Politics

బీఆర్ఎస్ ఎమ్మెల్యే దాస్యం వినయ్ భాస్కర్ ఆసక్తికర వ్యాఖ్యలు చేశారు. మేనిఫెస్టో అంటే తమకు భగవద్గీత, ఖురాన్, బైబిల్ లాంటిదని అభివర్ణించారు. తనకు బీఫామ్ ఇచ్చినందుకు సీఎం కేసీఆర్‌కు కృతజ్ఞతలు తెలిపారు. వచ్చే ఎన్నికల్లో తాను 50వేల మెజారిటీతో గెలుస్తానని ధీమా వ్యక్తం చేశారు.

బీఆర్ఎస్ మేనిఫెస్టోలో సీఎం కేసీఆర్ పేదల సంక్షేమానికి మరోసారి ఎన్నో పథకాలు అందించారని చెప్పారు. అంబేడ్కర్ ఆలోచనా విధానంతో అభివృద్ధిలో దూసుకెళ్తున్నామన్నారు. తెలంగాణ సచివాలయానికి అంబేడ్కర్ పేరు పెట్టి, అతిపెద్ద అంబేడ్కర్ విగ్రహాన్ని నెలకొల్పామని చెప్పారు.

కరోనా కాలంలో పశ్చిమ నియోజకవర్గంలో 46వేల కుటుంబాలను ఆదుకున్నామని గుర్తుచేశారు. వరంగల్ పశ్చిమ నియోజకవర్గ ప్రజలకు కష్టకాలంలో అండగా ఉన్నానన్నారు.

ప్రజలకు ఏనాడూ కనిపించని నాయకులు ఎన్నికలు దగ్గర పడుతుండడంతో వస్తున్నారని ఎద్దేవా చేశారు. మతతత్వ పార్టీలు ప్రజలు ఆదరించరని అన్నారు. అభివృధ్ధే ధ్యేయంగా అందరి సలహాలను స్వీకరిస్తూ ముందుకెళ్తున్నట్లు తెలిపారు.

బీఆర్ఎస్ (BRS) పార్టీ విడుదల చేసిన మెనిఫెస్టో పై విమర్శల ప్రవాహం కొనసాగుతోన్న నేపధ్యంలో.. బీఆర్ఎస్ ఎమ్మెల్సీ (MLC) కల్వకుంట్ల కవిత (Kavitha) కీలక వ్యాఖ్యలు చేశారు. బీఆర్ఎస్ మెనిఫెస్టో చూసిన తర్వాత కాంగ్రెస్, (Congress) బీజేపీ (BJP) పార్టీల్లో గుబులు మొదలైందని, అందుకే ఆ రెండు పార్టీల నేతలు ఇష్టం వచ్చినట్టు మాట్లాడుతున్నారని అన్నారు.

తెలంగాణ గ్రామీణ ఆర్థిక వ్యవస్థను పటిష్టం చేసేలా పార్టీ మెనిఫెస్టో ఉందని తెలిపారు. తాడూ బొంగరం లేని కాంగ్రెస్ చెప్పే మాటలు ప్రజలు ఎలా నమ్ముతారని ప్రశ్నించారు. ముందుగా కాంగ్రెస్ జాతీయ నాయకులు ఏమి తెలియని స్థానిక నేతలు రాసిచ్చే స్క్రిప్ట్ ను చదవడం మానుకోవాలని సూచించారు. మరోవైపు అబద్ధాలు చెప్పడంలో బీజేపీ ఆరితేరిందని, రూ. 15 లక్షలు ఒక్కో ఖాతాలో వేస్తామని చెప్పి విస్మరించారని, ఏటా 2 కోట్లు ఉద్యోగాలు కల్పిస్తామని చెప్పి బీజేపీ మోసం చేసిందని కవిత విమర్శించారు.

తెలంగాణ ప్రజల కోసం సీఎం కేసీఆర్ మంచి మెనిఫెస్టోను విడుదల చేశారని ప్రశంసించారు. 2014లో రూ. లక్షా 12 వేలుగా ఉన్న రాష్ట్ర తలసరి ఆదాయం ప్రస్తుతం రూ. 3 లక్షల 15 వేలకు చేరిందంటే తెలంగాణ ఎంత అభివృద్ధి చెందిందో తెలుస్తుందన్నారు. కాగా బీఆర్ఎస్ నిన్న విడుదల చేసిన మేనిఫెస్టోపై టీపీసీసీ అధ్యక్షుడు రేవంత్ రెడ్డి, బీజేపీ నేత కిషన్ రెడ్డి మరికొందరు నేతలు స్పందించారు. వారి వ్యాఖ్యలకు కవిత ధీటుగా కౌంటర్ ఇచ్చారు.

మాజీ మంత్రి, మాజీ పీసీసీ అధ్యక్షుడు పొన్నాల లక్ష్మయ్య నేడు బీఆర్ఎస్‌(BRS) పార్టీలో చేరనున్నారు. జనగామ(Janagama)లో జరగనున్న బహిరంగ సభలో సీఎం కేసీఆర్‌(Kcr), పొన్నాలకు గులాబీ కండువా కప్పి పార్టీలోకి ఆహ్వానించనున్నారు. కాగా, ఇటీవల పొన్నాల జనగామ టికెట్‌ ఇవ్వకపోవడంతో కాంగ్రెస్ పార్టీకి రాజీనామా చేసిన విషయం తెలిసిందే.

ఎన్నికల ప్రచారంలో భాగంగా ఇవాళ జనగామ జిల్లాకు సీఎం కేసీఆర్ వెళ్ళనున్నారు. ఈ సందర్భంగా బహిరంగ సభలో సీఎం  ప్రసంగించనున్నారు. ఈ తరుణంలోనే సీఎం కేసీఆర్ సమక్షంలో పొన్నాల లక్ష్మయ్య బీఆర్ఎస్ తీర్థం పుచ్చుకోనున్నారు.

జనగామ కాంగ్రెస్ పార్టీ టికెట్ తనకు ఇవ్వలేదని ఆవేదన వ్యక్తం చేస్తూ రేవంత్‌రెడ్డిని ఉద్దేశించి లక్ష్మయ్య కీలక వ్యాఖ్యలు చేశారు. ఈ నేపథ్యంలో మంత్రి కేటీఆర్‌ శనివారం ఎమ్మెల్యే దానం నాగేందర్‌తో కలిసి హైదరాబాద్‌లోని పొన్నాల నివాసానికి వెళ్లి కలిశారు. బీఆర్ఎస్ పార్టీలోకి పొన్నాలను సాదరంగా ఆహ్వానించారు. అనంతరం బీఆర్ఎస్‌లో చేరేందుకు పొన్నాల లక్ష్మయ్య సిద్ధమయ్యారు.

తెలంగాణ(Telangana)లో ఎలాగైనా పాగా వేసేందుకు బీజేపీ(Bjp) విశ్వ ప్రయత్నాలు చేస్తోంది. ఈ నేపథ్యంలో అధికార బీఆర్ఎస్(Brs), కాంగ్రెస్(Congress) పార్టీలకు దీటుగా ప్రచారంలోకి దిగింది. అభ్యర్థుల పేర్లను ప్రకటిస్తూనే మరోవైపు క్షేత్రస్థాయిలో ప్రజలను ప్రసన్నం చేసుకునేందుకు వ్యూహాలను రచిస్తోంది.

ఈ నేపథ్యంలో జాతీయ నేతలు ఒక్కొక్కరిగా తెలంగాణ పర్యటనకు వచ్చి తమ ప్రసంగాలతో బీఆర్ఎస్, కాంగ్రెస్‌పై విమర్శలు గుప్పిస్తున్నారు. ఇవాళ రాష్ట్రంలో కేంద్ర మంత్రి రాజ్‌నాథ్ సింగ్ పర్యటించనున్నారు. ఈరోజు మధ్యాహ్నం 12.10 గంటలకు హైదరాబాద్‌లోని శంషాబాద్ విమానాశ్రయానికి రాజ్‌నాథ్ సింగ్ చేరుకుంటారు. అక్కడ ఆయనకు రాష్ట్ర నేతలు ఘనస్వాగతం పలకనున్నారు.

అక్కడి నుంచి జమ్మికుంట, మహేశ్వరంలో నిర్వహించే సభల్లో రాజ్‌నాథ్ ప్రసంగిస్తారు. అనంతరం శంషాబాద్ నుంచి హెలికాప్టర్‌లో రాజ్‌నాథ్‌ సింగ్‌ హుజూరాబాద్‌కు వెళ్తారు. హుజూరాబాద్‌ నుంచి రోడ్డు మార్గంలో జమ్మికుంటకు చేరుకుంటారు. అక్కడ సభలో ప్రసంగించిన అనంతరం మహేశ్వరానికి బయల్దేరతారు. మహేశ్వరం మున్సిపల్ గ్రౌండ్‌లో నిర్వహించే సభలో పాల్గొని తిరిగి రాత్రి 7.35 గంటలకు ఢిల్లీకి పయనమవుతారు.

ఖమ్మం (Khammam) జిల్లా కేంద్రంగా రాజకీయ పరిణామాలు వేగంగా మారుతున్నాయి. సీనియర్ నేత బాలసాని లక్ష్మీ నారాయణ(Balasani Lakshmi Narayana) బీఆర్​ఎస్​ (BRS)పార్టీ ప్రాథమిక సభ్యత్వానికి రాజీనామా చేస్తున్నట్లు ప్రకటించారు. మంత్రి పువ్వాడ అజయ్ ప్రాతినిథ్యం వహిస్తున్న ఖమ్మంలో పలువురు నేతలు బీఆర్​ఎస్​ని దూరమవడం చర్చనీయాంశంగా మారింది.

మాజీ మంత్రి తుమ్మల, ప్రచార కమిటీ కో-ఛైర్మన్ పొంగులేటి శ్రీనివాస్‌రెడ్డి రంగంలోకి దిగి.. ఆపరేషన్ ఆకర్ష్‌కి తెర లేపారు. ఫలితంగా మాజీ ఎమ్మెల్సీ, మరో ముగ్గురు కార్పొరేటర్లు, ఇద్దరు మాజీ కార్పొరేటర్లు, మరికొంత మంది నాయకులు గులాబీ పార్టీకి రాజీనామా చేశారు. అయితే మంత్రి పువ్వాడ అజయ్ పార్టీలో పరిణామాలు చక్కదిద్దేందుకు రంగంలోకి దిగడంతో.. ఖమ్మం రాజకీయం కాక రేపుతోంది.

హైదరాబాద్ లో ఉన్న మంత్రి పువ్వాడ కార్పొరేటర్లకు ఫోన్ చేసి పార్టీని వీడొద్దని కోరినా వెనక్కి తగ్గలేదు. ఈ క్రమంలో పువ్వాడ ఖమ్మం వెళ్లి కార్పొరేటర్లు, నియోజకవర్గ ముఖ్యనేతలతో అత్యవసర సమావేశం ఏర్పాటు చేసి పార్టీలో నెలకొన్న పరిణామాలపై చర్చించారు. అంతా పార్టీ గెలుపు కోసం పని చేయాలని దిశా నిర్దేశం చేశారు. మరో వైపు భీ-ఫారాల పంపిణీ, మేనిఫెస్టో ప్రకటనతో పార్టీ శ్రేణుల్లో కోలాహలం నెలకొన్న తరుణంలో ఖమ్మంలో జరిగిన రాజకీయ పరిణామాలు బీఆర్​ఎస్​ని కలవరానికి గురి చేస్తున్నాయని ప్రచారం జరుగుతోంది.