ కు ఓటు వేయకుంటే సంక్షేమ పథకాలు బందు చేస్తామని.. భయపెట్టి ఓట్లు యాచిస్తున్న అవినీతి ప్రభుత్వం కావాలో.. రాష్ట్ర సంపద ప్రజలందరి పంచాలన్న కాంగ్రెస్ ప్రభత్వం కావాలో.. నిర్ణయిం మీ చేతిలో ఉందని ఓటర్లను ఉద్దేశించి భట్టి విక్రమార్క వ్యాఖ్యానించారు. మరోవైపు కాంగ్రెస్ ప్రకటించిన ఆరు గ్యారెంటీల అమలుకు నిధులు ఎక్కడివని కేసీఆర్, కేటీఆర్, హరీష్ రావు ప్రశ్నించడం విడ్డూరంగా ఉందన్న భట్టి.. నేతల అవినీతికి అడ్డుకట్ట వేస్తే చాలని అన్నారు. ఆరు గ్యారంటీలు అమలు చేయడానికి రాష్ట్రంలో పుష్కలంగా ఆర్థిక సంపద ఉందని భట్టి విక్రమార్క వెల్లడించారు..

భాగ్యనగరంలో ఎన్నికలు (Elections) ప్రశాంతంగా జరిగేందుకు అధికారులు చర్యలు చేపట్టారు. ఇప్పటికే కొన్ని చోట్ల ఉద్రిక్త పరిస్థితులు నెలకొనడం.. మరికొన్ని సమస్యాత్మక ప్రాంతాలు ఉండటం వల్ల భద్రత విషయంలో కఠినంగా వ్యవహరించడానికి పోలీస్ అధికారులు సిద్దం అవుతున్నారు. మరోవైపు గ్రేటర్‌ పరిధిలోని పలు చోట్ల ప్రత్యర్థి పార్టీలు తమ అడ్డాలో కాలుపెడితే సహించబోమంటూ.. బహిరంగంగా బెదిరింపులకు పాల్పడుతున్నారని, కొన్ని నియోజకవర్గాల్లో పట్టు నిలుపుకునేందుకు నేతలు ఎంతకైనా తెగిస్తున్నారనే ఆరోపణలు వస్తున్నాయి.

రౌడీషీటర్లు, అసాంఘిక శక్తులను బైండోవర్‌ చేసినా.. అనుచరులను రంగంలోకి దింపి కొందరు హల్‌చల్‌ చేస్తూ.. బహిరంగ దాడులు చేసుకోవడం పోలీసుల కళ్లెదుటే జరుగుంది. ఈ నేపథ్యంలో సున్నిత, సమస్యాత్మక ప్రాంతాలు ఉన్న చోట పోలీసులు (Police) ఆచీతూచి వ్యవహరిస్తున్నారు. ముందుగా ఇరువర్గాలను సముదాయిస్తున్నారు. మాట వినని పక్షంలో కఠిన చర్యలు తీసుకునేందుకు సిద్దం అవుతున్నారు. అభ్యర్థులు, కార్యకర్తలు ఏ పార్టీకి చెందిన వారైనా శాంతిభద్రతలకు విఘాతం కలిగిస్తే సహించబోమని పోలీస్ అధికారులు హెచ్చరిస్తున్నారు.

మరోవైపు మలక్‌పేట్‌, లంగర్‌హౌజ్‌,చార్మినార్‌ సమస్యాత్మక ప్రాంతాలుగా గుర్తించిన పోలీసు యంత్రాంగం.. అప్రమత్తమైంది. పోలింగ్‌కు ముందుగానే అదనపు బలగాలను రప్పించడానికి సిద్దం అయ్యింది. అదీగాక దక్షిణ, పశ్చిమ, సౌత్‌ఈస్ట్, సౌత్‌వెస్ట్‌ పరిధిలోని పలు నియోజకవర్గాల్లో పరిస్థితి నివురుగప్పిన నిప్పులా మారింది. ఈ ప్రాంతాల్లో ఎన్నికల్లో అల్లర్లు చోటు చేసుకునే అవకాశాలు ఉండటంతో పోలీసులు ప్రత్యేక నిఘా ఏర్పాటు చేశారు.

ఇప్పటికే నగర సీపీ (City CP) సందీప్‌శాండిల్య (Sandeep Sandilya) కీలక ఆదేశాలు ఇచ్చారు. అసాంఘిక శక్తుల (Unsocial forces) విషయంలో కఠినంగా వ్యవహరించమని ఆర్డర్ వేశారు. ప్రజాజీవనానికి ఎలాంటి విఘాతం కలిగించినా సహించేది లేదని సీపీ అన్నారు.. ఇక ప్రస్తుతం సమస్యాత్మక నియోజకవర్గాలపై ప్రత్యేక దృష్టిసారించిన అధికారులు ఒక్కో నియోజకవర్గానికి 100 మంది వరకి అదనపు బలగాలను రంగంలోకి దింపనున్నట్టు తెలుస్తుంది.