Politics

ఏపీ సీఎం జగన్‌మోహన్‌రెడ్డిపై తెలుగుదేశం పొలిట్ బ్యూరో సభ్యుడు బొండా ఉమామహేశ్వరరావు (Bonda Umamaheswararao) కీలక వ్యాఖ్యలు చేశారు. అధికారాన్ని అడ్డం పెట్టుకుని తనపై ఉన్న అవినీతి కేసుల విచారణ నుంచి తప్పించుకుంటున్న సీఎం జగన్‌మోహన్‌రెడ్డి(CM Jaganmohan Reddy) వ్యవస్థలను మేనేజ్ చేయడంలో దిట్టని సెటైర్లు విసిరారు. సీఎం చెప్పింది చేస్తూ మంత్రులంతా ఆయన పెంపుడు కుక్కల కంటే దారుణంగా తయారయ్యారని ఆరోపించారు.

ఈ సందర్భంగా సోమవారం ఆయన విజయవాడలో మీడియాతో మాట్లాడుతూ.. అవినీతి కేసుల విచారణ నుంచి తప్పించుకుంటున్న సీఎం జగన్‌రెడ్డి (CM Jagan Reddy) వ్యవస్థల్ని మేనేజ్ చేయడంలో దిట్టని బొండా ఉమామహేశ్వరరావు విమర్శించారు. వ్యవస్థల్ని గుప్పెట్లో పెట్టుకునే సొంత బాబాయ్ హత్యకేసులో శిక్ష పడకుండా అవినాశ్ రెడ్డి (Avinash Reddy), అతని తండ్రి భాస్కర్ రెడ్డి (Bhaskar Reddy)ని జగన్ కాపాడుతున్నది నిజం కాదా? అని ప్రశ్నించారు.

చేయని తప్పుకు దళిత యువకుడు శ్రీనివాస్ కోడికత్తి కేసులో జైల్లో మగ్గిపోయేలా చేస్తోంది జగన్ రెడ్డి కాదా? అని నిలదీశారు. శ్రీనివాస్ బయటకు వస్తే వాస్తవాలు ప్రజలకు తెలుస్తాయనే ఐదేళ్లుగా జగన్ కోడికత్తి కేసులో ఎన్ఐఏ కోర్టులో విచారణకు హాజరుకావడంలేదని విమర్శించారు. అన్యాయంగా తన రాజకీయ కుట్రలకు చంద్రబాబును బలిచేసిన సీఎం జగన్, 53 రోజులుగా వ్యవస్థల్ని మేనేజ్ చేస్తూ ఆయన జైల్లో మగ్గిపోయేలా చేస్తున్నది నిజం కాదా? అని బోండా ఉమా ప్రశ్నించారు.

చంద్రబాబు తప్పు చేశారనే ఆధారాలు ప్రభుత్వం వద్ద ఉంటే, న్యాయస్థానాల్లో కుంటిసాకులు చెబుతూ, తప్పుడు సమాచారమిస్తూ జగన్ అండ్ కో ఎందుకు తప్పించుకుంటున్నారని ఆరోపించారు. తన అన్న కాని అన్న గాలి జనార్ధన్ రెడ్డిని జైలు నుంచి విడిపించడానికి ఏకంగా న్యాయమూర్తికే లంచం ఆశచూపాడని జగన్‌పై ఫైర్ అయ్యారు. 38 కేసులున్న జగన్ పదేళ్లుగా బెయిల్‌పై బయట ఉంటూ, న్యాయస్థానాల్లో విచారణకు కూడా హాజరుకావడం లేదంటే, వ్యవస్థల్ని మేనేజ్ చేయబట్టే కాదా? అని ధ్వజమెత్తారు.

జగన్ మనస్తత్వం, దుర్మార్గం తెలిసీ.. పదవీవ్యామోహంతో, భయంతోనే మంత్రులు, వైసీపీ నేతలు వాస్తవాలు చెప్పలేని దుస్థితిలో ఉన్నారని విమర్శించారు. మంత్రులు జగన్‌రెడ్డి పెంపుడు కుక్కల కంటే దారుణంగా తయారై, టీడీపీపై.. లోకేష్‌పై నిందలు వేస్తున్నారని బోండా ఉమా మండిపడ్డారు. చేతిలో అవినీతి మీడియా, బులుగు మీడియా ఉన్నాయని జగన్ రెడ్డి, అతని మంత్రులు ఎంత బరితెగించి విషప్రచారం చేసినా చంద్రబాబుకు అవినీతి మరక అంటించలేరన్నారు. ఎప్పటికైనా న్యాయం ధర్మమే గెలుస్తాయని, జగన్ రెడ్డి.. అతని నీతి మాలిన ప్రభుత్వం చేసే దుష్ప్రచారం గెలవదని బోండా ఉమా వ్యాఖ్యానించారు.

తెలంగాణ రాజకీయాల్లో కీలక మలుపు చోటుచేసుకుంది. తెలంగాణ జనసమితి(TJS) , కాంగ్రెస్ పార్టీ(Congress Party) భేటీ అనంతరం ఆయా పార్టీలు కలిసి పనిచేయాలని నిర్ణయం తీసుకున్నాయి. బీఆర్ఎస్ పార్టీని గద్దె నుంచి దించడమే ఉమ్మడి లక్ష్యంగా ఈ ఎన్నికల్లో రెండు పార్టీలూ పరస్పరం సహకరించుకునేలా చర్చలు సఫలమయ్యాయి.

ఈ భేటీ అనంతరం టీపీసీసీ చీఫ్ రేవంత్‌రెడ్డి మాట్లాడుతూ.. తెలంగాణకు పట్టిన చీడ, పీడ వదలాలంటే కోదండరాం మద్దతు అవసరమని అన్నారు. వచ్చే ఎన్నికల్లో తెలంగాణ జన సమితి, కాంగ్రెస్ కలిసి పనిచేస్తాయని చెప్పారు. కాంగ్రెస్‌తో కలిసి పని చేయడానికి కోదండరాం సుముఖత చూపారని తెలిపారు. కోదండరాం మద్దతు కోరామన్నారు. ఎన్నికల్లో తెలంగాణ జన సమితి పోటీకి దూరంగా ఉంటుందని రేవంత్‌రెడ్డి వివరించారు.

కేసీఆర్ కుటుంబం నుంచి తెలంగాణకు విముక్తి కల్పించాలని రేవంత్ రెడ్డి ఆకాంక్షించారు. సమన్వయ కమిటీ ఏర్పాటు చేసి ముందుకెళ్తామన్నారు. కాంగ్రెస్ అధికారంలోకి వచ్చాక తెలంగాణ జన సమితిని ప్రభుత్వంలో భాగస్వామ్యం చేస్తామని రేవంత్ రెడ్డి వెల్లడించారు. పదేళ్లుగా బీఆర్ఎస్ ప్రభుత్వ ప్రజా వ్యతిరేక విధానాలపై కోదండరాం పోరాడుతున్నారని రేవంత్ చెప్పారు. ఓట్లు, సీట్ల సర్దుబాటుకు బదులుగా కాంగ్రెస్ ప్రభుత్వం ఏర్పడిన తర్వాత పరిపాలనలో టీజేఎస్‌కు తగిన భాగస్వామ్యం కల్పిస్తామని పీసీసీ చీఫ్ రేవంత్‌రెడ్డి స్పష్టత ఇచ్చారు.

ఈ సందర్భంగా కోదండ రాం మాట్లాడుతూ.. కాంగ్రెస్ ఇచ్చిన ఆరు గ్యారంటీల అమలుపై రేవంత్ క్లారిటీ ఇవ్వగా, వాటికి అదనంగా ఆరు అంశాలకు కూడా ప్రాధాన్యత ఇవ్వాలని కోరారు. కేసీఆర్ ముఖ్యమంత్రిగా తొమ్మిదేండ్ల పాలన నిరంకుశంగా, అప్రజాస్వామికంగా కొనసాగుతున్నదని, అనేక సెక్షన్ల ప్రజలు అవస్థలు పడుతున్నారని, ప్రజా పరిపాలన కోసమే కాంగ్రెస్‌తో కలిసి పనిచేయాని నిర్ణయించుకున్నామని తెలిపారు. కొత్త ప్రభుత్వంలో పరిపాలనలో తగిన భాగస్వామ్యం కల్పించేందుకు కాంగ్రెస్ పార్టీతో అవగాహన కుదిరిందన్నారు.

విద్య, వైద్యాన్ని ప్రజలకు ఉచితంగా అందించాలని, యువతకు ఉపాధి అవకాశాలు కల్పించాలని, రైతాంగానికి తగిన సహాయ సహకారాలు లభించాలని, పాలనలో ఎస్సీ, ఎస్టీ, బీసీ, మైనారిటీలకు భాగస్వామ్యాన్ని ఇవ్వాలని, తెలంగాణ పునర్ నిర్మాణం కోసం టీజేఎస్, కాంగ్రెస్ మధ్య సమన్వయ కమిటీ ఏర్పాటు కావాలని కోదండరాం సూచించారు. ఈ మేరకు బీఆర్ఎస్ నిరంకుశ పాలనను అంతమొందించే గొప్ప లక్ష్యంతో కాంగ్రెస్ పార్టీకి కోదండరాం సంపూర్ణ సహకారం అందిస్తున్నారని, ఇది ఆహ్వానించదగిన పరిణామం అని రేవంత్ అన్నారు. నిరుద్యోగులకు ఉపాధి అవకాశాల కోసం కొట్లాడిన కోదండరాం విజ్ఞప్తికి అనుగుణంగా 40 లక్షల మంది యువత, నిరుద్యోగులు బీఆర్ఎస్ పాలనను గద్దె దించడానికి కదిలి రావాలని పిలుపునిచ్చారు.

టీజేఎస్ కార్యాలయానికి(TJS OFFICE) టీపీసీసీ చీఫ్ రేవంత్‌రెడ్డి(TPCC Chief Revanth Reddy) చేరుకున్నారు. టీజేఎస్ అధ్యక్షుడు కోదండరాం(TJS President Kodandaram)తో రేవంత్‌రెడ్డి సమావేశమయ్యారు. నాంపల్లిలోని టీజేఎస్ కార్యాలయంలో రేవంత్ రెడ్డి, కోదండరాం భేటీ ప్రధాన్యతను సంతరించుకుంది. పొత్తులు, సీట్ల సర్దుబాటుపై ఫైనల్ చర్చలు నిర్వహించినట్లు తెలుస్తోంది.

కలిసి పనిచేద్దామని ఇప్పటికే ఇరు పార్టీలు అంగీకారానికి వచ్చాయి. రాహుల్‌తో భేటీ అయి కాంగ్రెస్‌తో కలిసి పనిచేయడానికి కోదండరాం అంగీకారానికి వచ్చారు. ఇటీవల ఢిల్లీ వెళ్లి ఖర్గేతో కోదండరాం భేటీ అయ్యారు. ఎన్నికల్లో కాంగ్రెస్‌కి మద్దతు తెలపాలని కోదండరాంను రేవంత్ కోరనున్నారు. ప్రభుత్వం వచ్చాక కోదండరాంకి సముచిత గౌరవం ఇస్తామని రేవంత్ చెప్పనున్నట్లు తెలుస్తోంది.

అయితే తెలంగాణ అసెంబ్లీ ఎన్నికల్లో పొత్తు లేదా, మద్దతు విషయంపై ఇంకా క్లారిటీ రాలేదు. వచ్చే ఎన్నికల్లో కాంగ్రెస్, టీజేఎస్ కలిసి పనిచేయాలని ఇప్పటికే నిర్ణయించాయి. ఇటీవల తెలంగాణకు వచ్చిన రాహుల్ గాంధీతో కరీంనగర్ వీ పార్క్ హోటల్‌లో కోదండరామ్ భేటీ అయ్యారు. ఎన్నికల్లో తమకు మద్దతు ఇవ్వాలని రాహుల్ కోరినట్లు చెప్పారు. తెలంగాణలో నిరంకుశ పాలన పోవాలనే అభిప్రాయాన్ని రాహుల్ వ్యక్తం చేసినట్లు కోదండరాం తెలిపారు.

తెలంగాణలో నిరంకుశ పాలన పోవాలన్న తన అభిప్రాయంతో రాహుల్ ఏకీభవించినట్లు కోదండరాం తెలిపారు. తెలంగాణలో ప్రస్తుతం ఉన్న రాజకీయ పరిస్థితులు, బీఆర్ఎస్ పాలనపై చర్చించినట్లు ఆయన పేర్కొన్నారు. మరోసారి రాహుల్ టీం తమతో చర్చలు జరపనున్నట్లు తెలిపారు. ఈ క్రమంలో రేవంత్‌తో కోదండరాం భేటీతో ఉత్కంఠ నెలకొంది.