Politics

తెలంగాణ (Telangana) బీజేపీ (BJP) లో రాజగోపాల్ రెడ్డి (Rajagopal Reddy) రాజీనామా తీవ్ర చర్చనీయాంశంగా మారింది. బీజేపీ (BJP) గ్రాఫ్ పడిపోయిందని.. బీఆర్ఎస్ (BRS) కు ప్రత్యామ్నాయం కాంగ్రెస్ (Congress) పార్టీయే అని ఆయన చేసిన వ్యాఖ్యలపై కమలనాథులు స్పందిస్తున్నారు. పార్టీ రాష్ట్ర అధ్యక్షుడు, కేంద్రమంత్రి కిషన్ రెడ్డి (Kishan Reddy) మాట్లాడుతూ.. ఎవరి ఊహలు వారివి.. ఎవరి ఇష్టం వారిది అని వ్యాఖ్యానించారు. బీజేపీ పోటీలో లేదని ఆయనంటే అయిపోతుందా.. ప్రజలు అనుకోవాలని అన్నారు.

రాష్ట్ర ప్రజలు అన్నీ గమనిస్తున్నారని చెప్పిన కిషన్ రెడ్డి.. రాజగోపాల్ రెడ్డికి పార్టీ మంచి అవకాశం ఇచ్చిందని, జాతీయ స్థాయిలో పదవి కట్టబెట్టామని చెప్పారు. అయినా పార్టీ మారడం ఆయన వ్యక్తిగత నిర్ణయమని వివరించారు. వ్యక్తిగత కారణాలతో పార్టీకి రాజీనామా చేస్తూ ఆరోపణలు చేయడం సరికాదని హితవు పలికారు. బీఆర్ఎస్ పాలనకు చెక్ పెట్టేది తామేనని స్పష్టం చేశారు కిషన్ రెడ్డి. తాజా పరిస్థితుల నేపథ్యంలో హైకమాండ్ నుంచి పిలుపు రావడంతో బుధవారం కిషన్ రెడ్డి ఢిల్లీకి వెళ్లారు.

రాజగోపాల్ రెడ్డిని బీజేపీ గౌరవించి.. ఉన్నతమైన స్థానం కల్పించిందని ఎంపీ లక్ష్మణ్ (Laxman) తెలిపారు. వ్యక్తిగతంగా ఇటువంటి ఆరోపణలు చేయటం సరైంది కాదని.. కచ్చితంగా మూడోసారి నరేంద్ర మోడీ (PM Modi) ప్రధాన మంత్రి కాబోతున్నారని అన్నారు. తెలంగాణ రాష్ట్రంలో అధికారంలోకి వస్తామనే నమ్మకం తమకు ఉందని తెలిపారు. కాంగ్రెస్ ఎన్ని ఆరోపణలు చేసినా.. బీజేపీ అధికారంలోకి వస్తుందని ధీమా వ్యక్తం చేశారు.

ఇక, జితేందర్ రెడ్డి (Jitender Reddy) మాట్లాడుతూ.. రాజగోపాల్ రెడ్డిని పాసింగ్ క్లౌడ్ అని వ్యాఖ్యానించారు. పార్టీ ఎప్పుడూ బలంగానే ఉంటుందని.. కొందరు అలా వచ్చి ఇలా వెళ్తారని చెప్పారు. తాను ఎంపీగానే పోటీ చేయాలనుకుంటున్నట్లు స్పష్టం చేశారు. ప్రజలు బీజేపీని గెలిపించాలని అనుకుంటున్నారని.. మంచి పాలన ఇస్తామని వారికి తెలుసని చెప్పారు. కేంద్రంలోని బీజేపీ పాలన చూసి రాష్ట్రంలో కూడా గెలిపించుకోవాలని చూస్తున్నారని అన్నారు. తాజా సర్వేలో 55 సీట్లు తగ్గకుండా బీజేపీకి వస్తాయని తేలిందన్నారు జితేందర్ రెడ్డి.

ఇది బ్రేకింగ్ న్యూస్ ఏమీ కాదు.. అందరూ ఊహించినదే జరిగిందని అన్నారు బూర నర్సయ్య గౌడ్‌. రాజగోపాల్ రెడ్డి శరీరం మాత్రమే బీజేపీలో ఉంది.. ఆత్మ కాంగ్రెస్ లోనే ఉండేదని కీలక వ్యాఖ్యలు చేశారు. రాష్ట్రంలో కాంగ్రెస్ ని నమ్మే పరిస్థితిల్లో జనాలు లేరన్నారు. కేసీఆర్ ని ప్రగతి భవన్ నుంచి ఖాళీ చేయించే పనిలో రాజకీయాలకతీతంగా ప్రతి ఒక్కరు ఉన్నారని తెలిపారు. రాష్ట్రంలో ప్రత్యామ్నయం కేవలం బీజేపీ మాత్రమేనని.. అధిష్టానం ఎక్కడి నుంచి పోటీ చేయమంటే అక్కడి నుంచే చేస్తానని క్లారిటీ ఇచ్చారు.

రాజకీయ విశ్లేషకుల అంచనాలే నిజమయ్యాయి. కొన్నాళ్లుగా పార్టీ కార్యక్రమాలకు దూరంగా ఉంటూ వస్తున్న కోమటిరెడ్డి రాజగోపాల్ రెడ్డి (Rajagopal Reddy) బీజేపీ (BJP) కి గుడ్ బై చెప్పారు. ఈ మేరకు పత్రికా ప్రకటన విడుదల చేశారు. కేసీఆర్ (KCR) కుటుంబ దుర్మార్గపు పాలన నుంచి తెలంగాణ (Telangana) ను విముక్తి చేయాలనే తన ఆశయం మరో ఐదు వారాల్లో నెరవేరుతుందని భావిస్తున్నట్టు చెప్పారు. రాష్ట్రంలో ప్రభుత్వ వ్యతిరేకత తీవ్ర స్థాయిలో ఉందన్న ఆయన.. ప్రజలు మార్పును కోరుకుంటున్నట్టు స్పష్టమవుతోందన్నారు.

ఏడాదిన్నర క్రితం తెలంగాణలో అధికార బీఆర్ఎస్ (BRS) కు ప్రత్యామ్నాయంగా ఎదిగిన బీజేపీ.. తర్వాత జరిగిన రాజకీయ పరిణామాల్లో కొంత డీలా పడిందని తెలిపారు రాజగోపాల్ రెడ్డి. ఇప్పుడు తెలంగాణ ప్రజలు బీఆర్ఎస్ కు ప్రత్యామ్నాయంగా కాంగ్రెస్ (Congress) ను భావిస్తున్నారని.. అందుకే, తాను కూడా వారి ఆలోచనలకు అనుగుణంగా వ్యవహరించాలని నిర్ణయించుకున్నట్టు స్పష్టం చేశారు. తెలంగాణలో అవినీతి అరాచక నియంతృత్వ కుటుంబ పాలనకు చరమగీతం పాడే శక్తి భారతీయ జనతా పార్టీకే ఉందని భావించి.. 15 నెలల క్రితం మునుగోడు ఎమ్మెల్యే పదవికి, కాంగ్రెస్ పార్టీకి రాజీనామా చేసి ఆపార్టీలో చేరానని గుర్తు చేశారు.

గత ఏడాది అక్టోబర్ నెలాఖరున మునుగోడు అసెంబ్లీకి జరిగిన ఉప ఎన్నికల్లో ప్రధాని నరేంద్ర మోడీ, అమిత్ షా, నడ్డా ఆశీస్సులతో బీజేపీ అభ్యర్థిగా పోటీ చేసి బీఆర్ఎస్ ను ఓడించినంత పని చేశానని అన్నారు. ఒక రాజకీయ యుద్ధం మాదిరిగా జరిగిన మునుగోడు ఉప ఎన్నికల్లో బీఆర్ఎస్ 100 మంది ఎమ్మెల్యేలు మరో వంద మంది ఇతర సీనియర్ నేతలను ప్రచారంలోకి దింపి వందల కోట్లు ఖర్చు చేసి, భారీ స్థాయిలో అధికార దుర్వినియోగానికి పాల్పడిందని వివరించారు. అయినా, స్వల్ప తేడాతో నెగ్గి, నైతికంగా ఓడిందని తెలిపారు. ఉప ఎన్నికల్లో తన విజయం కోసం ప్రయత్నించిన బీజేపీ నేతలు కార్యకర్తలు శ్రేయోభిలాషులందరికీ మరోసారి ధన్యవాదాలు చెప్పారు.

అవినీతిలో మునిగిన కేసీఆర్ సర్కార్ పై కేంద్రం చర్యలు తీసుకుంటుందన్న ప్రజల కోరిక నెరవేరకపోవడంతో రాష్ట్రంలో రాజకీయ సమీకరణాలు మారుతూ వచ్చాయన్నారు రాజగోపాల్ రెడ్డి. సకల జనుల పోరాటంతో సాకారమైన ప్రత్యేక తెలంగాణ పదేళ్ల కేసీఆర్ అరాచక పాలనతో గాడి తప్పిందని విమర్శించారు. అధికార మార్పును కోరుకుంటున్న ప్రజల ఆలోచనలకు అనుగుణంగానే తాను కాంగ్రెస్ లో చేరాలని నిర్ణయించుకున్నట్టు చెప్పారు. ‘‘తప్పనిసరి పరిస్థితుల్లోనే బీజేపీకి రాజీనామా చేస్తున్నాను. మునుగోడు ఉప ఎన్నిక ద్వారా నాకు నియంతృత్వ కేసీఆర్ సర్కారుపై యుద్ధం చేసే అవకాశం కల్పించిన బీజేపీకి ధన్యవాదాలు. దీనికోసం ప్రోత్సహించిన అమిత్ షాకు నేను ఎప్పటికీ రుణపడి ఉంటాను. తెలంగాణ ప్రజల ఆలోచనల మేరకు పార్టీ మారాలని నేను తీసుకున్న నిర్ణయాన్ని బీజేపీ పెద్దలు అర్థం చేసుకుంటారని ఆశిస్తున్నాను’’ అని తెలిపారు రాజగోపాల్ రెడ్డి.

ఆనాడు కాంగ్రెస్ నుంచి బీజేపీలో చేరినా, ఇప్పుడు బీజేపీ నుంచి కాంగ్రెస్ లోకి మారుతున్నా తన లక్ష్యం మాత్రం ఒకటేనని స్పష్టం చేశారు. కేసీఆర్ కుటుంబ అవినీతి, అరాచక, అప్రజాస్వామిక పాలన నుంచి రాష్ట్రాన్ని విముక్తి చేయడమే తన ధ్యేయమని తెలిపారు. తాను ఏనాడూ పదవుల కోసం ఆరాటపడలేదని.. తెలంగాణ ప్రయోజనాల పరిరక్షణ కోసమే తపన పడ్డానన్నారు. నియంత కేసీఆర్ పాలనను అంతమొందించేందుకు కాంగ్రెస్ లో చేరుతున్న తనను ఆదరించాలని రాష్ట్ర ప్రజలను కోరారు కోమటిరెడ్డి రాజగోపాల్ రెడ్డి.