Politics

బడుగు జీవి బ్రతుకు పొద్దు గడవదు.. పొట్ట నిండదు అని అనుకుంటున్నారు రాజకీయ నేతల ముచ్చట్లు విని విని విసుగు వస్తున్న జనం. అభివృద్ధి మంత్రాన్ని జపిస్తున్న నేతలు ఏ మాత్రం అభివృద్ధి చేశారు అని ప్రతిపక్షాలు ఆరోపిస్తున్న నేపధ్యంలో.. అసలు అభివృద్ధి అనేది జరిగితే ఆకలి కేకలు, అన్నదాతల ఆత్మహత్యలు, నిరుద్యోగుల బలవన్మరణాలు తెలంగాణలో ఎందుకు జరుగుతున్నాయని మూగబోయిన మేధావుల గొంతులు లోలోన ప్రశ్నిస్తున్నాయంటున్నారు.

రాజకీయాల్లో నీతివంతులను భూతద్దం పెట్టి వెతికినా దొరకరని అందరికీ తెలుసు. అయినా వారు చెప్పడం ఆగరు.. ఓటర్లు ఊ కొట్టడం ఆగరు అని కొందరు అనుకుంటున్నారు.. ఇకపోతే తెలంగాణ ప్రణాళికా సంఘం ఉపాధ్యక్షుడు వినోద్‌ కుమార్‌ (Vinod Kumar) కాంగ్రెస్ (Congress)పై కీలక వ్యాఖ్యలు చేశారు. తెలంగాణ (Telangana) ఉద్యమానికి వరంగల్‌ (Warangal)కేంద్రంగా పనిచేసిందని పేర్కొన్నారు.

ప్రభుత్వ చీఫ్‌ విప్‌, వరంగల్‌ పశ్చిమ ఎమ్మెల్యే వినయ్‌ భాస్కర్‌, వర్ధన్నపేట ఆరూరి రమేశ్‌తో కలిసి వినోద్‌ మీడియాతో మాట్లాడుతూ.. 2009లో తెలంగాణ ఇచ్చినట్టే ఇచ్చిన కాంగ్రెస్‌ (Congress) వెనక్కి లాక్కుందని విమర్శించారు. అప్పుడే తెలంగాణ రాష్ట్రం సిద్ధించి ఉంటే శ్రీకాంతాచారి లాంటి వాళ్ల ఆత్మ బలిదానాలు ఉండేవి కాదని వినోద్‌ కుమార్‌ ఆగ్రహం వ్యక్తం చేశారు.

తెలంగాణ ఏర్పడిన తర్వాత కర్ఫ్యూలు, 144 సెక్షన్లు లేవని అన్నారు.. బీఆర్‌ఎస్‌ ప్రభుత్వం ప్రవేశపెట్టిన పథకాల గురించి వివరించారు. ఓటర్లు నిజనిజాలు గ్రహించి బీఆర్ఎస్ పార్టీని భారీ మెజార్టీతో గెలిపించాలని వినోద్‌ కుమార్‌ కోరారు.. సీఎం కేసీఆర్‌ (CM KCR) పాలనలో రాష్ట్రం అన్ని రంగాల్లో పురోభివృద్ధి చెందిందని అన్నారు. తెలంగాణ ఆర్థికంగా అగ్రగామిగా ఉందని ఆర్బీఐ చెప్పిందనట్టు గుర్తు చేశారు వినోద్‌ కుమార్‌. .

కేసీఆర్ అంటే నమ్మకమైతే.. కాంగ్రెస్ అంటే నాటకమని మంత్రి హరీశ్‌రావు(Minister Harish Rao) విమర్శించారు. రంగారెడ్డి జిల్లా(Rangareddy dist) ఇబ్రహీంపట్నం(Ibrahimpatnam)లో శుక్రవారం నిర్వహించిన బీఆర్ఎస్ బూత్ కమిటీ సమావేశానికి మంత్రి హాజరై మాట్లాడారు.

30 రోజులు మనం అందరం కలిసి కష్టపడితే వచ్చే ఐదేళ్లు సీఎంగా కేసీఆర్, మీ ఎమ్మెల్యేగా మంచిరెడ్డి కిషన్‌రెడ్డి ప్రజలకు సేవ చేస్తారని అన్నారు. కేసీఆర్ అంటే నమ్మకం.. కాంగ్రెస్ అంటే నాటకం.. అని విమర్శించారు. 60 ఏళ్ల కాంగ్రెస్ పాలనలో చేయలేని పనులు కేసీఆర్ చేశారని బీఆర్ఎస్ పథకాలన్నీ సూపర్ హిట్ అన్నారు. మంచి కంటే చెడు వేగంగా వ్యాప్తి చెందుతుందని అందుకే సోషల్ మీడియా వేదికగా కొందరు గోబెల్స్ ప్రచారం చేస్తున్నారని హరీశ్‌రావు ధ్వజమెత్తారు.

కర్ణాటక రైతుల పరిస్థితి పెనం మీద నుంచి పొయ్యిలో పడ్డట్టు అయ్యిందన్నారు హరీశ్‌రావు. కేసీఆర్ భరోసా పేరుతో మేనిఫెస్టో జనాల వద్దకు చేర్చాలని సూచించారు. యాసంగి పంటకు రైతుబంధు ఇవ్వొద్దని కాంగ్రెస్ ఫిర్యాదు చేసిందని వ్యవసాయాన్ని దండగగా మార్చిన చరిత్ర కాంగ్రెస్ పార్టీదేనని దుయ్యబట్టారు. కాంగ్రెస్ పార్టీలో ఎవరికి వారే సీఎం అంటున్నారని గత ఎన్నికల్లో అన్ని పార్టీలు కలిసి పోటీ చేస్తే.. ఈడ్చికొడితే ఎక్కడో పడ్డారని ఎద్దేవా చేశారు.

కొంత మంది డబ్బుల కోసం అమ్ముడు పోతే మేము ప్రజల్లో ఉంటాం.. ప్రజలను నమ్ముకుంటామని హరీశ్‌రావు తెలిపారు. మనుషులను కొంటారు కావొచ్చు గానీ తెలంగాణ ఆత్మగౌరవాన్ని కొనలేరని, ఉద్యమం సమయంలో ఒకరు రైఫిల్ పడితే మరొకరు రాజీనామా చేయకుండా పారిపోయారని సెటైర్ వేశారు. ‘అన్ని సర్వేలు బీఆర్ఎస్ వైపే చూపుతున్నాయి.. ఎవరెన్ని ట్రిక్కులు వేసినా హ్యాట్రిక్ కొట్టేది మాత్రం సీఎం కేసీఆరే..’ అని ధీమా వ్యక్తం చేశారు.

టీడీపీ అధినేత చంద్రబాబు నాయుడు అరెస్టును(Chandrababu Naidu Arrest) ఖండిస్తూ ఇప్పటికే తెలుగు రాష్ట్రాల్లో నిరసనలు వెల్లువెత్తుతున్నాయి. చంద్రబాబుకు మద్దతుగా రోడ్లపైకి వచ్చి మరీ ప్రజలు మద్దతు తెలుపుతున్నారు. తాజాగా ఖమ్మం జిల్లాకు వచ్చిన ఏపీ మంత్రి అంబటి రాంబాబుకు నిరసన సెగ తగిలింది.

ఖమ్మంలో ఓ కార్యక్రమంలో పాల్గొనేందుకు వచ్చిన అంబటి రాంబాబు(Ambati Rambabu)ను టీటీడీపీ కార్యకర్తలు అడ్డుకున్నారు. ఆయన  బస చేసిన హోటల్‌ వద్దకు వచ్చిన తెలంగాణ టీడీపీ కార్యకర్తలు ఆయనకు వ్యతిరేకంగా నినాదాలు చేశారు. ఖమ్మం ఎందుకు వచ్చారని వారు ప్రశ్నించారు. ‘ఇక్కడ నీకేం పని.. ఎందుకొచ్చావ్’ అంటూ నిలదీశారు.

హోటల్ నుంచి బయటకు వెళ్తున్న అంబటి రాంబాబు కాన్వాయ్‌ను అడ్డుకునేందుకు ఆందోళనకారులు ప్రయత్నించారు. ఈ క్రమంలో ఓ వ్యక్తి కర్రతో అంబటిపై దాడి చేయడానికి వెళ్లగా పోలీసులు అడ్డుకున్నారు. ఈ క్రమంలో అక్కడికి చేరుకున్న పోలీసులు నిరసన తెలుపుతున్న టీటీడీపీ కార్యకర్తలను అదుపులోకి తీసుకున్న పోలీస్‌ స్టేషన్‌కు తరలించారు.

మరోవైపు నిజామాబాద్ జిల్లా బోధన్‌లో చంద్రబాబు నాయుడు అరెస్టుకు వ్యతిరేకంగా.. ఆయన మద్దతుదారులు 36రోజులుగా నిరసన దీక్షలు చేస్తున్నారు. ఎన్నికల కోడ్ అమలులో ఉన్న నేపథ్యంలో పోలీసులు గురువారం టెంట్ తొలగించారు. దీంతో వారు భవానిపేట్ గ్రామంలో రహదారులు ఊడ్చి వినూత్నంగా నిరసన వ్యక్తం చేశారు. చంద్రబాబు విడుదలయ్యే వరకు రోజూ ఆందోళన కార్యక్రమాలు చేపడతామని వారు తేల్చిచెప్పారు.