Hyderabad

తెలంగాణలో అసెంబ్లీ ఎన్నికల తేదీ దగ్గర పడుతున్న కొద్ది అన్ని పార్టీల నేతలు ప్రచారాన్ని ముమ్మరం చేశారు. ఇందులో భాగంగా సభలు, సమావేశాలతో విమర్శలు, ప్రతి విమర్శలతో రాష్ట్ర రాజకీయాలను హీటెక్కిస్తున్నారు. దీంట్లో భాగంగా బీఆర్ఎస్ (BRS) నేత,ఎమ్మెల్సీ కల్వకుంట్ల కవిత (MLC Kavitha) కాంగ్రెస్, బీజేపీ పై సంచలన వ్యాఖ్యలు చేశారు.

కాంగ్రెస్, బీజేపీ పార్టీల్లో.. బీఆర్ఎస్ ప్రకటించిన మ్యానిఫెస్టోను చూసి గుబులు మొదలైందని విమర్శించారు. ఏం చేయాలో అర్థం గాక రెండు పార్టీల నేతలు మతితప్పినట్టుగా మాట్లాడుతున్నారని కవిత ఎద్దేవా చేశారు. కాంగ్రెస్ (Congress) ప్రకటించిన గ్యారెంటీలు టిష్యూ పేపర్లని, అబద్దాలు చెప్పడంలో బీజేపీ (BJP) ఆరితేరిందని వ్యంగ్యాస్త్రాలు సంధించారు.

బీఆర్ఎస్ ప్రకటించిన మ్యానిఫెస్టో తెలంగాణ గ్రామీణ ఆర్థిక వ్యవస్థను పటిష్టం చేసేలా ఉందన్న కవిత.. అన్ని వర్గాలకు లబ్ధి చేకూరేలా రూపొందించారని తెలిపారు. మరోవైపు రెండు పార్టీలు గ్యారెంటీలకు గాంధీలు, క్షమాపణలకు బంట్రోతులా అంటూ ట్వీట్ చేశారు. కాంగ్రెస్ ను ఉద్దేశించి.. ఆరు దశాబ్ధాల పాటూ తెలంగాణను మోసం చేసిన గాంధీలు కనీసం క్షమాపణలు చెప్పలేరా అని ప్రశ్నించారు.

వందలాది తల్లుల కడుపుకోత పదేళ్లలో ఒక్కసారి కూడా మీ కుటుంబానికి గుర్తుకు రాకపోవడం బాధాకరం అవి వెల్లడించిన కవిత అమరవీరుల స్థూపం వద్ద మోకరిల్లినా కూడా మీ పాపాలకు ప్రాయశ్చిత్తం ఉండదని ఎమ్మెల్సీ కవిత ఘాటుగా విమర్శించారు.

ఎప్పుడు వివాదాలను వైఫై లా తన చుట్టూ ఉండేలా చూసుకునే బీజేపీ (BJP) ఎమ్మెల్యే రాజాసింగ్ (MLA Raja Singh).. గోషామహల్ (Goshamahal) నియోజకవర్గం నుంచి పోటీ చేస్తారా లేదా అనేది అభ్యర్థులను ప్రకటించే వరకు సీక్రెట్ గా ఉంది.. కానీ చివరికి బీజేపీ అధిష్టానం ఆయనకే టికెట్ ఇచ్చింది.

ఇప్పుడు రాజాసింగ్ కు ఉన్న సమస్య నియోజక వర్గంలో మరోసారి సత్తాచాటి.. తన చరిష్మా తగ్గలేదని నిరూపించాలి.. ఈ లక్ష్యంతో ఎన్నికల ప్రచారంలో దూసుకుపోతున్న రాజాసింగ్.. సొంత పార్టీ నేతలపై నిప్పులు చెరిగారు. ఈ ఎన్నికలు తన జీవితానికి సంబంధించినవని తెలిపిన రాజా సింగ్.. తనను మోసం చేయాలని చూస్తున్న వారిలో ఏ ఒక్కరిని కూడా వదిలిపెట్టనని మాస్ వార్నింగ్ ఇచ్చారు..

అంతేకాదు.. చంపడానికైనా.. చావడానికైనా సిద్దంగా ఉన్నట్టు రాజాసింగ్ హెచ్చరించారు.. తన చుట్టూ ఉన్న వారే తన వ్యూహాలను ప్రత్యర్థులకు చేరవేస్తున్నారంటూ ఆగ్రహం వ్యక్తం చేశారు. ఎన్నికలు ముగిసిన తరువాత వారి అంతు చూస్తానంటూ రాజాసింగ్ వార్నింగ్ ఇచ్చారు.. తనను ఓడించటానికి . 2018 లో ప్రయత్నించిన వారి లిస్ట్ పదిలంగా ఉందన్న రాజాసింగ్.. ఎవరెవరు తన ప్రత్యర్థులతో టచ్‌లో ఉంటున్నారనే సమాచారం తన వద్ద ఉందని పేర్కొన్నారు.

ప్రస్తుతం, ధర్మానికి, అధర్మానికి మధ్య యుద్ధం జరుగుతోందని తెలిపిన రాజాసింగ్.. ధర్మాన్ని గెలిపించాలని ప్రజలకు విజ్ఞప్తి చేశారు.. మరోవైపు గతంలో గోషామహల్‌ నియోజక వర్గంలో రిగ్గింగ్‌ జరిగిందని.. ఈ ఎన్నికల్లో కూడా జరిగే అవకాశాలు కనిపిస్తున్నాయని రాజాసింగ్ ఆరోపించారు. అలాంటి తప్పిదాలు జరగకుండా చర్యలు తీసుకోవాలని సీఈవో వికాస్‌ రాజ్‌ కు ఫిర్యాదు కూడా చేశారు.

పార్టీ మారడం అంటే పక్కోడి గోచి లాగినంత సులువు అయ్యింది నేటి రాజకీయాల్లో అని కామెంట్స్ వస్తున్నా.. కండువాలు మార్చడం మాత్రం ఆగడం లేదు. ఇప్పటికే లెక్కలేనంతగా కార్యకర్తలు, నేతలు పార్టీలు మార్చారు. ఆ సమయంలో తమని నమ్ముకున్న అనుచరులు ఏమౌతారనే ఆలోచన కనీసం వారి బుర్రకు తట్టిందో లేదో తెలియదు.. కానీ ఈ విషయంలో మాత్రం కొందరు నిరాశ పడుతున్నట్టు వార్తలు వస్తున్నాయి.

మరోవైపు కొన్నాళ్లుగా బీజేపీ (BJP) అధిష్టానంపై అసంతృప్తిగా ఉన్న విజయశాంతి (vijaya Shanthi)..పార్టీ కార్యక్రమాలకు దూరంగా ఉంటూ వస్తున్నారు. అదీగాక బండి సంజయ్‌ (Bandi Sanjay)ని అధ్యక్ష పదవి నుంచి తప్పించి.. ఆ బాధ్యతలు కిషన్‌ రెడ్డి (Kishan Reddy)కి అప్పగించడాన్ని బహిరంగంగానే తప్పు పట్టారు విజయశాంతి. ఇటీవల ప్రధాని మోడీ, అమిత్ షా బహిరంగ సభలకు సైతం హాజరుకాలేదు రాములమ్మ..

ఇదే సమయంలో విజయశాంతి పార్టీ మారుతున్నట్టు వార్తలు వైరల్ అయ్యాయి. తాజాగా కీలక నిర్ణయం తీసుకుని ఇలాంటి వార్తలకు పుల్ స్టాప్ పెట్టారు.. బీజేపీ ప్రాథమిక సభ్యత్వానికి, పార్టీ పదవులకు రాజీనామా చేసి..పార్టీ స్టేట్ చీఫ్‌ కిషన్ రెడ్డికి రాజీనామా లేఖను పంపారు విజయశాంతి. మరోవైపు రేపు కాంగ్రెస్ పార్టీ జాతీయ అధ్యక్షుడు మల్లికార్జున ఖర్గే సమక్షంలో హస్తం కండువా కప్పుకోనున్నట్లు సమాచారం.

ఇప్పటికే ఏఐసీసీ నాయకులు విజయశాంతితో మంతనాలు జరిపి.. హస్తాన్ని అందుకుంటే.. మెదక్ ఎంపీ స్థానంతో పాటు పార్టీలో సముచిత గౌరవం కల్పిస్తామని హామీ ఇచ్చినట్టు తెలుస్తోంది. ఇప్పటికే కోమటిరెడ్డి రాజగోపాల్‌ రెడ్డి, వివేక్‌ వెంకటస్వామి, యెన్నం శ్రీనివాస్‌ రెడ్డి లాంటి సీనియర్ నేతలు బీజేపీని వీడి.. హస్తం గూటికి చేరారు. ఈ క్రమంలో విజయశాంతి రాజీనామాను ముందే ఊహించిన కమలం నేతలు.. ఆమెను బుజ్జగించే ప్రయత్నం చేయలేదు. మరి ఇప్పటికైనా రాములమ్మ హస్తాన్ని విడవకుండా ఉంటారా? లేదా? అనేది మిలియన్ ప్రశ్నలా జనం మదిలో మిగిలిపోయింది.

తెలంగాణ (Telangana) అసెంబ్లీ ఎన్నికల్లో (Assembly Elections) చూసిన చిత్రాలు.. విన్న మాటలు జీవితంలో మరచిపోని విధంగా ఉన్నాయని ప్రజలు అనుకుంటున్నారు.. సవతుల పొరుకన్నా నేతల పోరు మించిపోయిందని నవ్వుకుంటున్నారు. ఈ టామ్ అండ్ జెర్రీ ఆట ఎన్నికలు జరిగే వరకి మాత్రమే ఆతర్వాత అంతా సైలంట్ అవుతారని అనుకుంటున్నారు.

మరోవైపు ప్రపంచ యుద్ధాలను తలపించేలా కాంగ్రెస్, బీఆర్ఎస్ (BRS) పోరు జరుగుతున్నట్టు కనిపిస్తుంది. రెండు పార్టీలు గతాలను తవ్వుకుంటున్నాయి. ఈ నేపథ్యంలో కాంగ్రెస్ (Congress) సీనియర్ నేత చిదంబరం.. బీఆర్ఎస్ పాలన తీరుపై మండిపడ్డారు. ఎన్ని ఇబ్బందులు ఉన్నా.. మాట తప్పకుండా ప్రత్యేక రాష్ట్రాన్ని ఏర్పాటు చేస్తే.. కేసీఆర్ తెలంగాణను ఆగం చేశారని చిదంబరం విమర్శించారు.

తన కుటుంబం బాగుకోసం తొమ్మిదిన్నర ఏళ్లుగా రాష్ట్రాన్ని దోచుకుంటున్న కేసీఆర్.. తెలంగాణను అప్పుల కుప్పగా మార్చారని ఆరోపించారు. నిరుద్యోగం, అధిక ధరల నియంత్రణలో కేసీఆర్ సర్కార్ విఫలమైందన్న చిదంబరం.. విద్య కోసం నిధులు కేటాయించకుండా ప్రజలను మోసం చేస్తూ పాలన చేస్తుందని మండిపడ్డారు..

ఇతర రాష్ట్రాల కంటే హైదరాబాద్ లోనే గ్యాస్ సిలిండర్ ధర ఎక్కువ ఉందన్న చిదంబరం.. రాష్ట్రంలో ఖాళీగా ఉన్న 80వేల ప్రభుత్వ ఉద్యోగాలను ప్రభుత్వం భర్తీ చేయకుండా నిరుద్యోగుల ఊసురు తీస్తుందని ఆగ్రహించారు చిదంబరం (Chidambaram)..అవినీతికి కేరాఫ్ గా మారిన కేసీఆర్ ప్రతి తెలగాణ పౌరుడి తలపై సగటునా లక్ష రూపాయల అప్పు వేశారని ఆరోపించారు.

బీఆర్ఎస్ పాలనలో రాష్ట్రంలో ఉన్న అన్ని వర్గాల ప్రజలు అసంతృప్తితో బ్రతుకు వెల్లదీస్తున్నారని.. ఇక చాలంటూ కారుకు బై బై చెప్పడానికి సిద్దమైనట్టు చిదంబరం వెల్లడించారు. కాంగ్రెస్ హయాంలోనే రాష్ట్ర అభివృద్థి జరిగిందని.. కాంగ్రెస్ వల్లే తెలంగాణ రాష్ట్రం వచ్చిందని చిదంబరం తెలిపారు. రాష్ట్రంలో కాంగ్రెస్ అధికారంలోకి వచ్చిన తర్వాత ఆరు గ్యారంటీలను ఖచ్చితంగా అమలు చేస్తామని చిదంబరం తెలిపారు.

తెలంగాణ (Telangana)లో అధికారుల ఎన్నికల హడావుడి మొదలైంది. ఈ నెల 30 న జరగనున్న ఎన్నికల కోసం ఇప్పటికే అంతా సిద్దం చేసుకున్న అధికారులు.. ఏర్పాట్లను స్పీడ్ అప్ చేశారు.. మరోవైపు సమయం మించిపోతుండటంతో అభ్యర్థులు సైతం ప్రచారాన్ని హోరెత్తిస్తున్నారు. హామీలు, మేనిఫెస్టోలతో ఓటర్లను ఉక్కిరి బిక్కిరి చేస్తున్నారు.

ఈసీ (EC) కూడా ఈ ఎన్నికలను పకడ్బందీగా నిర్వహించడం కోసం నియమాలను కఠినంగా అమలుచేస్తుంది. ఈ క్రమంలో ఓటు వేయడం ఇష్టం లేని అభ్యర్థుల కోసం ఇప్పటికే నోటాను తీసుకొచ్చిన విషయం తెలిసిందే. ఆ నోటా (Nota) కోసం అధికారులు రెండు చోట్లా అదనపు బ్యాలెట్ యూనిట్ ఏర్పాటు చేయనున్నారు. ఇందులో భాగంగా సనత్ నగర్ (Sanat Nagar)..నర్సంపేట (Narsampeta)లో అదనపు బ్యాలెట్ యూనిట్ ను ఏర్పాటు చేస్తున్నట్టు అధికారులు తెలిపారు.

మరోవైపు సనత్ నగర్ లో 18 మంది నామినేషన్లు వేయగా.. ఇద్దరు ఉపసంహరించుకున్నారు. నర్సంపేటలోనూ 16 మంది అభ్యర్థులు బరిలో ఉన్నారు. అయితే ఒక్కో ఈవీఎంలో 16 గుర్తులకే ఛాన్స్ ఉండటంతో అంతకు మించితే మరో యూనిట్ ను ఎన్నికల అధికారులు కేటాయిస్తారు. అయితే ఐదేళ్ల క్రితం గరిష్ఠంగా నాలుగు యూనిట్లతో 64 గుర్తుల వరకు ఎన్నిక నిర్వహించే అవకాశం ఉండేది. అంతకు మించితే కంట్రోల్ యూనిట్ తీసుకునేది కాదు..

కానీ.. 2019 నుంచి ప్రవేశ పెట్టిన ఎం-టీ రకం ఈవీఎంతో ఆ సమస్యకు పరిష్కారం దొరికింది. వీటిలో ఒక్కో కంట్రోల్ యూనిట్ కు.. 24 ఈవీఎం యూనిట్లను అమర్చేలా సాంకేతికతను డెవలప్ చేశారు. దీన్నిబట్టి చూస్తే ఒక నియోజకవర్గంలో 384 మంది ఎన్నికల బరిలో ఉన్నా ఎన్నికల నిర్వహణ సాధ్యం అవుతుంది. మరోవైపు 2019 లోక్ సభ ఎన్నికల్లో నిజామాబాద్ నుంచి 185 మంది అభ్యర్థులు బరిలో నిలవగా ఎం-టీ రకం ఈవీఎంలను ఉపయోగించి ఎన్నికలు నిర్వహించారు.

అసెంబ్లీ ఎన్నికలలో నేతల మధ్య చోటు చేసుకున్న విమర్శలు.. పోలీసుల వరకు వ్యాపిస్తున్నాయి. ఇప్పటికే కొందరు పోలీస్ అధికారులు బీఆర్ఎస్ పార్టీకి తొత్తులుగా వ్యవహరిస్తున్నారనే అపవాదు ప్రచారంలో ఉంది. మరోవైపు చట్టం ఎవరికి చుట్టం కాదని పోలీసులు అంటారు.. ఏది ఏమైనా పోలీస్ ఉద్యోగం కరవమంటే కప్పకు కోపం.. విడవమంటే పాముకి కోపం అనేలా ఉంటుందని కొందరు అనుకుంటారు.

ప్రస్తుతం కాంగ్రెస్ (Congress) అభ్యర్థి అంజన్ కుమార్ యాదవ్ (Anjan Kumar Yadav) బీఆర్ఎస్ (BRS) అభ్యర్థి ముఠాగోపాల్ (Muthagopal) చిక్కడపల్లి ఏసీపీ (ACP)పై తీవ్ర ఆగ్రహం వ్యక్తం చేశారు. చిక్కడపల్లి ఏసీపీ.. బీఆర్ఎస్ కి కోవర్టుగా వ్యవహరిస్తున్నారని ఆరోపించారు. తన నామినేషన్‌లో తప్పులు ఉన్నాయని ఏసీపీ ప్రచారం చేయాల్సిన పని ఏముందని అంజన్ కుమార్ యాదవ్ విరుచుకుపడ్డారు. ఏదైనా తప్పిదాలు ఉంటే రిటర్నింగ్ అధికారి చూసుకుంటాడని తెలిపారు.

ఏసీపీ, ముఠాగోపాల్‌ బంధువులు అయితే ఇంట్లో చూసుకోవాలి కానీ ఇలా అవసరం లేని విషయాల్లో తల దూర్చకూడదని అంజన్ కుమార్ పేర్కొన్నారు.. ఎన్నికల్లో కాంగ్రెస్ కి వ్యతిరేకంగా ఏసీపీ పని చేస్తున్నారని ఆరోపించిన అంజన్ కుమార్.. తాము అనుమతి తీసుకొని ఎన్నికల ప్రచారం నిర్వహించుకుంటున్న ఆంక్షల పేరుతో అడ్డుతగలడం సరికాదని అన్నారు.. వచ్చేది కాంగ్రెస్ ప్రభుత్వమేనని ఏసీపీ గ్రహించి తన పని తాను చేసుకుంటే మంచిదని అంజన్ కుమార్ హితబోధ చేశారు..

బీఆర్ఎస్ మళ్లీ అధికారంలోకి వస్తే.. హైదరాబాద్ నగరం అభివృద్ధి చేస్తామని, మంత్రి కేటీఆర్ (KTR) గొప్పలు చెప్పుకుంటూ ప్రచారాలు నిర్వహిస్తున్నాడని అంజన్ కుమార్ విమర్శించారు. గత పదేళ్లుగా అభివృద్ధి చేయకుండా… ప్రభుత్వ భూములు అమ్ముకోవడమేనా అభివృద్థి అంటే అని అంజన్ కుమార్ యాదవ్ మండిపడ్డారు.

వేసవిలో నిప్పులు కక్కుతున్న భానుడల్లే బీఆర్ఎస్ (BRS) పై కాంగ్రెస్ దూకుడుగా వ్యవహరిస్తుంది. ఈ క్రమంలో బీఆర్ఎస్ అవినీతి పై గళం విప్పిన హస్తం.. బీఆర్ఎస్ పాలనకు వ్యతిరేకంగా చార్జిషీట్ విడుదల చేసింది. మొత్తం పది అంశాలతో కూడిన ఈ చార్జిషీట్‌లో కేసీఆర్ (KCR) పాలన, బీఆర్ఎస్ హామీలపై ధ్వజమెత్తింది. విద్యా రంగానికి అతి తక్కువ మొత్తంలో నిధులు వెచ్చించేది ఒక్క బీఆర్ఎస్ ప్రభుత్వమే అని మండిపడ్డ కాంగ్రెస్.. ఈ రాష్ట్రం కంటే దేశంలోని మిగతా రాష్ట్రాలు నయం అని ఎద్దేవా చేసింది.

కేజీ టు పీజీ ఉచిత విద్యను 2014 ఎన్నికల మేనిఫెస్టోలో ప్రకటించిన కేసీఆర్ గడిచిన 9 ఏళ్లలో కొత్తగా ఒక్క తరగతి గదిని కూడా రాష్ట్రంలో నిర్మించలేదని దుయ్యబట్టింది. 2014-15 బడ్జెట్‌లో విద్యారంగానికి 10.89 శాతం నిధులు కేటాయిస్తే క్రమంగా తగ్గిస్తూ 2023-24 బడ్జెట్‌లో 7.6 శాతానికి బీఆర్ఎస్ ప్రభత్వం తీసుకువచ్చిందని ఆరోపించింది.

సీఎస్ఆర్ నిధులతో ఒక కేజీ టు పీజీ సంస్థను గంబీరావుపేటలో నిర్మించిన ప్రభుత్వం.. కనీసం ఒక్క పాఠశాలనైనా నిర్మించమని కార్పొరేట్ కంపెనీలను అడుక్కునే స్థితికి దిగజారిదని కాంగ్రెస్ (Congress) ఆరోపించింది. ప్రతి ఇంటికి ఒక ఉద్యోగం పేరుతో కేసీఆర్ యువతను మోసం చేశాడని.. టెన్త్ ఎగ్జామ్స్ నుంచి టీఎస్‌పీఎస్సీ వరకు అన్ని పరీక్షల నిర్వహణలో ఈ ప్రభుత్వం విఫలమైందని చార్జిషీట్‌ (Charge sheet)లో పేర్కొంది..

ఈ ప్రభుత్వం కారణంగా 2014-2021 మధ్య దాదాపు 3,600 మందికి పైగా యువకులు ఆత్మహత్య చేసుకున్నారని కాంగ్రెస్ ఆరోపించింది. మరోవైపు ఫీజు రియంబర్స్‌మెంట్ బాకాయిల చెల్లింపులో జాప్యం కారణంగా కాలేజీల నిర్వహకులు విద్యార్థులకు సర్టిఫికెట్లు ఇవ్వకుండా తిరస్కరిస్తున్నారని చార్జిషీట్‌ లో కాంగ్రెస్ పేర్కొంది.

ప్రభుత్వ అధ్యాపకుల పోస్టులు ఖాళీగా ఉన్నా భర్తీ చేయకుండా.. తన సన్నిహితులకు లబ్ది చేకూర్చేలా ప్రైవేట్ యూనివర్సీటీలను సీఎం ప్రోత్సహిస్తున్నారని కాంగ్రెస్ ఆరోపించింది. కేసీఆర్ అసమర్థ పాలన వల్ల రాష్ట్రంలోని యువత మద్యం, జూదం, డ్రగ్స్‌కు బానిసలయ్యారని వారి భవిష్యత్ నాశనం అవుతున్నదని చార్జిషీట్‌లో పేర్కొంది..