Politics

తెలంగాణ (Telangana) రాజకీయాల్లో మరో ఆసక్తికరమైన చర్చ తెరపైకి వచ్చింది.. కాంగ్రెస్ (Congress) పార్టీ ప్రచార కమిటీ చైర్మన్ మధుయాష్కి (Madhu Yashki) గౌడ్ నివాసంలో మాజీ ఎంపీలు (MP) సురేష్ షట్కర్, బలరాం నాయక్, రాజయ్య తదితరులు భేటీ అవడం పై ఎన్నో ఊహాగానాలు వార్తల రూపంలో బయటికి వస్తున్నాయి. అయితే కాంగ్రెస్ మొదటి జాబితా ప్రకటించిన తర్వాత లిస్ట్ లో పేర్లు లేని నేతలు అసంతృప్తిని వ్యక్తం చేస్తున్నారని ప్రచారం జరుగుతోన్ననేపథ్యంలో వీరి భేటీకి మరింత ప్రాధాన్యత సంతరించుకోంది.

మరోవైపు మధుయాష్కీ ఎల్బీ నగర్ టికెట్ కోసం దరఖాస్తు చేసుకోగా, సురేష్ షెట్కర్ నారాయణఖేడ్ టికెట్ ఆశిస్తున్నారు. బలరాం నాయక్ మహబూబాబాద్ బరిలో నిలవాలని చూస్తున్నారు. అయితే పార్టీ ప్రకటించిన తొలి జాబితాలో వీరు ఆశిస్తున్న స్థానాలకు అభ్యర్థులను ఇంకా ఖరారు చేయలేదు అధిష్టానం.

ప్రస్తుత పరిస్థితుల్లో టికెట్ వస్తుందో రాదో తెలియకుండా తికమకలో ఉన్నారని, అందువల్లే ఒకరి బాధను ఒకరు చెప్పుకోవడానికే మధుయాష్కి ఇంట్లో భేటీ అయినట్టు గుసగుసలు వినిపిస్తున్నాయి. మరోవైపు ఉద్యమం సమయంలో పని చేసిన తమకు తొలి జాబితాలో టికెట్‌ కేటాయించక పోవడంపై అసంతృప్తి వ్యక్తం చేస్తున్నట్టు కూడా ప్రచారం జరుగుతోంది.. అయితే ఇతర పార్టీ నేతలు కాంగ్రెస్ లోకి క్యూ కడుతుంటే ఇప్పటి వరకు హస్తానికి సేవ చేసిన నేతలకి గుర్తింపు లేక వాపోతున్నారని అనుకొంటున్నారు పార్టీ వర్గాలలోని కొందరు..

తెలంగాణ (Telangana) సీఎం (CM) ఎన్నికల మేనిఫెస్టో విడుదల చేయడానికి ముందు పార్టీ అభ్యర్థులకు క్లాస్ ఇచ్చినట్టు, అంతే కాకుండా అహంకారం ప్రదర్శించడం వల్లే గత ఎన్నికల్లో జూపల్లి ఓడిపోయారని కేసీఆర్ (KCR) అన్నట్టు వార్తలు వచ్చాయి. ఈ నేపధ్యంలో కాంగ్రెస్ పార్టీ నేత జూపల్లి కృష్ణారావు (Jupally Krishna Rao) ఘాటుగానే స్పందించారు. ఎన్నికలు రాగానే కేసీఆర్‌ వేషాలు మారుస్తున్నారని, నోరు తెరిస్తే అన్నీ అబద్ధాలే అని, ఆయన మాట మీద నిలబడే వ్యక్తి కాదని విమర్శించారు.

సీఎం కేసీఆర్‌ తన కాలి గోటికి కూడా సరిపోరని, ఏ విషయంలో తన కంటే గొప్పోడని జూపల్లి మండిపడ్డారు. నన్ను వేలు పెట్టి చూపించే హక్కు నీకు లేదు అని సీఎం పై ఫైర్ అయ్యారు జూపల్లి.. ఎలక్షన్లు రాగానే పగటి వేషగాడి లెక్క రంగులు మారుస్తున్న సీఎం కేసీఆర్‌ కట్టించింది ప్రగతి భవన్ కాదని.. బానిస భవన్ అని విమర్శించారు.

అందరికీ దళిత బంధు ఇవ్వకుండా బీఆర్ఎస్ నేతలు దళిత బంధు పేరుతో మోసం చేస్తున్న పట్టించుకోవడం లేదని, తెలంగాణ కోసం త్యాగం చేసిన అమర వీరుల కుటుంబాల ఊసే లేదని మండిపడ్డారు. ఇష్టారితిగా డబ్బులు ఖర్చు పెడుతూ ఇతర పార్టీ నేతలను మేనేజ్ చేసుకుంటుంది మీరని జూపల్లి కదం తొక్కారు. రెండేళ్లలో 2 వేల కోట్లు ఇవ్వలేని వారు.. 20 రోజుల్లో లక్ష కోట్లు ఎలా తెస్తారని ప్రశ్నించారు. ఈ విషయంలో కేటీఆర్, హరీష్ మీలో ఎవరు చర్చకు వస్తారో రండి అని జూపల్లి సవాల్ విసిరారు..

టీపీసీసీ అధ్యక్షుడు రేవంత్‌రెడ్డిపై ఉస్మానియా యూనివర్సీటీ విద్యార్థి నేత కురవ విజయ్ ‌కుమార్ ‌సంచలన వ్యాఖ్యలు చేశారు. రాష్ట్రంలోని 65 నియోజకవర్గాల కాంగ్రెస్ పార్టీ అసెంబ్లీ టికెట్లను రూ.600కోట్లకు అమ్ముకున్నాడని ఆరోపించారు. ఆదివారం ఆయన తన అనుచరులతో కలిసి గాంధీభవన్‌ను ముట్టడించారు. అనంతరం విజయ్‌కుమార్ మాట్లాడుతూ.. రేవంత్‌రెడ్డిపై తీవ్ర ఆరోపణలు చేశారు.

రేవంత్‌రెడ్డి వసూళ్లపై ఐటీ, ఈడీకి ఫిర్యాదు చేస్తామని చెప్పారు. కోట్ల రూపాయల వసూళ్లపై వెంటనే అధిష్ఠానం విచారణ జరపాలని డిమాండ్‌ చేశారు. రేవంత్‌ను జిల్లాల్లో తిరగనివ్వమని హెచ్చరించారు. రూ.600కోట్ల వసూళ్లపై ఊరుకునే ప్రసక్తే లేదని తేల్చిచెప్పారు.

చంద్రబాబు అండ్‌కో కబంధహస్తాల నుంచి కాంగ్రెస్‌ను కాపాడాలని డిమాండ్‌ చేశారు. తెలంగాణ కాంగ్రెస్‌ పార్టీ దళారుల చేతుల్లోకి వెళ్ళిపోయిందని విమర్శించారు.  గద్వాల టికెట్‌ను రూ.10 కోట్ల క్యాష్‌, 5ఎకరాల భూమికి కొనుక్కున్నట్లు టికెట్‌ పొందిన సరితా తిరుపతయ్య బాహాటంగా చెప్పుకుంటున్నారని తెలిపారు.

కరీంనగర్ (Karimnagar)​ జిల్లా జమ్మికుంట (Jammikunta)లో జరగనున్న కేంద్ర రక్షణ శాఖ మంత్రి రాజ్‌నాథ్‌సింగ్‌(Rajnath Singh) బహిరంగ సభ ఏర్పాట్లను పర్యవేక్షిస్తోన్న హూజరాబాద్ (Huzurabad​) ఎమ్మెల్యే ఈటల రాజేందర్ (Etela Rajendar).. సీఎం కేసీఆర్‌ పై కీలక వ్యాఖ్యలు చేశారు. తాను గజ్వేల్​ (Gajwel) నియోజకవర్గం నుంచి పోటీ చేస్తానని చెప్పిన మాట ఆషామాషీ కాదని.. కచ్చితంగా బరిలో నిలిచి సీఎం కేసీఆర్​ (CM KCR)ను ఓడిస్తానని తెలిపారు.

ఈ సందర్భంగా దమ్ముంటే ఒకే నియోజకవర్గం నుంచి పోటీ చేయమని మంత్రి గంగుల కమలాకర్‌ ఇటీవల చేసిన సవాల్‌పై స్పందించిన ఈటల.. హుజూరాబాద్‌ ఉప ఎన్నికలో తనను ఓడించేందుకు.. రూ.వందల కోట్లు ఖర్చుపెట్టిన ఓడిపోయారని ఎద్దేవా చేశారు. నన్ను ఓడించడమే లక్ష్యంగా ఎంతో మంది మంత్రులు, ఎమ్మెల్యేలు రాత్రి పగలు శ్రమించారని, అధికార యంత్రాంగం మొత్తాన్నితనపై కేంద్రీకరించినా తన గెలుపును ఆపలేక పోయారని ఈటల గుర్తు చేశారు.

ఆ ఉప ఎన్నిక తర్వాత సీఎం కేసీఆర్‌ను ఓడించటమే తన లక్ష్యంగా పెట్టుకున్నట్టు తెలిపారు. ఇప్పటికే గజ్వేల్‌ నుంచి పోటీ చేస్తానని ప్రకటించానన్నారు. కాగా 22 ఏళ్లుగా రాజకీయాల్లో ఉన్న నేను ప్రజల మద్దతు, ఆశీర్వాద బలం కలిగిన నాయకుడినని, మంచి, చెడులు తెలుసుకొని స్టేట్​మెంట్​లు ఇస్తానని అన్నారు. మరోవైపు కేంద్ర రక్షణ శాఖ మంత్రి బహిరంగ సభకి భారీ బందోబస్తు మధ్య ఏర్పాట్లు పూర్తి అయ్యాయని ఈటల అన్నారు.

బీఆర్ఎస్ రాష్ట నాయకుడు, ఎన్ఎంఆర్ యువసేన వ్యవస్థాపక అధ్యక్షుడు నీలం మధు ముదిరాజ్ ఆ పార్టీకి గుడ్ బై చెప్పారు. 22 సంవత్సరాలుగా పార్టీకి సైనికుడిలా సేవలందించినా పార్టీ తనను గుర్తించలేదని ఆవేదన వ్యక్తం చేశారు. 2001లో సీఎం కేసీఆర్ పార్టీని స్థాపించిన నాటి నుంచి బీఆర్ఎస్ పార్టీలో కొనసాగుతూ పార్టీ అభ్యున్నతికి కృషి చేశానని చెప్పారు.

2014లో పటాన్ చెరు జడ్పీటీసీ అభ్యర్థిగా పోటీ చేయడానికి ఎవరూ ముందుకు రాకుంటే తాను ధైర్యంగా జడ్పీటీసీగా పోటీ చేసి భారీ మెజార్టీ సాధించినట్లు తెలిపారు. తన స్వగ్రామం చిట్కుల్‌లో రెండు ఎంపీటీసీలను గెలిపించానని అందులో తన తల్లి రాధమ్మ ఒక్కరని వెల్లడించారు. తర్వాత 2014, 2018 ఎన్నికల్లో బీఆర్ఎస్ పార్టీ అభ్యర్థి గెలుపునకు అలుపెరుగని కృషి చేశానన్నారు.

పార్టీ అభివృద్ధి కోసం తన ఆస్తులను సైతం అమ్మి కోట్ల రూపాయలను వెచ్చిస్తే తనను గుర్తించకపోవడం, ఎమ్మెల్యే అభ్యర్థిగా అవకాశం ఇవ్వకపోవడం బాధకు గురి చేసిందని ఆవేదన వ్యక్తం చేశారు. పార్టీ కోసం కోట్ల రూపాయలు ఖర్చుపెట్టి ప్రచారం నిర్వహిస్తే ఓర్వలేని ఎమ్మెల్యే మహిపాల్ రెడ్డి తనపై అక్రమంగా కేసులు బనాయించడమే కాకుండా పార్టీ కార్యక్రమాల కోసం తాను ఏర్పాటు చేసిన ఫ్లెక్సీలను సైతం చింపివేశారని అన్నారు. స్వతంత్ర అభ్యర్థిగా బరిలో ఉండడానికి నిర్ణయించుకున్నానని తెలిపారు.