Politics

తెలంగాణ (Telangana)లో అసెంబ్లీ ఎన్నికల నేపథ్యంలో అన్నీ పార్టీలు ప్రచారాలు ఏకధాటిగా నిర్వహిస్తున్నాయి. ఇప్పటికే కాంగ్రెస్ (Congress) బీఆర్ఎస్‌ (BRS) ప్రచారంలో దూసుకు పోతుండగా బీజేపీ (BJP) కూడా అదే దారిలో సాగుతుంది. మరోవైపు బీఎస్పీ (BSP) అధ్యక్షుడు ఆర్ఎస్ ప్రవీణ్ కుమార్ (RS Praveen Kumar) కూడా ఎలాంటి హంగామా లేకుండా ప్రచారాన్ని నిర్వహిస్తున్నారు. ఇప్పటికే బీఆర్ఎస్‌ అవినీతిని తీవ్రస్థాయిలో ఎండగడుతున్న ప్రవీణ్ కుమార్.. తాజాగా పెద్దపల్లి (Peddapalli)నియోజకవర్గంలో.. బీఎస్పీ అభ్యర్థి దాసరి ఉష తరఫున ఎన్నికల ప్రచారం నిర్వహించారు.

తెలంగాణ రాష్ట్రంలో దొరల పాలనను తరిమికొట్టేందుకు.. ప్రజలంతా ఏకం అవ్వాలని పిలునిచ్చారు. అవినీతి అంతం కావాలంటే అసెంబ్లీ ఎన్నికల్లో ఏనుగు గుర్తుకు ఓటు వేసి బీఎస్పీని అధికారంలోకి తీసుకురావాలని ఆర్ఎస్ ప్రవీణ్ కుమార్ విజ్ఞప్తి చేశారు. ప్రత్యేక తెలంగాణ ఏర్పాటైతే దళితున్ని ముఖ్యమంత్రి చేస్తానన్న కేసీఆర్ ఈ 9 ఏళ్లలో ఒక్క హామీని కూడా నెరవేర్చలేక పోయాడని ప్రవీణ్ కుమార్ విమర్శించారు.

కాళేశ్వరం ప్రాజెక్టు కట్టి రూ.లక్ష కోట్లు అప్పు చేసిన కేసీఆర్ రాష్ట్రంలో దర్జాగా బ్రతుకుతున్నాడని.. నిరుద్యోగులు మాత్రం ఉద్యోగాల కోసం ఆత్మహత్యలు చేసుకుంటున్నారని ప్రవీణ్ కుమార్ ఆరోపణలు చేశారు.. మరోవైపు పెద్దపల్లి జిల్లా కేంద్రం ప్రభుత్వ జూనియర్ కళాశాల మైదానంలో నిర్వహించిన ప్రజా ఆశీర్వాద సభకు ప్రజలు, కార్యకర్తలు పెద్ద సంఖ్యలో పాల్గొన్నారు. ప్రవీణ్ కుమార్ ఆధ్వర్యంలో పెద్దపల్లి మున్సిపాలిటీకి చెందిన పలువురు కౌన్సిలర్లు నాయకులు బీఎస్పీ కండువా కప్పుకున్నారు.

తెలంగాణ (Telangana) అసెంబ్లీ ఎన్నికల వార్‌లో ఖమ్మం నియోజకవర్గం (Khammam Constituency) హాట్‌ సెగ్మెంట్‌గా మారింది. ఇక్కడ కాంగ్రెస్‌, బీఆర్ఎస్ మధ్య పోరు రసవత్తరంగా సాగుతుంది. బీఆర్‌ఎస్‌ (BRS) అభ్యర్థి, మంత్రి పువ్వాడ అజయ్ కుమార్‌ (Puvvada Ajay Kumar).. కాంగ్రెస్‌ (Congress) అభ్యర్థి, తుమ్మల నాగేశ్వర్ రావు (Tummala Nageshwar Rao) మధ్య మాటల తూటాలు పేలుతున్నాయి. వీరిద్దరూ పోటాపోటీగా సమావేశాలు నిర్వహిస్తూ ఒకరిపై ఒకరు విమర్శల బురద చల్లుకుంటున్నారు..

ఈ క్రమంలో మాజీ మంత్రి తుమ్మల నాగేశ్వరరావు.. మంత్రి పువ్వాడ అజయ్‌పై ధ్వజమెత్తారు. ఖమ్మం నియోజకవర్గంలో అప్రకటిత ఎమర్జెన్సీ నడుస్తుందని.. వ్యతిరేకంగా మాట్లాడితే కేసులు నమోదు చేసి ప్రజలను ఇబ్బందులకు గురి చేస్తున్నారని ఆరోపించారు. నగరంలో 45వ డివిజన్‌లో ఏర్పాటు చేసిన తుమ్మల మిత్ర మండలి సభ్యుల ఆత్మీయ సమ్మేళనంలో పాల్గొన్న మాజీ మంత్రి.. ఖమ్మం నగరంలో ఎక్కడికి వెళ్ళినా పువ్వాడ అరాచకాల గురించి చెప్పడం సిగ్గుచేటని అన్నారు..

సామినేని సాయి గణేష్ అనే యువకుని ప్రాణాన్ని పొట్టన పెట్టుకున్నారని అన్న తుమ్మల.. మంత్రి అవినీతిని సోషల్ మీడియా ద్వారా ప్రశ్నించినందుకు గణేష్ పై అక్రమ కేసులు పెట్టి వేధించి, అతని ఆత్మ హత్యకు కారణం అయ్యారని తెలిపారు. మంత్రి ఆరాచకాలు తగ్గాలంటే బీఆర్ఎస్ ను ఇంటికి పంపాలని.. పువ్వాడకు బైబై చెప్పాలని తుమ్మల నాగేశ్వరరావు తెలిపారు. ఇక్కడి ప్రజల కష్టాలు తీరాలంటే కాంగ్రెస్ పార్టీని గెలిపించాలని కోరారు..

దేశంలో మహిళా రిజర్వేషన్ల చట్టం తక్షణ అమలుకు భారత్ జాగృతి(Bharat Jagruthi) తరఫున న్యాయపోరాటానికి సిద్ధమని భారత్ జాగృతి అధ్యక్షురాలు, ఎమ్మెల్సీ కవిత(Mlc Kavitha) అన్నారు. ఈ మేరకు రిజర్వేషన్‌ అమలు విషయమై న్యాయ నిపుణులతో చర్చిస్తున్నామని చెప్పారు. వారి సలహా మేరకు సుప్రీం కోర్టు(Supreme Court) లో ఈ అంశంపై పెండింగ్‌లో ఉన్న పిటిషన్‌లో ఇంప్లీడ్ అవుతామని కవిత ప్రకటించారు.

మహిళా రిజర్వేషన్ల కోసం పోరాటం చేసి సాధించిన తాము వాటిని తక్షణమే అమలు చేయించడానికి కూడా మరో పోరాటానికి సిద్ధమయ్యామని ఎమ్మెల్సీ కవిత స్పష్టం చేశారు. మహిళా రిజర్వేషన్ల చట్టాన్ని తక్షణ అమలు కోసం పలు రాజకీయ పార్టీలు, సంస్థలు డిమాండ్ చేస్తున్నాయని గుర్తు చేశారు. ఇప్పటికే పలు పార్టీలు, సంస్థలు కోర్టుకు వెళ్లాయని ప్రస్తావించారు.

కేంద్ర ప్రభుత్వం ఇప్పటికైనా సానుకూలంగా స్పందించాలని, 2024 సార్వత్రిక ఎన్నికల నుంచి రిజర్వేషన్లు అమలయ్యేలా చర్యలు తీసుకోవాలని ఈ సందర్భంగా కవిత డిమాండ్ చేశారు. మహిళా రిజర్వేషన్‌పై సుప్రీం కోర్టు విచారణ జరుపుతున్న నేపథ్యంలో న్యాయపరమైన అంశాలను చర్చించి ఆ చట్టాన్ని త్వరగా అమలు చేసేలా పోరాటం చేయనున్నట్లు వెల్లడించారు.

మహిళా రిజర్వేషన్ల కోసం తాము ఢిల్లీలో చేసిన పోరాటానికి దిగి వచ్చిన కేంద్రం పార్లమెంటులో బిల్లును పాస్ చేసిందని చెప్పారు కవిత. అయితే అది చట్టంగా మారిన తర్వాత కేంద్రం అమలును వాయిదా వేసే కుట్రలు చేస్తోందని మండిపడ్డారు. కేంద్ర ప్రభుత్వం ఇప్పటికైనా స్పందించి రిజర్వేషన్లను వెంటనే అమలు చేయాలని డిమాండ్ చేశారు. లేదంటే తాము న్యాయపోరాటానికి దిగుతామని హెచ్చరించారు.