Politics

ఉద్యోగం, ఉపాధి ప్రభుత్వం చేతుల్లో ఉంటుందన్నారు టీజేఎస్ అధ్యక్షుడు కోదండరాం (Kodandaram). ఈమధ్యే ఆత్మహత్య చేసుకున్న ప్రవల్లిక (Pravallika) ఘటనపై ప్రభుత్వం, మంత్రి కేటీఆర్ (KTR), పోలీసులు అసత్య ప్రచారం చేస్తున్నారని.. నిరుద్యోగ జేఏసీ (JAC) సమావేశం నిర్వహించింది. ఇందులో పాల్గొన్న కోదండరాం మాట్లాడుతూ.. ప్రవల్లిక ఉద్యోగం కోసం ఎంతో కష్టపడిందని.. ఆ కష్టానికి అనేక సాక్ష్యాలు ఉన్నాయన్నారు.

ప్రవల్లిక రాసుకున్న నోట్స్ ఉన్నాయని, హైదరాబాద్‌ లో ఉండి ఉద్యోగం సాధించిన తర్వతనే ఇంటికి వస్తానని ప్రతిజ్ఞ చేసిందని తెలిపారు. కానీ, ఉద్యోగం కల్పించాల్సిన ప్రభుత్వం విఫలమైందని విమర్శించారు. ప్రతిపక్షాలు కేసులు వేస్తేనే ఎగ్జామ్స్ రద్దయ్యాయని కేటీఆర్ అన్నారని మండిపడ్డారు కోదండరాం. పరీక్షలు సక్రమంగా నిర్వహించకపోతే కేసులు వేయక ఏం చేస్తారని ప్రశ్నించారు.

ఇటీవల ప్రభుత్వం ప్రకటించిన గణాంకాలన్నీ తప్పుడు లెక్కలు అని విమర్శించారు. 2 లక్షలపైగా ఉద్యోగాలు ఇచ్చామని చెప్పుకుంటున్నారని, లక్ష కంటే ఎక్కువ ఇవ్వలేదన్నారు. దీనిపై చర్చకు తాను సిద్ధంగా ఉన్నానంటూ సవాల్ చేశారు. ప్రవల్లిక సూసైడ్ చేసుకొని ఒకసారి చనిపోతే.. ప్రభుత్వం అసత్య ప్రచారాలు చేసి మరోసారి చంపేసిందని ఫైరయ్యారు. పేపర్ లీకేజ్, పరీక్ష రద్దు వల్ల నిరుద్యోగులు ఇబ్బందులు ఎదుర్కొంటున్నారని ఆగ్రహం వ్యక్తం చేశారు. అబద్ధాలను కప్పిపుచ్చుకోవడానికి ప్రవల్లిక వ్యక్తిత్వాన్ని దెబ్బ తీస్తున్నారని అన్నారు.

రాష్ట్రంలో నిరుద్యోగ సమస్య లేదన్నట్లుగా కేసీఆర్ మాట్లాడుతున్నారని మండిపడ్డారు కోదండరాం. బీఆర్ఎస్ మేనిఫెస్టోలో పెన్షన్, రైతుబంధు, గ్యాస్ ధర తప్ప.. ఎక్కడా ఉద్యోగాలపై లేదంటూ ఫైరయ్యారు. మేనిఫెస్టోలోనే నిరుద్యోగులు లేకపోతే.. వాళ్ళ విధానాల్లో ఎక్కడ ఉంటారన్నారు. ప్రవల్లిక పైన వాస్తవాలు చెప్పాలని ప్రెస్ మీట్ పెడితే.. పెద్ద ఎత్తున వచ్చి ఇబ్బందులు గురిచేస్తున్నారని ఆగ్రహం వ్యక్తం చేశారు. ఎలాంటి నిజాలు తెలుసుకోకుండా ప్రవల్లిక గ్రూప్స్ కి అప్లై చేయలేదని కేటీఆర్ ఎలా మాట్లాడతారని ప్రశ్నించారు కోదండరాం.

తెలంగాణ (Telangana) లో రైతు బంధు పథకాన్ని ఎంతో ప్రతిష్టాత్మకంగా అమలు చేస్తోంది ప్రభుత్వం. ప్రస్తుతం ఎన్నికల కోడ్ నేపథ్యంలో అన్ని పథకాలకు బ్రేక్ పడింది. అయితే.. వచ్చే ఎన్నికల్లో గెలిస్తే రైతు బంధు కింద ఇచ్చే డబ్బులను పెంచుతామని.. క్రమక్రమంగా రూ.16 వేలు చేస్తామని బీఆర్ఎస్ (BRS) ప్రకటించింది. ఈ మేరకు మేనిఫెస్టోలో కూడా పొందుపరిచింది. ఈ క్రమంలోనే రైతు బంధు హామీని జనంలోకి తీసుకెళ్తున్నారు గులాబీ నేతలు.

రైతు బంధు గురించి బీఆర్ఎస్ ఎమ్మెల్సీ కవిత (Kavitha) ట్విట్టర్ (ఎక్స్)లో ప్రత్యేక పోస్ట్ పెట్టారు. స్వాతంత్ర్య భారతదేశ చరిత్రలోనే తొలిసారిగా రైతులకు పంట పెట్టుబడి ఇచ్చింది తామేనన్నారు. ఇది కేసీఆర్ (KCR) మానస పుత్రిక అని తెలిపారు. ఐక్యరాజ్యసమితి సైతం రైతు బంధు కార్యక్రమాన్ని అభినందించిందని చెప్పారు. ఎకరానికి 8 వేలతో మొదలై, 10 వేలకు పెంచుకున్నామన్న కవిత.. వచ్చే ఏడాది నుండి ఈ సాయాన్ని రూ.12 వేల పెంచుతామని తెలిపారు.

రానున్న రోజుల్లో ప్రతీ ఏటా పెంచుతూ రూ.16 వేలు అందిస్తామని బీఆర్ఎస్ మేనిఫెస్టోలో కేసీఆర్ ప్రకటించడం చారిత్రాత్మక నిర్ణయమని తెలిపారు. రైతుల జీవితాల్లో వెలుగులు నింపి, తెలంగాణ వ్యవసాయ రంగ ముఖచిత్రాన్ని సమూలంగా మార్చిన కేసీఆర్ కి అన్ని జిల్లాల్లో అన్నదాతలు మద్దతు పలకాలన్నారు. రానున్న ఎన్నికల్లో తమకు రైతుల ఆశీర్వాదం ఉండాలని కోరారు.

ఎన్నికలు దగ్గరయ్యే కొద్దీ సవాళ్లు, ప్రతిసవాళ్లతో తెలంగాణ (Telangana) రాజకీయం హీటెక్కుతోంది. అధికారమే లక్ష్యంగా నాయకులు మాటల తూటాలు పేలుస్తున్నారు. ఈ క్రమంలోనే టీపీసీసీ చీఫ్ రేవంత్ రెడ్డి (Revanth) రెండు రోజుల క్రితం డబ్బు, మద్యం లేకుండా ఎన్నికలకు వెళ్లేందుకు సిద్ధమా అంటూ సీఎం కేసీఆర్ (KCR) కు ఛాలెంజ్ విసిరారు. 17న గన్ పార్క్ దగ్గర అమరవీరుల స్థూపం ముందు ప్రమాణం చేసేందుకు రావాలన్నారు. ఆయన చెప్పినట్టుగానే మంగళవారం గన్ పార్క్ దగ్గరకు వచ్చారు.

రేవంత్ రాకతో గన్ పార్క్ వద్ద ఉద్రిక్త పరిస్థితులు ఏర్పడ్డాయి. పోలీసులు ఆయన్ను అడ్డుకున్నారు. ఎన్నికల కోడ్ ఉందని ఇది కరెక్ట్ కాదని చెప్పారు. దీంతో పోలీసులతో రేవంత్ రెడ్డి, కాంగ్రెస్ నేతలు వాగ్వాదానికి దిగారు. కాసేపటి తర్వాత రేవంత్ ను అరెస్ట్ చేశారు పోలీసులు. పలువురు కాంగ్రెస్ నాయకులు, కార్యకర్తలను పోలీసులు బలవంతంగా అదుపులోకి తీసుకున్నారు.

అరెస్టులతో హస్తం శ్రేణులు పోలీసులకు వ్యతిరేకంగా నినాదాలు చేశారు. రిటర్నింగ్​ అధికారి పర్మిషన్ కావాలని రేవంత్​ రెడ్డికి స్పష్టం చేశారు ఖాకీలు. ఈ పరిణామాల నేపథ్యంలో గన్ పార్క్ వద్ద పోలీసులు భారీగా మోహరించారు. ఆ ప్రాంతంలో బారికేడ్లను ఏర్పాటు చేశారు.

బీఆర్ఎస్ కు షాకిచ్చిన ఎమ్మెల్యే

బీఆర్ఎస్ లో అసంతృప్తులు ఒక్కొక్కరుగా పార్టీని వీడుతున్నారు. తాజాగా బోధ్ ఎమ్మెల్యే రాథోడ్ బాపురావు రేవంత్ రెడ్డిని కలిశారు. బోధ్ టికెట్ విషయంపై వీరిద్దరు చర్చించినట్లు తెలుస్తోంది. ఇటీవల బీఆర్ఎస్ ప్రకటించిన అభ్యర్థుల జాబితాలో బాపురావు పేరు లేదు. కేసీఆర్ టికెట్ ఇవ్వలేదు. ఆయనను కాదని నేరడిగొండ జెడ్పీటీసీ అనిల్ జాదవ్ కు ఇచ్చారు. అప్పటి నుంచి అంసతృప్తిగా ఉన్న ఎమ్మెల్యే.. బీఆర్ఎస్ కార్యక్రమాలకు దూరంగా ఉంటున్నారు. పార్టీ మారుతారనే ప్రచారం జరుగుతోంది. ఈక్రమంలో రేవంత్ రెడ్డిని కలవడంతో ప్రాధాన్యత ఏర్పడింది.