Hyderabad

తెలంగాణ అసెంబ్లీ ఎన్నికల ప్రచారంలో ఉన్న బీఆర్ఎస్ వర్కింగ్ ప్రెసిడెంట్, రాష్ట్ర మంత్రి కేటీఆర్ (Minister KTR).. రోడ్‌ షోలు, బహిరంగ సభలతో బిజీబిజీగా గడుపుతూనే.. సిటీలో ఓటర్లకు మరింత దగ్గరయ్యే ప్రయత్నం చేస్తున్నారు. ఇందులో భాగంగానే హైదరాబాద్‌లో ఉన్న ఫేమస్ ప్రదేశాలను సందర్శిస్తున్నారు.

కాగా ఇటీవల నిలోఫర్ కేఫ్‌లో సందడి చేసిన కేటీఆర్.. శుక్రవారం రాత్రి చార్మినార్‌ సమీపంలోని ఫేమస్‌ షాదాబ్‌ రెస్టారెంట్‌కు (Shadab Restaurant) వెళ్లి అక్కడున్న వారిని సరదాగా పలకరించారు. షాదాబ్‌ రెస్టారెంట్‌ కు కేటీఆర్ వెళ్లడంతో అక్కడున్న వారు ఒక్కసారిగా ఆశ్చర్యపోయారు. వారందరినీ పలకరిస్తూనే.. రెస్టారెంట్‌ లో ఉన్న ప్రజలతో కలిసి బిర్యానీ తిన్నారు.

అనంతరం మొజంజాహీ మార్కెట్‌ (Mozamjahi Market)లో ఫేమస్‌ ఐస్‌క్రీమ్‌ను రుచి చూశారు కేటీఆర్. మరోవైపు కేటీఆర్‌ రాకతో రెండు ప్రాంతాలు సందడిగా మారిపోయాయి. కేటీఆర్ తో సెల్ఫీలు దిగేందుకు, కరచాలనం చేసేందుకు ప్రజలు ఎగబడ్డారు. కాగా ఈ పర్యటనకు సంబంధించిన ఫొటోలను ట్విట్టర్ వేదికగా (X)లో పోస్టు చేశారు కేటీఆర్‌. ప్రస్తుతం నెట్టింట ఈ పిక్ లు వైరల్‌ గా మారాయి.

మరోవైపు తెలంగాణ శాసనసభ ఎన్నికలకు (Telangana Assembly Elections) సమయం దగ్గరపడుతుండటంతో ప్రధాన పార్టీలు ఎన్నికల ప్రచారాన్ని ముమ్మరం చేశాయి. విమర్శలకు ప్రతివిమర్శలతో సమాధానాలు ఇస్తూ.. ఎన్నికల సమరాన్ని రణరంగంగా మారుస్తున్నాయి.. ఈ సమయంలో నగరంలో అర్ధరాత్రి కేటీఆర్‌ ప్రజలతో కలిసిపోవడం వల్ల బీఆర్ఎస్ పై పాజిటివ్ వైబ్స్ ఏర్పడే అవకాశాలు ఉన్నట్టు కొందరు భావిస్తున్నారు.

అందరూ ఊహించినట్టే బీజేపీ (BJP)కి షాక్ ఇచ్చి కాంగ్రెస్ (Congress) తీర్థం పుచ్చుకున్నారు సీనియర్ రాజకీయ నాయకురాలు సినీ నటి విజయశాంతి. 1998లో తన రాజకీయ జీవితాన్ని ప్రారంభించిన విజయశాంతి మొదట కమలం కండువా కప్పుకున్నారు. తర్వాత పార్టీలు మారుతూ చివరికి కాంగ్రెస్ వైపు మొగ్గు చూపారు. ఇక బీజేపీని వీడి కాంగ్రెస్‌లో చేరిన విజయశాంతి.. కమలం నేతలపై సంచలన వ్యాఖ్యలు చేశారు.

కేసీఆర్ నాటిన మొక్క బీజేపీలో ఉన్న ఈటల రాజేందర్ అని తెలిపిన విజయశాంతి (Vijayashanti).. ఇప్పుడు ఆ మొక్క వృక్షంగా మారి బీజేపీలో గందరగోళం సృష్టించిందని విమర్శించారు. రాష్ట్ర అధ్యక్షుడిగా ఉన్న బండి సంజయ్‌ని.. ఆ పదవి నుంచి తప్పించడానికి కారణం ఈటల అని ఆరోపించిన రాములమ్మ.. చేజేతులా వారి పార్టీని వారే నాశనం చేసుకున్నారని బీజేపీని దెప్పిపొడిచారు. మరోవైపు బీజేపీ హైకమాండ్ కేసీఆర్ (KCR) ట్రాప్‌లో పడిపోయిందని ఆరోపించారు.

గతంలో కేసీఆర్‌ను అరెస్ట్ చేసి జైల్లో వేస్తామని చెప్పడంతో తాను బీజేపీలో చేరానని విజయశాంతి గుర్తు చేశారు. కానీ తెర ముందు ఒకటి, తెర వెనుక మరొక డ్రామా జరుగుతుందని వెల్లడించారు. స్వయంగా ప్రధాని నరేంద్ర మోడీ, అమిత్ షా వంటి నేతలే కాళేశ్వరంలో జరిగిన అవినీతి గురించి కేసీఆర్ ను ప్రశ్నిస్తుండటం చిత్రంగా ఉంది.. అధికారం వారి చేతిలో ఉంచుకుని ఎందుకు ఈ డ్రామాలు ఆడుతున్నట్టని.. అరెస్ట్ చేయించాలంటే కేంద్రానికి ఎంత సమయం పడుతుందని ప్రశ్నించిన విజయశాంతి.. దీనికి మోడీ సమాధానం చెప్పాలన్నారు.

మరోవైపు బీజేపీని మోడీ, కేసీఆర్ కాళ్ల దగ్గర పెట్టారని ఆరోపించిన విజయశాంతి.. బీఆర్ఎస్, బీజేపీలు రెండు ఒక్కటి కావటంతో పార్టీకి రాజీనామా చేసి కాంగ్రెస్‌లో చేరానని వివరించారు. ఏ శత్రువుతో పారాడుతున్నామో అదే శత్రువుతో చేతులు కలిపి..బండి సంజయ్‌ని అధ్యక్ష పదవి నుంచి మార్చిందని, వద్దని తాను ఎంత చెప్పిన అధిష్టానం చెవికి ఎక్కించుకోలేదని విజయశాంతి ఆరోపించారు.

టీపీసీసీ చీఫ్‌ రేవంత్ రెడ్డి (Revanth-Reddy)పై ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ ఈ మధ్య తీవ్ర స్థాయిలో మండిపడటం కనిపిస్తూనే ఉంది.. మరోవైపు కాంగ్రెస్ విడుదల చేసిన మ్యానిఫెస్టోపై అస‌దుద్దీన్ ఓవైసీ ఆగ్ర‌హం వ్య‌క్తం చేశారు. ఎంఐఎం పార్టీ ఆధ్వ‌ర్యంలో నాంప‌ల్లిలో జ‌రిగిన ప్ర‌చారంలో పాల్గొన్న అస‌దుద్దీన్.. కాంగ్రెస్ (Congress)పై కీలక వ్యాఖ్యలు చేశారు. రాజ‌స్థాన్‌లో మైనార్టీ డిక్ల‌రేష‌న్ ఎందుకు ఇవ్వ‌లేద‌ని ప్ర‌శ్నించారు.

తెలంగాణ‌లో మాత్రమే కీలక హామీలు ఇస్తున్న కాంగ్రెస్.. రాజ‌స్థాన్‌లో కూడా ఎన్నిక‌లు జ‌రుగుతున్న విషయాన్ని గుర్తించాలని అస‌దుద్దీన్ ఓవైసీ (Asaduddin Owaisi) తెలిపారు. మైనార్టీ డిక్ల‌రేష‌న్ అంశాన్ని ప్ర‌స్తావిస్తూ.. చ‌త్తీస్‌ఘ‌డ్‌, మ‌ధ్య‌ప్ర‌దేశ్‌లో కూడా మైనార్టీ డిక్ల‌రేష‌న్ లేద‌ని..అక్క‌డ ఎందుకు మైనార్టీ డిక్ల‌రేష‌న్ ప్ర‌క‌ట‌న చేయ‌లేద‌ని ప్రశ్నించారు.

రాహుల్ గాంధీ త‌న కుటంబానికి చెందిన సీటునే కాపాడుకోలేక పోతున్నాడాని అస‌దుద్దీన్ ఓవైసీ విమ‌ర్శించారు. మరోవైపు తెలంగాణ‌లో మంచి స్కీమ్‌లు ఉన్నాయ‌ని, అవ‌న్నీ త‌మ ప్ర‌జ‌ల‌కు అందుతున్న‌ట్లు ఓవైసీ తెలిపారు. తెలంగాణలో అమలవుతున్న షాదీ ముబార‌క్‌ (Shaadi Mubarak)..క‌ళ్యాణ ల‌క్ష్మీ (Kalyana Lakshmi) లాంటి స్కీమ్‌లు, ఆస‌ర పింఛ‌న్లు ఇక్కడి ప్రజలకు ఉపయోగంగా ఉన్నట్టు ఓవైసీ వెల్ల‌డించారు.

బీఆర్ఎస్ (BRS) ప్రభుత్వాన్ని గద్దె దించి అధికారాన్ని హస్తగతం చేసుకోవడమే లక్ష్యంగా పెట్టుకున్న కాంగ్రెస్ (Congress).. ఆ దిశగా వ్యూహాలు రచిస్తుంది. ఇప్పటికే హస్తం పన్నిన చక్ర వ్యూహాన్ని చేధించలేక బీఆర్ నేతలు.. కాంగ్రెస్ పై తీవ్ర విమర్శలకు దిగినట్టు.. ఓటర్లను భయాందోళనకు గురిచేసే విధంగా ప్రచారం చేస్తున్నట్టు వార్తలు గుప్పుమంటున్నాయి..

ఈ నేపథ్యంలో కాంగ్రెస్ వివిధ వర్గాలను ఆకట్టుకునేలా హామీల వర్షం కురిపిస్తోంది. ఇప్పటికే ఆరు గ్యారెంటీలకు అనుబంధంగా మరో 66 అశాలతో కూడిన మేనిఫెస్టో ప్రకటించిన కాంగ్రెస్.. మరో కీలక హామీ ఇవ్వడానికి సిద్దం అయ్యింది. ఈ క్రమంలో టీపీసీసీ (TPCC) చీఫ్ రేవంత్ రెడ్డి (Revanth-Reddy) మరో కీలక హామీ ప్రకటించారు.

గత కొంత కాలంగా సమగ్ర శిక్ష కాంట్రాక్టు ఉద్యోగులు.. తమ సమస్యలను పరిష్కరించాలని డిమాండ్ చేస్తున్నవిషయం తెలిసిందే. అయితే తాజాగా ఈ విషయంలో రేవంత్ ఎక్స్ (Twitter) వేదికగా రియాక్ట్ అయ్యారు. విద్యాశాఖలో పని చేస్తోన్న తెలంగాణ సమగ్ర శిక్షా కాంట్రాక్ట్ ఉద్యోగులు (SSA) నెల రోజుల పాటు వారి న్యాయమైన హక్కుల కోసం ఆందోళన చేసిన విషయం నా దృష్టిలో ఉందన్న రేవంత్ రెడ్డి.. కాంగ్రెస్ అధికారంలోకి రాగానే వారి సమస్యల పరిష్కారానికి కృషి చేస్తానని హామీ ఇచ్చారు..

కుత్బుల్లాపూర్ (Kutbullapur) అసెంబ్లీ నియోజకవర్గ ఎమ్మెల్యే అభ్యర్ధి కూనా శ్రీశైలం గౌడ్ (Kuna Srisailam Goud) ఈ రోజు ఎన్నికల ప్రచారాన్ని నిర్వహించారు. బీజేపీ (BJP) రాష్ట్ర ఎన్నికల నిర్వహణ కమిటీ చైర్మన్, ఎమ్మెల్యే ఈటల రాజేందర్ తో కలిసి గాజులరామారం డివిజన్ చంద్రగిరినగర్ లో ప్రచారం చేశారు. ఈ సందర్భంగా ఈటల రాజేందర్, బీఆర్ఎస్ పై కీలక వ్యాఖ్యలు చేశారు.

బస్తీ ప్రజలకు డబల్ బెడ్ రూమ్ ఇచ్చే దమ్ము కేసీఆర్ (KCR)కి లేదు కానీ గుడిసెలు వేసుకున్న వారి దగ్గర భూములు లాక్కొని పెద్దవాళ్ళకు కట్టబెడుతున్నారని ఈటల మండిపడ్డారు.. ఆనాటి ప్రభుత్వాలు ఎల్లమ్మబండలో ఉన్న 250 ఎకరాలలో 160 ఎకరాలు పేదలకు పంచాయి. మిగిలిన 92 ఎకరాలలో దేశ్ పాండే అనేవాడు రేకులు పాతే ప్రయత్నం చేసిండు. ఆనాడు ప్రతిపక్షంలో ఉన్న నేను రేకులు పీకేసి ఇది ప్రభుత్వ భూమి నువ్వు ఎవడ్రా అంటూ అతన్ని అడ్డుకున్నానని ఈటల తెలిపారు.

కానీ కేసీఆర్ ఆ భూమిని 4500 కోట్లకు బ్రోకర్లకు కట్టబెట్టిండని ఈటల ఆరోపించారు. బంజారాహిల్స్ లో నేను రాములు నాయక్ కలిసి ప్రభుత్వం  భూములను కబ్జా కాకుండా కాపాడుకున్నాం. ఆ నాటి ముఖ్యమంత్రి రోశయ్య గారికి చెప్తే  ఇళ్లను కూలగొట్టకుండా ఆపారు. కానీ ఈ ముఖ్యమంత్రి అన్నింటినీ కబ్జాలు పెడుతున్నాడని ఈటల మండిపడ్డారు. అలాంటి దలారికి ఓటు వేసి గెలుపిద్దామా? అని ప్రశ్నించారు ఈటల..

కేసీఆర్ ప్రజలను నమ్ముకొలేదు. డబ్బులు నమ్ముకున్నారు.. డబుల్ బెడ్ రూం ఇవ్వలేదని మీరు కోపంగా ఉంటే..100 కోట్లు ఖర్చుపెడతాడు. ఓటుకు 10 వేలు ఇస్తాడు.. ప్రజలారా అవి మీ నుంచి దోచుకున్న డబ్బులు ఇస్తే తీసుకోండి. కానీ ఓటు మాత్రం బీజేపీకి వేయండని ఈటల రాజేందర్ కోరారు. మరోవైపు మొన్న ప్రధాని నన్ను పక్కకు పిలుచుకొని మాట్లాడాడు. నాలుగు హామీలు ఇవ్వమన్నారు. ఉచిత విద్య, ఉచిత వైద్యం అందిస్తామని చెప్పమన్నారు. పుస్తెలు కాళ్ళమీద పెట్టీ ఏడ్చే రోజులు పోవాలని ప్రధాని కోరుకుంటున్నారని ఈటల తెలిపారు.

బీజేపీ అధికారంలోకి వస్తే.. కుటుంబ పెద్దను కోల్పోయిన పేదవారికి 5 లక్షల రూపాయల ఇన్సూరెన్స్ అందిస్తాం. పేదవారికి 60 గజాల స్థలం ఇస్తాం లేదంటే డబుల్ బెడ్ రూం అందిస్తామని ఈ సందర్భంగా వెల్లడించారు ఈటల.. కేసీఆర్ ప్రజలకు కల్యాణలక్ష్మి కింద 13500 కోట్లు ఇచ్చి, మద్యాన్ని అలవాటు చేసి ప్రజల నుంచి 45 వేల కోట్లు లాక్కుంటున్నాడని ఆరోపించారు ఈటల..

మరోవైపు అవినీతి ప్రభుత్వాన్ని ఓడించాలని ఈటల పిలుపునిచ్చారు. ప్రత్యేక రాష్ట్రంలో బ్రతుకులు బాగుపడతాయని ఆశపెట్టిన కేసీఆర్.. బంగారు తెలంగాణ కాదు బాధల, కన్నీళ్ళ తెలంగాణ మనకు ఇచ్చాడని ఈటల ఆరోపించారు. బీజేపీ అధికారంలోకి వస్తె తెల్లరేషన్ కార్డులు అందిస్తాం. నిజమైన బంగారు తెలంగాణ తీసుకువస్తామని ఈటల రాజేందర్ (Etela Rajender) వెల్లడించారు.

బీజేపీ ఎంపీ లక్ష్మణ్ (MP Laxman).. బీఆర్ఎస్ (BRS), కాంగ్రెస్‌(Congress)పై పలు విమర్శలు చేశారు. ఈ రెండు పార్టీలు తోడు దొంగలని ఎంఐఎం (MIM) కబంధ హస్తాల్లో ఉన్నాయని ఆరోపించారు. శుక్రవారం మీట్ ది ప్రెస్‌లో మాట్లాడిన లక్ష్మణ్.. తెలంగాణ ప్రభుత్వం సహకారం అందించకున్న రాష్ట్రం కోసం కేంద్రం అభివృద్ది కార్యక్రమాలు చేస్తుందని తెలిపారు. బీఆర్ఎస్, కాంగ్రెస్‌లు ఎన్నికల తర్వాత కలుస్తాయన్న ఎంపీ.. బీజేపీ, బీసీని సీఎం చేస్తామంటే.. రాహుల్ గాంధీ విరుద్ధంగా మాట్లాడుతున్నాడని మండిపడ్డారు.

రాష్ట్రంలో బీజేపీకి ఒక్క అవకాశం ఇస్తే.. గుజరాత్, ఉత్తరప్రదేశ్‌ మాదిరిగా అభివృద్ధి చేసి చూపుతామని లక్ష్మణ్ హామీ ఇచ్చారు. బీసీలను అవమానించే విధంగా ఉన్న కేటీఆర్ (KTR) మాటలు చూస్తుంటే.. వారికి బీసీ (BC)లపై చిత్త శుద్ధి లేదన్న విషయం అర్థం అవుతుందని లక్ష్మణ్ మండిపడ్డారు. బీజేపీ ఎప్పుడు బీసీ జనగణనకు వ్యతిరేకం కాదని.. కానీ కొన్ని సమస్యలు ఉన్నాయని లక్ష్మణ్ తెలిపారు.

కొన్ని టెక్నికల్ ఇష్యూల వల్ల బీసీ జనగణన ఆలస్యం అవుతుందని లక్ష్మణ్ పేర్కొన్నారు. రెడ్డి, చౌదరీలు కర్ణాటకలో బీసీలు, వైశ్యులు, బ్రాహ్మణులు ఇలా అందరూ అన్ని చోట్ల ఉన్నారన్న లక్ష్మణ్.. వారందరినీ బీసీలో చేర్చాలా? అని ప్రశ్నించారు. కేంద్రంలో మళ్లీ అధికారంలోకి వస్తే ఉమ్మడి పౌర చట్టాన్ని తీసుకొచ్చే విషయంలో కృషి చేస్తామని లక్ష్మణ్ అన్నారు..

బీసీ సీఎం అభ్యర్థులు మా పార్టీలో చాలా మంది ఉన్నారన్న లక్ష్మణ్.. బీజేపీ (BJP) ఆర్ఎస్ఎస్ మధ్య ఎలాంటి పొత్తు లేదని తెలిపారు. ఆర్ఎస్ఎస్ సలహాలు సూచనలు మాత్రమే ఇస్తుందని వెల్లడించారు. గ్యారంటీల పేరుతో కర్ణాటక ప్రజలని కాంగ్రెస్ మోసం చేసిందని విమర్శించిన లక్ష్మణ్.. ఓట్ల కోసం గ్యారంటీలు అనే గాలం ఆ పార్టీ వేసిందని విమర్శించారు.. పెట్రోల్, డీజిల్ ధరలు బీజేపీ పాలిత రాష్ట్రాలలో తక్కువ ఉన్నాయన్న లక్ష్మణ్.. ఇక్కడ కూడా అధికారం ఇస్తే తగ్గిస్తామని పేర్కొన్నారు.

కాంగ్రెస్ ను విమర్శించే అవకాశం వస్తే మొదటి వరసలో ఉండేది కేటీఆర్ (KTR)..హరీశ్​ రావు అని జనం అనుకుంటున్నారు. ఇప్పటికే మాటలకు అందని విధంగా హస్తాన్ని ఆటాడుకుంటున్న ఈ మంత్రులు.. ఎన్నికలు మొదలైనప్పటి నుంచి కాంగ్రెస్ పేరు పలకని రోజు లేదని జనం ముచ్చటించుకుంటున్నారు. ఈ నేపథ్యంలో మంత్రి హరీశ్​ రావు మరోసారి కాంగ్రెస్ పై ఘాటు విమర్శలు చేశారు.

కన్నడ ప్రజలకు ఆరు నెలల క్రితం అరచేతిలో వైకుంఠం చూపించిన కాంగ్రెస్​ (Congress) నేతలు.. ఇప్పుడేమో​ నరకం చూపిస్తున్నారని హరీశ్​రావు విమర్శించారు. నోటికి ఏది వస్తే అదే హామీలుగా ఇచ్చిన కాంగ్రెస్ అగ్ర నాయకుడు రాహుల్​ గాంధీ.. ఎన్నికల తర్వాత ఒక్కసారిగా కూడా కర్ణాటక వెళ్లలేదని హరీశ్​రావు అన్నారు. దిల్లీ నేతల హామీలను నమ్ముకున్న కర్ణాటక ప్రజలు ఆరు నెలల క్రితం చేసిన తప్పుకు.. ఇప్పుడు బాధపడుతున్నారని తెలిపారు.

అధికారంలోకి వచ్చిన 100 రోజుల్లో ఉద్యోగాలు ఇస్తామని చెప్పిన కర్ణాటక ప్రభుత్వం.. ఆ హామీని మరచిపోయిందన్నారు హరీశ్​ రావు (Harish Rao).. ఉన్న పథకాలకే కోత పెడుతూ ప్రజలను ఇబ్బందులు పెడుతున్నారని ఆరోపించారు. అక్కడ రోడ్లు వేయడానికే డబ్బులు లేవని డీకే శివకుమార్‌ అన్న విషయాన్ని ఈ సందర్భంగా హరీశ్​ రావు గుర్తు చేశారు. కాంగ్రెస్‌ పాలనలో కర్ణాటక దివాలా తీసిందని విమర్శించారు.

తెలంగాణ (Telangana)లో నేను రైతును అని గర్వంగా చెప్పుకునే స్థితికి కేసీఆర్‌ తీసుకొచ్చారన్న హరీశ్​రావు.. కాంగ్రెస్ ను నమ్ముకుంటే వెన్నుపోటు ఖాయం.. ఇచ్చిన హామీల కోసం చూస్తే గుండెపోటు రావడం నిజం అని ఎద్దేవా చేశారు. కర్ణాటకలో నీళ్లు రాక ప్రజలు ఇబ్బందులు పడుతున్నారని.. కానీ తెలంగాణలో ప్రతి పల్లెలోను నీళ్లు పుష్కలంగా లభిస్తున్నాయన్న హరీష్ రావు.. రాష్ట్రంలో ప్రచారం చేస్తున్న ఏఐసీసీ అధ్యక్షుడు మల్లికార్జున ఖర్గే తీరు చూస్తే హాస్యాస్పదంగా ఉందని విమర్శించారు.

తెలంగాణలో రాజకీయ పరిణామాలు వేగంగా మారుతున్నాయి. రాత్రికి రాత్రే నేతల కండువాల రంగులు మారుతున్నాయి. పార్టీ అధినాయకత్వంపై అసంతృప్తితో, కోపంతో జంపింగ్ జపాంగ్‌ల్లా కొందరు నేతలు మారుతున్నారు. ఎన్నికలకు పట్టుమని 13 రోజులు కూడా లేవు. అయినా నేతల వలసలు మాత్రం ఆగడం లేదు. మరోవైపు గెలుపే లక్ష్యంగా నేతలు సీనియర్ లీడర్లను ప్రసన్నం చేసుకునే పనిలో బిజీగా మారారు.

ఈ క్రమంలో మాజీ హోంమంత్రి దేవేందర్ గౌడ్‌ (Devender Goud)తో కాంగ్రెస్‌‌ ప్రచార కమిటీ చైర్మన్‌, ఎల్బీనగర్ కాంగ్రెస్ పార్టీ అభ్యర్థి మధు యాష్కీ గౌడ్ (Madhu Yashki Goud) నేడు సమావేశమయ్యారు. ప్రస్తుతం వీరిద్దరి భేటీ రాజకీయ ప్రాధాన్యత సంతరించుకుంది. మరోవైపు తెలంగాణలో అధికారమే లక్ష్యంగా కాంగ్రెస్ పార్టీ పావులు కదుపుతోంది. బీఆర్ఎస్ అవినీతి భాగోతం అంటూ కొత్త రాజకీయ సినిమాని తెరపైకి తీసుకొచ్చింది.

అదీగాక అధిష్టానం సూచనల మేరకు రాష్ట్రంలో పట్టున్న నేతలను పార్టీలోకి ఆహ్వానించడమే కాకుండా.. ఇతర పార్టీల్లో అసంతృప్తిగా ఉన్న నేతలకు వలలు వేస్తున్నట్లు సమాచారం. ఇక టీడీపీ నేత దేవేందర్ గౌడ్‌ తో గతంలో పీసీసీ చీఫ్ రేవంత్ రెడ్డి (Revanth Reddy) సైతం సమావేశమై చర్చలు జరిపారు. ఈ ఏడాది జులై 18న దేవేందర్ గౌడ్‌తో పాటు ఆయన తనయులు వీరేందర్ గౌడ్, విజయేందర్ గౌడ్‌లను రేవంత్ కలుసుకున్నారు.

ఈ నేపథ్యంలో దేవేందర్ గౌడ్‌తో పాటు బీజేపీలో కొనసాగుతన్న వీరేందర్ గౌడ్‌ ను పార్టీలోకి రావాలని కొరినట్టు సమాచారం. ఆ సమయంలో రేవంత్ వెంట మధుయాష్కి గౌడ్, మహేశ్వర్ రెడ్డి కూడా ఉన్నట్టు వార్తలు వచ్చాయి. మరోసారి ఇలాంటి కీలక సమయంలో దేవేందర్ గౌడ్‌ను మధు యాష్కి కలవడం రాజకీయ వర్గాలలో చర్చకు దారితీస్తుంది. ఒకవేళ దేవేందర్ గౌడ్‌ కూడా కాంగ్రెస్ (Congress)లోచేరే అవకాశం ఉందని పార్టీ వర్గాల విశ్వసనీయ సమాచారం..